陳奕迅愛心爆棚領養小孩當生仔

　

說陳奕迅有過度活躍症，相信沒有人會反對，難得的是他撞傷「下體」入院，依然懂得對鏡頭笑！Eason入行七年，自言嘗盡喜怒哀樂，朋友、敵人，對他而言沒有甚麼大分別，Eason甚至覺得多一位敵人，他多一份得著！

記：記者　E：Eason

記：入行至今，係圈中朋友多定敵人多？

E ：你覺得我多唔多朋友0者？其實朋友、敵人係我心目中都係一樣！應該咁講，人生好多野都係0係生活中學習，如果發現身邊有好多人唔鍾意自己，當正你係敵人，咪諗下點解囉！如果覺得自己冇問題，咪就係冇問題囉！睇多D人生百態，最後得著都係自己。唔明呀？

記：你同謝霆鋒性格好似，是非亦一樣咁多，你同佢會唔會都有呢個感覺？

E：哈哈！又係喎！不過，我地爆發激烈行為既時候都未必次次一樣既！記得有次我同佢，女友同趙學而四個人一齊食完飯俾「狗仔隊」追車，佢鬼咁激走落車向記者發脾氣，我就掛住同幾個攝影記者「吹水」，激到佢死！哈！我諗住趕時間，鬧乜鬼0者！

　

少說話多做事

記：你出道時，有傳因為華星沒有悉心照顧，令你每次出席活動都總係著上跟場合不甚配合的服飾，當時係咪Hurt？好唔開心？

E：（陰濕地笑）哈哈哈！我不嬲著衫都係咁架啦！我唔覺得自己D衫有問題喎！（你話過好唔開心喎！）只係果時同D記者唔熟，個個埋黎問我係咪冇人理，點解成日著錯衫，我唔好意思話大家冇品味，咪惟有話唔識著衫囉！（說罷Eason又抵死地笑起來）

記：入行果時既陳奕迅，性格同依家好唔同，面上笑容似隨著歲月而流走，以前定依家開心D？

E：基本上我係一個好鍾意講野既人，只係覺得好多人都認為我不停講既都係講廢話，咁我咪唔講囉！講少D野，咪覺得我唔開心囉！

　

做錯一定認

記：係呢個圈咁耐，覺得最辛苦係乜？工作方面定係面對既人與事？

E：乜野唔開心？好多無聊人成日問我無聊問題囉！講笑0者！其實我都已經適應左，我同D新人都係咁講，有時唔開心，笑一笑咪算囉！總之盡量令到個氣氛舒服D啦！（你做得到咩？）我都未架！學囉！

記：覺唔覺得自己同傳媒關係唔好，之前仲好「僵」？

E：唔……咁每個人都有唔同既朋友，唔可以話「僵」既！我係一個會認錯既人，如果我知道自己有地方做得唔好，我會接受意見同批評。

　

不亂發脾氣

記：點解好似成日對傳媒發脾氣？

E：我唔係一個易發脾氣既人，我明既！大家都係做野0者！開開心心咪過左去囉！好似上次話我用腳踢檯發脾氣，你知嘛，我果日叫痛都黎唔切呀！

記：點睇依家既傳媒？

E：新一代既記者同以前係有D唔同，以前記者同藝人可以好Close，大家講個信字，依家藝人對傳媒某程度上真係失晒信心！

　

愛火重燃更了解對方

　

記：同徐濠縈拍拖咁耐，有冇諗過幾時結婚？

E：結唔結婚真係咁重要咩？

記：冇諗過生BB咩？

E：生BB唔一定要結婚架！（正所謂有仔趁嫩生嘛！）一定同佢（徐濠縈）生咩？（乜話？）我意思係，唔可以領養咩！世界有好多好慘既細路等人收養，領養都幾好丫！

記：記得你講過，曾經同徐濠縈分手一段日子，再係番埋一齊，感覺有乜唔同？

E：感情會好左！果時分開係大家未太了解對方，再係番埋一齊，大家更加知道大家要乜野。

記：你受傷入院，女友全程陪伴左右，係咪好感動？

E：呢D唔使講啦！明架啦！

記：暫時未諗過做老竇，那麼現在與父親陳裘大關係又如何？

E：我地關係不嬲都好好，以前係、依家都係！

　

支出大冇儲錢

記：好多人都覺得依家唔穩陣，有冇儲錢？

E：依家支出大左，所以真係冇儲錢，遲D啦！諗番起，入行咁耐，新秀得獎之後銀行最多錢，不過好快就用晒囉！

記：覺唔覺自己好大使？

E：唔覺喎！有時好多支出係少不免，而且做野咁辛苦，唔係太過分0者，我覺得畀自己同家人享受下都好應該。