影片欣賞(No.460) |
你是第 
參觀者
日期/時間 |
地點 |
人物 |
釣餌 |
魚獲 |
釣後備忘 |
相片記錄 |
24/10/2004 (日) 04:30 - 09:30 |
南風灣露營+磯釣 | Stephen 阿欣 阿Wing Fanny 亞珍 亞花 舅父 Halen Ably Anna |
誘餌粉 南極蝦 死蝦 |
大青鱸一條 大花追一條 黃尾矢一條 烏絲班一條 沙鑽一條 廉咪一條 不知名魚兩1 條 |
今次我地又係露營+釣魚，不過今次我地o既收獲就破晒以往最大條魚o既記錄，事關魚獲方面有大鱸魚同大油追，真係驚喜萬分呢!! 入Camp o個日由於我放三點半o既原故，所以要到八點幾至入到營地， 到十一點打完邊爐之後，我、阿欣、Fanny同阿珍就走左去碼頭釣魚，一路釣就一路越來越凍，我、Fanny同阿珍見無咩魚訊於是就先返去營地訓覺，而阿欣就釣多陣至訓。 早上四點幾，當全世界o既人都未醒o既時候，我同阿欣就已經起左身去碼頭釣魚，開始時見個海無咩動淨，只知當時o既流水好快! 此時阿欣叫我抬頭望上天，一看不得了!! 真係好耐都無見過咁靚o既夜空，所有星星都看得一清二楚!! 無幾耐，突然看見一道流星擦過長空，咁o岩我同阿欣都見到，嘩......實在太美了!! 個多鐘頭之後，Fanny 加入，阿欣發覺駁邊有水面魚，而且為數不少，但此終看不清是什麼，估計為海狼，於是我就立即改短釣組，希望可以釣返一條半條，但可惜釣左一段時間之後都好似無咩反應，只係釣到一條不知名魚(Fanny 看似是沙丁魚)，之後又無影相，真可惜!! 無幾耐，我睇到駁邊有條大魚游過，立即通阿欣同Fanny ，跟住我將口餌擺向條魚o既前方，果然即中，我諗住拉佢埋樓梯級，點知當諗住用撈簊o個陣，佢突然發難!! 比佢走甩，真可惡，都只怪自己一手絲都唔比啦!! 過左陣，又見佢?影，今次又擺口餌嚮佢前面，果然，又中!! 今次我將枝竿交比阿欣，佢用純熟o既技巧，分幾兩分鐘之後就將條魚釣到!! 利害!! 此時已引來不少人圍觀，到左七點幾，其他人開始加入，水面開始有好多魚仔，但睇到釣唔到，八點轉位前就只有Stephen 釣到條黃尾矢。 轉位後，Fanny 、阿珍同阿花佢地釣到沙鑽、廉咪同烏絲班，由於呢個釣位係沙底，所以我同阿欣都覺得呢度無景，到九點幾，當我在洗誘餌袋o既時候，比阿欣發現到條大花追，於是我、阿欣同阿珍就合力將條魚釣起，哈哈!! 咁都得!! 今次真係破晒我地最大條魚o既記錄呀!! 十二點幾返到鑽石山荷李活一間酒樓，諗住將條青鱸整黎食，點知加工費要成百五蚊，我地當然唔制啦!! 最後飲完茶就各自散水。 |
|
12/9/2004 (日) 11:00 - 16:00 |
西貢 白馬咀 |
Stephen 阿欣 Fanny 亞珍 亞花 舅父 Halen |
誘餌粉 麥皮 南極蝦 死蝦 |
十五條星鱸 三鬚一條 石殺多條 泥盓多條 |
爆釣鱸魚日!! 自從轉左份新工之後都無乜時間走去釣魚，難得今日得閒就同阿欣佢地去左西貢白馬咀，順便輕鬆下，今朝早天氣不錯，有點秋天的感覺，實在太好喇!! 未出發之前先同阿欣o係大埔食個早餐，順便買返枝磯竿，事關我枝竿已經玩完了.......好!! 買齊o野出發!! 十點半到達白沙灣馬頭，跟住搭大船去目的地，一到步後由我負責先開粉而其他人則開竿，一會兒後大家揀好釣位就開始試釣，起初阿珍、家姐就不停中d 石殺、班仔、油追仔咁，其中家姐更釣到一條大過手板o既石殺添，真係勁呀!! 點幾鐘，食左d o野後又繼續，順便轉轉釣位，釣左陣就有小石殺同泥盓仔，叫做好過無咁啦!! 而阿欣就好似中未開齋，兩點幾，遠處o既Fanny 釣到一條大三鬚，再過左陣，舅父釣到條星鱸，而我同阿欣就繼續無乜境.......突然阿珍打電話比我話己經釣到第二條星鱸，仲話成個海都係鱸魚，叫我地過去一齊釣，咁我當然急急忙忙走過去啦!! 一去到，嘩.......佢地極之瘋狂，輪流中魚!! 真係誇張，口餌一出，不久就會中魚，咁既情形，真係好罕見!! 由上而望下去，海水清澈，d 魚看得一清二楚，而我同阿欣都想立即試下係咪真係咁易，所以立即把餌掉出，結果真的不久就中魚，嘩......勁呀!! 好過癮呀!! d 力好大呀!! 此時，撈簊係咁出動，無停過。阿欣可能因為佢經常要幫手起魚，所以佢只係釣到一條咁多，而我都唔錯，有兩條......哈哈.......就係咁一個鐘個去，d 鱸魚差不多比我地釣晒，就係咁跟住d 鱸魚就好似"精"左咁，唔再食餌...... 四點鐘，船到左我地一d o野都未執好，所以最後我地唯有一次過將d o野搬晒上船，咁狼狽都真係第一次呢!! 落船時，比左兩條船家，跟住我地搭車出返西貢市中心，拿魚獲到酒家整黎食順便請我食餐飯，當係興祝我生日，在此多謝咁多位呢!! 食完飯之後，大家分配魚獲，總括而言，鱸魚總數有十五條，今次真係皆大歡喜喇~~~~ |
|
8/8/2004 (日) 10:30 - 16:00 |
半月灣 爛魚塘 |
Fanny 亞珍 Alby 亞花 舅父 |
蝦仁 | 1條海狼 28條金錢班 4條烏絲班 2條石剎 |
以下文章由Fanny提供 : 爛魚塘第六回，話說Alby 同舅父都未來過，所以帶他們一嘗釣石班過手癮。 我們一行五人一早就入到西貢，食完早餐就拿拿淋上船，一到達我第一時間開竿，可惜連勾三次石，但回頭一望亞珍同舅父已經有班上釣了，過左無幾耐，亞花連續上了七條之多，Alby 就釣到兩條,突然之間亞珍大叫一聲，原來被亞珍釣到是一條海狼，再過左無幾奈，另一條海狼被釣上岸時走掉，真可惜! 回程到馬頭Alby 同舅父各分一半取回家。 |
|
6/8/2004 (五) 10:30 - 15:00
|
半月灣 爛魚塘 |
Fanny 亞珍老公 |
蝦仁 | 大量金錢班 石殺一條 青衣一條 |
以下文章由Fanny提供 : 在一個風雨交加的早上，我同亞珍老公孤男寡女在一個緲無人跡的島上…..釣石班， 這裡我來過五次之多，真是十分之多金錢班同烏絲班，每次都會釣到廿幾三十條， 真是每次都過足手癮，而且每條都大個我的手掌，雖然今天風大雨大，我還PK了好幾鑊，搞到全身濕透兼且損手爛腳都是值得的，今次我還拿給老媽子煮全班宴呢! |
總魚獲 |
1/8/2004 (日) 11:30 - 15:30 |
半月灣 | Stephen Fanny 阿花 Helen 阿珍 |
誘餌粉 南極蝦 蝦仁 |
大班兩條 細班仔約三十條 |
原本諗住今日出魔鬼山，但見佢地尋日已經去左，所以為有轉戰半月灣，大約十一點鐘食埋野就上船出發!! 其實去親半月灣，就淨係只會諗起釣石班，好少話有其牠魚獲，而且咁釣法，真係好憺心o個度遲早有日無魚釣!! 不論大小，都很少放生，唉......真內疚....... 至於魚獲方面，總括黎講d 魚都係偏細，只有我同阿花釣獲兩條比較大size 的班，到下午三點幾就執野走人，d 魚獲就比左阿珍帶返屋企整班宴，而我地就上左Fanny 屋企打麻雀，有時真係好偑服自己，真係唔係好知個死字點寫!! 打到差不多十二點，個個都打到想死咁滯，唉......下次都係咪搞喇!! 備註 : 今日真係差d 晒到死，個太陽由頭晒到落尾，無停過!! 係呢，大家唔知有無為意d 釣點好似越來越多蜜蜂呢?? 成日?度搞搞震!! 好鬼煩!! 唔知大家有咩計仔"驅蜂"呢?? |
|
31/7/04 (六) 14:30 - 18:30 |
將軍澳 魔鬼山 |
Fanny 阿欣 阿花 Helen 舅父 Mandy Ibe Billy |
誘餌粉 南極蝦 蝦仁 |
細鱗二條 沙盓一條 花頭梅三條 幽面一條 |
以下文章由Fanny提供 : 今日本想帶他們到西貢釣石班，但由於我要去三家村攀石，所以要他們就一就我，今次我們一行八人到上次釣到細鱗的位置，大約下午兩點半我們便到達。 一開竿無幾耐，亞花就中了一條大細鱗，而我都唔執輸中一條沙猛，大約過了一會Mandy 中了一條金錢班而Helen 就中小細鱗，跟住亞欣中幽面、Billy 亦有條雞泡，其後都是石班仔.......到了七時我們回程到三家村體育館，放低釣魚工具之後，便把釣到的魚獲拿去飯店整黎食......而他們十分有精力還可以攀石、打波直到11時才結束整日行程!!
|
|
22/7/2004 (四) 16:00 - 19:15 |
半月灣
|
Stephen Fanny 阿珍 阿珍老公 |
誘餌粉 南極蝦 蝦仁 |
石班仔十幾條 油追仔一條 三鬚仔一條 |
阿珍老公見我地成日都有魚釣，而佢就因為星期六、日要返工唔可以同我地一齊釣，於是佢見今日放假就搵Fanny、阿珍同我出去釣魚，本來我並非放假的，不過，見佢咁想釣魚，就突登請半日假陪下佢啦!! 今朝早重諗住下午出魔鬼山的，可惜艇家去左旅行，要轉戰其他地方，而Fanny搵左西貢艇家，重收到料話半月灣附近有好多班仔釣，咁就一於去o個度啦!! 我放工之後就急急腳咁走去買粉、蝦，返屋企已經好快咁執埋d 架生，但出到西貢都係要遲到!! 真的很抱歉呢!! 差不多四點鐘才到達釣點，於是急忙開竿，不到廿分鐘，我就中到三條班仔，而Fanny 就中到一條油追仔。過了很久，阿珍佢地都仲未中魚，於是嘗試轉位，佢地三個人轉位後成績好像很不錯，不過由於佢地距離太遠及有大石阻隔，看不清情況。一路到七點鐘，總結大家收獲都算唔錯，豈碼人人有魚釣，人人都開心先啦!! 最後返到西貢市中心，幫d魚獲影完相之後就全數拿去酒家整黎食，雖然有點感覺殘忍，但最後還是把他們食了.......真是內疚極了!! |
|
1/7/2004 (日) 15:30 - 20:30 |
將軍澳 魔鬼山 |
Stephen 阿欣 Fanny 阿珍 Debbie舅父 |
誘餌粉 南極蝦 蝦仁 魚仔 |
幽面七條 黃立倉一條 魚毛幾條 |
今日原本諗住去小西灣磯釣，但係個船家話o個邊d 磯位好難上，又危險，所以最後都係去返魔鬼山度，經過商量後，我地揀返第一次個位，希望再釣大魚。 一去到，有班青年又咁o岩黎釣魚，佢地先揀左釣位，並且很快就開竿，當我地準備好之際，佢地已經中魚，遠看可以清楚見到係幽面一條，不到十幾秒佢地另一人又中魚，過左一陣佢地又有人中魚。原本諗住釣另一邊，但見到咁o既情況，真係唔可以唔走去釣埋一份。阿欣第一個過去釣亦都係第一個釣到幽面，跟住係阿珍，而舅父亦都中魚，就係咁，六、七個人輪流中魚，呢種情景都係第一次見!! 真係好壯觀!! 與此同時有人歡喜有人仇，Stephen 同Fanny 就點都釣唔到魚......真係無運行，Stephen 已經試過三種唔同釣組，開頭用0.8 釣組，跟住用1B浮波，最後用埋浮標，都係無魚中!! 真係慘情*_*!! 一號風球下釣魚，又熱又焗，幸好有魚釣才容易挨過!! 而我地最精采一刻就在大約五點鐘，舅父中得一條黃立倉，看他控魚時就知條魚有多好玩了!! 而呢條魚之後就再沒有人中魚了。 備註 : 由阿欣得知原來o個班青年係窮人釣會o既人黎，而佢地後尾都知我地係乜水，Stephen 仲問佢地?左d 相，擺o係我地個網頁網友魚獲照片度等大家可欣賞!! |
|
27/6/2004 (日) 15:00 -18:00 |
青龍頭 | Stephen Fanny 阿珍 阿花 |
誘餌粉 南極蝦 蝦仁 |
魚毛多條 | 由於阿欣今日去左蒲台島磯釣，所以就只得我地幾個人去釣，落左車之後，一路沿馬路一路向前行，直至有個斜路，然後行落去，便到達釣點。 初頭仲以為有景，但後來越來越覺得唔妥，原來呢度兩竿水內都係好淺水，所以勁易勾石，而且呢度常有大船及飛翔船出出入入，搞到間唔中就會有d浪打上岸，搞到成身濕晒。講返魚獲，除左魚毛就真係咩都無，消餌情況非常嚴重，而且d釣位又唔係咁好企，我諗......下次唔會再黎呢度釣了。 |
|
22/6/2004 (二) 14:30 - 21:00 |
將軍澳 魔鬼山 |
Stephen Fanny 阿欣 阿珍 阿花 Alby Helen |
誘餌粉 南極蝦 蝦仁 |
章雄一條 魚毛仔一堆 |
魔鬼山第三回之Fanny離奇中章雄 : 話說呢日我地又揀返魔鬼山作釣，豈初阿欣諗住釣遠d個位，但係艇家基於安全理由，都係揀返上次個位。 好景不常，今次大家釣左好耐都無大魚中，而魚毛就有好多，真奇怪!! 釣組已經跟上次一樣咁set，但無魚就係無魚!! 一路到差不多五點鐘，Fanny 在收絲期間，被她誤中一條章雄，由於章雄係一種深海魚，唔係度度都有得釣，所以你話係咪好離奇呢?? 佢一路收，一路攪絲，很快便到手，上水一看，應該有8、9兩重，咁難得釣到魚，Stephen 當然唔會錯過呢個影相機會啦!! 一路到八點幾，都好似無咩魚訊，而且又快到艇家接我地o既時間，於是只好收竿走人。 |
|
13/6/2004 (日) 13:30 - 18:30 |
將軍澳 魔鬼山 |
Stephen Fanny 阿欣 阿珍 阿花 Alby Helen |
誘餌粉 南極蝦 蝦仁 |
十二兩細鱗 一斤沙盓 幽面兩條 雜魚一堆 |
今日再戰魔鬼山，不過同上次有d 唔同，因為我地今次搵到艇家，唔使行得咁辛苦，而且有七人同行，感覺好好多。 我地一行人一點鐘，嚮鯉魚門三家村集合，魚餌、粉、蝦同o野飲o野食等由我、阿欣預先攪掂，而其他人就去三家村體育館book 場。點幾鐘上船，一會兒就到達釣場，今次在另一位置上船，這釣點很不錯，不太危險，又有得檔太陽，最重要係一看就知此位不錯，應該有魚釣!! 落船後，除左我同阿欣要先食野，其餘人都準備開竿，當Fanny 落餌不久，就中石九，跟住就係阿珍中哨牙妹。兩點鐘，我在收竿其間中一條幽面，今次係我第一次中呢種魚，感覺很好，雖然條魚得幾兩，但係已經好好力了!! 一路釣......連掛幾次底，而誘餌粉打在腳邊，於是我改短釣棚，試下釣腳邊，無幾耐，只見浮波慢慢下沉，於是我舉高之竿，嘩!! 中呀!! 好大力呀!! 條魚係咁向下衝，又向駁邊游，同佢搏鬥左幾十秒，終於上水，一見條魚o個刻，已經知係細鱗，我當然開心到飛起啦!! 呢種魚我想釣好耐架喇!! 今次終於得償所願喇!! 一路釣......Alby、阿花、阿珍佢地都釣到d 雜魚仔，而我就無乜動靜，三點幾鐘，阿欣轉位後釣得一條小赤立，不過由於太細緣故，所以放生，過多陣，比佢拉左條幽面上黎，到左四點幾鐘，當大部份人都在休息之際，我看到阿花支竿竿頭向下彎，起初我還以為她掛底，所以沒有理會她，但過了一會兒，阿珍話要拿撈簊幫佢，才知條魚應該唔細!! 不過，佢後尾都唔使撈簊，自己拉了牠上水，嘩........腳板咁大o既沙盓呀!! 仲大過佢之前o係東涌釣o個條呀!! 成斤重，都未見過咁鬼大條架!! 真係要封佢為"沙盓之后"呀!! 到左六點半鐘，收竿、執野、影下相，等船家走人，之後我地仲去左酒樓加料，真係又有得玩、又有得食!! 唔錯唔錯!! 備註 : 今次消餌情況嚴重，二兩蝦仁都唔夠，下次要預多d至得!! 還有千祈唔好買雪條，因為溶到不得了!! 下次都係買o者喱或者豆腐花好d!! |
|
5/6/2004 (六)21:00 | 6/6/2004 (日)09:00
|
將軍澳 魔鬼山 |
阿欣 Stephen |
誘餌粉 南極蝦 蝦仁 |
兩斤牛屎立一條 石殺二條 雜魚幾條 |
以下文章由阿欣提供 : 呢日因為我要返工，所以要把所有釣具都帶回公司，未釣已經累死了!! 而 Stephen 就要拿著 5磚蝦同釣餌等由大埔 出來油塘和我會合，他也累透了呢!! 晚上六時四十五分準備好食物、飲料後立刻出發，由油塘坐的士到將軍澳永遠墳場4號亭大約6分鍾。 從亭後的小路直落就可到達一間石屋，石屋前有一條小路落到海邊,但必須要小心石屋裡養了六隻惡狗，狗雖細但十分凶惡，我們一路行到石屋時本以為狗隻會被鎖在屋內，但其實牠們已經在屋外向我們衝過來，以當時的情況足以嚇破膽呢! 因為我行前，而 Stephen 在 後，所以 Stephen 不知當時情況，他只見我突然回身走了幾步到了他身後呢 !! 我不停地叫石屋內的人把狗銷回屋內，但沒有人回應，心想 …… 難道要放棄 ? 我們因為此事爭拗了半小時，而石屋主人此時終於都把狗隻捉回屋內，好讓我們通過，那時已時八時半了! 小休一會後，穿上磯鞋再行去釣點，這段路十分難行! 又斜又要行石路，而且某d位頗 " 扇 " 腳，大約半小時後才到達釣點，真的想死 !! 釣點一 : 是個嘴位有小小斜，腳邊有一出水石，大約十八至二十尺，右邊有很多暗礁，十尺水左右，開始時還可以站在出水石上釣，但11時左右就上浪了，要站後幾步到斜位上釣，全晚的水流都十分急，但是我們都只用上較輕的4 B 及 3 B 釣組 ， 不停釣上細魚如石狗、雞泡等等。大約零時左右 Stephen 建議小休後行去釣點二 : 細碼頭釣，我就當然無問題啦!!! Stephen 在細碼頭用活蝦大勾釣組，不久忽然中魚 ...原來是海刺!!...... xyz#@x:!x!z.... 而我就一口都冇，蚊就勁多口 (因不停地被針!!!)，後來我們都因為太累所以走去睡覺，又多蚊又多虱 其實都睡不了多少，不過勉強也要睡下去吧 !!! 早上4時又再努力!! 勁打誘餌希望有魚食餌，到了早上六時，我決定更換釣組: 0.8浮子及2號子線，並把所有希望都放在這釣組上，投到第3口餌浮子慢慢地下沉，於是我立即把虛絲輕輕帶動，突然，一下大力的拉竿出現，我即時舉竿頂魚，心知魚不是很大，但因為只有一口，所以十分小心，先放一手，後慢收慢頂，一會兒後，一條剛好2斤的牛屎立上水，勁正呀(因為從未釣過牛屎立呢)!! 回到將軍澳永遠墳場4號亭已經十時了，因為上不到的士，所以決定行出去油塘 ，中途竟然遇見 Stephen 的攀石朋友行山，真巧呢 !! 大約十分鐘後去到油塘 ，吃過早餐後就坐巴士回家了。 |
|
27/05/2004 (四) 19:30 - 22:30 |
吐露港 科學園 |
Stephen 阿欣 |
誘餌粉 南極蝦 蝦仁 |
黑沙一條 油立 梳籮 雞泡
|
o個日阿欣請左假補領身份證，而佢見咁好時機於是就一早打電話比我約埋我一齊去科學園釣夜水，由於科學園尾班車在十一點，所以我地六點幾鐘就出發，在大學站轉車，七點鐘就到達科學園，嘩......原來o個度咁靚架!! 我第一次去，感覺就好似去左外國咁!! 我心諗，如果可以o係o個度返工就好喇!! 言歸正傳，呢排由於我有好多私人野做，所以少左去釣魚(希望讀者門唔好怪我啦^_^)，估唔到咁耐無釣魚，釣魚運都係咁，成晚都只係釣埋d 雜魚仔，好似 : 油立、梳籮同雞泡咁，真係差勁 !! 而阿欣就好d ，原本諗住打龜，點知都比佢釣到條手板黑沙立，到左十點半鐘，執野走人，好彩最後都趕得設搭尾班車......哈哈!! |
|
1/05/2004 (六) 19:00 - 22:30 (日) 04:00 - 10:30 |
東龍島
|
Stephen Fanny 阿欣 阿珍 阿花 Alby Helen Debbie Anna |
誘餌粉 南極蝦 蝦仁 |
黑毛一條 海狼一條 大量石殺 燕子刀多條 不知名魚仔多條
|
我們臨時臨急才決定在五一假期到東龍島露營加磯釣，還記得上次塔門的爆釣情形，所以今次我們一到步安頓好一切後，由我同阿欣先到周圍視察一下，看看那兒有好釣位，很幸運，我們找了不久便找到兩個容易到而又離營不遠的釣位。 晚上七點，我們全部人便出發到目的地，到達後各人選好位置並打下誘餌開始作釣，大半個鐘之後，Fanny 先釣到一條魚毛，過了不久，Stephen釣到一條燕子刀，不過，上岸之後脫勾"扇"回海中。再過不久，Fanny 突然大叫有魚，仲要話好大力，而阿欣就即時取出佢o既新撈簊，不過.......Fanny已經急不及待把魚抽上岸，上水一看原來係條38cm長o既海狼，真係開心喇!! 今次係我地第一次釣到呢種魚咋!! 就在阿欣幫佢地搞條魚o既時候，Stephen幫阿欣拿住o個支竿就連續有幾口魚訊，當阿欣接手?陣，條魚已經走口，收絲一看原來是海狼做的好事(給牠咬斷子線)!! 不一會，Stephen又釣了一條海浪，不過，明顯不及Fanny那條(大概有25cm長)，可惜的是上岸後又給牠"扇"落海!! 到左九點半， 某部份人要返大本營整野食 ，而阿欣同Stephen 等到十點幾都收竿走人。 經過中場休息後，三點幾鐘，阿欣同Stephen 又出發到第二釣點，由於路很黑而阿欣的頭燈又沒電，所以只好用Stephen 的頭燈照路，四點鐘到達釣場，開竿後，釣了很久都沒有什麼魚訊，於是只好拖住岸邊試釣，一路到六點半都只是釣得燕魚刀，而Fanny 同阿花就七點鐘會合我地，他們到步後，Fanny 先釣到石狗仔，而阿花就不停咁釣到d 不知名魚仔，過左陣佢支竿傳來很大力的魚訊，上水之後竟然係條16cm黑毛!! 東龍州釣到此魚真是奇聞!! 整個早上，我們都不停咁釣到石殺，大的有大過手板size，可以說那裏滿海都是石殺，不過......阿欣竟然釣到一條幽面，雖然不是很大，但今次是Stephen 第一次見到這種魚呢!! 十點幾，因為大家都肚餓了，所以只好收竿走人，臨走前放生了很了魚呢.......留下的只有相中的三條魚了。 |
某部份魚獲 |
25/04/2004 (日) 06:30 - 12:00 & 18:00 - 22:30 |
(早)大尾篤提霸 (夜)馬鞍山 |
Stephen 阿欣 |
誘餌粉 南極蝦 蝦仁 |
水針 黑沙立 石殺 泥盓 梳籮 油立 鱭魚
|
今朝早我同阿欣約定釣大尾篤早水，於是晨咁早五點鐘就起左身，五點半鐘出發到目的地，六點幾鐘到達提霸釣場。 一開始我地先釣兩竿及十幾尺水並用蝦仁做餌，由於過了一段時間後，都沒有魚訊，於是轉去另一釣位，轉位後，阿欣發現有水面魚，於是校淺釣棚，並改用浮標，果然不一會，在他收竿一刻傳來魚訊，不過在上水一刻給牠途走了，那是一條水針。而我也改短釣組，希望可以釣返條水針，不過最後都是沒有，整個早上大家也只釣得石殺、泥盓、鱭魚等魚毛，而阿欣也成功釣返條水針。十二點鐘，由於誘餌剛好用完，於是只好收竿走人。 中午時份，大家各自回家休息，等待四點半又再度出發征戰馬鞍山夜水，五點幾鐘到達馬鞍山，並於" 天風"買粉、釣餌，同時補一補倉及同老闆吹吹水，六點鐘搞掂所有野之後，就開始行去我地o既目的地海典居對出石駁。 一到步後我就立即開竿，當我打下第一口誘餌時已經有魚訊，一抽即中，收回來發現是油立仔一條!! 我心想，算是一個好開始吧!! 於是大家都把位置放在竿半對出及十七尺水深位，不久，阿欣先中魚，條魚表現也不錯，上水後原來是手板黑沙。過了一會我亦都中魚， 嘩.......條魚好大力呀!! 不過我唔會比佢得逞o既，上水後又係同一size 黑沙，之後阿欣又中，又是同一size，不過就好力過佢之前o個條。 之後到十點半，除左梳籮仔之外就乜都無，咁就為有收竿走人囉....... |
黑沙合照 |
11/04/2004 (日) 04:30 - 09:00 |
塔門 |
Stephen Fanny 阿欣 阿珍 阿花 Alby Helen Debbie Debbie舅父 |
誘餌粉 南極蝦 蝦仁 死蝦 青蟲 |
雞魚兩條 黑毛多條 石殺多條 哨牙妹多條 泥盓多條 石狗多條 雞泡多條 |
今日係我地釣魚以來最爆釣一日，而且還釣到一些我們平時較為難見到的魚種，包括雞魚和黑毛。 今次我地係來塔門露營兼釣魚的，由於要打誘餌原故所以裝備比平時都來得多及重，昨晚十時許，我們先到碼頭試釣順便拖一拖大尾魷，但過了很久都沒有什麼魚訊......於是暫時收竿回大本露，玩下食下小休下之後，正當其他人準備睡覺時，Stephen同阿欣就出發到我們的磯釣位，一路上沿途每步都很艱辛而且只靠我們頭燈上微弱燈光真是十分危險呢!! (行了三十分鐘後)那時是早上四時三十分，到達後各自開竿並打下誘餌，大概五時，阿欣中魚，從他的竿來看條魚應該不小，一會兒後一條十二兩雞魚上水，此時大家都感到十分興奮，於是加快手腳希望再中大魚。五時三十分，阿欣又滿弓，今次明顯地強勁過之前那條!! Stephen 立即收竿回避 !! 一會後斤半雞魚上水，兩人心情興奮度推至極點!! 就在Stephen 憺心打龜之際，他的魚竿傳來魚訊，上水後原來是手板黑毛，與此同時阿欣也中手板石殺，由於黑毛是阿欣夢寐以求的對象魚，所以阿欣很善慕Stephen 呢，不一會，Stephen 又傳來強勁魚訊，拉据了一會後，一斤黑毛上水，阿欣又善慕不已了，不過機會終都輪到他了，連上兩條手板黑毛，開心死了!! 由於大家都太興奮了，所以Stephen 立即通知大本營，告知狀況。 六時半起，大家陸陸續續到步，總之全部人都有魚上釣，魚獲包括: 黑毛、泥盓、石殺、哨牙妹、石狗公和雞泡等。 備註 : 由於魚獲太多，所以放生小魚不計其數。 |
|
05/04/2004 (一) 00:00 - 09:00 |
大埔 大尾篤 |
Stephen 阿欣 |
誘餌粉 南極蝦 蝦仁 |
花膠一條 梳籮四條 小赤立一條 |
呢次係我第一次同阿欣釣夜水，雖然收獲唔多，但是不打龜已經很好了。 我們晚上十點鐘才入大尾篤，到達巴士總站後，要步行四十五分鐘才到達目的地，一到步我們便各自開竿，由於水極之深，所以一開始大家都釣成十五尺水，而誘餌就一路不停地打，十二點幾阿欣先中大梳籮，到大約一點鐘，我們發現水面有魚打水，於是我就改釣四尺水，不久真的中魚，可惜上水一刻甩勾，而大家一致認為那條是石班.......真可措!! 過了很久也沒有魚訊 ，試過轉了幾次位，也是沒有，大概兩點鐘，我在走魚位置中了一條花膠，這次是我第一次釣到這種魚，很不錯呢!! 雖然誘餌不繼地落下，但都是沒有魚訊，直至早上九點也只得阿欣幾條梳籮，最後由阿欣釣到一條小赤立埋齋，跟住誘餌也用盡了，於是收竿走人。 |
|
21/03/2004 (日) 20:00 - 23:30 |
大埔 吐露港 |
Stephen Fanny 阿欣 阿珍 阿花 Debbie Debbie舅父 |
誘餌粉 南極蝦 死蝦 青蟲 |
七條黑沙立仔 坑廉一條 |
今日剛剛去完Camp 返到屋企，Fanny 就打電話比我話要去吐露港釣魚，問我去唔去，當時我很疲倦，真的不想去，但係諗諗下見佢地咁難得來到大埔，重咁有癮添，於是最後都係應承了他們。
而阿欣又剛巧去完蚊洲回來，於是就約了他一起到吐露港，去到的時候已經是八點幾鐘，他們剛轉位到了我們平時的釣位，而我同阿欣一到步後和他們吹了一陣水便各自開竿。八點半，阿花先中坑廉，不久阿欣中兩條黑沙立仔，九點鐘佢地話肚餓想去食飯，而阿欣又剛巧肚餓，於是佢地就立即收竿走人。只有我，吃了飯又剛到步不久，所以獨個兒留在那兒繼續釣，幸好當晚天氣還不錯，不太大風，又不太大浪!! 在阿欣離開前，我向他取了一些誘餌粉。 在誘餌粉的輔助下，不到兩個鐘便釣了五條黑沙立仔，還未計走了兩口，包括一條立仔同一條黃立倉仔。水漲後開始，d 立魚仔變得很精口，於是到十一點半收竿走人!! |
魚獲 |
14/03/2004 (日) 13:00 - 18:00 |
大尾篤 |
Stephen Fanny 阿欣 阿珍 阿花 阿信 Helen Debbie Debbie舅父 |
福壽魚粉 鯽魚粉 死蝦 泥盓釣餌
|
鯽魚四條 藍刀一條 蝦虎魚一條 雞泡魚、泥盓同梳籮魚一堆 |
原定今日到大尾篤釣魚、踏單車、撐艇和放風箏，但係到最後都只係得釣魚一樣活動......釣魚。 大概一點鐘，我地到達淡水湖提霸，而阿欣一到步後先開粉，其餘人就開竿，釣了一會後舅父先中一條蝦虎魚仔，Stephen 同阿欣就因為無魚訊所以轉到另一位置，而佢地轉位後不久，他們便相繼中鯽魚。而Debbie 同Helen 大約兩點半會合我地，過了一會，阿花傳來中魚聲音，一看發現原來她中了一條斤多的生魚，可惜她不懂處理，最後埋岸走魚，真可惜...... 而阿信在這時才到，但他打算到碼頭釣泥盓，Fanny 同阿珍因為覺得無景，所以也跟著到碼頭釣。大約四點半，阿欣釣了一條藍刀，Stephen 亦中多兩條鯽魚到完場。阿信o個邊，到六點鐘就有雞泡魚、泥盓同梳籮魚一堆。最後所有魚獲通通放生，一條都不留!! 晚上我們一起到就近的餐館食盤菜，而阿信因為早走而沒有和我們一起食。吃完後，我們便到大埔墟明記補充釣具，跟住各自散水。
|
|
13/03/2004 (六) 15:00 - 18:00 |
大尾篤 |
Stephen 阿信 |
泥盓釣餌 |
泥盓三十幾條 |
今日朝早我走左去馬鞍山福安o個度補充d 釣魚用具，順便探下老闆同老闆娘，因為我都好耐無幫襯佢地喇，呢間舖幾好架!! 一來佢地好nice，二來d 野平，三來次次同佢地買野，佢地都會計平d比我，所以我都好樂意山長水遠入去搵佢地。 言歸正傳，我約左阿信在大尾篤度等，由於我早到，所以我就一路釣一路等，在阿信黎之前我已經釣到十幾條，而阿信黎埋之後大家都不停咁上魚，我仲試過"起雙飛"添!! 到最後，總魚獲係有三十幾條，成績都算唔錯哦!! 返到屋企，叫阿媽整返味"陳皮蒸泥盓"，簡值係一流呀!! 總括黎講，我覺得我同阿信嚮釣泥盓方面大有進步!! 而今次d 魚餌非常得食，可以話經濟之選，另外，新買的釣餌盒真係大派用場!! 放在腰間非常方便，豈碼不用"擒高擒低"找餌呢。 備註 : 今日陰天，吹微風，有少少流，去時潮脹脹定，走時已經潮退了不少呢。 |
|
07/03/2004 (日) 10:30 - 19:30 |
東涌 |
Stephen Fanny 阿欣 阿珍 阿花 Debbie Helen |
誘餌粉 南極蝦 死蝦 青蟲 |
三斤黑沙一條 十幾兩沙盓一條 雜魚一堆 大蟹一隻 |
勁呀!!今日我地破左本日記三項紀錄呀!!分別係最大條立魚、最大條沙盓及最大隻蟹!! 話說我地昨日還計劃今天到大廟釣魚的，但因為時間及交通問題而改到東涌。今朝Stephen 同阿欣十點半鐘先到東涌第一釣點，由於那兒有太多漁民落簾及間中有大船駛過，結果到十二時半沒有太多魚咬餌，而Fanny 佢地又差不多到達東涌地鐵站，所以只好步行過去與他們會合。 下午二時買了午餐後便步行至第二釣點，而Debbie 同Helen 今日第一次用佢地昨日才買的魚竿，幸好他們今日都有魚獲，總算為它們"開了光"。話說回來，阿花在三點鐘中一條大沙盓，估計有十幾兩，破了本日記最大的沙盓Size，真是可喜可賀!! 一路到四點半，大家都有一些魚仔上釣，我想可能是打了誘餌的原故吧! 突然，Helen 發現她的魚竿有反應，越收越覺得不對勁，於是交給Fanny ，誰不知一交到Fanny 手上，支竿頭立即向下彎，差點把她拉下去，阿欣見此情況於是不得不出手，用他純熟的手法，很快便把大魚控制，最後撈簊一出，大魚手到拿來，哈哈.......三斤大黑沙上水，破本日記最大條魚紀錄! 大家都開心到飛起，更立即致電友人，分享此刻心情!! 而看熱鬧的人也越來越多......也因此差點兒給漁民看見，幸好我們檔著他們的視線，但最後那些漁民還是落了簾.......真是可惡!! 差不多時間阿珍釣了一隻大蟹上水，而此蟹也是破本日記記錄呢.......不過很可惜沒有給牠拍照，不能給大家欣賞。 自漁民落簾後都沒有太多魚訊，到晚上七時半一致決定收竿走人，臨走時當然是和魚獲拍照啦!! 與此同時我們聽途人說其他釣友大多打龜收場，而我們竟然可以中兩口大野，真是幸運到極點呢!! 最後，我們想了很久才決定拿魚獲到最近的海鮮酒家給我們烹調，雖然八十元是貴了一點，不過，大家都吃得很開心，很滿意!! 希望下次再有機會釣過這般大的魚啦!! 備註 : 原來一支一百元連魚攪的竿竟然可以釣上三斤的大魚，真是價錢和質素不可比下去...... |
|
29/02/2004 (日) 17:30 - 23:00 |
大埔 吐露港 |
阿欣 Stephen |
誘餌粉 南極蝦 死蝦 |
斤幾黑沙一條 三、四指黑沙多條 釘公仔一條 放生黑沙仔多條 |
以下文章由阿欣提供: 每逢星期日都去釣魚的我，今日又出動喇! 本來早上去大尾督釣魚的，但整個早上一條魚毛都無，所以決定下午五時再戰吐露港!! 到達吐露港釣場只是五時三十分，天還未黑，立即開竿開粉，由於今晚會水退乾底，所以釣棚只要7呎-12呎，用B黃頂浮子作釣，投出一竿遠，不久第3口魚餌中3指黑沙，其後逢二中一，全部即放!! 很快就到六時三十分左右，天黑了，加上瑩光棒繼續作釣，但入黑後就靜了下來!!大約七時三十分，瑩光棒慢慢下沉，中了……有點力……手板黑沙一條，入了扣唯有帶回家!吃了它吧(因為我D勾要個幾銀紙一隻的! ) ! 不一會再中…… 又是手板黑沙…… 又入扣…… 再下餌又靜下來。突然一下極快的拉波，我第一反應立刻收絲抽竿，中了…… 好大力呀!…… 上水後原來是一條30cm、斤幾的黑沙，因為用1號竿，所以十分好玩!!! 於是我即時致電 Stephen 告知我在吐露港中左條斤幾黑沙並叫他趕快過來一齊釣!! 就在Stephen來到之前再中多幾條3，4指黑沙，不過d魚十分精口，要全部入晒扣至起到佢地!! 而 Stephen 在通電後二十分鐘便到達，他一到步二話不說便立刻開竿作釣， 我就坐在一旁小休，他的浮子慢慢沉下，他輕輕帶動釣組，發現有魚上釣!一抽竿，1.5號磯竿滿弓，Stephen收了兩下就停下來，好大條呀?? 頂唔住啦!! 他正想把竿給我時1.2號子線過石斷了，估計是兩斤以上魚種，十分可惜呢!其後又走了一口，到最後大約十時三十我中多了一條釘公作結尾! 備住 : 今日因為水退乾底，漁民們不可在近岸落網所以有點魚獲，第二次同Stephen釣魚，發覺他的技術進步了呢!! 哈!! |
|
28/02/2004 (六) 23:30 - 02:30 |
西貢 半月灣 |
Stephen Fanny 阿珍 阿花 Debbie Debbie舅父 Alby Helen |
青蟲 | 斤半及兩斤星鱸各一條 廉咪兩條 雞泡一條 |
今次我地去半月灣露營，原本諗住even 就算釣魚都唔會有大魚上釣，但點不知就令我地大跌眼鏡....... 今晚我地燒烤到十一點幾，Fanny唔聲唔聲自己走左去沙灘釣魚，佢諗住去釣沙鑽，但落餌不久就釣了一條簾咪仔上黎，仲要好高興咁同我地講話有好多魚，而且又有大魚咬餌，令到佢斷線收場。我地見佢講到咁好竟，緊係立即動手開竿啦!! 釣了一會後，隔鄰的朋友仔釣到一條斤頭星鱸，不久，舅父佢大叫一聲:"中呀"，跟住一條斤半星鱸很快便上水。跟住過了很久阿花突然中了一條大野，由於佢少有中大魚經驗，所以上水過程便由Stephen搞掂，而結果就係一條近兩斤星鱸一條，Stephen 仲話好刺激、好好玩添!! 最後Fanny 釣多一條廉咪及Alby 釣上一條雞泡魚仔。而今次我地咁難得釣到兩條破紀錄魚，真係十分可喜可賀，所以大家都爭住同條魚影相。到左第二日，經我地商量後一致決定拿去海鮮酒家整左黎食，實行皆大歡喜。 備註 : 如要到此釣魚，最好選擇在四月前，因那時還未落防鯊網。而魚絲方面，則選用較粗的會較好，因為不易斷線。 |
|
24/02/2004 (二) 19:30 - 23:30 |
大埔 吐露港 |
Stephen 阿欣 | 誘餌50粉 南極蝦 死蝦 |
手板大黑沙 坑廉 |
今日未放工就收到網友阿欣叫我今晚去吐露港玩磯釣，我見橫掂無乜野做，就應承左佢。六點鐘返到屋企執埋工具就立即出發，由於大家咁o岩住埋同一座樓，所以就一齊行過去吐露港。 雖然唔使搭車，但係你都咪話唔"甘"，由屋企行過去要成粒鐘......而且大家都無買乾糧，所以我好憺心今日會挨肚餓，不過其實有魚釣都真係可以忘記一切o野架!! 七點半鐘在第一釣位釣了一會，便有漁民捕魚，真的豈有此理!!大家心知已無"景"於是轉位，釣了一會那班漁民又再落網，我們只有XoxYzx 佢地，但都是無奈地再轉位。 我們一路落誘餌，很久也沒有動靜，直至十點半Stephen終於有一條手板大黑沙臘上水，而阿欣則未有魚食餌。一路到十一點Stephen再中一條坑廉，由於大家都不想帶牠回家，故即時把牠放生了，而遺憾的是沒有帶相機不能和牠們即時拍照!! 備註 : 今日係生流尾，有少少涼但又不太大風，以釣黑沙黎講已經接近尾水了。 |
|
22/02/2004 (日) 09:00 - 13:30
|
大尾督 |
Stephen 阿信 Irene |
南極蝦 | 泥盓廿幾條 | 非常之開心! 今日成功領唔了如何釣泥盓，因為平時想釣呢類魚都好似有點困難，但今日全憑隔鄰的阿叔教路，成功釣獲廿幾條泥盓，哈哈重試過一起起兩條添，你話有咩辦法唔開心丫 ^_^。 你都咪話呀，釣泥盓如果唔識釣，真係可以係咁喂魚而一條都中唔倒架 (因為d 泥盓好鬼古惑)。而今次學會了，下次再多加學習和改善，一定可以學d 阿叔咁一分鐘起幾條o既!! 其實，有時同d 阿叔釣魚都唔錯，因為佢地真係可以教曉你好多釣魚o既學問，好似 : 邊度有多d 魚釣，邊度d 魚大條d ，釣咩魚應該用咩釣法呀咁，真係聽君一席話勝過你釣一年魚架，所以見到d 阿叔都係虛心d 同埋對佢地客氣d 好!! 備註 : o係大尾督釣泥盓，唔同釣位有唔同釣果，好似大細同數量咁，想知就試下問人啦!! |
|
15/02/2004 (日) 13:30 - 16:30 |
城門水塘
|
Stephen Fanny 阿珍 阿花 Debbie Debbie舅父 Alby Helen | (看相片) |
一條"食人倉" |
今日我們的收獲係捉的並不是釣的......哈哈!!點解咁講? 因為o個條魚幾次停留在岸邊，真係用手都摸得到! 所以你話我地又點會放過佢呢? 於是我地就用Fanny 個魚籠去捉佢喇，話時話，條魚都真係幾大幾有氣力，所以要合二人之力才能捉佢入網，第一次入網以為放o係水度就無走雞啦! 點知，再拎起個網至發現條魚咬穿o左個o隆......好在，佢重留在原地，於是又再捉過，而隔鄰的釣友則在此時說那條是"食人倉"......Stephen 同舅父即刻打個突!! 不過......最後都小心地捉了牠上岸，結果係點? 當然係比我地捉住黎同佢輪流影相留念啦!! (話時話，我地都無乜幾可釣到咁大o既魚，估計有成斤幾兩斤重，哈哈......)。而條魚最後都係比我地放生o左。 到左四點幾，大家覺得無乜魚訊，於是決定收竿走人，而我地最後見時間尚早，於是釣魚變行山，所以話，在城門水塘釣不到魚都可以改節目行山。 註: 感覺上成個塘咁大無理由無魚，但事實上又無乜大魚可以見到，而魚毛仔(不到一手指尾)者則到處可見。未知是否時候未到...... |
|
01/02/2004 (日) 06:00 -10:30 |
東龍洲 一碼頭 |
Stephen Fanny 阿珍 阿花 Debbie舅父 Alby Helen |
死蝦 |
石九仔廿幾條 |
今次我地去東龍洲露營順便釣下魚，聽人講o個度有魚釣，但最後我們都只是釣到石九仔，唔通係唔o岩季節o既原故? 和我們一起釣魚的還有兩個不認識的人，他們是釣通宵魚的，聽他們講他們以前來過這裏，而且起過兩斤魚，所以突登來再碰碰運氣，但結果也是無功而回。 不過，如果撇除釣果的話，那裏會是一個露營的好地方，因為除了環境優美外，要找食物、水源、廁所等都很方便，希望下次再去的時候，我們會釣到更多更大的魚就好了。 |
|
17/01/2004 (六) 16:30 - 19:45 |
鯉魚門 |
Stephen Fanny 阿珍 阿花 Debbie | 誘利粉 南極蝦 螺肉 |
石九兩條 |
今日一行五人約左三點半嚮觀塘麥當勞等，第一個到係Debbie，跟住係阿珍，其餘人都遲到...... 諗住話o係觀塘道一間釣餌店買死蝦，點知o個間野無開舖仲話要年初二至啟市，真係好似唔想做生意咁!!最後當然係無買到啦。 四點半到達第一釣場"斷橋"，Fanny、阿花同Debbie先到海邊拾螺肉，阿珍就第一個開竿，無耐Stephen就用誘利粉強攻，點知落了好一會都沒半點魚訊，跟住一路落都好像沒有什麼聲氣......由於今次係Stephen第一次使用誘利粉，所以......其實都不太懂也起不到什麼作用。到七點鐘，只得阿花同阿珍各中一條石九，跟住大家決定轉位到天后廟隔鄰繼續釣，不過那兒浪大而且易勾石，大半個鐘之後都無魚訊，於是收竿走人。 注意: 到橋前必須爬過兩個鐵絲網，去及回程均須經過一間有惡狗的人家，那隻狗很兇，怕者別去也...... |
|
11/01/2004 (六) 19:00 - 22:00 |
西貢 船釣 |
Stephen Fanny 阿珍 阿珍老公 阿信 阿花 Mandy Debbie Debbie舅父 Alby Helen | 生蠔 青蟲 死蝦 |
無 |
今日終於知道乜野叫做天時與地利喇! 話說我地一行十一人約左夜晚六點半o係西貢市中心等，由於Stephen、Fanny、阿花無野做，於是提早到碼頭釣下魚，順便搵艇家，點知去到o個度見到我地o既艇家，佢係咁話咩水口凍呀.......咁夜無魚釣呀.......呢個季節唔適合釣魚呀!!又話人地日頭都無魚釣，夜晚就更加......重叫我地改節目添(真係老實得好緊要)!!而Stephen同Fanny就係咁話唔緊要，因為已經約晒人，唔可以掃興。咁好啦，個艇家好似好唔願意咁應承左。 跟住我地三個就諗住搵個釣點玩下先啦，行左幾個字，阿花話肚餓，咁就行返去市中心買野食啦，買完野食之後，就再去碼頭囉，唉......點知又撞到我地o既艇家，佢話唔記得左今晚去飲，話唔載得我地。真係豈有此理!!其實大家都唔相信佢o既籍口，而Fanny就叫佢點都要幫我地班隻艇返黎，搞左好耐至幫我地搵到個艇家，真係爭d比佢玩死!! 仲未到六點半，佢地三個加理後到o既Mandy，就嚮碼頭玩住先，釣左唔夠一個鐘，得Mandy釣到條泥孟，之後大家見肚餓去左食野。 七點鐘，等齊人上船，當然結果係點大家都應該知道，真係不聽老人言吃虧在眼前!!大概個半鐘後大家由釣魚變到有訓覺、一大班人傾計.......真係我地釣魚以黎，最悲慘o既一日!!我諗真係要聽個艇家話要到二三月之後至有多返d魚釣。 |
|
04/01/2004 (日) 09:00 - 16:00 |
西貢 五塊田 |
Stephen Fanny Alby 阿珍 | 青蟲 死蝦 |
石九4條 黃衣一條 雞泡二條 |
嘩......今日又係石狗爆釣日呀!!話說我地今日一早就嚮牛池灣街市出發，大約八點半在五塊田下車，由於我們從未到過此處釣魚，所以我們都要花少許間找路，幸好憑著我們的直覺，大概半個鐘之後便到達目的地。 好不容易，左攀右爬後找到一個釣點，不過這裏又有Stephen不太喜歡的------海草!!由朝勾到晚，真的很討厭!!而且他又帶唔夠衫，看他在既大風又陰天的環境下好像很難受。話說回來，Fanny開竿大約半小時後就中一條細石狗，跟住無幾耐佢又中一條雞泡，而其他人則食緊白果，一路到大約十二點，大家都覺得無景，於是一致決定轉位!! 又一次左攀右爬後到達沙灘的另一端，開竿無幾耐Fanny中細石狗同細黃衣，Stephen就中雞泡，而Ably 同阿珍就諗住今日可能打龜，不過......過左個幾鐘之後阿珍就中左條大石九，這是有史以來我們看到最大的，Stephen還笑阿珍釣左條"石九公爺爺"上黎，與此同時Fanny都中石九，咁難得o既場面緊係同佢地影相啦!! 一直到四點鐘，大家都感覺到無魚訊只好收竿走人，回程時還要走那又長又斜的路，搞到大家都索晒氣，所以話下次仲會唔會再黎都係未知之素....... |
|
01/01/2004 (四) 06:30 - 11:00 |
塔門碼頭
|
Stephen Fanny 阿花 |
青蟲 死蝦 |
大廉咪一條 哨呀妹3條 梳蘿一條 石九12條 |
哈哈.....今日終於都得嘗所願到塔門釣魚------我地尋晚o係果度露營，到朝早六點幾到碼頭，然後開竿釣魚，Fanny 同阿花就用投竿，而Stephen就用手絲。 開竿無耐Stephen先中石九、梳蘿同哨牙妹各一條，跟住阿花同Fanny中哨牙妹同石九，到左大概九點幾，Stephen突然好興奮，因為佢釣到一條大廉咪，一路到十一點，大家都不停上石九、哨牙妹，到最後蟲同蝦都用盡，大家都只好收竿走人，總結大家釣果，都算係我地釣魚以來最爆釣的一次了。 |
|
| 14/12/2003 (日) 9:00 - 1730 |
西貢 籃天碧海魚排 |
Stephen 阿信 Irene |
青蟲 誘餌粉 南極蝦 |
小赤立四條 火點一條 小雜魚一堆
|
我地呢日一朝早八點鐘嚮大埔墟火車站出發，到三杯酒碼頭坐快艇到魚排，去到之後選了位便開始揚竿了，釣了一會兒，我們看見有一班人釣完夜魚走，他們的魚獲相當豐富，聚眼一看豈碼至少有三四條兩斤幾重的黑沙立，其他的不繼其數。 我想在那裡釣夜魚會有較好的收獲，因為我們釣了一個早上才得幾條小立魚和一些雜魚，而下午及過後除了釣了一條泥孟外便是"打龜"，而最令我覺得煩懮的是那裏很易勾石，我在那裏損失了很多鉛和勾，真是掃興，到下午五點半便收竿走人。 |
|
| 7/12/2003 (日) 15:00 - 2000 |
西貢 小清水灣 |
Stephen Fanny 阿珍 阿花 |
死蝦 青蟲 |
花頭梅一條 |
今日係諗住燒烤的，所以我地釣魚的人不多，而第一個上魚的人是Fanny，佢用死蝦玩投竿釣到條半斤多的花頭梅，最搞笑係佢嚮防鯊網內釣到的，而我、阿珍和阿花都食白果......入夜後繼續燒烤到八點走人。 其實魚訊係有的，只是有比較多的海草及大浪，經過呢次之後，我諗下次早d到，避免入黑後增加危險。 |
|
| 30/11/2003 (日) 10:30 - 14:30 |
西貢海 船釣 |
Stephen Fanny 阿珍 阿信 阿花 Irene Mandy Debbie | 生蝦 死蝦 青蟲 |
芝麻班、烏絲班、花頭梅、三鬚各一條, 沙盓兩條 |
呢日我地十點約o係西貢碼頭等，而我同阿信去左買青蟲同生蝦，而fanny 佢地就買左死蝦，等齊人後十點幾上船，一陣間就到達目的地。 開始釣無幾耐，阿花第一個中三鬚，跟住係Stephen中近半斤芝麻班，之後係Mandy 中沙盓。過了幾過字大家都無魚訊，於是叫艇家轉位。轉位後好耐都無魚訊，懷疑有人在滑水，大半個鐘後決定再轉位，無幾耐Stephen中沙盓仔，而阿信都執返個尾采中條烏絲班仔，到兩點半鐘開船回程。 在西貢食完野之後，Fanny話仲未夠喉，於是再嚮碼頭釣過，但除左Stephen中左條花頭梅仔和fanny釣到隻蟹外就咩都無......於是四點半收竿走人。 |
|
12/11/2003 (日) 18:00 - 22:00 |
紅磡 大環山泳池後 |
Stephen 阿信 Fanny 阿花 阿珍 阿珍老公 Ricky | 青蟲 |
廉咪、紅班、紅衫魚仔各一條及手指大石班多條 |
Fanny成日話大環山有魚釣，於是佢今日襯住放假三點幾鐘就去左o個度，而我同其他人就等放左工至去，當我同阿信仲搭緊車去o既時候，Fanny打電話黎話釣到條大廉咪，仲話比平時釣開o既大，搞到我鬼咁心急! 大概六點鐘就到o個度，開竿無幾耐我就中左條小紅班，我好開心，因為這是我釣魚以來第一次中班，而阿珍老公就係咁中小石班仔，搞到佢好無癮。到左九點鐘Ricky加入，而fanny佢地就走先，結果我同Ricky釣到十點鐘共釣多一條紅衫魚仔同埋一隻蟹。 注意: o個度有好多蟹作怪，如果玩沉底真係煩都煩死! 仲有一樣唔好o既就係勁勾石!!如果各下想o係度釣魚都真係要諗清楚先呀...... |
|
9/11/2003 (日) 18:00 - 22:00 |
西貢 三柸酒碼頭 |
Stephen Fanny 阿花 阿珍 阿珍老公 | 青蟲 假蝦 |
坑廉一條 廉咪二條 墨魚二條 |
因為今日fanny收五點，所以我地只好約齊人夜釣三杯酒。阿珍話尋日嚮西貢碼頭見人爆釣墨魚，於是佢諗住用佢新買o既餌木釣墨魚，釣左無幾耐就聽到佢好大聲o係度哎，完來佢釣左條墨魚上黎，而stephen見佢釣得咁過癮，就忍唔住問佢借左隻餌木黎玩一玩，不過玩左大半個鐘都無動靜，於是就還返比物主了。 大家釣左成晚，總結成績fanny釣到一條坑廉、阿花同阿珍老公各釣到一條廉咪，阿珍就最叻釣到兩條墨魚。 注意 : 呢度入夜後勁黑所以要打燈，走時都要靠燈照明，重有就係小心夜有惡犬...... |
