Monday, 28 February, 2005　　　　　四個重要的人

　　入主了７Ｆ班房一星期，今天再返回６Ｆ的二樓老家上課了。

今天三堂UE看了一套電影(The Truman Show)，原來很有意思的呢。

糊裡糊塗終於放學了，很久沒有試過獨個兒離校了，只因他們都要上Debate。

整個人呆呆的，心很酸。嗯，原來幾個月也未試過四時許便回家。

就是因為如此，胡加突然打了給我，問我為什麼這樣早回家，

她說那banner怎算，問我為什麼不留校一起做。

你知道嗎？King子她們說你做校工日十分辛苦，我真不忍心兩手空空交banner給你。

我希望有少許成績才交給你...

看到我被人似鬧非鬧的樣子，媽媽不禁笑了起來。＝．＝

呆坐著床一兩小時，這幾星期都是這樣，反覆想著同一件事。幸好，還有Ｂ陪伴我，聽我說話。

除了和媽媽吃Dinner外，我整天也留在房中。

十二點和 Pokman  ICQ chat，在談話中發覺原來她的習慣漸漸變了。

這半年，眼白白看到......眼白白...><......我終於不可不接受現實。

已經不是一次的事了，真的累了、心淡了...

除了四個重要的她，我真的不想再認識人...很想獨個兒...

走進洗手間......一滴滴水點無意間從眼裡流了出來......
出來看見媽媽在廳中...又要立即收起自己心情。

這晚慢慢感覺到很苦、很心酸...

回到床上，看著傻傻的Ｂ，我又...再次流淚...

何苦呢？可是我寧願這樣。

(知道有我的存在, 已經足夠)

(如果換著被關心的是我, 那我感動了)

Pokman多謝你今晚聽我發up風。

Friday, 18 February, 2005　　　　　《在世界中心呼喚愛》

　　十人唱Ｋ，二人看戲。

十一時的荃灣地鐵站堆滿了一班最熟悉的朋友，很久沒有試過這樣多人唱Ｋ了...

五男五女，有我、Pokman、薯仔、LiuLiu、阿輝；阿包、Arbe、Zizz、Lamyan、小玉。

去了Green Box天字一號大房，第一次用Projector唱K！那房的佈置挺特別，中間的櫃把房隔成兩邊。

於是自然地，女的看Screen、男的看電視。

我總是覺得氣氛不夠，可能由於燈光問題，而且亦沒有平時那種擠迫親密的感覺吧。

Lamyan唱了《假如讓我說下去》便躲在一角，原來她不舒服，她一直躺在sofa上...

後來她還早走了，Lamyan你時常作病的，希望你日後小心身體。

接著Arbe、包、Zizz也過了我們男仔這邊，小玉好像被人遺棄似的，又自閉了。

其實今天沒有多大心情唱歌，都是和朋友聚聚吧。四時便離開了。

Zizz和小玉先走，其他人便到了三聯，大家也有各自的活動。

餘下我和Pokman，到荃灣Broadway看16:50《在世界中心呼喚愛》。

兩個男孩子看愛情片，總顯得怪怪的。

沒錯，起初是從Cha口中介紹Pokman看的。可是後來，我看到有關這電影的資料介紹，才知道這是一部非常感動的愛情片。很久沒有被愛情感動和溫暖過了。

而同時這幾天自己卻因為一些零碎的情感，哭了很多次...唉，我這個人，經常感情用事。

其實Pokman也和我差不多...可是他理性得多，但總算兩個傻孩子吧。

於是我約了Pokman，我說堅決要看這套戲。

我好像從未試過兩個人看電影，當然Pokman經驗便多了。

其實來看的也不算情侶為主，只不過全都是我們十幾歲的男女孩子。

故事開首大多是交代其後的劇情，Pokman說有少許沉悶。

直至十七年後同樣的颱風，男主角朔太郎開始記起高中時代相識的亞紀，憶起段段甜蜜動人的回憶。

一段非常純真的愛情，我個人相信都是每一個人的夢幻。

他們以錄音帶的交往也令我想到，我的一個秘密。

每一個回憶都深深刻在長大後的朔太郎身上，他重遊舊地，彷彿自己的愛人還在彈琴、還在擁抱他。

我這刻很感動，為什麼他這麼傻，已經是這麼多年的回憶了。

劇情也令我因此明白為什麼這主題曲叫《輕閉雙眼》。

亞紀後來患了白血病，她的一個願望便是到世界的中心。

令人感動的是在亞紀生命的最後一天，因為颱風而不能上機到世界中心的一刻，

因為朔太郎知道亞紀已經捱不住，這次去不成便代表永永遠遠不能替亞紀完成遺願。

亞紀最後臨死的一刻，我流下了眼淚...只因她臨死前的錄音對話，交代了她對朔太郎日後幸福的願望。

結局好像是要襯托戲名似的，十七年後的朔太郎最後也完成遺願...

兩小時多的故事，看完後整個人的思想也呆了，可能是太投入那劇情。

七時許，和Pokman逛了一會千色店買禮物。

不知為什麼十分頭痛，回家倒頭便睡了。

這幾天也睡不好...夢中反覆想著以前和一個人絲絲的回憶，是我太傻了。>_<"

後話:

整套戲每個情節也十分感動，我很羨慕男主角，能有一段這樣純真的情感。

戲中塑造出一個像初戀那樣甜蜜的回憶，讓所有人想到，雖然我們活在花花世界，

但其實每個人心中也有一個如詩如畫的回憶..可能就是初戀吧。

電影特意以一個樣子平凡不過的男孩子襯托出一個才貌出眾的女孩子。像Pokman說，愛情沒有條件可言。

值得一提的是以十七年前後的颱風呼應，還有朔太郎未婚妻律子埋下的伏筆。

關於錄音帶的交往，這些特別的通訊方式，我個人感受也很深。因為自己一向也有寫信給人。

另外也證實了一點，原來回憶的確會深深刻在腦裡的。我們不能沒有回憶，回憶不是負累，是人生的調味料。

雖然我不能經歷生離死別的愛情，但仍可感覺到愛的存在，不論生死。

沒錯，看完這套戲的確有非常多的感受。一段純潔的愛情， 電影描繪得非常真實，可是卻像夢一般。

一位網友: Any one who had been in sad memories of real love must be 感動.

<Pokman>之感受 (18/2): http://free.sinhk.com/diary/sindiary.php?to=PokMan

人死了，但愛永不會變。

珍惜眼前一切。

輕閉雙眼　平井堅

每當早晨醒來　脫下的軀殼總在身邊
過去總能感受到你背後的溫暖　今天卻是一陣寒冷
停止苦笑　拉開沉重的窗簾　眩目的朝陽　每天追趕著我
那天　讓你見到我哭泣的臉　眼淚映照著夕陽
每當我祈禱著能夠卸下肩膀上的溫暖
我的心　與身體　卻都牢記著你

Your love forever
輕閉雙眼　在心中描繪你的樣子
這樣就好　不管季節將我的心置於不顧
有一天對你的事　我將會失去所有感覺吧
所以現在我仍然懷抱著痛苦入眠　也無所謂
那天我看到的星空　許下了願
兩人一起探尋那光芒　雖然瞬間就消失了
我的心　與身體　都因為你而閃耀

I wish forever　輕閉雙眼　在心中描繪你的樣子
我只能如此　即使世界把我留下置於不顧
Your love forever　輕閉雙眼　在心中描繪你的樣子
這樣就好　儘管季節將我置於不顧　自顧自的改變顏色
我搜尋記憶中的你　這樣就好
超越了失落而獲得的堅強
是你給我的　是你給我的

Thursday, 17 February, 2005　　　　　掃墓坪

　　今天十時便起床，嘗試脫離「下午一兩點起身、凌晨四五點訓覺」的生活。

為的是拿回我修理完的相機，不過銅鑼灣挺遠呢。

還記得今年平安夜狂歡過後，相機的LCD被撞爆了，結果維修費=$700，認真要命。

幸好媽媽資助一半......我往後會小心些。

拿回相機，上了一架往秀茂坪的巴士，很久沒有獨個兒沒有目的地乘坐巴士，

還記起以前曾經不快樂，每踏上巴士總會思想，總會有很多不同的感覺湧上心頭。

秀茂坪到處都是新的大廈，還記得小時候到過那裡探望爺爺...

在那裡獨個兒吃了午飯。

在乘車回家的途中，不知為什麼，突然哭了，可能是由於那人那事吧。

原諒我這個多愁善感的男孩子吧。

Monday, 14 February, 2005　　　　　My 17s' Vanlentine's Day

Day

　　度過特別形式的情人節，並沒有特別的氣氛感覺。

１１時許，乘坐巴士到城隧口，等待薯、文攝、小玉，還有遲來的輝、c9、包、Doris。

沒錯，今天的節目是踩單車。

和他們在車上談著年宵蝕了的事，大家也氣得連問...誰在那天口口聲聲說回本、賺錢?

到了大圍，回到我們平日租車的店舖，桃花依舊人面全非，以前的嬸嬸已變了一個年青人。

薯仔說已忘記那些踩單車技巧，所以只好慢慢地、扭來扭去地踩。

今天的風很大，迎面而來令我們覺得天氣變得更冷。

在路上Vivian突然打了給我，還記得我昨晚很夜才告訴她我今天的節目，可是談不久，便給薯仔他們責罵了．．．原來他們正等待著我的決定。

最後我們選擇上了CUHK KCR Station，輝說自己老了，腳很快便累，我想大家也是了。

科學園對出已有一番新景象。在吐露港的景色映照下，我和阿奶討論愛情，很奇怪吧了，可是奶很有一番獨特想法的。我後來取笑阿奶和他學校的Yoko，但他好像很討厭她似的。

吃飯後我們進入大埔海濱公園，盡頭是一大片空地，那裡還有很多人在放各式各樣的風箏。

很久沒有看過人放風箏了。眼前大大的風箏轉眼間已升到遠遠．．．

我們回程經過的回歸紀念塔，是我們每次逢到必停的景點。

Vivian又打了給我，原來她一直在家，我又再被責罵昨日cut了她線。

談話中突然聽到「由於線路受到干擾，閣下之通話被中段」=.=  (今次唔方唔cut線lu)。

另一方面，我和薯、文攝在塔頂偷看一對小情侶在塔底纏綿中...

在高處還看到小玉一人呆坐，不知她是否不快樂。

回程時一直沒有停過，６時半直取大圍交車。

Night

　　送了包、Doris、文攝離開，７時我們已到了沙田新城市。

相信是全港最多情侶的商場，一對對情侶，手牽著手，說著一番番甜蜜的情話。

正在等候Liuliu的我們，包括薯、輝、c9，和唯一的女孩...小玉，到了Muji。

我又打了給Vivian，驚奇的是，原來她也在新城市。

原來她補完習，正和媽媽逛街。我說很想見她，但又怕見她的家人，哈哈。接著談了很多人，還有阿南的事。等了很久，才看到他們在Muji出來。

到處都是舞獅助興的聲音，已聽不到她電話中微弱的談話聲，她也說她那邊很吵。

突然之間，她已出現在我面前。

很是驚喜，沒有想過這天會見到她．．．

過了一會，我找回阿奶他們。

薯仔離開後，不久Liuliu也來了。他說這天很大感觸，看到一對對，反觀他自己卻...

後來我們決定到Pizza Hut 吃我們的情人節晚餐。

在等位過程中，Liuliu提議到玩具反斗城，Liu又再回憶他和翠的日子...

Lamyan後來也來到，不知道她是否和喬峰吵了架，希望她倆沒事吧。

Dinner後的沙田，情侶們不見了，只見巴士站一條條長長的人龍。

阿奶又笑說我的事了，Hey!不是真的...回到家已十一點了。

還記起在塔底那男孩送了一個大大的心型氣球給女朋友，在我腦海裡還有那女孩的笑臉．．。

我想，將來情人節一定要送一隻大大的毛公仔給女朋友，逗她開心。

...很奇怪，這晚 並沒有傷感 。

(Vivian，多謝妳。)

Tuesday, 8 February, 2005　　　　　金雞六業(年宵最後一晚版)

　　今日係年宵既最後衝刺。下午其實編左有一更(2-4pm)要去，但薯仔話要整電腦，黎唔到。

下午２點，我黎到只係見到阿腸、阿包同小彬，果時個場真係好少人行。

小彬既服飾同坐既姿態，加埋佢拎住本數簿，真係好似D收數佬什至係老翻商人，好搞笑。

佢既Duty已經完左，不過唔夠人唔走得。

記得有個阿嬸走過黎，話琴日買完格格帽而家想幫人買多頂，佢話琴日買仲係＄２５，話今次係特登返黎買(而家我地賣＄３８)，佢問我地點解會貴左咁多。佢講得完全無錯wor，所以我地當時無言以對。

後來佢問可唔可以平D，阿腸堅決話唔得。最後我地話送風車同平少少，佢終於都買左。

我見過呢D事已經唔係第一次，講真＄３８真係嚇走唔少人。

之後阿嘉、Irene、Jasmine、姜佩玲、Elaine同Ger恆都黎左。

阿嘉落左黎就交帶左阿Ken既說話，格格帽要賣＄４８，最低＄４０。當時太令我地驚嚇。

我同阿腸堅決話可以做呢個價，太貴啦。

其實日頭咁光猛，下午D人又唔肯駛錢，所以下午我地都主要係賣公仔。

．．．「買大眼雞大肥雞，加五蚊送雞頭cool。」

後來原本唔駛Duty既阿晶同阿Ken都黎左。Ken話今日格格帽入貨價多左４蚊＝＄１２，所以先要加價。

我地果時先肯定地向人開價＄４８。之後我親眼見到有人俾＄４０買帽，好恐怖＞＜

下午五點幾離開，臨走前用自己錢買左兩隻熊先走。

跟住就出左阿婆度食團年飯。十點我先返黎葵芳幫手，首先幫佢地去機鋪唱散紙。當時入場好多人，誇張到要排隊，D轉彎位堆滿晒人圍晒鐵馬。好辛苦先入到我地檔口，第一眼見到Ger恆佢地６，７個企晒o係檔口前面，企埋o係張 凳度嗌(當時檔前既通道已經水洩不通) ，我當時覺得佢地超落力。

入到去裡面原來仲多人，好似全班文科班落晒黎咁。

第一次見到陳志偉落黎，佢當時負責泵吹氣大眼雞同大肥雞。

見到添添同廖sir tim，不過佢地好似無乜幫到手。

當時格格帽已經差唔多賣晒。(四十幾蚊都有人買，犀利！)

全部野都賣平左，大眼雞＝＄１３、大肥雞＝＄１８、星星棒＝＄１５

但Bob帽、皇帝帽企硬＄２５，雞頭cool仍然尚餘大量。

我最鍾意嗌同Sell野，所以首先拎左兩隻雞搥幫手Sell。我地條巷出面真係超多人行，D人已經塞到行唔到。不過夜晚D人真係唔同D，佢地比前幾日既人更捨得洗錢。

只要推銷少少，就有人問價，而且好快就會買左。

唔知係咪行花市既氣氛關係，好多人都買吹氣雞搥拎住行，

搞到要陳志偉o係裡面不停泵，我地賣完一個又一個，不停o係裡面拎新既出黎。

好快就宣佈格格帽同大肥雞賣晒。跟住我地 就主打大眼雞．．．

只因場內有幾檔都賣大眼雞搥，當時我地務求賣晒所有吹氣雞搥，決定將大眼雞價錢推至與其他檔口同價＝＄１０。我地全部人由當時各自賣唔同既貨品轉晒齊齊賣大眼雞，並將氣氛推至最高峰，我諗果時係我地全日最興奮既時刻。

５至６個人企o係張凳度嗌＆Sell，出少少又有６至７人Sell，阿嘉就企o係人堆之中。

每人都拎住一至兩個，保證無人買唔到、什至無人聽唔到大眼雞賣幾錢。

好多路人見到我地之後都笑，可能佢地稱讚我地 連賣一個平到十蚊既雞搥都竟然咁落力。

而且講真，我地比其他檔多人Sell野，我地氣氛係全條巷之中最勁。

當時我覺得我地班人好團結，每過幾分鐘就會齊齊嗌前幾日前諗既著名Slogun．．．

「細路仔買大眼雞，成個新年唔會曳。」

我地既策略慢慢開始成效。不停有人俾錢話要，多數人都唔壓價。

我地曾經一度將大眼雞推至＄８，但因為隔離檔仲係＄１０，所以無謂頂爛市，最後變番＄１０。

哈，咁好賣唔知係咪D路人可憐我地D學生 呢。

之後裡面D人每次話回到本、廖sir派利是、有錢賺．．．我地成班人都會歡呼，好開心好有氣氛。

我地叫完，每次D行人都會望一望我地跟住笑，當然我地成日都keep住嗌唔同Slogun啦。

賣到咁上下，裡面D策劃人話仍有大量雞頭cool，我地部分人就轉賣雞頭cool，每頂＄８。

．．．「買任何貨品，加五蚊送雞頭cool。」

當然啦，雞頭cool的確點都無乜人買。

大眼雞一隻又一隻，終於講你都唔信，琴日成袋既大眼雞竟然最後賣晒，

但我地唔係蝕本賣架wor，我諗都係我地既推銷有效。

雞頭cool真係好似無咩人理，裡面D策劃人話單買五蚊都照殺。

算啦，當時其實已經有錢賺，所以D野蝕本賣都唔緊要啦，最緊要賣晒D貨。

我同Jasmine、姜佩玲當時賣緊雞頭cool、星星棒。

阿Ken突然一句話賣＄３啦，我地仲興奮，而且即刻多左人賣。

十二點幾，我媽媽都有黎，佢話我地條巷係全場最逼架！不過我地檔真係成日都有路人影相。

見到唔少林護人，佢地都有買野wor...陳志雄都黎左，仲有佢個妹。

．．．「林護人，你已經被發現啦，快D過黎買野。」

我同Martin拎住D貨成日大大聲講野營造氣氛。

光．．．「咩話，呢樣野幾錢話？」

鄔．．．「３蚊ｊａ。」

光．．．「喂，我唔信wor...」

鄔．．．「真係３蚊ｊａ。」

睇完D人真係望住我地笑。不知不覺已經一點幾．．．

姜佩玲講番D雞頭cool真係唔太掂，唔知係咪裡面D策劃人顛左，佢地話不如＄１啦，

另一邊廂，Bob帽、皇帝帽終於由＄２５＞＞＄１５＞＞到而家＄１０。

於是我地真係傻左，果時又將氣氛推至高峰。

．．．「雞年戴番頂雞頭cool啦，一蚊ja，想高貴D？戴皇帝帽啦，都係十蚊ja。」

．．．「十蚊做皇帝。」

．．．「唔係講笑，雞頭cool真係一蚊ja wor。」

．．．「買支星星棒，氹下自己個女、或者女朋友都好丫。」

．．．「廿蚊成底香囊俾晒你。」

D行人又再笑、又影相，我真係估唔到我地連Sell一蚊既貨都咁落力。

好成功，不停開始係咁賣雞頭cool。好似唔駛本咁，痴線的。

同一時間，所有貨品降至成本價，星星棒＝＄５。Bob帽、皇帝帽由於斷色斷size，終於降至＄８。

大家開始有點力歇聲嘶、好火熱、好累，唔少人已經入番檔口抖抖。

雞頭cool最後竟然可以賣晒，簡直無可能。(只因蝕本賣＄１)

已經兩點幾三點，我地大部分貨已經賣到七七八八。

最後我同Liuliu、薯仔佢地返入裡面休息，又出左去其他檔口行。

真係唔明點解，原來我地條巷係全場最逼、最多人流架。

而且我地係少部分檔口可以賣到七七八八，大部分乾貨既檔仲企硬價，所以仲尚餘大量貨。

賣花賣吉既人仲慘，好似無乜生意tim。

我地檔對面個阿叔好慘，我睇到佢仲剩好多吉。因為始終係鄰居，佢就叫我地每人拎一盆返屋企。

但我地個個都無貪心。後來佢唯有賣＄５盆，見到開始有行人同佢買。

我地最後尚餘少量星星棒同香囊，偶爾聽到阿Ken話十蚊三枝星星棒，一蚊個香囊，同兩蚊隻公仔。

果時個場已經少左好多人行，我地都返晒入檔口休息。大家都好開心，進入「半賣半不賣」既狀態。

廖sir call齊人埋數。剩番我地就圍下傾下計。倩倩同佢個妹都先後黎左兩次。

四點幾開始執野，最後我地又齊齊唱「歡樂今宵」 ，真正同D行人講byebye。

跟住薯仔送寶寶返屋企．所以佢走先。

執完野，o係隔離檔買左隻熊熊匙扣，之後行左其他檔，見到D不堪入目既場景．．．

賣野既人踩爛掟爛自己D花同吉...我覺得好浪費lor，不過呢D係做生意人既習慣，年年檔檔都係咁。

其他人就將D花賤賣，俾低十蚊任攞。

Jasmine同姜佩玲就唔知邊度拎左D花返黎。阿晶同陳皓就緊緊攬住對方，好似D電影鏡頭咁。

Ahlu就凍親病左訓o係檯度，希望佢無事啦。Elaine同Cathy就掛住同隔離檔D男仔玩。

最後我、Liuliu、Balance、Lamyan、Arbe過左輕鬆一下食宵夜，

之後加埋阿晶、陳皓、阿杉，食到佢間野無晒粥賣。

食完野陪Balance去OK食麵，之後Arbe同Lamyan就返屋企先，

我就跟住一個行番屋企，聽講Liuliu仲會返去幫佢地拆野...我返到屋企已經五點幾六點lu。

我相信今年係最特別既年初一，因為我會訓成日覺。

最後祝倩倩，１８歲生日快樂。 咦，但好似過左啦wor＝．＝。

Monday, 7 February, 2005　　　　　即興少女組 +年宵(年廿九版)

　　倩倩就黎生日，但琴晚倩倩話正日唔得閒，所以我諗住今日見一見佢。

我本來話約佢食飯，點知佢話約左敏wor，咁算啦。佢地仲話幾個女仔去機鋪玩太鼓tim...=.=

下午２點幾，我打俾倩倩，原來佢地o係光輝圍玩緊太鼓(一定係Mandy既主意啦)，我話撞佢地...

所以之後我搵左薯仔叫佢陪我...(費事得我一個男仔啦)

o係地鐵站落小巴，行到咁上下，就見到有幾個少女。佢地"即興少女組"今日幾靚wor =.=，

有倩倩、敏、Milk、王倩兒。而我就好似好怕羞咁...佢地跟住買野飲，我就一直企o係７－１１門口。

其實唔知點解，我果時有少少緊張。

間野原來係Soso介紹架，真係好想知敏同佢點。

之後我送左張ｃａｒｄ俾倩倩，因為有野想同佢講，不過又無機會同佢食飯講。哈，敏又話爭住睇。

其實我只係想見下佢地......跟住佢地話上敏屋企打牌...

最後我叫佢地走先，我一個繼續等薯仔。眼見佢地離開左，薯仔就黎左啦，佢提議話去機鋪。

當我地行過去時，仲見到佢地等緊的士。我地一黎到，無幾耐佢地先有的士。

哈，天註定要我地兩班人見多次先俾佢地走。

同薯仔之後玩左２鋪太鼓。３蚊３隻歌，抵呀。

跟住已經五點lu，因為陣間成晚要年宵，所以薯仔就返屋企食飯，我就上左圖書館睇書。

大約六點同薯仔會合，拎埋阿Ken檔口條匙，就落葵芳年宵幫手。

"金雞六業"

地點: 葵芳年宵市場 96號檔

營業時間: 10:00am- 24:30am

一落去即刻問佢地D野賣成點，原來我地入D格格帽勁好賣架。

．．．「全場獨有皇帝帽、格格帽，順便睇下wor。」

．．．「喂，買帽送風車wor。」

果陣有阿包、Arbe、Jasmine、阿腸、阿晶、Irene、阿嘉同埋Prisca。

Irene真係好識逗D細路仔，不停問Ｄ男孩子女孩子鍾唔鍾意。

佢地一話鍾意，Ｄ家長點可以唔洗錢買丫，Irene D策略好得。

我地D女仔戴晒格格帽，真係吸引左好多人黎睇，試戴什至影相。

多人試既時候，我地檔真係成為焦點。

另外，我仲記得我諗左個吹氣雞搥Slogun．．．「大眼雞、大肥雞、十五、二十。」

其實附近幾檔都有大眼雞賣架，佢地壓得個價都幾低。

之後真係有人講笑話係咪猜嬴左十五二十可以送，不過佢後來都俾錢買左。

最印象深刻就係當初格格帽係＄２５．．．但太好賣，而且我地少貨，

年廿八已經＄２８，到今日已經＄３８

留意，成本係＄８ ja。

唉...叫既外賣好耐都未黎呀...

後來我地食野時廖sir都落左黎呀，佢既銷售方式好特別，好似賣野俾師奶咁＝．＝

問番先知原來陳志偉日日都買幾排野飲俾我地架，佢真係好好。

我地將佢對比廖sir，廖sir好似無乜做過野。

後來九點Liuliu、Martin、Cathy、Meander、Elaine同佢 BF都黎幫手。仲有Oliva、阿杉佢地都黎左。

我見到我地呢度D女仔好受隔離檔D男仔歡迎lor，俾人撩tim呀∼

不過眼見阿腸好唔開心...

大家好落力，好開心咁推銷。

好齊心咁嗌Slogun．．．「細路仔買大眼雞，成個新年唔會曳。」

我忽然覺得我地文科班好團結，從未試過。

先後Zizz同Anson都探我地班，佢地好有我地心。

十二點薯仔話要拎電腦，要走先，走之前同Martin、Liuliu講好收工去荃灣打機。

最後Lamyan、小光都黎幫手，佢話接我地放工，跟住食糖水wor。

十二點半，大家執野，終於收檔，最後我地齊齊唱「歡樂今宵」 ，同D行人講byebye。

淨番Flora同Ger恆...唔知會有咩事發生呢。之後我、Liuliu、Arbe、Lamyan同Martin就五個一齊搭的去荃灣。

入左間粥鋪，坐落先知原來無人想食野。五個人最後叫左一杯豆漿share。

之後走仲要俾人話，真係咁大個仔未試過咁勇又咁臭。
薯仔最後話唔出黎，所以我地過左Ｍ記傾計。又講人是非喇。

不過Martin講左好多自己既野，身為一個男仔，我覺得佢真係好勇敢。

２點幾，Liuliu送Arbe返屋企，我同Martin就行返屋企，順便送埋Lamyan。

之後行果條陰深小路真係有D驚，不過同Martin兩個傾左好多好多野，今晚的確好開心。

Thursday, 13 January, 2005　　　　　雀巢牛奶公司廠房

　　今天好像不用上課那般。

中化堂，看了一套法國電影，名字倒忘了。故事是講述兩對夫婦，其中一家的男和另一家的女從前是情侶，但後來雙方也各自結婚，可是最後他們卻在此重遇，並巧合地成為鄰居。故事就是由這裡開始，故情節一直環繞三角關係，男的婚外情，女的紅杏出牆。這片挺悶的，但結局卻令人可笑，只因大家看到了少許恐怖的鏡頭， 便叫了起來並特意營造氣氛，把這套片變成恐怖片那般。

Lunch後，我們讀BS和Account的人便往元朗雀巢廠房參觀，大約有三十人。

到達會議室後，職員介紹公司資料，我們共分三組，穿上保護衣後，一行十人到各生產線及設施參觀。職員向我們逐一介紹各種機器，我們看到了一些產品的整個生產過程，例如乳酪、荳品、雪糕等。甜筒的包裝過程很是整齊和具規模，令我留下深刻 印象。最後我們進入了雪糕冷藏庫，那裡零下二十多度，房很大也很冷，很難想像那些搬運雪糕的工人怎樣可以逗留在此，我們也只留了一兩分鐘。出來時，阿腸笑說他的心停頓了，薯仔也說他的褲子忽然涼得很。

我們是第一組參觀完回到會議室的，我們便開始進行這次Trip的另一目的----吃。

沒錯，我們可以盡情享受該公司的產品。

我們所有人首先取了乳酪，相信也很美味吧。

第2輪，腸和薯取了奇趣杯，他們說那雪糕像石頭一樣硬，薯更因此把匙弄碎了。

後來其他組也回來，大家也紛紛選擇食物。

Q & A時間，我拿了Drumstick。

大家也顧著吃，並不踴躍問那3條問題。可是職員卻詳細地解答。

完了所有問題，我們還有最後15分鐘。其實大家那時已很飽，而且冬天吃雪糕，並沒有特別滋味。

大家也選了飲品作最後衝刺。我最後吃了4樣東西，而大部份女仔也吃了3樣。

聽說林國男吃了8種食物=.=

回到家中和媽媽傾談，她笑說問我感受是否像以前小學般參觀可樂廠、維他奶廠。

媽媽，又怎會一樣呢？我長大了，這次是學習呀。

其實我感覺雀巢的產品挺多了，但原來生產過程並不是那樣龐大。

不過這也是一個很好的體驗。