第一廁 20041207
(台上只有一座廁塔，女人[1]坐於其上。她像在如廁，只有腳尖頂著地，微微的顫抖，雙腳抖得比較厲害，上身有些輕微擺動。那種顫抖，不知是感覺寒冷還是驚慌)
(她好像有些甚麼想說，但又不知應如何說出口，就只在不停的抖著)
(終於，她開口了……)
1：今日，天氣好好。
您見唔見到？
太陽好紅、好紅、好紅……
個天，一絲雲都無，
藍到，照得見個海。
好耐無見過海，
唔知，仲有無浪；
翻得比人更高浪，
一個接一個，一個過一個，
洶洶湧湧咁，最後，又無聲無息咁消失。
您，口唔口渴？
(像在等候著回應，跟著按下沖水制)
我唔餓，真係唔餓。
您餓？
我見到好多塵，
晌陽光裡頭有好多塵；
佢地一粒一粒，一粒一粒咁，
晌裡面跳舞。
係，係，
佢地晌度跳緊華爾滋。
(哼著華爾滋的音樂)
我地都有好耐無跳過舞，
好耐無晌水晶燈下面跳華爾滋。
好熱，因為每個人都望住我地；
個心跳得好快，
您一隻手捉住我一隻手，
另一隻手，放晌我背脊。
您記唔記得，我有無笑過，
我同您跳舞時候，
有無，笑過。
呀!流星啊!
您有無許到願？
無，我無。
天上面，一粒星都無，
全部變晒做流星，
飛走，去佢地自己想去地方。
我無。
我只係想留晌度，
留您身邊；
聽您講故事，
一個一個理想故事，
五顏六色故事。
您一路講，我一路聽。
您，口唔口渴？
(像在等候著回應，跟著按下沖水制)
今日，天氣好好，
陽光總係帶比人溫暖感覺，
越過一個一個山頭，
爬過樹，又跌過落；
摘過野果，食過樹皮。
日子，就快快樂樂咁過，
流好多汗，好多汗。
眼淚，一滴都無流過 。
無，一滴都無。
越過晒所有山頭，
就可以返番您身邊，
又可以留晌您身邊。
係咪月蝕呢？
您見唔見到月亮？
見唔到......
咁，曾經晌月亮下面承諾呢？
真係月蝕......
晌山頭變紅一日，
我種棵樹。
棵樹，唔知而家點呢？
有幾高？有無開花？
重唔重？又有無比人蝦......
仲記唔記得......
我度......
我諗，棵樹應該仍然晌度，
有無人，會佢樹蔭下面捉棋......
您想唔想見棵樹，
同佢捉番盤棋。
今日......
我收養隻飛蛾，
佢對翼好『令』，啡得，特別『令』。
不過，佢飛得唔穩陣，
風大一，佢都會跌落。
好彩，呢度無風。
我收養佢日，您唔度。
佢有一隻翼爛爛，
可能因為咁，佢飛得唔好。
但係，佢仍然想飛。
我唔知佢想飛去邊。
無幾耐，佢就死。
我將佢，放晌您身邊。
您，有無見過佢？
落雨。
落雨......
您，口唔口渴？
(像在等候著回應，跟著按下沖水制)
雨水打落面上便，
一都唔痛。
無感覺，
好舒服。
您，唔會知道，
因為，無人會比您淋雨；
一定會有人幫您，擋住；
擋住雨、擋住水，
擋住......
今日，天氣好好，
好到，您估唔到。
係呀，係呀，又點可能估得到；
有太陽、有月亮、有星星、有雲，
一陣風，
將佢地攪埋一齊。
一陣風時間，
好精彩。
一陣風，將一切推向巔峰，
巔巔峰峰。
唔係每個人都吹得風，
會冷親，
會顛，
會瘋......
有無人幫您擋住一陣風？
一定有，一定有。
幾大風都好，您依然會，
坐得好好，
過得好好。
每個人抬高頭，就可以見到您；
見到您微笑，
見到您容光煥發，
見到您向我揮手，
見到您。
見到您就得。
今日天氣，好好；
您想唔想吸新鮮空氣？
哈。
好舒服。
只要晌您身邊，
吸一口氣，吸一口氣......
您，口唔口渴？
(像在等候著回應，跟著按下沖水制)
您睇，
太陽、月亮、星星同雲，
終於分開，
終於，就，分開。
彩虹係咪應該出打個招呼，
用流星灑一場雨，
掀起兩三個白頭浪，
再翻幾陣風。
跟住，一切一切就會好似以前咁，
乜都無變。
您依然向住我微笑。
天氣......
好好......
好到，
我咩都睇唔到。
就留晌您身邊，
一直，一直，
留晌度。
您，口唔口渴？
(像在等候著回應，跟著按下沖水制，但卻沒沖水聲傳出；於是，她再按，再按，急慌了，想往外走，卻發現原來一直被困於細小的斗室內，團團轉，竟就四處碰壁，出不了去。慌亂一會後，她回到廁塔身邊，安慰著它，愛撫著它，最後擁著它，或笑，或哭，好像面對著一個垂死的病人。終於，她決定雙雙殉情，沉溺廁塔之內)
(完)
io：這個戲要寫的是嚴重的個人崇拜，那年頭，誰能令人能如此痴迷，想就只有天安門
上那人頭像。會這樣瘋狂的又會是誰......
