尋常百姓家
可能發生在我們的家庭、別人的生命，也許曾見於報章新聞，或道聽途說。小市民的人生一樣充滿欣喜
和缺憾，關愛和意外；怎樣才算是幸福？又是否單看表面便能得知真相呢？

角色：
四人家庭--父、母(約四十歲) ，子、女(約十多歲)，經濟狀況中上。
老婆婆、老公公--二人衣衫殘舊、老公公要坐輪椅。
三人家庭--父、母(約三十多歲)，女(約十歲)，中上家庭。
新移民家庭--窮漢-父(約五十歲)、娣-女(約二十歲)、手抱嬰孩。
陳宅--夫(約三十歲)、妻(約三十歲)、榮仔(約十歲)，陳妹(二十多歲)，小康之家。
還有：中年漢、西裝男、少婦、業主、經紀。

--------------------------------------------------------------------------------

(背景有數幢不同式樣的大廈，有高樓和唐樓。近台後方置一六人長型餐桌，四人家庭坐其中，
父和母面向觀眾，子女坐兩旁，眾人面帶憂色，其間沒有說話，但不時有些微動作。)

(前演區近左側有一個市政的垃圾筒，有一、兩個汽水罐棄於地上。)

(燈漸亮，為晚上的街燈光、集中於前台，不用照到台後方四人。
老婆婆拖著大垃圾袋入，緩緩的向前行，不時看看地上有沒空罐，從另一邊出。)

(中年漢入，身穿外套，行至台中，手提電話響。拿電話時跌出銀包，不察覺。)

中：喂？…到樓下o勒，做晒功課未？…唔…咁乖！？爸爸記得，係…聽日二千年第一日第一時間就同
你去買…(邊行邊說，出)

(窮漢入，看到地上的銀包，再看四周有沒有人，拾起，把錢拿出，猶豫了一會，
最終把錢收起，銀包拋往垃圾筒旁，出)

(中年漢入，摸著衫袋，看看地上可有遺下銀包，於垃圾筒旁發現，喜，拾起打開看，怒。)

中：仆你個街！唔多錢果日你唔跌，千咩年蟲！(電話響)
喂！催催催！咩o野都唔洗買o勒，o的錢比千年蟲食晒呀！(收線，出)

(陳生和妹入, 有說有笑。)

夫：終於都申請到你落o黎 ，等到二千年終於一家團聚。
(妹只笑不語)
夫：要你o係朋友度住住先…
妹：我明。
(夫搭著妹的肩，笑。)

(陳妻於台後方入，挽著數個超市袋。看到夫欲叫住他，但看到身旁女子，站住)

夫：聽日o係我同你阿嫂結婚紀念，你陪我去揀份禮物o丫。
妹：(捉著夫的手)好呀！我都想買份禮物比個侄仔。
夫：我冇話比佢地知你落o左o黎。
妹：哦？咁多年無見，都唔知認唔認得。
夫：唔好講咁多，行o勒，唔係晏。
妹：唔。
(二人出)

(妻行上前台)
妻：你個無良心鬼，o岩o岩先至捱到份首期，你就包二奶！我要你一世都後悔！
(業主入)
業：陳太。
(妻出)

業：嘩，大支o野！叫都唔睬，重諗住問o下層樓點。
(經紀入，西裝公事包。)
經：朱老闆！
業：喂！阿黃，有冇聲氣？
經：減五萬！
業：有冇病呀！樓價升緊要我減？！
經：朱老闆，層樓又未交吉，我都話等住客搬o左，執執間屋佢，企企理理，唔好話唔洗減五萬，
加多幾萬都得啦。
業：D人買唔起就咪買，幾萬都講價，冇D誠意！
經：o甘等你D住客搬o左先再搵人睇過。
業：我放多幾間地產，你荒無人買！(出)
經：朱老闆！ 講明獨家代理，朱老闆！ (出)

(西裝男拿著罐裝飲品入)
(老婆婆從相反方向入)
(老婆婆望著男的罐，笑笑)
(西裝男離老婆婆，老婆婆尾隨之)
(西裝男把罐拋入垃圾筒，向老婆婆討厭的笑)
(西裝男出)
(老婆婆沒有介意，往垃圾筒拾回罐)

婆：(輕鬆地) D後生，估阿婆發瘋咩，阿婆老，無工做，無人養，後生仔，唔做得咁白鴿眼。
(邊行邊說，出)

(燈光集中照背景某一個單位，再慢慢亮)
(婦人拿著椅入，放近前台，不時向下方望，像於露台向樓下看，突然有點不安，來回踱步，
稍稍整理衣衫和頭髮)

(門鐘響)
(婦人一呆，才往開門)
(中年男人和小女孩入)
(二人拿著多袋購物紙袋)
女：媽咪，DADDY買左好多o野比我呀！
(中年男放下紙袋)
(女於其中一袋拿出一個手袋)
女：呢個手袋，我幫揀o架，睇下鐘唔鐘意？！
婦：(未看)鍾意，你揀o既媽咪一定鍾意。
女：DADDY話今晚同我地一齊食飯呀！
(婦愕然的望望中年男人)
(男人手電響)
男：喂？
(婦、女望著男)
(男行遠)
婦：乖，拎D o野返入房先，放好，唔好擺到周圍係，去啦！
(女雖然想留下，但也只好從命，出)
男：(把聲壓低)好啦，好啦！ 我而家返黎，妳唔好喊啦，係！ 即刻返。(收線)
婦：你都係襯個女未出黎就消失。
男：妳同個女講，我下個禮拜一定同佢食飯。
婦：做唔到，又何必應承呢？！
男：我今日咪同佢去買左所有佢想要o既o野囉。
婦：算啦，夫妻先至會嗌交，你扯啦，我廢事個女人以為我唔放人。
男：我下個禮拜一定會同個女食飯。
婦：好，我會叫佢等你。
(二人對望一會)
(男出)
(婦感失望)
(女戴著帽入)
女：DADDY，睇下，我戴左頂帽幾靚(看不到男)媽咪，DADDY呢？去左廁所呀？
(婦沒回答，坐在椅上)
女：(走近門口)DADDY！ DADDY！ (走向台口望下)DADDY！ DADDY！
你又講大話！衰人！ 我憎死你！
(氣沖沖跑回入內)
(婦仍坐著，演區燈暗)

(老伯坐輪椅慢慢入)
(老伯面帶笑容的向遠望，衣衫有點單薄)
(老婆婆入，向老伯行去)
婆：伯爺公，又出冷巷吹風，你有無著夠衫呀？！
(老伯笑笑)
婆：番風呀伯爺公，老人家冷親就手尾長。
(老伯也只笑笑)
(老婆婆把老伯推近台前)
婆：伯爺公呀，記唔記得今日咩日子？今日伯爺婆牛一呀！你記唔記得應承過，要送個翡翠觀音比
我旁身o架？
婆：貴就貴左D，不過你話最緊要伯爺婆鍾意！(行往老伯面前，從衫袋拿出一個玉咀)拎住，拎住。
(老伯免力拿住玉咀)
婆：呀！！ 伯爺公，個翡翠觀音好靚o番，送比邊個o架？梗係好貴o勒！
(老伯望定老婆婆，笑得更燦爛)
婆：送比我o架？
陳太V.O.：(急)榮仔！ 榮仔！ 你同我躝返黎！
(榮仔跑入，踫跌了老公公的玉咀)
(榮仔沒有理會，出)
(老伯的手慢慢垂下，俯視地上的玉咀)
(老婆婆慢慢的蹲下，看著地上的玉咀，難過得說不出話，她拾起爛玉咀，眼也紅了，但忍著沒哭出來，
再把玉咀遞給老伯)
婆：(哽咽)哎呀，觀音娘娘有靈呀，跌左落地都無爛喎，伯爺公，個觀音好靚，好透，好……
(淚不禁往下流)

(老伯笑笑的望向老婆婆，手緩緩遞起，慢慢替老婆婆抹去面上的淚痕)
婆：伯爺公，舊玉真係好綠，好透。
(老伯的手緩緩垂下，仍笑著望向老婆婆)
婆：你呀，著咁少衫，攝親就惡攪o勒，我推你返入屋。
(老婆婆起身，推輪椅)
婆：今日何姑娘又黎搵我地，問我地做乜重未申請老人金，我話佢聽伯爺公唔鐘意人地施捨囉，
我講得o岩哦呵？
(老伯微微點了一下頭，笑)
(二人出)

(燈光集中於背景大廈的另一個單位)
(西裝男推著一架家用餐車入，上面放了數支紅酒，酒杯和蠟燭台)
(西裝男這時已脫去外衣和領帶)
(西裝男斟了兩杯紅酒，點著蠟燭)

西：(向台口)DARLING！ (頓)o曳呀你，行幾步都懶。(出)

(西裝男抱著一個身穿睡袍的女子入)

西：係咪好好情調呢？
女：算你啦，都交足功課。
西：唔係交功課o架，有HEART o架！
女：衰鬼！
西：可以放低你未o者？
女：抱多一陣先。
西：飲杯酒，再抱過，好無？
女：又好。
(西裝男放下女子，有鬆一口氣的表情)
(女子仍依偎著他)
(西裝男拎起兩杯酒，一杯給女子)
女：今晚月色好朦朧，同我o既心情一樣。
西：你講說話真係有詩意。
女：唔知係咪我對眼比較水汪汪(眼定定望著男)所以先至覺得朦朧呢？
西：我不嬲都話你有一雙水汪汪的黑眼睛o架，飲杯！
(女子又依偎著男，一瞼陶醉)
女：今晚，留o係度陪我！
西：你知我唔過夜o架。
女：為我破例一次都唔得？
西：雖然你係熟客，但係五舊水係唔過夜o架。
女：一次都唔得？
西：我對訂落黎o既規矩一向都嚴格執行。
女：唔！ (甩開男)
西：HONEY，笑番啦，嬲得多有皺紋o架。
女：我有皺紋﹐無皺紋都唔關你事。
西：(從後抱著女子的腰)有皺紋就唔靚女o勒！
女：衰人，重對人咁鬼好。
西：未夠鐘，必然係顧客至上。
女：(推開男)你！啍！ (出)
西：重有五分鐘喎.DARLING！ (推車出)可以攬多陣。(出)

(婦拉著椅，出)
(燈光背景另一座大廈)

(窮漢挽著數袋超市袋入)

窮：娣！娣！ 阿爸返o黎o勒！
(娣揹著嬰孩入)
娣：爸，細聲D，阿弟o岩o岩先收聲，訓著。
窮：(輕)哦，阿爸買左好多o野返黎。
娣：(高興)睇過，(看看買了甚麼)爸，你無買奶粉。
窮：哎呀，漏左添，我而家去買過。
娣：唔好o勒，襯阿弟訓左，我煮野你食先啦，你都未食過飯。
窮：(傻笑)嘿嘿，係呀！ 係呀！ 你都餓。
(娣笑笑， 拿過數袋，出)
窮：(行近台前)今晚個月好靚，唔知你阿媽o個邊個月有無咁靚，咁圓。
(娣急步入)
娣：爸！ 你有工開呀？ 有錢買咁多o野！
窮：係呀，係呀，不過計日薪，散工o黎o架，散工o黎o架。
娣：咁我就放心！有工開就唔好去靜坐o勒！
窮：唔得…...同D鄉里約好晒，一齊爭取無證媽媽居留權，妳都想呀媽落返o黎o架！
娣：我諗過o勒，我想返上去。
窮：唔得，咁辛苦落到黎，幾大都唔返上去。
娣：爸，"里"唔到一世o架，我想光明正大做人，我想返學讀書。
窮：就合法o架o勒，就合法o架o勒。
娣：爸，不如我地一齊返上去？
窮：傻左呀妳，女呀，幾多人仆倒o黎香港，重有細佬呢？ 佢香港出世o架。
娣：咁又點 ？ 阿媽都唔o係身邊。
窮：阿爸o係度。
娣：阿弟要食奶粉，你連奶粉都唔記得買。
窮：妳怨阿爸無用，無錢。
娣：唔係呀！
窮：我而家就去搵錢返o黎！ (急出)
娣：爸！爸！
(弟哭)
娣：乖，乖，家姐去煲D粥水你飲，唔好喊，生性啦。(哽咽)(出)

(燈光照背景另一座大廈某單位)
(傳來榮仔喊聲)
(榮仔哭著入)
榮：媽咪呀，比我返入屋企啦，媽咪呀！我乖o勒！ 媽咪呀！ 開門呀！
(陳生和妹拿著兩袋百貨公司袋入)
陳生：榮仔？ 做乜o係走廊喊，跌親？
榮：(望到是父)爸巴，媽咪唔比我返入屋企呀！ (仍在哭)
陳生：做咩事？？ 係咪你又百厭，激嬲媽咪？
榮：媽咪話憎死你，憎埋榮仔，所以唔比我返入屋呀。
陳生：咩事呀？妹，你幫我拖住榮仔，我入去睇下咩情況先。
妹：唔，你快D去睇下阿嫂先。
(陳生急入)
妹：(幫榮仔抹眼淚)男仔o黎o架，唔好喊啦！
(陳生V.O.：阿珍，阿珍，妳做咩反鎖度門？ 阿權呀，比我入o黎先啦！)

(傳來撞門聲)
(妹也緊張)
陳生V.O.：阿珍！ (大叫) 阿珍！
(陳生抱著陳太入，把她放在地上)
陳：報警！ 快D，叫白車！
妹：點報呀？
陳：(急忙拿出手電按999)喂，999？有人自殺，有人自殺….呢度係何田村四座九樓，快D，快D叫白車，
快D，人命o黎o架，重問咁多！(收線)珍！(拍她面)珍！
榮：媽咪，媽咪，妳起身啦，榮仔乖，聽話唔曳o勒！
陳生：唔等o勒！ 我地搭的士去醫院。
妹：哥，你冷靜D先。
陳生：(抱起陳太)唔等o勒！ (出)
妹：(抱起榮仔) 哥！ 哥！ (出)

(差人急步入，於另一邊出)
(差人再入)
差：(通話器)PC486386
報案單位無人，現場留低一個炭爐，相信係炭燒自殺，現場整齊，相信無可疑，ROGER。

(朱老闆入)
(朱看到差人，愕然)
朱：阿SIR，打劫呀？
差：你o係度住o架？
朱：唔係，我住樓上，不過我係呢度業主，諗住順便搵陳生陳太傾下租約。
差：懷疑有人自殺，你有無方法可以聯絡到戶主？
朱：我o岩o岩行過，咩都唔知o架，阿SIR！
差：麻煩你提供一下資料o者。
(二人邊行邊說)
朱：阿SIR，我正當商人o黎o架！
差：依家無人懷疑你，淨係想你提供資料。
朱：阿SIR，報紙會唔會登o架？
差：有咩關係？
朱：層樓放緊盤o架，死過人，好惡賣o架！
差：我都無話死人！
朱：自殺喎！
差：自殺實死o架？ (二人出)

(傳來微弱的歡呼聲)
(燈再照另一層大廈某單位)

(台後的四人家庭演區燈亮)
(父起身，出)
(其餘三人沒甚麼大動作)
(父拿著兩個細公文袋入)

父：(坐回)決定o勒！
母：你倆個要聽阿叔同大姨說話。
父：(把公文袋給仔女)裡面有銀行存摺，圖章，保單，屋契，一人一份。
母：拎住啦，萬一有咩……事，你地都可以獨立，照顧自己。
女：無事o架，一定無事o架。
母：係囉，唔會有事，你地唔駛擔心。
仔：如果一定無事，我地唔要呢D o野！
父：唔怕一萬，你地大個，要明白手術o既o野無百分百話成功定失敗。
母：媽咪好錫妳地，都好唔捨得妳地兩個，不過爸爸唔可以唔做呢個手術。
父：老婆…….再考慮清楚，萬一…….
母：如果唔搏，我就會無左個老公。醫生都話，切一半咋嘛，我都簽左字咯。

V.O.: 10、9、8、7……

母：o黎，一齊出去睇下99年最後一個月光。
(母拖著子女，父跟著行到前台)
母：過左今日，又有新o既一日。
父：2000年，總有新希望。
女：我執乾淨間屋，等你地返屋企。
子：我都幫手。
(四人靠得更緊)
母：個月光就好似個肝咁樣。
父：原本係圓月。
母：我一樣鍾意月半。
女：我都鐘意。
子：我都係。
父：(感動)我都係…… 新0既一年……

(燈漸暗)

(完)

--------------------------------------------------------------------------------

     歡迎給予指正和意見或感想，先謝!