景: 全劇於一日內發生，景亦只有杏家大廳。

人物：
(杏) 杏富貴 - 杏家之主，四、五十歲。
(杏) 杏吉祥 - 富貴之孖生弟弟。
(太) 杏太 - 整天整日只顧妝扮，看上去只有三十多歲。
(富) 杏大富 - 約二十歲，杏富貴之大兒子，游手好閒。
(貴) 杏大貴 - 約十八歲，杏富貴之女兒，愛發明星夢。
(三) 杏三 - 約十六、七歲，杏富貴之小女兒，不多說話。
(管) 杏仁管家 - 約四十歲之男子，衣履整齊。
(舒) 杏舒 - 杏吉祥之女兒，斯文淡定，深謀遠慮，二十多歲。
甲 - 工人，約五十多歲，男性。
乙 - 工人，約五十多歲，女性。
丙 - 工人，約三十多歲，男性。
丁 - 工人，約二十多歲，女性。
(記) 記者 - 環保雜誌記者，認真。
(明) 小明 - 小明周刊記者，滑頭。
(趙) 趙公子 - 約二十歲，富之友，闊少爺一名，游手好閒。

--------------------------------------------------------------------------------

(豪華而俗氣之大廳，紅、金為主色，非常大的梳化置於場中，另有茶几，水晶吊燈；
有一條長樓梯擬通往二樓，樓梯亦鋪上紅地毯。)
(台左擬是大廳正門入口，台右有一度側門，擬通往小花園 )

(時為早上)
(杏富貴身穿晨褸，皮拖鞋，戴眼鏡，從二樓入，行落大廳, 坐於沙發上)

杏：(大聲點) 長白山千年人蔘、茶﹗
(甲捧著托盆入，上有千年人蔘及茶)
甲：老爺，早晨。飲茶。
(杏拿起支人蔘大力嗅著，放下)
杏：(拿起茶杯) 咩茶？
甲：鹿鼎山馬騮搣。
杏：無客人0係度，唔駛吹到咁大。
甲：陸羽香片。
杏：(飲茶) 下次買黃金0麥得0勒。
甲：柏佳買二送一呀。
杏：咁圍起黎係咪平過黃金0麥？
甲：平三毫0架。
杏：入左幾多貨？
甲：買入60，送30，總共90。
杏：做得非常好，不過下次問過我或者管家先，我最唔鍾意人自把自為。
甲：係0既老0野，老爺﹗
杏：放番好支千年人蔘，呢度唔駛你0勒，叫阿丁出0黎。
甲：係0既老__爺。(出)
(杏把茶杯放茶几上)
(丁入，有點姣，手拿報紙)
杏：丁丁~
丁：老爺 ~ 早晨呀 ~
杏：(拉著丁的手)琴晚訓覺有無掛住老爺？
丁：有頂啦，掛到人心肝仔都痛啊 ~~
(杏拉丁坐在身邊)
杏：陰功咯，等老爺呵番 。(欲伸手摸丁之胸)
丁：(撥開杏的手) 少奶﹗
(杏驚，立刻坐好)
(丁笑)
(杏回頭望見無人)
杏：哈﹗撚化老爺咁大膽﹗罰妳錫我咀咀一啖。
丁：唔制，你朝朝都唔刷牙0既﹗
杏：你唔係鍾意老爺陣"除"咩？
丁：我鐘意你除......
杏：除咩？
丁：除底副眼鏡，成日"硬"親人地眼尾。
杏：除除除。(把眼睛除下) 錫得未？
(丁差少許便錫下去)
丁：哎呀﹗
杏：咩事幹？心仔又痛？
丁：老爺今朝未封利是比我。
杏：琴晚咪封左囉。
丁：咁人地琴晚夠同你咩左咯。
杏：都無成事，臨門一腳，老爺咩喎。
丁：哎唷，我成個人訓晒0係度任你咩喎，你射唔射門唔關我事0架~~
杏：咁爭住先0勒。
丁：老爺，我同你講心0架嘛，邊有得爭住先0架。
杏：一次咁多？

(太太從樓上下來，身穿睡袍，頗性感。)
(丁立即拿起報紙)

丁：總理克林鄧醜聞案最新發現。
(杏也察知太太正下來)
丁：原來溫斯k裙上面0既液體係屬於未溶解0既洗潔精，同克林總理無直接或者間接
關係。
太：老爺，早晨﹗
杏：(轉頭望望太太)早晨﹗士v克﹗
太：咁早就讀報0勒？
丁：(起身)少奶早晨。
太：(有點騷) 以後大家叫我英文名。
杏：妳改0左個番鬼佬名？
太：(挺胸) 以後我唔再係少奶，我叫Dornai (一瞼自豪)
(丁看看自己的胸，再看看太太，有點羨慕。)
杏：(盯著太太的胸部) 妳琴日唔係咁0架？
太：我前幾日係哉慈買左件低胸露背高叉see through0既晚裝，但係個胸位爭左少少，
件衫又唔改得，so……今晚我就可以著件新衫參加你個授勳典禮。
(杏仍盯著太太的胸)
(太坐了在沙發上)
(太示意丁出)
(丁出)
杏：琴晚妳比我睇咪掂囉。
太：我要養精蓄銳，以最好0既狀態見新聞界、法律界、名流界、娛樂界、政界0既朋
友。
杏：咁妳重唔試衫？
太：一早起身，梗有小小水腫，萬一掙爆件衫咪弊傢伙﹗
杏：唔怕，唔怕，得我睇妳0者。
太：要爆，就要係娛記0既相機面前爆，爆得轟轟烈烈，爆得有價值，爆到上頭條。
杏：咁咪蝕底晒？﹗
太：你知唔知登一日頭版收幾錢？登幾份頭版加埋又幾錢？爆一件晚裝又幾錢？
杏：(想一想)係0番，都係士v克知慳識儉。
太：駛乜講，(略大聲)上等一級血燕燉富士山溫室木瓜。
(杏在研究太太的胸，太太也任他)

杏：幾好手功喎，真0既一樣。
太：你知唔知值幾多張獅子股？
(乙捧著燉盎入)
乙：少奶，妳盎木瓜。
太：乙﹗以後唔好叫少奶 ( 挺胸 ) 叫Dornai。
乙：墮奶？……嘩，咁0既名都比妳諗倒，係咪朱丙幫妳改0架？
太：讀多兩個錢英文啦，乙﹗重有，我要口既係上等一級血燕燉富士山溫室木瓜，記得
講全名。
乙：都無人客0係度。
太：老爺唔係人咩？無客咋嘛﹗
乙：係0既墮奶，趁熱食妳盎上等一級血燕燉富士山溫室木瓜啦。
(太太接過盎木瓜)
太：上去叫二小姐起身。
乙：嘩，呢件任務好艱鉅0番。
太：你話，再訓，塊面就唔上妝，用唔倒0個支WC III 美顏精華素，而今晚個Party
除左有好多娛記，邵九叔都會0黎，想坐0係佢身邊就唔好再訓。
乙：哦，咁我去0勒，少…墮奶。
(乙上樓)
太：衰佬，捨得拎開個頭未？係咪要我擺盎木瓜0係你頭上面食？
杏：唔拘，唔拘。
(太太於是把盎放在杏的頭上)

(富戴著烏蠅超入)
富：yahoo! 兩位幾時變得咁恩愛？
(杏一抬頭便弄瀉了盎內的水，弄濕了太太的衫)
太：好彩我未換衫，睇你，攪到我濕晒。
富：yell﹗媽咪，妳好得喎﹗
太：啍，你媽咪就幾時都咁得，係你Daddy唔得0者﹗
杏：喂，我假假地都係紫杜鵑鑽石金針勳爵喎﹗
富：PETER仔夠係金牡丹藍寶石高級經理啦﹗
太：PETER仔？做健康米粉傳銷0個個？
富：媽咪Really好記性。
太：我一日食一包0架，PETER仔話固本培元，加速細胞新陳代謝，影后PEGGIE都
係食佢。
富：一日一包？
太：唔通早午晚三餐咩﹗
富：一個禮拜一包0架，媽咪。
太：噢，唔怪之得呢排我聰明0左咁多。
富：(打呵欠)我入房先。
杏：大富，今晚記得盛裝出席。
富：DAVE﹗放心喎DADDY，我特登訂左對JORDAN AIR Y2K EDITION限量版，加
埋對SUPER利賓納紅烏蠅鏡，想唔做全場FOCUS都唔得。
杏：我杏富貴0既仔，無失禮0既。
富：SURE﹗唔講0勒，我SLEEP陣先，SEE YOU LATER。
(富上樓)
杏：大富仔似足我後生0個陣。
太：係呀，一樣咁晚出早歸。
杏：頭先妳唔話佢？
太：個仔讚我喎，做醜人都要睇時辰﹗我上去換過件衫。(起身)
杏：係咪0個件低胸露背高叉SEE THOUGH？
太：哈，你又記得幾清楚0番。
杏：我記性一向都唔差。
太：咁我幾時生日，結婚紀念日係幾時？出年結婚幾多週年？你有幾多身家係我唔知
0既？你總共有幾多個女人？答啦﹗
杏：哈哈，哈哈﹗
太：扮啦，你最叻就係0係某D時候扮老人痴呆，睇你幾時扮扮下變真。
杏：換衫，換衫，"UP"住唔好。
太：啍﹗(上樓)
(杏目送著太離去，喝了口燕窩)
杏：唔好0徙。
(杏的手電響)
(杏看看來電顯示，笑。)
杏：蝶蝶呀，咁早就掛住我0勒﹗(頓)我就梗係分分秒秒都想住妳啦﹗(頓)係咪真0架，
同我預慶？唔係，預祝？淨係聽到妳講"哎唷"就已經合合慶啦~~(頓)好緊要事？無
問題，蝶蝶叫到，唔緊要我都即刻飛身到。(頓)咁妳坐定定等我咯喎，哈哈，訓定
定就重好啦﹗(頓) BYE~
(杏上樓)
(貴身穿貼身衣衫從三樓入)
貴：DADDY，旱晨﹗
杏：貴女，今日咁早？
貴：媽咪話再訓就用唔到0個支成萬銀0既WC III美顏精華素，咁我咪立即逃離我0個
張充滿誘惑0既床囉。
杏：DADDY趕時間，乖，自己落樓食早餐。
貴：DADDY~~我有個請求。
杏：咩請求？睇中左朱媽里定係菲獵加毛？
貴：時裝同媽咪講0既。
杏：同DADDY就講心？
貴：我想改名。
杏：改名？
貴，你聽下："二千年特區小姐冠軍係杏大貴﹗"嘩﹗幾鄉下﹗
杏：咁妳想改咩？
貴：李嘉欣個欣，袁詠儀個儀。
杏：咁即係杏欣儀？
貴：杏欣儀﹗係咪好好多呢？聽落實紅咁呀﹗
杏：咁不如叫玲玲，一定做梗少奶奶。
貴：杏玲玲，都幾好，咁不如杏嘉玲，好唔好？
杏：X家鈴？﹗梗係唔好。
貴：咁杏玲呢？
杏：好好好，妳同媽咪商量啦，DADDY真係好趕時間。
貴：哪，係0架0勒﹗咪又話人自把自為呀。
杏：係，係，乖，落去食早餐。
(杏趕著離開，出)
(貴下樓，到大廳去。)
貴：二千年特區小姐杏玲﹗唔錯，幾順口。杏玲，杏玲。都唔錯。
(坐到梳化)
貴：高鈣脫脂北海道純鮮牛奶..(頓)最上鏡小姐杏玲，都唔錯。

(丙捧著牛奶入)
丙：二小姐，高鈣脫脂唔洗強調，唔值租0架。
貴：啊？咁應該點叫？
丙：北海道極品一級牛奶配高雲地利水晶杯。
貴：嘩﹗(接過牛奶)好GRAND呀﹗
丙：係呢二小姐，老爺呢排有無話邊隻股入得過？
貴：唔…DADDY好似話記住D DOT，記住D COM。
丙：係咪好似0個D湯水DOT COM？
貴：係呀﹗阿丙你真係好鬼醒﹗
丙：都係跟得小姐多﹗
貴：係呢，你覺得杏玲個名好唔好聽？
丙：杏玲？﹗嘩﹗簡直如雷貫耳，一嗚驚人﹗
貴：哎呀，咁會唔會響得滯？
丙：咁不如杏小玲丫，幾小家碧玉FEEL。
貴：杏小玲，又係0番，杏玲又真係老土左小小。
丙：到二小姐第時選影后咪改番杏玲囉，0個陣就剎食0勒﹗

(杏舒從台左入)
舒：貴妹妹，早晨。
貴：舒姐姐。
(丙向舒略為躬身，轉身出)
貴：我改左個好小家碧玉0既名呀﹗
舒：妳的確係小家碧玉，唔駛靠改名。
貴：妳聽下先啦。
舒：我無話唔聽。
貴：杏小玲。
舒：唔。
貴：係咪好襯我呢？
舒：妳有無同大伯商量？
貴：有呀﹗
(杏下樓，已改穿西裝)
杏：(看到舒，高興)阿舒，咁早黎左0勒﹗
舒：大伯，早晨。
杏：食左早餐未？伯娘燉左血燕。
舒：我0係屋企食左先過黎。
杏：睇妳，一日瘦過一日，女仔人家要補下0架，係喎，妳又話去東歐旅行0既？幾時
出發？記得去之前同大伯講聲，我買定疊旅行支票比妳旁身。
貴：DADDY﹗
杏：又點呀，貴女﹗
貴：我改到名0勒，杏小玲呀﹗
杏：好好好，同妳媽咪商量啦(手電響) DADDY趕時間，舒，記得食血燕。(出)喂？
舒：大伯真係好趕時間。
貴：DADDY一世人最爭取0既就係錢同時間。
舒：咁如果妳有大伯0既優良傳統，就趕快飲完妳0個杯18個字0既牛奶，然後去音
樂廳度學琴。
貴：DADDY係音盲0黎0架。
舒：我意思係妳盡快飲完盡快學就慳時間，搵妳堂家姐我黎教就慳學費。
貴：舒姐姐，妳講0既說話真係有深度。
舒：作為一個有教養0既女性，深度、氣度、量度都不能缺少。
貴：咁如果作為一個女明星呢？
舒：咁就取決於攝影機0既角度，導演0既調度，同埋妳換男朋友0既速度。
(管家入)

管：兩位小姐早晨﹗
(舒只向管家點點頭)
貴：杏仁管家，今晚係文華到會定係君悅？
管：今晚係(法文)j'eur boujour
貴：嘩﹗好高檔喎，聽落。無中文名0架？
管：未有。
貴：咁你講多一次黎聽？
管：(法文)
貴：(照讀)
舒：貴妹妹，應該係(法文)
貴：(照學)
舒：好好多。(起身)我地係時候移步到音樂廳。唔好再留0係大廳度虛耗光陰。
貴：係。(飲光杯牛奶)
(二人出)
管：兩位小姐慢行。(頓)(法文粗口)(大聲點)甲乙丙丁﹗
(四人從不同入口入台)

(四人站近管家，管家立於中央)
管：今晚會有一個盛大0既慶祝宴會，官蓋雲集，衣香檳影，老爺花左咁多錢，唔係，
花左咁多心血終於得到佢應得0既(在心口比劃)小勳章。甲﹗你負責檢查D茶葉。
必定要有趙老夫人最愛0既荷蘭黑玫瑰茶，文叔同車伯伯必飲0既武夷山頂峰靈芝
壽眉，無頭無面0既用黃金0麥得0勒，不過記得撕左個招牌。
甲：知道，杏仁管家。
管：乙﹗你全屋檢查清楚，應掛張大千口既地方掛張大千，應掛畢卡索咪掛錯達文西，
愈大件愈貴0既古董記得放0係大廳，細件0既就收埋，費時有d人順手。橫樑記
住掛番孫中山親題0個幅橫扁。
乙：哦。
管：丙，酒水同酒杯就歸你管，大人物先好用水晶杯。一陣同我落酒窖，咩年份都要
執，咩身份就斟咩年份。
丙：明白，我會做得好好睇睇0架0勒杏仁管家。
管：丁，今晚大部份賓客都係攜眷出席，麻煩妳拎返端莊0個一面出黎，唔，都係唔好，
妳今晚唔好出黎，我請臨時工代妳。
丁：咁多謝咯0番，杏仁管家﹗(出)
管：無問題就各就各位，打醒一百二十分精神。解散﹗
(甲、乙轉身轉出，丙向管家躬身才出)
管：(打電話)薦人館？呢度杏蘆，我今晚想要個臨時工，(頓)市價幾多？唔，減一成啦。
(頓)5%…好啦，幾點到？ok，姓咩？趙。Ok，張單照舊send去杏富貴國際企業控股
集團會計部啦。唔。(收線)
(太太身穿吊帶裙下樓，看到管家。)
太：仁管家~~
管：太太，咁早換好衫0勒？
太：(行近管家)未換好0架，我拉唔倒拉鍊呀~~~
管：(向四圍望望)係喎，"click " 住左，太太，呢度唔夠光，我地出去花園攪。
太：好呀~~你話去邊度攪咪邊度攪囉~~Honey Almond ~~
(二人行往小門，穿過小門退擁吻，吻著轉身離台)
(杏三背著袋入，立即上樓)
(乙拿著一幅很大的油畫入)
乙：三小姐？﹗
(三做了一個不用說話的手勢，逕自上房，三出)
(乙也見怪不怪，想掛畫又不夠力)
乙：杏仁管家﹗(等了一會)杏仁管家﹗
(管家忽忙從小門入回大廳，稍稍整理衣衫，但頭髮仍有點亂)
管：咩事叫到咁大聲？﹗
乙：幅畫咁大，我掛唔到上去。
管：乙，呢幅老翻黎0架，擺到明當眼，你想丟老爺假咩？
乙：哎呀，我地盲字都唔識多個，點曉分老翻定老鼠？﹗打牌數番我就識。
管：你愈黎愈長氣，掛呢幅o係偏廳，叫阿甲幫你啦。
乙：哦，(預備離開，轉身再向管家說)三小姐返左黎，上左樓。
管：(高興)係？0岩0岩上左去？
乙：0岩0岩, 0岩0岩。
管：得0勒﹗ (示意乙可以離開)
(管家想上樓，但猶豫 )
(三拿著數本書下樓)
管：三小姐﹗
(三也是做一個不用多說的手勢)
(太太從小門入大廳)
(太太看到三，立即走過去捉著她的手)
太：三三，做乜0係宿舍返黎都唔去同媽咪say個hello？你知唔知媽咪幾掛住妳。
(三沒甚麼表情)
管：三小姐，妳食左早餐未？等我去拎盎血燕妳補下。
太：快d去拎。
(管家去)
太：睇下妳個面珠都凹晒，宿舍邊有好飯菜，媽咪都話左叫妳搬返屋企住，最多請多
個司機送妳返學。
(三搖搖頭)
(太太拉三往梳化坐)
太：做乜隻手鞋烚烚0架，有無用我買比妳個支百年深海珍珠護膚液？你睇媽咪，對手滑妳幾多？
(三抽回自己的手)
太：(不以為意)今晚DADDY攪左個大party，妳就留0係屋企，唔好返學0勒。
(三沒反應)
太：三三，乖0勒，妳成個月無見過妳DADDY0勒，係喎，老爺﹗老爺﹗(沒回應)老
公﹗老公﹗
(管家捧著燕窩入)
管：0黎0黎0黎，三小姐趁熱食，凍左無益。(放了在三面前)
太：老爺呢？
管：停車場0架ROYCE唔0係度，老爺應該出左去。
太：我唔知0既。
(舒和貴入)
貴：媽咪，妳都無儀態喎，叫到咁大聲﹗咦？三三﹗
舒：伯娘，三妹妹。
(三向舒點點頭)
太：阿舒，咁早就0黎教琴0勒。
舒：我驚貴妹妹下晝要裝身，所以咪早d0黎囉。
太：你地有無見過老爺？
貴：DADDY好匆忙咁出左去。
太：蝦﹗又唔知去左邊，今日咁大日子仲周圍去﹗
貴：媽咪，你又話比支WC III 美顏精華素我用0既。
(乙V.O：杏仁管定﹗)
管：(轉身) 又點呀，乙﹗(出)
(三趁眾人不察覺，靜靜離開)
(舒望著三離開，但沒作聲)
太：比妳塊面媽咪睇過。
(買比面靠向太太)
太：琴晚無飲水訓啦嘛？
貴：重敢咩﹗
太：0拿，一陣上去美容房用牛奶洗面，洗五分鐘度啦，跟住再用WC III ，再用蒸氣
蒸五分鐘，過一個鐘後先開始化妝就實上妝0勒。
貴：點解唔去ANITIE RUBY 0個個美容院整？
太：妳知唔知去佢度整一次夠買幾多兩碧血燕窩？傻女﹗
貴：咁我應該著邊件晚裝？
太：低胸、露背、高叉、SEE THOUGH，是旦揀一樣。
貴：哎呀…….好難揀0番，一樣咁少……兩樣啦。
太：咁快比人睇咁多，第日上電視，妳咪無話題比D娛記寫囉。
貴：係喎，都係媽咪諗得周到，咁露背先啦。
太：GOOD CHOICE﹗(向三坐的位置望去)三三，咦？三三呢？(四圍看)三三？？
(望向貴和舒)三三呢？
(舒只笑笑仍優雅的坐著)
貴：三三依然係咁無聲無息。
太：唔知佢會唔會返添﹗
(管家入)
管：咦？三小姐呢？哎﹗仲無食到盎血燕。
貴：我食咪得囉﹗(拿起血燕)
(管家有點不悅)
舒：仁管家，你頭髮有小小亂。
(管家撥撥頭髮)
管：咁多位失陪。(出)
(電話響，無人去聽)
(丁入)
丁：(接電話) 杏公館。請問邊位搵太太？好，等等。(放下電話) 太太，有位小明周報
0既記者話約左妳做訪問。
太：係咩？是旦啦，妳話我o係屋企等佢。
丁：哦。(拿起電話)太太話o係屋企等你，係，最高0個間就係，你見唔見倒？
太：妳話佢知，我地間屋高到成日比d雲遮住，係好難搵下0架。

舒：伯娘，0個d係霧。
太：總言之就好高啦。
丁：你上到最高o個間就係o架o勒，成日比d…雲雲霧霧遮住0架，係﹗上啦。(收線)
太：丁﹗
丁：係，太太。
太：幫我去服裝間拎條阿爾卑斯山羚羊頸毛披肩落黎。
丁：要邊隻色呢太太？
太：杏色繡左金線o個條..等陣，拎埋條湖水綠…重有淡粉紅都拎埋黎。
丁：係0既，太太。(上樓)
貴：媽咪，咁我駛唔駛o係度陪妳？
太：妳快d上去做facial，今晚先至驚艷出場﹗
貴：係0番，咁我上去先。舒姐姐，失陪0勒﹗
(舒微微點點頭)
(貴上樓)
太：阿舒，妳唔同貴女一齊做？
舒：唔駛0勒，伯娘，唔會有記者影我。
太：說話唔係咁講0架，舒﹗今晚有好多鑽石王老五，扮靚d，無壞0架，二叔二嬸又
唔0係度，伯娘就當妳女一樣，唉，孖生兄弟，條命爭咁遠，唉......呀，不如今晚
搵個時間，我叫老爺請妳出黎彈琴，妳手琴咁好，一定吸引到d乜公子物總理，
老爺成日都叫我幫妳搵個好對象。
舒：(扮猶豫)唔……
太：一於咁話啦，上去同貴女一齊整整個妝，再去服裝間揀件衫。
舒：多謝伯娘，咁我上去。
太：哎，不過唔好揀0個件低胸露背高叉see through喎。
舒：我都著唔起。
太：傻女，妳大把本錢，上去，上去。
(舒笑笑，上樓)
(電話響)
(甲入，往接電話)
甲：杏公館。哦，係係，請等等。(放低電話)太太，趙夫人搵妳。
太：拎過黎。
(甲把電話拿給太太)
太：唏，早晨啊趙夫人，今晚幾多點到0者？我開定台灣牌等妳(頓) 哦？(頓)真係？(頓)
啍﹗0個個咁0既演員仔會搶到我風頭咩？(頓)哦？(頓) 多謝妳特登打電話黎通知
我，好好，今晚見﹗
(把電話遞給甲)
太：36D好叻咩! (望望自己的胸) 39見過未!
(甲放好電話)
(傳來一下撞車聲)
太：嘩﹗咩事幹呀出面，甲，去睇下咩野事。
甲：係，太太。
(丁拿著數條披肩下樓, 丁披了一條在身上)
丁：太太，披肩呀。
太：妳個丁丁丫，披肩唔係真係要披上肩0下嘛？
丁：(立即拿下) 對唔住，太太﹗
太：妳好鐘意咩？
丁：邊鐘意得起﹗
太：老爺琴晚得唔得？
丁：都係唔得。
太：丁丁，比多兩錢肉緊，太太好，就即係妳好，明白唔明白？
丁：我會努力d0架0勒，太太。
太：0拿，一陣映完相，呢幾條披肩就送左比妳。
丁：0下？咁貴﹗
太：妳幻想一下，脫清光訓0係張床度，淨係得條披肩，係咪好誘惑呢？﹗
丁：(扮害羞)太太呀~~
太：哈，等我今晚都試下。
丁：0下？
太：一於咁話啦，哎，重有，妳有無依時依候食0個隻健胸素？
丁：有0架，太太。
太：(比劃著丁的胸) 咁慢0既…都係做手術快，(挺胸) 快幾多。
丁：唔好啦，太太。
(甲入)
甲：太太呀，個記者架車撞左埋老爺口架法拉利度。
(太示意丁出)
(丁出)
太：邊架？八系定九系？
甲：唔係，舊0個架，好似五、六系度啦。
太：好彩，佢人呢？
(甲轉身)
甲：先生，太太請你入黎。
(記者入，頗英俊)
記：(快步到太太面前)杏夫人，真係非常之抱歉，妳地呢度實在太大霧，我睇唔倒有架
車0係前面，整左幾多錢，我會負責。
太：(見記者頗英俊，寬容許多，示意記者坐下來) 唔關你事，都係老爺唔好，車太多，
車房又泊唔晒，唔緊要，少事，橫掂富貴都諗住換過架十系。
記：杏夫人妳真係大量。
太：(把其中一條披肩，披在身上) 係呀，個個朋友都咁話我，太過大量。
記：咁不如開始訪問。(拿出錄音機)
太：好呀。
記：今日0既訪問係關於生態環境保護，我地周刊會作一個專題報導，連續兩個月，訪
問各個社會名流太太，演藝界人仕，對濫殺稀有動物，製成各樣純毛皮產品或者裝
飾，有咩意見？
太：(輕揚披肩) 哎呀，實在太殘忍0勒，係呢，你有無帶攝影師0黎？
記：呢個訪問，未必會登相0架，杏夫人。
太：唔駛登相？你地老總話明做封面0架？
記：老總無咁吩咐喎。
太：上期阿趙夫人紋眼線都上封面0勒，哎呀，你地係咪嫌我未夠資格先？
記：杏夫人，我諗妳誤會，上期封面係熊貓安安。
太：余安安係嘛？

記：我地0個本係綠色生態環保雜誌0黎0架，杏夫人。
太：哦？﹗係﹗哈哈，我知，我同你講下笑之嘛。我d朋友都叫我咪成日亂咁同人講
笑。
記：(苦笑) 哈…哈…咁唔知杏夫人呢幾年有無買過稀有動物皮毛所製成0既衣飾呢？
太：阿爾卑斯山羚羊算唔算稀有？
記：當然係啦，非常珍貴。
太：(吸口氣)哈…哈……好彩，我都知係0架0勒。咁紫貂鼠又算唔算？
記：都係0架。
太：(深呼吸) 哈…哈……咁白狐呢？
記：當然係啦。
太：噢，咁政府有無管制入口？
記：入口皮草，合法0既。
太：合法0架﹗ (轉口) 合法？哎呀，咁買0個個人都唔知自己唔0岩咯。
記：所以我地有責任灌輸愛護動物0既訊息出去，等d人唔好只為一己私慾，使到d圖
利商人不斷獵殺瀕臨絕種0既動物。
太：你又真係講得好0岩，但係我又無開皮草店，又無..又無買口個d喜瑪拉雅山皮草，
訪問我無用0架。(小聲點) 重唔係做封面添。
記：我地公司遲d會有個全港巡迴展覽活動，會請好多名媛紳士，影視紅星，一人拎
住一件皮草扔落個火盆度，希望能夠引起社會大眾0既關注。
太：0下？咁大0徙？唔係，咁有意義？
記：所以希望杏夫人都能夠抽空出席。
太：有無記者招待會？
記：當然有。
太：(作狀)哎呀，我最怕有太多攝影機對住我，邊個明星會到？
記：有關係咩？
太：咁如果0個個夢蝶蝶會到，我就唔能夠出席口勒。
記：咁我盡量安排。
太：唔好太刻意0番，人地知我杏富貴太太0係度，可能就唔敢到0架0勒。
記：哦？
太：哈哈，講笑，講笑，我都話我最鐘意講笑。
記：(苦笑)哈…咁或者請杏夫人同我地周刊0既讀者呼籲一下。
太：(清清喉嚨)買皮草就唔應該去喜瑪拉雅山，應該去比華利山，個人本身高貴，著多
著少都係高貴，人唔係靠衣裝，人係靠金裝0架嘛﹗哈哈哈…

記：(勉強) 哈…哈……
(甲入)
甲：太太，小明周報個記者到左。
太：啊，快D請佢入黎 (轉向記者) 問完咯呵？唔送0勒，整車張單我會SEND去你公
司。
(甲出)
記：0下？
太：呀，一係你當我損左比0個D咩鬼野慈善基金，咁你記得登我個名大個D0番。
記：0下？
太：係咁話啦。
(甲入，小明跟著)
太：甲，送客。
(記者跟甲出)
明：杏夫人﹗嘩﹗無見幾日，也事幹明艷照人左咁多0既？﹗
太：哈﹗小明你真係坦白，講說話咁直接，唔得含蓄。
明：哈，我已經閘住自己唔好講得咁明白0架0勒，我驚我照直講，妳會以為我擦妳鞋。
太：哎呀，咁事實大家有眼見，點會話你擦鞋咁衰。
明：哈﹗我叫左攝影師o係泳池邊set 定機，用杏蘆做背景，間屋外觀咁宏偉，一定
要比d讀者開下眼界。
太：0係花園影？哎呀，我驚我個妝唔上鏡0番。
明：化妝師我都帶埋0黎，駛唔駛call埋髮型？
太：小明呀小明，邊個夠你周到？
明：份內事，封面好就銷路好。
太：係0番，你要唔要今晚0既菜單？
明：妳先至夠晒周到呀杏夫人﹗
太：咁都睇下對邊個0既。(大聲點) 仁管家﹗(向小明)我問問我管家先，今晚個party
佢一手包辦。
(管家入)
管：太太，有咩吩咐？
太：今晚張菜單呢？
管：0係廚房。
太：邊個0係廚房？
管：阿丙。
太：咁你叫阿丙拎張菜單出黎，順便斟杯花旗蔘桂花鹿茸茶比阿小明哥。
管：係0既，太太。(出)
明：妳真係客氣o勒，杏夫人，但係咁飲法會唔會補得濟？
太：傻0既，有幾補，如果我先生飲，就改用千年人蔘0勒。
明：咁杏先生，唔係，杏爵士矜貴命，點同我地呢？﹗
太：係0番，你個攝影師同化妝師0係泳池，駛唔駛我叫工人拎埋比佢地。
明：唔駛客氣0勒，杏夫人，映完相重要趕返公司排版，趕住印。
(再拿著菜單和茶入)

丙：太太，今晚張菜單。先生，飲"花旗蔘桂花鹿茸"茶丫。
(明接過茶)
(太太看了看菜單，交回丙)
太：你讀比小明哥聽啦。
丙：(接過) 係0既太太。(清喉嚨)
明：呀，唔駛麻煩呢位阿哥，你比張菜單我，我照登咪得囉。係嘛，杏夫人？
太：哈，小明哥即係小明哥，張菜單咁長，又真係有排讀。丙，咁你放低疊菜單得0勒。
丙：(有點失望) 係太太。(放在茶几上) 咁我返入去。
太：唔。
明：杏夫人，我地出去映左輯相先？
太：好，無問題。
(二人起身，小明拿過菜單，喝光杯茶)
太：(挽著兩條披肩)個攝影師係男定女？
明：男0既。
太：化裝呢？
明：都係男0既。
太：全男班0架，你地？
明：唔係，老細係女0既。
太：啊﹗
(二人出)

(趙公子入)
(趙四周望望，坐了在沙發)
(丁捧著托盤入)
丁：趙少爺？
趙：嗨，丁丁。(沒精打采)
丁：你黎搵我地少爺呀？佢好似訓左。
趙：管家呢？
丁：我幫你叫佢。(收拾檯面的茶杯)
丁：趙少爺要唔要飲d咩？
趙：唉，唔好客氣o勒……
丁：今日花旗蔘桂花鹿茸喎。
趙：唉，總言之就唔駛客氣啦。
丁：咁好啦，我去叫管家出黎。
(丁出)
趙：呀﹗﹗﹗﹗﹗﹗﹗﹗(叫至無氣)
(管家急入)
管：趙少爺？無咩事丫嘛？
趙：(站起來)杏仁管家......唉…….
管：有咩吩咐，即管開聲喎，趙少爺，我杏仁做得到，一定做。
趙：唉……
(富睡眼惺忪入)
富：What happen ar ？走火警？
(富與趙對望)
富：hey﹗why you here ？
趙：唉……
管：趙少爺，大家自己人一樣，有咩唔怕講。
富：唉what？
趙：杏仁管家，我……(為難)我0黎返工。
管：0下？返工？
富：what are you talking about ？
趙：唉……最衰咪隻749i 囉。
富：749i？
管：有咩關係呢？趙少爺？
趙：我實在太愛佢，我一定要得到手。
(管家不明白)
富：你叫趙Uncle買咪得囉。
趙：叫0左。
富：Uncle say no ？
趙：佢 say yes﹗
宙：so？
趙：不過有條件。
富：tell la。
趙：如果我能夠好好地做完一份工，係一份工﹗Daddy就會買比我。
富：wow ﹗so挑戰﹗
趙：咪係囉，一份工……點做喎。
管：趙少爺，咁你唔係黎呢度返工0下嘛？
趙：Daddy打比薦人館，0岩0岩有0既空缺就係杏世伯呢度。佢話0岩晒o勒，做一日，
益晒我。
富：I see﹗
趙：咁我要做d咩？
管，趙老爺今晚都會到喎，咁似乎……
趙：佢唔知幾興奮，話可以睇到我捧餐個樣，又話：哈，睇你打爛杏Uncle幾多0野先﹗
重開心過拉頭馬。
富：噓，好彩我近排無咩想buy 0者，咪一陣Daddy學趙Uncle 0個招我就Die Hard。
趙：749i呀，幾咁流線，幾咁夠馬力，扯起個帆0既時候，個種快感…個種快感……
(望富)應該點形容？
富：呀… excellent﹗
趙：係，very excellent﹗
管：趙少爺，d粗重功夫你做唔慣0架，我邊敢吩咐你做0野。
趙：杏仁管家，你即管駛用我啦，為左749i ，受小小苦又有咩所謂。
富：呀，杏仁管家，你唔一定要佢做waiter 0架，你可以叫佢負責升旗。
趙：升旗？我掂喎。(作升旗狀)
富：好似話要practice 好耐0架。
趙：係0番，係0番，點呀杏仁管家？
管：少爺話點就點啦，升旗都好緊要0既。
富：你自己hand唔handle到？
趙：得呱。
富：咁我返入去sleep多陣，有problem你就搵杏仁管家啦。
趙：哦。
(富出)
趙：d旗放0係邊0架？
管：我搵人幫你拎啦，趙少爺。丁﹗﹗(向趙) 總共要升三支旗，咁d嘉賓會係花園睇
住個儀式，唔，我諗趙少爺要換過衫。
趙：唔駛著到童子軍咁0掛？
管：唔駛，不過有d似交通安全隊。
趙：0下？咁又幾cute喎。
(丁入)
丁：有咩吩咐，杏仁管家。
管：妳帶趙少爺去拎今晚預備用黎升0個三支旗，同埋換過套衫，練習升旗。
丁：趙少爺升旗？
趙：(往拉丁)行啦丁丁。
丁：你識升旗咩？趙少爺。
趙：扯帆都識，唔識升旗。
(二人出)
管：搵黎搞﹗749i 我都有架，模型啦。

(杏氣沖沖入)
杏：豈有此理，雜晒譜，d人梗係以為有錢就無腦當我傻仔﹗(坐在沙發上)
管：老爺，咩事咁勞氣？
杏：杏仁，你話口勒，紮左有無得生？
管：應該照道理就無0既。
杏：咪係囉，紮左都有得生，黃飛師傅都翻生啦，重唔告到個醫生甩褲﹗
管：但係老爺，紮左有無得生關你事咩？咁勞氣0既？
杏：你知我有幾多女人0架啦，唔做d防預措施，容乜易百子千孫﹗
管：哦？老爺你紮0左？
杏：一早紮0左﹗
管：(驚) 一早？﹗
杏：一早﹗
管：啊……
杏：0個個蝶蝶竟然話有左，重一口咬定係我﹗你話應唔應該勞氣﹗喂，你明星仔黎咋，
重未上位。
管：係…係…咁太太知唔知？
(杏定眼望著管家)
(管家不再問)
杏：杏仁，聽勞騷唔駛聽得咁認真。
管：老爺剛才講到d明星仔。
杏：咪係，不知所謂。
管：我去拎盎桂花茶比老爺下下火。
杏：唔，叫丁丁拎比我。
管：呀，丁丁同趙少爺搞緊升旗。
杏：趙世侄？升旗關佢咩事？
管：係因為咁口既："Blal Blal Blal Ba Ba Ba " 所以佢就去左升旗0勒。
杏：個老趙老矇左，搵個仔黎我度出風頭。你同我叫佢出黎。
管：係0既老爺。(出)
杏：(潮州話粗口)(打手電)趙呀？富貴呀。喂，乜事幹叫個仔0黎我度做下人(頓)749i幾
錢？你買唔起咪我買囉，當我送比細侄，生日禮物又好，畢業禮物又好，(頓)畢唔
倒咪愛黎鼓勵佢比心機讀書囉。濕濕碎啦﹗(頓) 係咩？哈哈，唉，咪係囉。
(趙拿著三面旗入，管家跟著)
杏：你自己同個仔講啦。(把電話遞給趙)
趙：喂？Daddy？哦，哦(高興) 哦﹗多謝Daddy。係，係。Bye~~(把電話交回杏) 多謝
Uncle。
杏：唔好客氣，快d返屋企，換過套禮服，今晚0黎飲。
趙：係，杏Uncle。(預備離去，突然轉身)不過升旗都幾好玩。(出)
杏：叫少爺出0黎。
管：少爺重訓緊。
杏：叫佢起身囉，有件好出風頭0既事等住佢做咁話啦。
管：係，老爺。(出)
(丁拿茶入)
丁：老爺，你杯茶。
杏：(接過，順勢捉著丁的手)丁丁~~ 今晚咩喎。
丁：好呀，我披定條披肩等你~~
杏：駛乜鬼披披肩0者。
丁：(甩開杏的手) 淨係得條披肩。(向杏拋了個媚眼，出)
杏：淨係得條披肩……(明白狀，淫淫笑)
(管家拖著富入)
(富一瞼睡容)
管：醒d啦少爺。
富：比我sleep多ten minutes 啦。
管：老爺搵你講d緊要野呀﹗

(管家把富拉至沙發上)
杏：大富仔，Daddy要你今晚做全場焦點﹗
富：(仍惺忪) 焦…焦…
杏：我委一個重任比你。
富：委…委……
杏：今晚你負責升旗﹗
富：升…升…
杏：好，乖仔，去同管家換過件衫。
富：衫…衫…
(管家扶富出)
(杏從西裝內袋抽出一份講稿)
杏：(清清喉嚨)好多謝各位今晚撥冗抽空光臨出席細佬0既授勳慶祝酒會。
(電話響)
(杏沒理)
杏：細佬三歲0係內地落黎香港，經過艱苦貧窮辛酸悲慘 0既童年，排除解決左數以萬計
0既困難。

(乙入)
乙：喂，杏公館。(頓)哦，請等等。老爺，深圳長途。
杏：哦？唔通係王秘書？(示意乙拿電話過來)喂？係。(頓)你講多一次 (非常惡) 豈有
此理﹗(潮州粗口) 你班x家拉差，重唔快d捉佢返黎﹗(收線)
乙：老爺？
(杏很憤怒又擔心)
(電話再響)
(杏望著電話，猶豫一會，接聽)
杏：喂？邊個？﹗(頓，漸變驚慌，雙目瞪圓) 你﹗你﹗你﹗(激動，昏過去)
乙：(驚) 老爺﹗(行近點) 老爺﹗(推一推杏) 老爺﹗(大叫) 老爺﹗﹗﹗﹗﹗﹗
(管家、富、貴、舒、甲、丙、丁、太太、小明全從不同入口入)
(富穿了制服，貴和舒正敷面膜)
眾：(各自不同演繹)做咩事咁嘈？
乙：老爺，老爺，老爺…

太：老公？(望向乙)點解老爺會訓左0係梳化0架？
乙：老爺，老爺……
管：乙﹗太太問你點解老爺會訓左0係度。
乙：老爺，老爺………
(小明出)
富：Daddy tired得濟，sleep陣0者。
舒：駛唔駛call Dr.Lee。
太：(望望管家) 駛唔駛呢呵？
管：(猶豫) 老爺身體一向都好好，可能今日太頻撲，尤得佢訓陣先。
(小明拿相機入)
(小明映了杏相)
太：唏﹗小明，做乜映我先生相？
明：杏勳爵……杏勳爵訓著左個樣實在太甜，我一時忍唔住。
太：我訓著左重甜，你要唔要映？
明：哈…杏夫人真係會講笑，無乜事我走先。
太：好呀，我諗我都要換衫，丙，送客。
丙：小明先生請。
（明與丙出）

貴：Daddy真係訓著左？佢從來唔會0係梳化訓覺。
太：佢從來唔會一個人訓添﹗
舒：不如同大伯搽d紅花油？
太：係0番。丁丁，拎支瑞士羊胎素紅花籽油出黎。
丁：係，太太。(出)
甲：駛唔駛斟杯蔘茶比老爺濕下口？
太：斟杯茶得0勒﹗
(甲預備出)
太：呀，唔好，斟杯水都得0勒。
甲：哦。(出)
貴：媽咪，如果無乜野，我返上美容房0勒。
太：上啦，上啦，個樣緊要。
(貴出)
太：舒，妳都上去啦，facial最驟忌做一半唔做。
舒：(望向杏) 但係…….
太：唏，妳大伯要訓，妳企0係度都無用0架。
舒：咁…我上返去先0勒。(出)
富：咁我係咪都可以leave？
太：你係長子嫡孫，梗係企0係度。
富：咁trouble0架﹗咁得唔得sit呀？
太：sit啦，sit啦，一個鐘意訓，一個鐘意sit，兩個都咁鬼懶。
(丁丁拿油入)
丁：太太，油呀﹗
太：蝦.﹗
丁：妳支瑞士羊胎素紅花籽油。
太：(滿意) 妳幫老爺搽下"云精" ，唔駛搽咁多。跟住比佢索下。
丁：哦﹗(幫老爺搽油)
富：Daddy會唔會唔醒0架？
(乙仍呆立一旁，低喊著老爺，老爺)
管：我"的"返阿乙入去先。
(管扶著乙)
(丁把老爺的手放在自己的胸上, 老爺有些微反應)
太：妳個矇丁，我叫妳比支油老爺索，唔係妳個胸。
(丁立刻把老爺的手放下)
(丁跟著比油老爺索)
富：媽咪，頭先Daddy好似真係有d reaction喎。
太：真係？
富：try多次咪知囉。
太：丁丁，比老爺索多次。
丁：索油定索我？
(太望向富)
太：係0番，你見到你Daddy索邊樣0既時候有反應？
富：oh？ (做索油和摸胸的動作) 唔sure0番。兩樣一齊do囉。
太：咁妳兩樣一齊做啦，丁。
丁：哦﹗(再把油給杏索，又把杏的手放在自己的胸上)
(甲拿水入)
(甲見杏的手放在丁的胸上，大怒)
甲：(把水潑向杏)太過份口勒﹗﹗(拉著丁的手) 女，我地扯﹗
丁：爸，我自願0架。
太：撞鬼你咩，甲﹗張梳化唔濕得水0架。
富：嘩﹗甲叔好堅喎﹗
(甲恍如聽不到太和富的話)
甲：我地黎打工，唔係賣身，有尊嚴無呀妳？
丁：尊嚴唔值錢0架呀爸﹗
甲：妳要咁多錢做乜？有得食，有得住﹗妳重要乜野？
丁：有錢我地就唔駛留0係度。
富：媽咪，佢兩個排戲？
太：係呱，家庭倫理大慘劇。
(太太和富真的像在看戲)
甲：0係度有乜唔好？有得食，有得住。妳重要乜野？
富：d台詞講完又講0既。
太：佢地自己度係爭d 0架0勒﹗
丁：離開呢度咪有尊嚴囉。
甲：妳o係呢度都可以有。
丁：無o架﹗我地只會一世都抬唔起頭。
甲：女，阿爸累左妳。
丁：爸，我丟你架。
富：原來做工人都好講面子。
太：不過面係人地比0個0番。
甲：女，阿爸同妳扯把啦。
丁：爸，而家出便搵工好難。
甲：我又唔信餓死我地。
丁：咁我地兩個無工做，媽媽咪會好辛苦？
甲：叫佢都唔好做，一家人，一條心，一齊拎公援﹗
丁：好，我地一齊走。
(二人出)
富：媽咪，佢地好似serious喎。
太：唔驚，辭工要比一個月通知0架嘛﹗即走要賠錢0架。
富：原來媽咪真係咁好數口。

(甲與丁扶乙入，各人背著包袱)
甲：太太，我地三個辭工0勒。
太：哎，要一個月通知0架喎，唔係要補番一個月人工0架。
丁：太太，0個三條披肩係咪真係送比我？
太：係，太太最有口齒0架0勒﹗(把三條披肩給丁)
(丁接過)
丁：(卻把三條披肩交還太太) 就當係我地三個0既代通知金，應該有多。
太：嘩，丁丁﹗(接過)原來妳咁鬼聰明。
丁：都係跟得太太多0者。
太：哈﹗咁又係，好啦，天下無不散之宴席，咁你地好快d去伸請公援，唔係餓死都
未輪到妳地。
甲：咁我地扯0勒。
丁：再見0勒，太太，少爺﹗
富：miss you 啦 ，丁丁。
(三人出)

(老爺有點抽搐)
太：衰佬﹗( 把老爺的手放在自己的胸上) 頂住先啦。
杏：假0既﹗假0既﹗(仍昏迷)
太：蝦，你個衰佬，咁挑剔﹗(撥開杏的手)
富：媽咪，妳已經假得好rea0架0勒﹗
太：乖仔。
富：試下我個得唔得？(把杏的手放在自己的胸上)
杏：(奸笑) 哈﹗哈﹗
富：咦？唔通Daddy係Duoble sex？
太：你知唔知以前係d皇室貴族先至搞同性戀？你Daddy絕對有資格。
富：媽咪都好open喎﹗
(太太作個理所當然狀)
太：弊﹗
富：夠鐘化妝？
太：我唔記得襯今晚對鞋﹗
富：駛唔駛我幫下眼？
太：又好，快d，揀唔0岩就要出去買。
(二人上樓)
富：好喎，我都想買多對Nine key air 三重氣墊搭帶漆皮限量版。
太：唏，哉慈無Nine key air波鞋0架，得古之。
富：古之有無男裝？
太：有，0岩0岩出左條新LINE。
(二人出)

(三三拿著一束小白花入)
(三正欲上樓，看到杏坐在沙發上，看了一看，但見他一聲不響，有點奇怪，走了過去)
(三拍拍杏，杏沒反應，三捏著杏的鼻，過一會，杏有反應了)
杏：(咳了數下) 三……
(三見杏沒事，欲離去)
三：(轉身) 今日係Bobby死忌。
(杏只望著三)
三：你乜野都唔記得晒﹗
(電話響)
(杏異常緊張)
(三沒有接電話)
杏：(痛苦地)三……
(三本欲離開，但停下)
杏：(非常痛苦) 我係妳呀叔。
(三愕然，轉身望著杏)
(杏點點頭)
杏：(繼續) 聽電話、妳爸爸，妳爸爸……(斷氣)
(三本想看看杏，但終於去了聽電話)
三：喂？(頓)爸爸？喂？﹗(看著聽筒)爸爸？﹗(看著杏)爸爸？﹗

(管家入)
(管家與三對望)
三：爸爸………(望著杏)
(管家本想回答，但止住)
管：三小姐……
三：佢唔係我爸爸……
管：三小姐﹗
三：佢唔係我爸爸？﹗
管：妳點知口架，妳媽咪話妳知？
三：媽咪？媽咪都知？
管：佢生妳，點會唔知。
三：(大叫)媽咪﹗﹗﹗﹗﹗
(太太急忙從樓上下來)
太：又邊個叫到咁大聲？﹗三三？(落樓)妳無事丫嘛？
三：(指著杏)佢唔係我爸爸？
(太太看看三，再看看管家)
太：三﹗邊個同妳講埋d咁野？
三：(已放下手) 佢自己講。
太：杏仁？﹗
管：我無。
太：你無，咁三三點知？
三：佢自己講，佢唔係我爸爸。
太：佢？富貴？佢無理由知﹗
三：真係？原來真係﹗我無爸爸…….
太：三三……..
三：唔係，我應該有爸爸。
管：梗係。
三：電話﹗
管：電話？
(三欲離開)
太：三三，妳去邊？
三：去搵爸爸。
管：妳爸爸咪0係度囉。
三：佢唔係我爸爸﹗
管：我咪係妳爸爸囉。
三：(同時說) 佢係我阿叔﹗
(同時間，富、貴、舒於樓上入)
(眾人皆訝異)
舒：三妹妹，妳講乜野？邊個係妳阿叔？
三：(向管家) 你講咩？
管：(驚慌) 講咩？﹗
太：哈哈，講笑囉，杏仁管家最鐘意講笑。
管：係囉﹗講笑。
三：講笑？？
太：係囉，講笑﹗
三：搵D咁0既笑黎講？
舒：(下樓)三妹妹，妳頭先話邊個係妳阿叔？
(三指一指杏)
舒：大伯？
三：佢自己親口話係我阿叔，唔係我阿爸。
舒：我爸爸十年前已經死左。
(太太這時發現杏已死)
太：呀﹗﹗﹗老爺﹗老爺﹗﹗
管：(探探杏的氣息) 老爺﹗
(眾人望望管家)
管：無氣……
(富、貴也下樓來)
舒：重唔去報警？
(管望望太太)
太：咁究竟佢係富貴定係吉祥？
富：媽咪？佢唔係Daddy咩？
(丙這時衝入)
丙：(驚慌) 太太﹗太太﹗(指著大門的方向) 老爺﹗老爺﹗
(眾人望向外面)
(燈滅)

(全體演員暫時靜止不動)
(燈只照射著杏)
(杏慢慢起來)
杏：(向觀眾) 睇到呢度，大家係咪覺得好疑惑呢？就等我黎解釋 一下，我其實叫杏吉祥，
係杏富貴個孖生細佬。唉，同粵語長片d情節差唔多，梗係因為佢對我唔好，所
以我就下一個毒手，所有人都以為死0既係杏吉祥，而真正0既杏吉祥，就順理成
章做左杏富貴。不過其實我最終都無殺我大佬,失策! (頓) 某程度上我個人0既道德觀念好重，
所以十年黎，我都無同過我大嫂同床，都好0架，咁大家就順理成章去偷食，佢有佢滾紅，我有我滾綠。
佢個紅咪係杏仁管家囉。 咁三三係邊個個女？照推理就係大嫂同杏仁生0既，
0拿，我估下0架咋，唔一定係0架。講到呢度，我都要去拎d野。(出)

(射燈滅，但觀察仍能看到各人)
(杏拿著一個等身大的布偶入，身上穿著和杏一樣的衣服)
(燈只照射著杏)
(杏把布偶放在剛才他坐的地方)
杏：而家，呢個就係杏吉祥，我就做番杏富貴，雖然你地一路都以為我係杏富貴。
(杏從丙指著的方向出)
(燈轉亮)
(眾人回復常態)
丙：(仍指著大門口的方向)老爺﹗老爺﹗
(舒走向杏處，面有疑色)
太：(望望沙發的杏，再望望丙)老爺？
(丙望向沙發的老爺)
丙：呀﹗？點解有兩個老爺？？
舒：(疑惑) 呢個係我爸爸？
丙：0下？老爺勾二嫂？
太：唏﹗丙，咪愈搞愈複雜。出便0個個人真係老爺？
丙：個樣就一模一樣，真唔真我就唔敢肯定。
太：(望望管家) 點好？
管：我出去睇睇。
費：哥呀，好似唔關我地兩個事喎。
富：咪當睇熱鬧囉。
舒：伯娘，佢係大伯又好，我爸爸又好，係咪應該報警先。
太：舒呀，唔死都死左，等多陣好無？
三：媽咪，咁我爸爸究竟係邊個？
太：三三，我都好混亂，比d時間媽咪，好無？
(管家跑入)
管：真係老爺﹗真係老爺﹗
(眾人注視著大門口的方向)
(杏入，衣著簡單)
(杏一面嚴肅的望著各人)
(三和杏對望)
三：爸爸？﹗
(杏微微一笑)
三：(高興)爸爸﹗﹗(跑了過去杏處)
(管家欲阻攔卻又不敢，再望望太太)
貴：呢個先至係Daddy？
富：Not sure喎，睇定d先。
太：富貴？
(杏望著太太苦笑)
杏：我今日返0黎，只係想拎返我想要0既野。
太：富貴﹗
貴：Daddy？﹗
(杏拖著三，欲離開)
管：你要帶三三走？
(杏停下來，沒有回答)
太：你唔可以帶佢走。
(杏望向太太)
(太太與杏對望一會)
管：(著急) 太太﹗
(太太猶豫)
(杏再欲離開)
太：三三唔係你個女。
(三瞪著太太)
(杏望著三，笑)
杏：想唔想跟我走？
(三望著杏，對望一會，堅定的點點頭)
管：三三﹗﹗
(三望向管家，搖搖頭)
(杏拖著三離開)
太：三三﹗
(杏與三出)

貴：媽咪，妳重有我地兩個。
太：唔同0架，三三個爸爸係我自己揀0架嘛。
管：太太﹗
(太與管對望，相擁而哭)
富：咁我地兩個算咩呢？
貴：原來我地兩個0既身世都好複雜。
舒：伯娘，咁而家係咪可以報警？
(太深呼吸，抹抹淚水)
太：舒，伯娘真係無晒主意。
舒：咁我報警，一切事我處理。
太：麻煩妳0勒，舒﹗
(舒打電話報警)
舒：呢度係杏富貴勳爵屋企，杏先生心臟病發，麻煩你地盡快派架救護車黎，盡快﹗(收線)
太：舒，妳真係鎮定。
舒：伯娘，就當呢個係大伯，一個人總要死一次。
太：舒……
舒：起碼可以風光大葬。
太：咁一定啦﹗
舒：重有，當妳地收到遺產0既時候，我要佔一份。
太，舒？﹗
舒：如果佢係杏吉祥，妳地就斗零都分唔到。
貴：哥，對我黎講有d複雜，你明唔明？
富：fifty / fifty 啦。
管：舒小姐的確真人不露相。
舒：我無左爸爸十年，寄人籬下十年，得番小小報酬都好應該，如果故事真係咁樣發
展落去，你就可以繼續同伯娘鬼混；Dave，繼續游手好閒；貴妹又可以日日發明
星夢；我又可以過一d富貴d0既生活，咪幾皆大歡喜。
貴：終於講到我地0勒﹗
富：係step緊我地。
太：舒﹗舒……妳實在…..妳實在…太聰明0勒﹗ok﹗伯娘應承妳(指著布偶)呢個係富
貴，我老公，遺產0個方面，三三0個份就歸妳啦﹗
管：太太，咁我地都可以名正言順0係埋一齊。
富：0下？Stepfather？﹗
太：錯0勒杏仁﹗如果你想同我一直愛落去，千祈唔好要名份，唔駛偷偷摸摸，我唔會
珍惜0架﹗
管：(想了一想)係0既太太，但係三三……
太：我諗我重有得生0既，咪當係富貴0既遺腹子囉。
管：妳有左？﹗
太：你唔覺得我肥左小小咩？
管：哈，咁無左三三，有四四。
太：死死聲，叫絲絲啦。
管：係喎，都係太太諗得周到﹗
貴：媽咪，咁如果係仔呢？
富：杏科囉﹗
太：哈﹗都係富仔醒目﹗好0勒﹗大家上去換衫，化個死樣出黎，相信d記者會跟住d
警察到，玩下手快過d警察，整裝待發，唔好失禮人﹗
貴：係0既﹗媽咪。(出)
富：OK﹗(出)
舒：我想坐0係度陪多大伯一陣。
太：折哀順變啦，舒﹗
舒：伯娘有心。

(太太和管家挽著手出)
(丙看著舒)
丙：估唔到個結局會係咁。
舒： 結局？(狡黠一笑) 重有下集﹗
(燈滅)

(全劇完)

--------------------------------------------------------------------------------

     歡迎給予指正和意見或感想，先謝!