從心出發 (26/10/97)
故事大綱:
三位未成名的畫家 ,他們的事業、友情與愛情 ;因不同的性格、際遇影響著他們的人生、
藝術取向 。 如何從迷失、消沉的當兒 ,找到成功的道路 ,尋回自我與真愛。
從心出發 ,仔細玩味。
人物介紹:
雪 :獨立 ,處事認真 , 尊重藝術。
鴻 :喜歡繪畫 , 但也看重名利。一度迷失 , 而未能突破舊有創作範疇。
賢 :善解人意 ,對生活、愛情、藝術的態度相當豁達。
高 :隨和 , 對藝術有絕對的誠意 , 重視友情及愛情。
曼 :率真 , 但對愛情過份著緊 , 稍嫌嘮唆。
千 :具繪畫天份 ,但相當在意別人的批評 , 容易氣餒 。
米 :賢的哥哥 , 樂天、喜歡說話、心地善良。外型討好 , 受歡迎。
--------------------------------------------------------------------------------
從心出發----- 第一幕
( 舞台上是一間簡陋的房子 ，沒有甚麼擺設。 有一、兩個獎杯放於櫃上，另外有個畫架和一些畫具；牆上掛了幾幅畫 ，
是照相寫實派的 ，畫得相當不錯 。中央的梳化坐了兩個人，一男
[阿鴻]一女[阿雪] ，氣氛不大好 。雪更狀甚不悅 ，一場罵戰即將展開 。)
雪：（平淡地望著鴻）點呀？有乜嘢打算？
鴻：（懶懶閒）打算？有咩打算，等下先囉 ,有麝自然香！
雪：（語帶不滿）等！重等！藝術家都要食飯㗎！就算你點唔鍾意 ,都應該搵份工做住先 ，
一路做 ，再一路等機會。
鴻：（滿不在乎）除咗畫畫，我乜都唔想做 ！咪暫時食住屋企先囉 ， 我又冇乜物質要求 。（攤在梳化上）
雪：（小許嬲怒， 身子傾向鴻）冇物質要求，你可以要求乜嘢呀！ 三十幾歲人，
重要靠屋企 ，你好唔好意思先 ！ 鴻：冇話唔好意思㗎，將來有人賞識我，出咗名，
我咪雙倍還返 比佢地！ 到時錢已經唔係一個問題！
雪：（不滿 ， 搖著頭道）唔係為咗做藝術家就連羞恥心都冇埋呀！ 你屋企環境又唔係好......
鴻：（小許怒氣，坐正）咪係囉！佢地根本就冇栽培過我 ，又駛乜 為佢地諗呀 ！
我對藝術嘅執著 ，佢地一啲都唔明 。
雪：（小聲道）你有幾執著呀？
鴻：（大聲地）淨係識話我不務正業，都唔知攪緊乜！哈！重叫我 要畫就學下馬榮成，
黃玉郎喎 ！有冇攪錯！！！我嘅畫點可以同 佢地相提並論！
(起身，往櫃拿出其中一幅畫,自己拿著看，用手 比劃著）
（語氣肯定）根本就完全唔同，話晒我都叫做攞過獎 .
（指 一指那些獎杯, 把畫放下。稍停，略帶傲氣道）不過，我從 來冇要求佢地明白我
或者欣賞我， 我唔須要佢地認同， 就算佢地話好，對我嚟講都係冇意思 ... 藝術 ,
（不屑地）佢地 明咩 ！ （雪聽罷顯得非常失望）
雪：（微微搖著頭）可能呢一世都冇人明你嘅所為藝術；（眼沒有望向鴻）就係因為你
"曾經" 攞過獎，跟住落嚟嘅日子，你畫嘅畫 就已經跳唔出果個框框。(稍停）（望向鴻）
（鴻面色一沉） 藝術唔係放係個殼入面，自吹自擂，係要有人認同、欣賞；你覺得自己
有料係天才係你嘅事；令到其他人有共鳴、有感覺先至算 係真正嘅藝術。
（雪忍著淚水，停了好一陣子）（續道）你以前嗰種衝勁同熱誠已經冇晒喇。
（稍停）（不望著鴻）而家叫你去 搵人贊助你開畫展，就話貶低你，唔想又"囈"又"西"；
但係要你 自己比錢出嚟開咩，你又冇！（歎氣道）我諗你而家連五佰蚊喺身都冇。
（鴻正想反駁. 電話響，鴻萬不情願的拿起來聽。）
鴻：（晦氣地）喂？......我係，邊位？......哦，呀下..... 呀下......唔（狀甚不悅）...... 痴線 ！
你自己畫喇 ！ （砰一聲收線）
雪：邊個？
鴻：（晦氣地）冇良畫商！比得個咁嘅價就想買晒我啲畫！有冇攪錯！佢梗係以為而家喺?BR> 旺角街邊買緊地攤，嘿！
（不屑）咁 嘅眼光點開畫廊呀佢！
雪 ：（失望地）（擰擰頭，慢慢道）你以前話過藝術唔係用錢黎衡量......（冷笑）原來係你
覺得人地比得你個價低，你想開天 殺價！嘿！你諗下自己值唔值至得㗎！
鴻：（雙手按著梳化）（大聲地向雪道）我唔值？？？果啲人畫下 山畫下水就話值幾多百萬；
畫班臘像喺到祝酒又話無價 ！我唔 值 ！
雪：（仍失望地，沒有正眼望鴻）我真係覺得你唔值！以前或者值， 但係而家......（歎氣）
（冷笑）（望向鴻）你可以同人比咩 ？ 你憑乜嘢 ！唔該你面對現實。
鴻：（怒氣）（拍一拍梳化）你憑咩咁講？
雪：（起身望著鴻堅定地說）憑我對咗你咁多年（稍停）（兩人對望著）喺呢段日子裡面
你除咗執番啲舊畫同發牢騷之外，你乜嘢都 冇做過，冇進步過！(眼有淚光）你唔好再喺到扮清高，若果
你真係咁清高就唔會睇到個錢咁大。你真係為藝術的話，就唔會變得咁俗氣。
你嘅本質已經變咗，再繼續咁落去都唔會有進步！ 你就係咁一路困住自己喺個死胡同入面，
（停了一停。忍著不哭）發你嘅春秋大夢 ！！！
鴻：（很嬲怒）（手指著雪）你--- , 你咁同我講嘢！！
雪：（相當惡）係呀！咁點丫？你想人專重你，你就叻比人睇！唔好得個講字！當初覺得
你有才華、有抱負，好難得！但係當你昇華 唔到去一個再高啲嘅層次，而只係識得怨天怨
地嘅時候 ， （身轉向另一面）我對你好失望 ！
鴻：（很嬲怒）失望 ? !
雪：（望向遠方）對一個只係識得懷緬過去嘅人，除咗失望，唔通重會有期望咩？（望著鴻）你記唔記得自己以前係點㗎？
係邊個同我講： " 比作品本身還重要的，是它所迸發出來的張力、氣質 以及所傳達出的訊息。"
鴻：（怔一怔）果句說話係 Miro 講嘅，唔係我。。。
雪：（搖一搖頭）邊個講唔重要，重要嘅係你個心，同埋你對畫畫嘅愛有幾深。（稍停）
你又記唔記得你話過， "真正感動人嘅畫作 ， 並唔在乎畫價嘅高低，只在乎作者傾注嘅感情
同埋心力！"
（對鴻像是當頭棒喝。鴻無語）
雪：（歎氣，失望地說）呢句睇怕係你講㗎啦，不過你都係唔會記得。你覺得而家嘅你，
會有成功嘅一日咩？ 唔單止我，而家嘅你， 令 到身邊所有嘅人都好失望 。
（鴻找籍口為自己辯護）
鴻：哼（冷笑）！講嚟講去，都係你覺得自己投資錯誤唧！我出唔到名丫嘛， 你咪冇面囉！
洗乜講咁多嘢呀。 （靜了一靜）
雪：（呆一呆）（搖頭）你真係變咗，（深呼吸，眼有淚光）變得好現實好銅臭。原來，
名同利真係會埋葬一個人嘅理想同埋抱負。
鴻：（搶白）係你變定我變呀！你敢話錢對你唔重要？你敢話同我一齊 ，唔係因為諗住我
終有一日會成名！？你又有幾清高呀！
雪：（搖頭）（苦笑）如果冇你呢個包袱，錢對我嚟講真係唔重要！ （歎氣）估唔到，
原來我喺你心目中係咁嘅......（想哭）...... 或者你覺得喺你失意嘅時候，我唔去鼓勵你，
唔支持你，返而潑 你冷水係我唔啱......不過，希望你記得，前前後後，我鼓勵過你幾多次、
忍咗你幾多次，原諒過你幾多次......（歎氣）你甚至連一句 "我愛你！" 都冇同我講過......
（搖著頭）我真係 唔知自己為乜！（忍著淚）算哪！夠哪！點講都已經冇用。
一個 人變咗就好難返番轉頭。（搖搖頭）（停一停）喺你身上面已經冇咗以前果種氣質
（閉上眼一會） 冇咗果種獨特嘅魅力...... 連你嘅畫都冇咗生命、 冇咗感情......
鴻：（疑問地）你真係咁覺得？
雪：（彷如聽不到）（深呼吸）（鼓氣勇氣道）你就繼續坐喺度諗你嘅錦繡前程啦 ，
呢條無止境嘅不歸路我唔行嘞...... (忍著淚水）留番比第二個會捨名陪君子嘅天真美少女啦！
（雪講完便立刻轉身入房）
（鴻呆著，不知如何是好）
（雪返回廳，手拿著行李）
鴻：（開始著急）你去邊呀？（跟著雪的身後）走！你真係走！
（雪拿著行李直畢離開，沒有再理會鴻）
鴻：（企在門口叫喊）喂！喂！ 美少女？！你估做卡通片咩！ 喂 ！ 喂 ！唔好走喇，比多
少少時間我丫！喂 ！你屋企嚟㗎， 走咩呀你 ！ 你走咗咁我點呀 ？ 你有咩唔滿意， 我改囉 ！
（大叫）喂 ！ 喂 ---- ！
（雪沒有折返，鴻呆了）
（軟攤在門口地上）
（停 一 停）
（望著雪走的方向）
鴻：（細聲地說）我愛您！......（搖著頭） 唔好走呀......唔好走呀......
（燈光轉暗）
--------------------------------------------------------------------------------
從心出發----- 第二幕
（依然是間簡陋的房子 ， 但換上了一些寫實畫 。仍是一男[阿高] 一女[阿賢] ， 賢正由廚房
倒茶出來，高坐在梳化上，拿著一幅畫在仔細打量。氣氛很好 。）
（賢遞茶給高） （高放下手中的畫，接過茶）
高：唔該 ！
賢：（微笑）（關切地問）點呀？有咩打算？ （賢往梳化坐）
高：（飲過茶，再放在檯上）唔，遲啲去教小朋友畫畫，有時間再幫陳生畫下啲遊客倒模畫，（笑）'當' 係鍛鍊基本功，
又可以搵到錢。
賢：（點頭）係嘅，人都要食飯。（停一停）其實上次個展覽，得 唔得？
高：（想著）幾喇。唔...不過點都冇可能一鳴驚人，規模細，嚟睇嘅人亦唔多，唔... 。
不過，有時會懷疑自己嘅天份，究竟 係唔係畫畫嘅材料，應唔應該繼續落去 。
賢：（望著高的雙眼）要有信心呀！（拍拍高的膝頭）你知道嘛，望住你嘅畫，
可以感受到你嘅熱情、希望同埋理想，好似聽緊你講 故仔咁！果種感覺好特別。
高：（笑著）真係！無咁誇張...... 哪 ，（搵一搵）（拿出其中 一幅）呢幅，呢幅畫，
我講緊咩呢？（將畫遞給賢） （高熱切的望著賢，等著）
賢：唔......（接過幅畫。諗一諗）（認真地望著手捧著的那幅畫）（慢慢地笑著道）你話，
世界其實係好美麗，如果我地付出多 啲關心同埋愛，人生就會變得更充實，世界亦靚好多！
重有（用 手比劃著那幅畫，指著某一處）美同醜有時只係一線之差，選擇邊一面都係由人
自己決定。（稍停）望住佢地工作緊嘅樣，就覺得世界充滿左希望，太陽嘅光亦好溫暖，
好舒服..... 唔（深呼 吸），好感動 ！ （將畫交回高）
高：（笑）（接過幅畫）都唔知係你利害定係我利害！唔...... （疑惑地）會唔會淨係感動到
你呢 ？ 其他人......
賢：唔準冇信心！咪有啲有關人事接觸過你咩？冇下文，定係你自己.....
高：（放回畫）唔.....唔急嘅，慢慢嚟，點都要填飽個肚先至有力畫......果啲人淨係識得講，
根本就冇諗過一個人，一間畫室需 要幾多經費。話贊助你，又到喉唔到肺。唔...睇怕畫家嘅宿命 就係死左之後，
令到其他人發達，自己就要潦潦倒倒咁過日子! （感慨地）Van Gogh 就係一個好例子。
賢：（觸著高的手）我永遠支持你！何況Van Gogh 亦都講過： "我們只能夠使我們的畫說話。" 你將你想講嘅嘢用繪畫表達出嚟，
令其他人共鳴。（望著高）可以做自己喜歡嘅事，實現理想， 用雙手畫出自己嘅感受同心聲。(停一停）唔係人人有咁嘅機會，
你有，就要好好把握唔好放棄。（笑著說）有麝自然香，我信㗎 。
高：唔......
賢：（側著頭望著高）唔？
高：（起身，眼望向遠方）其實，成唔成名，出唔出倒名都唔係太緊要 。太商業、太人工化
都失去咗藝術嘅意義同價值。可以出 到名，多人認識固然好，但係同真正有 ' 有心人' 欣賞，
始終係兩 回事。我只係希望......（停下來沒有說下去）（搖搖頭苦笑） 唔，可能我太理想化，但......
唔，好多時都好矛盾。想紅， 但係又唔想俗 ; 但係唔俗？又溶入唔倒人群。
（認真地望著賢） 我怕唔係有麝自然香，而係曲高和寡！
賢：（亦企起身）（望著高）唔，（搖搖頭）無須要諗太多，有時間就畫，有靈感就畫，
無論結果係點都好，你嘅畫已經俘虜咗我哩 個人喇！（笑著）重唔滿足！？
高：唔（滿足地笑）咁又係！再俘多幾個就煩哪，真係唔知邊度去搵咁多米飯養佢地 。
賢：（作嬲狀）咪幾好，重識得講笑。
高：（握著女的手）多謝你 ！
賢：（笑得很甜）哼 ！
高：（望著女的）唔知到將來會唔會成功，會唔會出名，但係無論點都好，我覺得自己已經
好幸運，起碼我搵到幸福。 （微笑）有錢都未必可以搵得到 ！
賢：（笑得甜甜的）畫你嘅畫喇，幸福藝術家！
高：好 ！ 就等我畫一個全世界最幸福嘅女人！（往拿相機）
賢：（疑惑）搞乜 ？
高：（拿著相機）（笑著）映低你個樣囉！我驚畫錯第二個，哈哈哈哈。。。
賢：哼 ！（擰轉頭，但是開心的）
高：唔玩喇。（放低相機）呀係，我要去一去阿千同阿鴻度傾啲嘢。
賢：傾下次展覽嘅事 ？
高：（點頭）睇吓佢地有咩意見，話晒都唔係個展，有必要同佢地傾咗先至答覆人 。
賢：（點頭）呀吓，咁如果你返嚟食飯就打電話返嚟啦。
高：OK ! 咁，我而家去 。(預備出門)
賢：帶咗銀包未？ （高拍拍褲後袋）
高：帶咗。
賢：（賢起身）送你出去 。
（行到門口，開門。 高轉身用鼻哥擦擦賢的鼻哥才離開）（燈光轉暗）
--------------------------------------------------------------------------------
從心出發----- 第三幕
（依然是間簡陋的房子，相當凌亂，換上一些抽象畫。男的[阿千]攤屍般攤在梳化上，
木無表情，雙眼半開半合。女的[阿曼]氣急急於屋內亂轉，滔滔不絕。）
曼：（苦口婆心地向著千說）你有咩打算呀？
千：（不語，彷如聽不見）......
曼：裝聾扮啞過唔到一世㗎！
千：（完全沒反應）.......
曼：（開始氣急）如果唔識你真係以為你係啞㗎！...唉...，連表情都冇 ， 究竟你係咪人嚟㗎！
千：（仍沒反應）......
曼：（團團轉）人畫畫，你畫畫，畫到好似你咁就真係該煨，似乞衣多過似畫家。
千：（仍沒有郁動）......
曼：我唔喺到幾日唧 ，你睇吓你自己，鬚又唔剃 ；你幾多日冇沖涼呀你。嘩 ！
（望一望檯面的垃圾） 睇吓個杯麵，愛黎養曱甴㗎？ 你有冇食過嘢呀？ 喂！郁吓喇 ！
（推一推男的）唔係我 以為你死咗呀 ！
千：......（仍沒反應，繼續扮死）
曼：比啲反應好喎， 攪到我好似個傻婆咁！（手叉著腰） 喺度自己 同自己講嘢！
千：......（仍是不語，神遊物外）
曼：（更急）呀 ！ 救命呀！（大動作揮動雙手）你郁吓啦，出句 聲好冇？
千：...... （像睡了的模樣）
曼：衰一次唧，唔代表衰一世丫嘛 。唔衰過又點會有成長呢？！最緊要係攞經驗之嘛 。
選美啲女仔成日都咁講㗎啦 ！ 人地賣肉輸咗都唔洗死 ， 你唔好喺度攪頹廢！
千：......
曼：（開始嬲）（用力地坐在另一張梳化上）死啦，死啦... 死啦你 啲咁 嘅人，死咗都唔洗恨 ！
咁大個人，衰咗唔緊要㗎，最緊要 識得輸咗，爬返起身，貯足電再嚟過，有賭未為輸！今次唔得，咪下次捲土重來囉 ！
千：......（表情沒變，仍然攤屍狀）
曼：（見硬功不行，改用軟功）唏！Com'on,（拉著男的手）唔該你 啦。哪，去沖個涼，執執
個人，我同你出去行吓，抖抖氣，好冇？ ?FONT COLOR="#808080">]等了一會仍沒反應）（又再發怒）（*fing*開男的手）
你估死咗就 真係會出名咩！"毆"死發臭就可能會見報！但都只係會話：三 十多歲中國籍男子，餓死家中咋！唔會話：
某大畫家於家中倒 斃㗎 ！
千：......（仍沒理會女的）
曼：（起身叉腰道）你係咪男人嚟㗎！小小挫折唧，有時間係度"毆"，不如步儲一吓下次
展覽啦 ！
千：......
曼：（手指著千）你再唔睬我，我走架喇...真係走㗎 ...（作走狀） （曼行往門口）
千：......（偷偷肯首）（但曼看不到）
（曼見沒有反應又走返轉頭）
千：（冇聲歎氣）
曼：（*抆憎*）出聲留下人都好掛（見男的仍沒反應，便又再說其他）（蹲在千旁邊）
嗱，抽象啲人唔受，咪試下風景呀，寫實呀果啲 囉，或者抽象唔啱你哩。
（在檯下拿出某一幅畫，看了一會，再 繼續說）真係好抽象哪......會唔會有人明你想講咩呀？
...... 不如試下畫得簡單啲，易明啲 , 咁咪多人嚟睇囉。
千：（突然彈起身，搶回幅畫。用非常惡的語氣向曼大罵，一口氣沒停頓）你講夠未呀！
講夠就好走喇！唔好再係度嘈暄巴閉，乜靈 感都比你趕走哂！（放好幅畫，繼續罵）
我見唔見人係我嘅事， 唔關你事！就算我真係"毆"死喺呢度都唔洗你操心！你咁鍾意
理人閒事就去做義工！冇乜嘢就請回喇 ！
（曼呆呆望著千，很愕然）
千：重有，記得幫我閂好度門，再黎多幾個你呢啲咁嘅煩人，我就真 係死！
（隨即坐低，望向其他地方，沒有正眼望著女的）
曼：（很驚詫地，手指著千）你...你...洗唔洗講到咁盡呀你！ 我都係關心你唶 ！（想喊）
千：（非常冷漠地）多謝喇， 我唔洗人關心 ！
曼：你...你......（指著千）比個心你......
千：（搶拍）係呀 ！ 比個心我食我會當狗肺㗎！ 走啦 ！ 好冇 ？ 當我求下你哩 ！
曼：（開始想喊，頓足）衰人！
千：（冷漠）你鍾意話乜就乜 ， 衰人又好 ，死佬又好 ； 總之你 肯走就得喇。
曼：（嬲怒）唔止走呀，你以後都唔洗止意我會再理你呀！死人頭！
千：係就最好啦！講得出就要做得到！唉...煩人見得多， （慢慢地搖搖頭）
煩到好似你咁就真係少有 。
曼：（很激氣狀，手指著千）你......你......你......
千：（淡淡然）走就走遠啲, 唔好一個屈尾十又屈返嚟 ！
曼：（忍著淚）容忍有個限度呀！
千：（沒有正眼望向曼）你知就好！所以我咪終於忍唔住要開聲駁你囉，容忍真係有個限度！
咁你而家捨得走未呢？唔送喇！ （女的作勢打巴男的）唔好諗住打巴我至走呀，我還手㗎！
曼：（凌空的手轉為指著男的）你.....你......你...... （哭著走）
（沒有閂門）
千：唉...（搖搖頭）乞兒竇（苦笑）......留喺到做乜呀。
（神情顯得傷感，攤在梳化上） （燈轉暗，但[阿千]不用返後台。接下場。）
--------------------------------------------------------------------------------
從心出發----- 第四幕
（仍是那房子，阿千依舊攤在梳化上 。 阿高來到看見沒有閂門便直畢入內 ， 看到屋內的
阿千嚇了一跳 。）
高：哎！乜連門都唔閂！（看一看阿千）呀...咁又唔驚，有賊入到嚟，見到個死人攤咗喺度 ， 都走夾唔抖。 （坐低，拍拍高）
點呀？ 有乜打算呀 ？
千：（不滿狀）又係呢個問題......好悶呀！
高：好，問過第二樣 。 你（望一望檯面周圍）食咗飯未？
千：（慢慢的說）未，但係亦唔想食。我淨係想喺度靜靜地諗吓嘢，搵吓靈感。
高：（搖搖頭，認真地說）你咁坐喺度，就算搵到靈感，畫出嚟嘅 畫都冇血冇肉啦 。
要出去感受吓其他人嘅生活 ，睇吓個世界 ， 擴闊自己嘅空間 ， 畫出黎嘅畫先至能夠感動
到人嘛 ！
千：（開始有些清醒）咁熟嘅，喺邊到聽過？
高：（笑）咪你同我講過囉！ 大哥 ！
千：（愕然）哼！ 乜我講過啲咁 "行" 嘅野咩 ？（苦笑）
高：唔係喎 ， 我成日記住你呢番說話； 睇多啲個世界 ， 題材都豐富啲 , 咁就更加能夠
畫出感動人嘅作品 。
千：（無奈地）哼 ！ 睇得多都悶啦...個世界係轉，但係轉嚟轉去咪又轉番轉頭 。今日打劫，
聽日炒樓，後日水災；哈！跟住咪 又有人爆格，有人炒股，再嚟地震呀飢荒呀咁囉...... 唉，
跟本個世界就冇新意；我講過嘅廢話自己都唔記得，你就當 係金科玉律（苦笑）（搖搖頭）
細佬，當係伊索寓言好喇， （感慨地）唔好咁天真呀。
高：（猶疑地）我真係希望我嘅作品能夠感動到人......
千：（感慨地）感到，又點呀......
（有人推門入來，是阿曼）
高：（起身）Hi ! 呀嫂 。
曼：（眼紅紅）（語氣平淡）嚟同死人傾計呀？ 你慢慢喇 。 （曼沒有望向千，直畢行入房）
高：（坐回梳化上，向千道）又嗌交？
千：（語氣平淡）哼 ， 話走話走， 一個鐘都冇就返轉頭。
高：唔好將自己唔開心嘅野發洩喺佢身上至得㗎 ，有女人肯留喺你身邊好難得。
千：（語重心長）細路，你識咩吖，要留無話留唔住；但係留住佢個人喺度，你自己又乜都
比唔到人，咪重可憐。診佢未人老珠黃， 重溝得到仔（苦笑），咪當比條生路人行。跟住我
呢"亭"不知所 謂、倒霉、失意藝術家，咪盞乞米。
高：（認真地）如果佢真係愛你，實肯陪你捱。
千：（苦笑）你都唔會想你愛嘅人要陪你捱足一世唧，我愛佢咪即係累佢。
高：（認真的望著千）你點知你將來會點唧？ 好掂都未定呢 ？
千：（無奈地）將來係點冇人會知，太多未知數。我真係唔敢肯定啲乜嘢。你睇
（指指間屋），如果唔係老豆留低呢間屋比我，哈，睇怕我街都有得訓。有情飲水飽 ...
（感慨地）唔通真係 想餓死自己嘅女人咩 。
高：（嘗試盡力勸服千）佢都唔洗你養。
千：咪係，（傷感地）我連養佢嘅能力都冇，又邊有資格去愛佢。 （搖搖頭）唔好講喇，
（歎氣）愛情對我嚟講太奢侈 。 （苦笑）（突然地）係呢，（望向千） 你搵我咩事 ？
高：（呆一呆）呀係 ！ 想同你傾吓下次聯展嘅事。
千：（提不起勁）下次 ？ 下世喇。
高：（疑惑）冇人聯絡你？
千：（望一望電話）點聯 ？
（阿高拿起電話聽一聽，長響。放回）
高：（望一望阿千）cut 咗？ （千苦笑）
高：可能有人贊助我地......
千：（冷笑）贊助 '我' 定 '我地' 先。
高：（猶疑地）呀...咁我又唔肯定，呀...又聯...唔係，又聯絡唔到你...冇理由淨係我嘅...
聯展嚟嘛，何況你係我地當中最 好嘅一個。
千：（苦笑）點先叫最好? 冇定義㗎傻仔。
（曼由房出來，拿著行李）
高：（見狀起身，猶疑地說）阿嫂， 出去呀 ？
曼：（頗惡地道）係呀 ！ 麻煩你幫我同個死人講聲（望著千講）， （千望向遠方）
個煩人走喇 ， 佢可以耳根清靜 ， 繼續 "毆"。 （望回高）（忍著淚水）你慢慢坐喇 ！
高：（不知怎樣回應）呀......好行哪。 （曼走，大力地關門。" 膨！"） （高轉向千道）你真係
'尤'佢走 ？？
千：（無奈道）可以點 ？
高：（關心地）你照唔照顧到自己？
千：（裝作滿不在乎）佢唔係看護...我亦唔洗人照顧。
高：但係你個樣話比我聽你好唔掂喎。
千：哼（苦笑）......無話邊個無咗邊個唔得嘅。佢真係走，對佢嚟講都公平啲。
高：（拍拍千）你得嗰喎！哪，最緊要攪番好個電話先，人地搵到你，咪掂囉 ！
千：（淡淡然）佢地搵唔到我，都會搵你喇。得架喇，聽天由命。有時啲野 "強" 唔到返嚟嘅。
高：（感到愛莫能助）唉......似乎我再講落去都係多餘，好啦， 你肯出山果陣就搵我。（起身）記得攪番個電話先...呀，
一係你比張電話費單嚟 ， 我幫你去交。
千：（感厭煩）得喇...由佢先喇。走啦你 （揚揚手）， 唔送...... 記得幫我閂門 。
高：（歎氣）咁你記得call我呀！（拍拍千。跟著走）
（高關門。千繼續攤屍） （燈轉暗。）
--------------------------------------------------------------------------------
從心出發----- 第五幕
（回到高與賢的房子，只得賢在家，正在練習書法）
（門鐘響，響聲很特別，是鳥聲來的。賢放下筆，往開門）
（門開，看到阿雪拿著行李，眼紅紅的站在門外）
賢：呀（小小愕然）......（關切地說）入嚟先。
雪：(點頭)......（入內。 放低行李 ， 坐在梳化上）
（賢也關門 ， 走到梳化旁）
賢：斟杯熱茶你。
雪：（嗚咽）唔該。
（賢往廚房 。 不久拿著茶出來。遞給雪）
賢：哪，小心熱。
雪：（雙手接過）唔該晒。
賢：唔洗客氣 。（跟著也坐在另一張梳化上）
雪：（呷一口茶後道）（用手抹一抹眼角小許淚水）你真係好， 一 啲好奇心都冇，
又唔會問長問短。比著第二個實唔停口咁問呢 樣，問果樣......（苦笑）
賢：（笑）人有私隱權嘛，你一定有你嘅原因同理由，你想講就自然會講，係咪 ？
雪：（苦笑,點頭）我就係鐘意你呢樣， 唔多事 ， 唔多餘。
賢：（微笑）你咁講， 想問多句都唔得啦 。
雪：（苦笑）（突然想到）呀...我可唔可以喺你度住一、兩日？
賢：唔...冇話唔得嘅。（諗一諗）咁啦，你訓我房，我去阿高房瞓。
雪：咦 ？ 你地分房瞓㗎 ？
賢：（微笑）唔...每個人都需要有自己嘅空間。成日都要黐埋一齊，就會變得好...... 吖，
點講呢...總之，就算一齊住甚至結埋 婚，每個人都仍然係一個獨立嘅個體，需要有一定嘅?BR> 空間去思考 同創作。
尤其係夜晚，呀，所以夜晚唔好太嘈，通常好嘅作品就 喺夜晚誕生。
雪：（輕輕搖搖頭道）冇問題， 我都諗唔到有乜野會嘈到人。。。 （幽幽道）有鼻鼾果個
又唔係我......
賢：（笑）哦，咁係邊個 ？ 雪：哼 ！ 明知故問。 （賢笑而不語）
雪：（淡淡然）你唔洗理我㗎，繼續做你做緊嘅嘢喇。 "尤" 我 喺到發下 "牛逗" 得㗎喇。
賢：（望了阿雪一會）（點點頭）唔，咁好丫。（起身往工作檯去） （轉身向賢道）呀，
你鍾意就入我房抖抖先啦 。
雪：（想一想）唔......都好。（起身，拿著行李入房）
賢：（關切地）搵我，就大聲叫我啦。
雪：（點頭）得喇。
（賢沒有繼續練字，開始收拾檯面。過了一會，門鐘又響）
賢：哦......又邊個呢 ？ （往開門）（門開，見到阿曼帶著行李，哭著站在門外）
賢：（嚇了一跳）做乜呀你？ 入嚟先啦 。 （賢幫她拿行李入內）
曼：（哭著仍企在門口）賢...... （賢再扶曼往疏化坐）
賢：坐低先喇......點呀你 ？
曼：（嗚咽，捉著賢的手）我想喺你度住幾日呀......得唔得呀？
賢：呀......本來冇問題嘅， 但係......（往房望一望）
曼：（搖著賢）你是但搵笪地方 "擺" 低我得㗎喇 ！
賢：（關切地）你唔係好妥， 洗唔洗睇醫生呀 ？
曼：（嗚咽）（搖著頭）要睇醫生果個唔係我......（再喊）
賢：（輕按著阿曼的膊頭）斟杯野你飲呀？（起身）
曼：（哭著說）好吖，最好比杯XO我，呀，唔好一杯，成樽喇！ 醉咗就乜都唔洗諗，唔洗煩。
賢：（猶疑地）呀...冇酒喎，斟杯茶比你好無？
曼：咁有冇安眠葯吖 ？ 效果一樣。
賢：（搖頭道）呀......都冇。
曼：（歎氣）唉...乜都冇......（轉望向阿賢，拉著她的手） 咁你陪我傾吓計啦...我唔想得我
自己講嘢呀 ！（有些激動） （大聲道）我唔想變傻婆呀！（滿眼是淚）
賢：（坐回梳化上，安撫她說）好好好......你想講咩呢？
（曼想了一想）
曼：你，你有冇同你個男人嗌過交呀？（認真的望著阿賢）
賢：（諗一諗）呀......（搖頭）
曼：（搖著頭道）哈。（苦笑）竟然有唔嗌交嘅情侶。不過有交嗌都好過得一個人喺到亂?BR> 吠... 吠幾耐都冇人理。
賢：（關心地問）你同阿千又吵嚟？
曼：（苦笑）諗住吵吓吵吓就熟㗎喇. ..一齊住梗有拗撬...哼...佢 高招，跟本唔還手都贏晒...
佢唔想人煩住佢嘛...好...咁我走 囉...（望著阿賢）愛一個人原來好辛苦㗎，愛一個當你透明
嘅 人重辛苦呀...（忍住淚水）而家舒服晒喇，分手！分開左就唔洗煩喇...佢有佢 "毆"，
我有我...我...我點呀 ？（又再喊）
賢：（按著曼的膊頭）你比自己冷靜吓先！你地成日都係咁㗎喇，比啲時間自己，
比啲時間佢 ...或者佢只係想靜下，諗吓嘢呢 。
曼：（嗚咽）咁...咁...你即係話我嘈？話我煩呀 ？ （開始激動）連你都覺得我嘈， 覺得我煩...（大聲地喊）
賢：（急了）（想說些安慰的話）我冇咁意思呀...唔好喊啦...
（在房的阿雪聽到出面很嘈，忍不住出來看看）
（雪出到廳，看到阿曼在哭。須不知何故，但卻感厭煩）
雪：（頗惡地道）喊乜呀你？ 收聲呀 ！ （曼望一望是誰，哭聲止住了一會）（續道）
你要喊要嘈就返自己屋企，唔好為個男人喺度嘈生晒！！
曼：（覺委屈）咩喎... 比人發洩吓都得掛，呢度又唔係你屋企... （嗚咽）咦， 點解你
都喺度嘅 ？
雪：（不知如何答覆）多事！
賢：（望望雪再望向曼）唉...你地唔好咁啦， 相嗌唔好口... （拍拍曼）冷靜啲 , 冷靜啲。
（雪不語，曼卻道）
曼：（小小怒氣）我冷靜唔到呀！ 個死佬...個死佬... 嘩 ！！！（又再喊，頗傷心）
賢：（掃著曼的背）呀...不如你講出嚟比我地聽 ...究竟發生 乜野事 ？
（雪裝作不理會 ， 但卻往梳化坐下）（曼的哭聲仍未止住）
賢：（仍柔聲地道）點呀？ 講出嚟，睇吓幫唔幫到你 ？
曼：（嗚咽著）我都唔知佢想點。
賢：咁，你地因乜事嘈吖 ？
曼：（激動地）哼！無㗎，一句講晒 ，佢緊張佢啲畫多過緊張我。 佢成日就淨係識諗住
畫畫，諗展覽；我呢？佢理都無理過。我係 人嚟㗎，有感情㗎，佢唔可以當我透明㗎...有時，
我寧願係佢 筆下面嘅畫，咁樣佢就會放多啲時間同心機喺我度...（歎氣） 我知冇可能㗎，
咁我咪係佢背後支持佢囉，佢鍾意畫咪畫囉 ... （歎氣）佢冇錢，我唔介意；佢忙，冇時間陪我，我都唔介意......
但係我好介意佢當我透明，當我唔存在...（滿眶淚水）好似今日咁，
成條死屍咁攤喺間屋度，叫又唔睬，問又唔應...（喊著說）好辛苦呀.....愛得好辛苦呀......
（賢遞紙巾給曼）（曼接過，抹一抹）
曼：（但淚水仍是停不了，望著賢道）好羨慕你...
（賢不知說甚麼才好）
（雪突然有所感觸地道）
雪：（眼有淚光，望向遠方）愛真係盲目㗎，明知條路係錯都要行落去...明明知道果個人
已經唔值得再去愛，再去關心...都重要留 喺果個人身邊......（停一會）（苦笑，有淚水流出）（續道）女人都係犯賤，
愛得咁痛苦都重要愛落去；明知付出幾多都係白廢，但係都唔識醒......
明知流幾多眼淚都冇用，但 係點都停唔到......把口講得幾瀟洒 ， 幾撇脫...呃到人... 呃唔到自己......
男人可以為事業放低愛情...女人... （搖搖頭苦笑）女人冇咗愛情，就好似一個洩咗氣嘅波，點彈
都 彈唔起。 （淚水淌淌而下，停不了。 但沒有哭聲）
（曼聽罷 ， 哭得更大聲）
（賢看著兩個淚人 ， 束手冇策）
（燈轉暗 ， 哭聲縈繞一會）
--------------------------------------------------------------------------------
從心出發----- 第六幕
（舞台變回第一幕 ， 阿鴻和阿雪對罵的房子)
（高往找鴻，來到門前，看到鴻坐了在門口的地上發呆，高顯得詫異）
（高俯身搖一搖鴻 ， 鴻的視線慢慢往上移 ， 看到是高，頗失望）
高：做乜坐係門口 ？...起身啦 ...... （高跟著扶鴻往梳化坐） （鴻顯得呆滯）
高：（按住鴻的膝頭）你冇嘢吖嘛？ （鴻不語，只輕輕搖一搖頭）
高：（四處望望）阿雪呢 ？
（鴻眼神惘然，再慢慢搖搖頭） （高歎氣，已大概知到發生何事，但不知該說甚麼才好）
（雙方靜默了一會） （鴻突然說）
鴻：（有氣冇力）愛一個人......大家知咪得囉...點解一定要講出口......（歎氣）唔通唔講就
代表我唔愛佢咩...... 好兒戲唧......（再歎）係要搵交嗌......都一齊咁耐喇..... （一臉惘然）
高：（望著鴻一會）（語重心詳道）如果你肯講出口，對佢嚟講就係一個承諾，可以令佢對大家之間嘅關係多一份肯定，
多一份信 心 。 既然大家係相愛， 點解要吝嗇果一句說話呢 ？
（按著鴻的膊頭）
（鴻不知該如何回答 ，但覺得高的話也頗有道理）（雙方靜了一會）
鴻：（長長的歎了一口氣）（望著阿高點頭道）或者你講得啱...... 不過，......（洩氣）
已經太遲......
高：事在人為嘅唧 。
（鴻想著，擰擰頭，再歎口氣） （鴻突然望著高問）
鴻：（語氣平淡）咦，嚟搵我咩事？
高：唔...你狀態嘛嘛 ...不如我遲啲再嚟過...
鴻：（聳聳肩，搖搖頭）得㗎喇， 你講啦。
高：一係你去洗個面先啦 。
鴻：（點頭道）唔... 都好 。 （鴻起身往洗面）
高：（搖搖頭認真地說）今日乜嘢日子， 一個又咁 ， 兩個又咁 。
（高歎氣） （鴻洗完面出來，往梳化坐）
鴻：（有氣無力的）講喇...... 高：唔...諗住同你傾吓聯展啲嘢 ， 有冇人聯絡過你 ？
鴻：（不悅，搖頭道）冇人搵過我...即係話有人搵過你？
高：（望著鴻的電話道）你個電話......有用啊可？ （鴻望著高，覺得他的話很奇怪）
鴻：電話梗係有用...你真係問得出奇。
高：我意思係...佢有冇響過...或者識唔識得響？
鴻：有唔識響嘅電話嘅咩？（隨手拿起電話筒，聽一聽）冇嘢...
高：如果遲啲有個展覽，你有冇興趣？
鴻：（搖搖頭）唔知......有嘅......幾時*倒*？
高：詳細資料我都未有 ， 最緊要知道你地有冇興趣先。 鴻：重有邊個 ？ 高：千哥。
鴻：唔？上次佢比條友彈完，成個人謝晒。復元呢咩？
高：唔......佢係重有啲問題...不過，比佢攤多幾日應該冇事㗎喇...小小挫折等於激勵...
（望著鴻道）咁你呢？你狀態都嘛 嘛。有乜嘢我可以幫到手？
鴻：（歎氣）（搖搖頭）覆水難收。
高：*雪* 又唔同講法。 （鴻苦笑）
鴻：......希望......（感慨道）愛情...有同冇都咁煩... （靜默了一會）
（突然一臉認真的望著高問道）你覺唔覺得我變咗？ （高不明所以）（鴻再道）老實答。
高：（疑惑地）你指邊方面？ 鴻：方方面...即係任何一方面 ！
高：唔......(不知如何說才好）
鴻：咁， 或者講吓畫果方面先 ...（等了一會仍未見高有答覆） 坦白講喇 ， 問得你我就預咗?BR> 冇好嘢聽 。
高：（猶疑地）咁即係...你自己都覺得自己變咗喇...
鴻：（一臉惘然）（歎氣）我自己都唔知 ... 你講。
高：唔... （猶疑一會）可能你自己真係唔覺...自從你得獎之後，你嘅畫好似再冇乜突破，
感覺好死......箍得好緊，眼光窄咗， 比唔到咩驚喜。 （鴻聽得呆了）
鴻：（苦笑搖頭）乜原來，我而家啲畫真係差得咁緊要......
高：（認真地）過渡期唧，睇你用乜嘢態度面對自己。只要你重有心、重有力，好作品嘅?BR> 出現只係遲早問題；
跟本而家就係睇吓你行唔 行到多一步；真㗎，只需要行 "多"一步，個
世界就唔同！
鴻：（無奈地）（歎氣）有時啲嘢，真係當局者迷，又或者自己呃緊自己。揸起支筆，
個腦就乜都諗唔到，冇晒畫面，好驚，唔知 點算好，終於就行返轉頭，穩穩陣陣（苦笑）......
其實個心喺 到嗌緊：去啦，去啦，放心去啦，你得㗎，自古成功在嘗試，就 算真係衰咗，
咪再嚟過囉 .....（歎氣）（搖頭道）冇用，雖然係一步，但係，我就係欠缺咗行果一步嘅力量
同勇氣，唯有繼續 鴻：原地踏步 ... 固步自封 ...（再歎氣）唔單止實力冇增長到，連運氣都
冇埋 ......而家咁嘅處境同心情，我真係唔知會畫啲 乜鬼嘢出嚟......（冷笑）哼，原來我唔好
得過阿千幾多......
高：（感慨地）唉...我真係唔知你兩個攪乜。（語重心詳）有機會嘅時候唔好好把握 ，
遲吓就想畫都冇得你地畫...... （感歎）因為種種外來因素而阻撓咗自己去發展理想，
唔係太可惜 咩 ？ 唔通你畫畫只係為咗名同埋利 ？
鴻：（淡然道）唔為名為利，咁為乜 ？
高：（認真地）當初你決定畫畫嘅時候， 係乜嘢原因驅使你？ 唔會係錢掛 ！（停下，望著鴻）
（鴻認真的想著）
高：一切從心開始，諗番自己第一次揸起支筆嘅時候，果種心情，果種態度，當時嘅熱誠同埋抱負...試吓再由果一刻出
發，從新定位，忘記果啲繪畫以外嘅嘢。（肯定地）擁有番當時嘅心情，加埋你而家嘅功力，一定有好作品。
（拍拍鴻的膝頭）真㗎！
鴻：（深呼吸）（歎氣）一切從心開始......（苦笑）我真係冇咁諗過...（感慨地）原來自己同自己玩緊捉*依因* ，
最後連自己都 搵唔番自己 ...唔，可能你講得啱（閉上眼一會）
（跟著望向高） 比啲時間我消化吓(指著自己的腦袋）（苦笑）呢到塞塞地...... （停一停）
講完畫... 咁個人呢 ？ 我個人有冇變到 ？
高：唔......我唔想人格批評 。
鴻：（苦笑）（停一停）咁不如陪我去食啲嘢？想出去抖抖氣。
高：好 ！ 樂意奉陪 。呀，不過要打個電話返屋企先。
（高打電話，鴻笑著搖搖頭，跟著往房換衫）
（場外音）賢：喂？
高：我呀，我同阿鴻去食啲嘢，妳唔洗等我喇。
（場外音）賢：唉......
高：（聽到屋內傳來哭聲）咩事呀？ 邊個喺到 ？
（場外音）賢：（婉轉地）你去完邊到呀？ 咪咩囉 。
高：呀...... 一個定兩個 ？
（場外音）賢：總之就齊人啦.....（欲言又止）
高：呀...我...諗諗辦法，妳留住佢地等我返黎喇...
（場外音）賢：得啦，等你喇 。 不過最好快啲， 場面都幾難控制 。
高：呀......明白 ， 我盡力喇 ！唔 ， 係咁先啦。
（高收線，鴻亦由房換了衫出來）
鴻：行得喇 。
高：叫埋阿千 ， 好嘛 ？
鴻：好 ，（指著電話）打比佢囉。
高：冇用㗎 ， 要親身去 。
鴻：（覺得奇怪）咁。。。行喇！
（一齊離開 ，閂門） （燈轉暗）
--------------------------------------------------------------------------------
從心出發-----第七幕
（回到第三幕阿千的房子 ， 千仍攤在梳化上 ，似乎沒有郁動過）
（門鐘響，千沒有理會。門鐘再響，更加上拍門聲，千一臉不悅叫道）
千：（大聲地）邊鬼個 ？
高：（在門外叫喊）又係我呀 ！ 阿高呀！ 起身開門喇大佬 ！
（千賴了一會才萬不願的起身往開門，看到阿高）
高：重 "毆" 緊？
千：（看不到阿鴻 ， 開了門便轉身往梳化去）你又玩屈尾十？（高和鴻齊入內）
鴻：千哥！ 千：（攤回梳化上）（望一望，詫異地）咦..鴻哥仔都嚟埋 ... （鴻微笑而不語，企在一旁）（千續道）今次又點呀 ？
高：（向梳化走去）睇吓你諗成點囉？
千：(冷淡) 吓，你走咗冇幾耐咋喎...（搖頭道）我咩都冇諗過。
高：（坐下，努力地說服阿千一同外出）咁...不如一齊出去食啲嘢？橫掂咁齊人，一路食，
一路諗，大家又再傾吓...好冇？
千：（滿不在乎）唔好 ！ 我都話只係想一個人諗吓嘢。（場面變得尷尬）（靜默了一會）
（高知道不能再拉扯下去，首先開口）
高：（認真地）（手指著門口）你連行出呢個門口嘅勇氣都冇，重有咩諗呀，你唔係話咩
都冇諗過嘅咩？你想諗咩，我幫你諗下 ！ （鴻定眼望著高 ， 很少看到他這樣）
千：（冷冷道）你好煩呀...... 冇我又唔係唔成事，做乜一定要嚟搵我唧？我唔得㗎，
我啲畫唔得㗎...無謂累人累物！啱啱先 趕走一個 ， 唔爭在趕多一個 ！ 我只係想靜下唧，
（歎氣）你咪成全我囉 ！
（高無語 ，雙方又靜了一會。 鴻見狀心生一計）
鴻：（打著眼色向高道）係囉，咪成全佢囉，一陣比人趕就無謂啦。（停一會，續道）
呀...為人為到底，一場朋友，幫阿千哥你掉埋啲 畫，廢事你眼冤，橫掂你都唔係好想郁咯。 （向高望去，打手勢）嚟喇 ， 過嚟幫下手 。
（千裝著不聞不問） （高會意） （鴻和高開始做戲）（拿起些畫來看）
鴻：（提高少許聲線）咦，（向高說）你睇呢幅，人定狗黎呢 ？ 呀！ 明白， 人即係狗，
狗即係人。 犀利，犀利 ！（拿起另外一幅， 再道）唔......呢個係男定女呢 ？一邊有胸，
一邊冇......一 面靚就一面醜，哈，幾似阿曼！抽象人像畫，唔錯唔錯 。
（千開始有些反應） （鴻再拿第三幅， 問阿高道）
鴻：呢幅又咩名堂呢 ？
高：（作思考狀）應該算係 "閉門造車"，睇吓，㗎車都出唔到個門口。
鴻：呀...係喎（冷笑） 有見地，有見地！
（鴻拿起第四幅）
鴻：咁...呢幅個人藍色心 ， 又咩嘢意思呢？ 憂鬱 ？ 無助 ？ 定係（加重語氣）無能呢 ？
高：咦 ， 試下搵搵 ， 可能會有張喺 "灰色" 心嘅 。
鴻：哈 ，咁抵死，真係要搵搵咯 。
（千突然道）
千：唔洗搵喇 ，"灰色" 心果張喺呢到 。（拍拍自己的心）
鴻：哎也，咁 "灰色" 心果張就留番比阿千哥你自用啦， （望望阿高）咁， 我地兩個夾手夾腳幫阿千哥掉咗啲眼冤野先啦 ，
眼唔見為乾淨，咁間屋又大啲，空間咪又大啲囉，街都唔洗出
喇 。 喂，睇吓有冇繩 ，扎起佢地 ，一次過，唔洗行幾轉 。 （高望著鴻笑）
高：等我四圍睇下...（但沒有動作）
鴻：哎 ， 咪住 ！ 我識得有人鍾意用地攤價嚟買畫㗎， 不如問吓 佢有冇興趣要晒啲畫喇 ，
又唔洗搬 ，重有錢收 ！ 一石二鳥 ！
（眼往千的方向望）
高：（裝傻）個價好唔好㗎 ？ 鴻：（冷笑）地攤價，你話好唔好！
高：是但啦，你打比人喇 。呀，（指一指個電話）個電話唔用得喎。
鴻：乜呢間屋咁多嘢冇用嘅！（手往千指）（千詐看不見，但開始忍不住）
鴻：咁我落街打喇 ， 佢都喺附近嘅唧， 應該好快到 。
（說完便往門口去）
千：（大聲地）你同我企喺到 ！ 鴻：（詐傻）得喇， 我會同你叫個好價㗎喇 ，放心喎。
千：（終於企起身）（認真地）啲畫我嘅，我冇話過要賣 ！ 唔洗 你地操心 ！
（鴻站住，望向高） （大家靜默了一會）
高：（回復本來語氣，嚴肅地）你知啲畫係你嘅咩？啲畫喺你心目中有位置 ？你重要佢地咩 ？就算你要番佢地，
佢地都未必肯 認你......（搖頭道）你唔配做佢地主人，佢地話對你好失望，
唔想再留喺到！（停一會）既然你連心愛嘅人都可以趕走，啲畫 又算係乜？
（鴻聽到呆了一呆，不知之前發生何事）
（千無語，面色一沉 ， 跌坐回梳化上）
高：（認真地）你唔捨得啲畫，即係話你重未死心，點解要攪到自己咁！比人講幾句，
時時都有㗎喇，做乜今次打得你咁謝呀！無話 吓吓一帆風順，藝術嘅嘢，邊有定義㗎！
挫折邊個冇？ （向鴻望一望）（鴻亦有所感）係男人嘅就抬起頭做人，去解決 問題，
唔係逃避！（停一停）再講，你估阿曼離開你，就會開心 咩？咁就會搵到幸福呀？
唔好咁大男人喇。咩年代呀？你係想 佢生活得好嘅，就更加要比心機做好啲，唔係喺到扮死屍。 事 業上嘅失意，
點解要帶落感情關係上面？
千：（亦是一臉嚴肅道）究竟你今次嚟同我講事業定愛情？我知自己唔會放棄畫畫，
我只係想用小小時間去沖淡啲唔開心嘢，我有 權下嘛 ！（停一會）至於愛情，或者我係
做錯咗，但係都唔洗 你同我操心!你一向都唔係咁多事？幾時變得咁八婆 ？
（鴻亦感疑惑的望著高）
高：（歎氣，感覺無耐）你講得啱，我一向都唔多鍾意理人閒事... 換咗係其他人，
我真係唔想理咁多（望一望千，再望鴻） 我諗我哩世人，最八婆就係今日......我真係唔明，
點解你兩個 事業同愛情都咁一團槽；我地唔細㗎喇，黃金時間有限呀！面對 現實，面對自己，
係想發光嘅，就快啲振作，掌握自己嘅人生。有時間玩失落，玩頹廢，不如用嚟檢討下自己點解會失敗重好！
揀呢條路行嘅時候，都應該有哂心理準備，清楚知到條路係爛嘅！係香港藝術得唔到重視，生存空間好狹窄，
但係呢啲嘢喺我 地開始行第一步嘅時候已經好明白.....我真係唔想再講落去，事業係你地嘅事業，要點行，我唔想再干涉 ；（歎氣）
但係阿 雪阿曼係我同阿賢嘅好朋友，你兩個亦係我嘅好朋友，我真係唔 想見到你地咁 ......
（三人靜默了一會）（高深呼吸） 一句講晒，你地嘅愛情就喺我屋企到，需要點做應該唔
洗我教！（望望鴻 ， 再望望千） （再歎）兩位大哥 ， 行一趟喇 ！
鴻：（小聲道）我怕......佢唔想同我行咋，決定權唔喺我到。
高：（拍拍鴻）我唔知佢因乜事走，但係你應該知到你點樣做，會令佢肯返轉頭。
感情事始終係兩個人嘅事 。
（鴻點點頭）
（高轉望著千）
高：唔好再詐死扮傻，緊唔緊佢你自己最清楚，今次放棄咗，可能真係再無機會，
將來後悔嘅亦都只係你自己 。
（千開始動搖）
（不等千有回應 ， 鴻和高已有所行動）
鴻和高齊道：行喇 ！
（兩人一左一右，夾著阿千離開）
（終於三人一起往高家去 。 燈轉暗）
--------------------------------------------------------------------------------
從心出發----- 第八幕
（回到高與賢的房子）
（三人[賢，曼和雪]以不同的姿態坐在梳化上，賢剛剛放回電話）
（雪和曼的哭聲亦已轉弱，但雙眼通紅，滿面淚痕）
（賢歎口氣，遞紙巾給兩人。嘗試繼續開解兩人） （雪和曼各自抹拭面上的淚水）
賢：（望著兩人，關切地說）我地係女人，唔係淚人，流幾多眼淚都解決唔到問題！
趁而家得我地三個，坦白啲，唔好呃自己 。 （稍停） 究竟（猶疑一會）你兩個會唔會
真係捨得放棄你地個男人？ 會唔會真係狠得起心 ， 斷咗果份感情？
（二人不語 ， 思考著問題） （雪先回答）
雪：（盡量使聲線顯得平淡）有時，有好多嘢...... （揚揚眉，眼光向遠望）唔到你唔放棄 。
（曼緊接著說）
曼：（嗚咽著，仍有淚流）有啲 嘢， （搖著頭）亦唔係我可以話事......
雪：（深深歎一口氣）佢跟本就唔識得面對現實，只係識得匿埋喺個殼入面，（稍停）
我唔可以忍受同隻 "烏龜" 一齊 ！ （雪強忍著眼淚）
曼：（抹抹淚水）佢自暴自棄，面對唔到挫折。哼！搵女人嚟出氣嘅男人係最無用嘅！
（靜默一會） （賢再努力希望能開解二人）
賢：（歎氣）其實，你地係咪相愛㗎？定係你地識咗冇幾耐？（停一停）我都唔係第一日
識你地！嗌完，鬧完，跟住咪又喺番一 齊，不過今次就嚴重啲，玩離家出走......（望望兩女）
試吓，（點著頭）試吓心平氣和，冷靜落黎諗吓，係咪真係忍心？係咪真係 想分手？
真係冇得挽救？（停一停） （加重語氣）小小唔捨得都冇 ？
（兩人默然。曼以手托著頭，仍流著淚；雪眼光望向遠處）
賢：（語重心詳）愛一個人係需要好大嘅能量，得到同付出嘅亦唔可能成正比......但係當你
真正深愛一個人，就唔會去計較得 與失 ...人人都會有失意同埋低潮，冇可能永遠都係順境，
如 果因為咁而放棄佢地 ...（歎氣）佢地咪重難起番身？睇住佢 地一撅不振，你地會開心，
會高興咩？ 諗清楚啲，一個人失意嘅時候，係咪更加需要愛同埋關心？！
曼：（抹抹淚水道）哼！佢要咩！
賢：（歎氣）（望著曼）佢唔要就唔會咁樣。佢唔需要嘅話，就唔會比你知到佢開心定唔開
心；佢重會喺你面前表現真正嘅情感， 因為佢覺得你會明白、會了解、會關心佢。一個成年
人，要掩飾 自己嘅喜怒哀樂，唔係咁難唧。佢會毫無保留咁係你面前宣洩， 亦代表咗你喺佢
心目中嘅位置 。（苦笑）可能咁講好阿Q。
雪：（強忍著淚水）（深呼吸）咁都未嘗冇道理......（歎氣）但係，當不滿嘅情緒充塞住整個
人嘅時候，（望向賢）會諗到咁多 咩？當你對一個人完全失望嘅時候，你只會睇到佢乞你憎
果一 面，連點解愛呢個人 ......（轉細聲）都忘記咗 ...... （雪用手托著鼻）
曼：（望向雪）但係......（跟著望向下方，擺著頭）而家係佢嫌我煩呀！係佢話唔想見到我呀！
（望向賢）咁我重可以點呀？唔通 賴死唔走咩 ！
賢：（望著曼）（歎氣）雖然話係旁觀者清，（搖搖頭）但係旁觀者永遠冇可能了解當局者心
裡頭嘅感受......（繼而望一望雪） 感情係你地嘅感情，要點樣面對，點樣處理你地應該比我清楚 。
（停一停）或者... 你地試下用局外人嘅心態去分析一下自己嘅問 題，咁樣，可能會容易啲解決?。
（兩人思索著，曼亦已不再哭了）
賢：（望著兩人繼續說）唔好所有嘢都只係向一面諗，試下易地而處，幫佢諗吓 ...其實...
問題係唔係真係咁嚴重？咁無可挽救？
（場面靜了一會。曼首先開聲）
曼：（用紙巾印印面上的淚痕）可能...我又真係煩咗啲嘅，但係佢 應該明白，我都係關心佢唧，
（委屈地）唔...唔通見到佢唔妥 都唔出聲咩！佢唔講乜事，我點知佢乜事喎。我有開心、
唔開心 嘢都會講佢聽啦，點解佢乜都收喺個心度，我都可以係一個好嘅 聽眾嚟㗎！做乜
淨係識得搵我嚟出氣喎！我係佢女朋友呀， （搖搖頭） 唔係出氣袋呀！
賢：（望著曼，輕聲問）咁你重愛唔愛佢？
（曼惘然 ， 霎時間不知如何回答）
（雪接上）
雪：（忍著淚水，眼望向遠方慢慢道）唔愛佢，都廢事理佢。鬧一 場交，死好多細胞。
（歎氣）但係唔鬧佢咩，佢又真係唔識得醒， 一路咁沉落去。（點著頭）我知我重未丟得低，
我只係想比自己 嘅情緒...休息吓...（苦笑）哼，發洩吓...再忍落去，真係會爆。
賢：（望著雪，認真地問）答我，咁即係，你重愛唔愛佢？
雪：（肯定地）愛。一路都冇變過... 或者你講得啱，應該抽離一吓， 用一個客觀啲嘅態度去
（望向賢）面對兩個人之間嘅問題。 （賢向雪作一個鼓勵式的微笑） （雪亦淡然笑一笑）
賢：（望回曼）你呢 ？你重未答我，你重愛唔愛佢？
曼：（不忿氣）唔愛佢就唔會咁痛苦啦。而家個問題係，我唔知佢愛唔愛我呀 ！
佢咁耐以嚟都冇話過愛我......
雪：（幽幽道）佢都冇.....
賢：（歎氣）唔好咁執著果一句說話， 調番轉頭你地有冇同佢地講 過 "我愛你" 吖？
（望向二人） （二人默然）一向中國人都唔會放呢三個字係口邊㗎，可況愛唔係靠把口講，
要用個心去感受。唔通咁耐以嚟，你地都感受唔到 咩 ？ （停一會）
雪：（苦笑）或者個問題唔係喺呢到，可能係我對佢有其他嘅要求、 更高嘅期望。
當佢唔再珍惜自己藝術生命嘅時候...... （稍稍傷感地續道）令到我相當失望、好唔開心。
我開始懷疑，我愛 佢啲乜嘢，佢重有乜嘢值得我欣賞。（歎口氣）我唔希望愛得咁盲目......
（苦笑）嘿 ！（望一望賢） 你明白嘛，原來愛一個 人，唔係單單靠愛就可以，
重有好多其他嘢 。
曼：（突然起身，大叫）呀！唔好講得咁複雜喇，愛得簡單啲唔好咩？ 好似阿賢咁講，
感覺嚟㗎咋嘛！
雪：（望向曼，淡淡然道）我同你唔同㗎。 曼：（感覺奇怪）有咩唔同呀 ？ 大家都係女人 ！
（雪不語，冷笑。曼不悅）
賢：（企在兩人中間）你兩個唔好咁啦！ 聽我講 ， 好冇 ？
（二人不語 。 雪仍坐在梳化上，但背向二人）
賢：（歎氣）唔好再咁拗落去喇，永遠都冇結果。總而言之，如果你地重係愛對方嘅，試吓比多次機會大家，
將個問題攞出嚟傾吓； 唔好咁固執，唔好郁下就嗌交。睇吓搵唔搵到中間存在嘅問題，嘗試去補救吓 。
（停一停）如果唔係嘅，就唔好再屈住自己， 交代清楚從新做人！最緊要係你地放唔放得低！？係咪真係會開心 ？
（雪默然，閉上眼一會）
曼：（大聲地）呀！！！！ 你明唔明白呀？ 而家係佢叫我走呀 ！ 佢冇話過要我比機會佢呀 ！
（賢想回答，但門鐘響）
（賢往開門） （曼用力地坐回梳化上）
賢：（自語）救星返喇 。
（門開。是個滿面笑容的英偉男子--米）
米：Hi ! 賢：（小許驚訝）大佬 ？！
米：（直畢入屋）好口渴，有冇凍嘅玫瑰茶？ （望到雪和曼） 呀！你兩個朋友仔都喺到，
（揮揮手）Hi ! （雪和曼向米點頭招呼。）（米轉向賢問）阿高高呢 ？
賢：佢出左去，你嚟搵佢 ？
米：（笑）冇乜特別事，過嚟坐下搵你地聚聚。咦？有冇玫瑰茶？
賢：呀，係 。等等 。（往廚房去）
米：（笑）凍嘅，唔該！（往梳化坐）
（米轉而望向雪和曼 , 笑道）
米：阻唔阻住你地 ？ （雪苦笑）
曼：（不快道）好似係我阻住人唧 ！
米：（望著曼笑道）唔 ？ 小妹妹，又有感情困擾？ （曼不好意思說，感尷尬）
米：（誠懇地）感情事，除咗自己，冇人幫到你㗎！自己嘅人生，要自己掌握番！
（米向曼作一個鼓勵式的笑容）（曼苦笑）
（賢由廚房出來 ） （遞茶給米）賢：大佬。
米：（接過）Thanks ! （飲數啖 ，放低）Good ! 呀"妹"（音-Mui）嘅茶特別好飲 。
賢：（搖搖頭）哈 ， 你把口呢 ！
（米望望雪、曼和賢。感到不大對勁，便往高的畫架看）
（看了一會，望著畫，向賢道）
米：呀， 阿高高啲畫愈黎愈好喎 ，唔......（按著胸口） （停一會）（歡呼）Wow ! 利害、
利害 ！ （仍望著畫 ， 問賢）幾時再有展覽 ？
賢：好似遲啲有 。（雪和曼聽到有些反應）
米：See** （仍望著畫 。 搖搖頭）一定好震撼！ 又係同埋阿千 、 阿鴻一齊攪 ？（望著賢）
賢：呀...（望向雪和曼）佢想係......
米：（笑道）想...跟住 ， 就行動㗎啦！ （賢笑而不答）
雪：（懷疑的向賢問）阿高 ， 去咗搵佢地？ （賢感尷尬 ， 不知如可答好）
（雪見狀亦明白，略有所思）
曼：（望望兩人）（提高聲線）阿高去咗搵佢地（企起身） , （緊張地向米問）搵佢係傾畫展 ？
米：（望著曼）呀...小妹妹 ， 你好 "High key" ！ （笑笑口，行近她們）唔洗咁緊張噃 。
阿千有事咩 ？
曼：（搖搖頭，坐回梳化上）佢冇 ，我有唧 ！
米：（笑著說） 唔係呀 ， 你幾好呀， 係對眼紅啲。 （行近曼，望著她，再指指眼的位置）哪，眼線走走地。臨走記得補補妝 。
Okay ,冇問題呀，重幾靚女 ！ （望向雪）咦！你都係喎...做乜事 ？ 傳染性紅眼症 ？ （雪擰轉頭 ， 背著米）
米：（望向賢）你小心呀，掙你咋 。（賢苦笑不答） （米見眾人不語，再打開話匣子）
米：（拍一拍手）呀...趁得我一個男人喺度，問下啲女人嘢，得嘛 ？
（賢側頭望著米，曼亦望向他 。 雪仍背向）
米：（小心地問）鍾意一個人係基於乜嘢原因呢？ （望向賢） "妹妹（Mui Mui）" 講先 ！
（米站在梳化背後，雙手按著椅背）
賢：（詫異地）我 ？ 米：（笑著說）係呀，（指指賢） 你呀 ！ 講嚟聽吓？
（曼也望著賢 ， 等她答覆） （雪也有些反應）
賢：呀...（想一想）眼緣喇 、 嗜好、 感覺......
米：（翹著雙手）感覺 ？ 好抽象噃。果種感覺係點㗎？形容吓 。
賢：（側著頭）呀...覺得同呢個人一齊，好舒服、好自然，咩都可以講；
（微笑道）佢所做嘅嘢會令我欣賞，會覺得呢個人好值 得尊重、好難得 。
米：（笑一笑）I see ** （望向曼）你呢 ？ 小妹妹 ？
曼：（迷惑） 鍾意咪鍾意囉 ， 要原因嘅咩？ 呀...（搖搖頭） 答你唔到呀...我只係知到我
第一眼見佢已經鍾意咗佢喇 。 （苦笑）好傻啊可 ？
米：（笑而認真）唔傻！可以同自己第一眼就鍾意嘅人喺一齊，真係好難得！
哈哈...亦好神奇，見完果一眼之後...點開始呢 ？（伏在曼坐的椅背）
曼：呀......（面紅）
米：（站直）（揮揮手）哈哈哈....算啦，當我冇問過，面都紅晒喇你 ！
（曼撫著面 ， 回想著）
（米望向雪，雪想迴避）
米：佢兩個講完 ， 到你喇 ！ 唔好奸*瀨* 。
雪：（深呼吸一下）赤子心 ,（停一停，慢慢道）氣質、熱誠...唔係咁簡單...（搖搖頭）
唔係一、兩句說話可以解釋到。 （望著米）做乜突然間咁問 ？
米：（作一個頑皮的笑容）（側側頭）資料搜集。
賢：（懷疑地）愛嚟寫書㗎 ？
（米笑而不答）
（賢搖頭笑笑）
米：（笑）點解你地唔會話要求：高大、靚仔、有錢、有樓呀咁嘅？我問過好多女仔，
通常都係咁答我；嘿！終於喺到比我搵到啲 唔同嘅！ 藝術家女友的確......
（點著頭，不知該如何形容）
雪：（淡然道）如果只係要求物質上嘅嘢， 可能會愛得容易啲。 （歎氣）而家追求緊嘅......
太虛無飄渺。
米：（笑著望向雪道）嚟得太容易又會變得無意思。 經過磨煉嘅感 情，先至值得珍惜；
會覺得更加珍貴同難得 ！
（雪苦笑，但米笑得非常肯定）
米：（望向賢）"妹" 你話我講得啱唔啱？
賢：（沒好氣地笑道）啱！ 你點會唔啱呢？
米：哈哈哈 ！ 梗係 ！ 哈哈哈 ！
曼：（望向米）咁你呢 ？ 你又點呀？
米： 我 ？ 鍾意一個人嘅原因 ？ （曼點頭）
米：（笑）呀...（望向遠方）（指著前方）係喇！係喇！係佢喇！（轉頭向曼笑道）
就係咁哪 ！ （眾人笑了）
米：要去愛一個人唔難㗎 ， 要對方同樣愛你先至難！ （搖頭） 譬如：（望向各人）
你地要愛我，冇問題㗎，但係 ！我會唔 會同樣愛你地就係另一回事 ，係咪 ？（笑）
賢：唉！（笑）真係比你激死 ！
米：（大笑）哈哈哈 ！唔係講笑㗎！調番轉頭，我好愛你地，得喎, No problem !（搖搖頭）
之不過 ，你地有權唔愛我 ，係咪 ？ （眾人再笑）
米：（笑）笑咩呢 ？I'm serious！哈哈！搵到可以相愛嘅人真係 好難！（有所感觸地）
唉...好似我咁好條件，都重未搵到... o徙哂 ！
（眾人被米逗得開懷些 ， 場面變輕鬆了）
曼：你要求高唧 ！
米：No！（搖搖頭） （望望尾指）可能條紅線斷咗。（按著胸口）或者邱比特眼界差咗。。。
（搖搖頭）Anyway , 我仍然相信緣 份，佢要嚟的話 （望向遠處，手比劃著） 點都擋唔住！
就好 似個七尺巨浪 "噤" 埋嚟 （搖著頭）死梗 ！
雪：（笑著道）咁你唔好咁快談戀愛喇， 唔係你會好短命 。
米：（點頭）唔...可能因為咁， 所以唔比我遇到！唉...... 冇愛情...（詐作憂傷）
長命百歲又如何呢 ？
賢：你重有事業嘛！
米：（誇張些）嘩！如果一個冇愛情嘅人，連事業都冇埋...個故事似乎太殘忍喇...
（忍不住大笑）哈哈哈哈 ！ （眾人再因米的話而笑）
曼：咁你跟住個故事講乜㗎 ？ 問咁多女人嘢。
米：未知 ， 問咗、分析完、整理好再算。 你想我寫咩呢 ？
曼：哈 ，咁你幫我寫衰啲男人啦 。
米：（笑）衰男人係多 ，（指指自己）好嘅亦唔小！哈哈哈 ！
賢：（搖搖頭）你真係唔怕醜 。。。
米：哈哈哈 ！ 怕㗎 、 怕㗎 ！ 哈哈哈！
雪：（望著米）究竟你有冇煩惱㗎 ？
米：（誇張地）有 ！ 梗係有啦 ！睇唔出哩 ！哈哈哈！唔... 煩惱唔係放響個面度嘅，
（指指腦袋）諗通透啲、 豁達啲， 最緊要成日笑 ， 咁煩惱就唔會纏住你 ， 開開心心咁做人，
（側側頭望著雪）唔好咩 ？ （雪淡然一笑）
米：唔係咁 ， 要笑得開心 、 笑得燦爛，啲煩惱先至會走㗎！
（聽罷，雪真的笑得比之前燦爛多）
米：係喇 ， （望向賢，指指雪）你話係咪好好多呢？
（賢不答，但笑著點頭） （曼也覺好笑）
米：呀！開始有番五成喇 ！
賢：（不明）五成 ？ 五成咩呀 ？
米：氣氛 ！ （轉一轉身）呢度嘅氣氛！每次嚟，我都感受到一種獨特嘅和諧 、 四周圍漓漫住
一種溫馨嘅感覺 。 *家*果種 ， 喺第二個人嘅屋企搵唔到 。
（雪和曼略有所感）
曼：原來係咁，唔怪得每次唔開心，都想嚟呢度坐吓......
雪：（苦笑）點解自己屋企冇 ， 要去人地屋企感受......
米：（笑）如果人人屋企都有，就唔算獨特。要大家同時 "用心" 去 愛個*家*，減小爭拗同磨
擦，呀 ！最重要就係唔好唔記得*笑*，（唱）笑一笑世界更美妙---， 哈哈哈 ！（眾人鼓掌）
米：（鞠躬）Thank You！呀 ，（數著）1、2、3、4，夠腳 ！
曼：（訝異）打牌 ？ 我相信呢度冇麻雀。
（賢搖頭示意沒有麻雀）
米：傻嘅， 麻雀大人玩嘅， 我地呢啲咁有童真，梗係玩第樣。 （從袋拿出一個小盒）
（隆重宣佈）飛行棋 ！
眾女： 吓？
（燈轉暗 ， 落幕）
--------------------------------------------------------------------------------
從心出發----- 第九幕
（仍是高與賢的房子。高和賢他們倆在整理著畫 ， 數量不少）
（門鐘響 ， 賢往開門 。 門開 ， 是阿鴻 ）
賢：Hi ! 重未得呀 。
（鴻入內，賢關門。高向鴻打招呼 ， 鴻亦向高招手）
鴻：哦 ， 駛唔駛幫手 ？ 賢：好呀， 麻煩你喇 ！
鴻：咁客氣！呀，等等。（打電話）（接通）喂，佢地未得呀，上嚟幫幫手，哈哈，係呀，
快啲喇。一齊上嚟喇 ！係呀， 係咁喇 。（收線）（望向賢）點呀 ？ 整邊啲先？
賢：呀...（轉向高）高， 整邊啲先？
高：唔...近門口果啲先， 唔該 ！
鴻：收到 ！ （鴻動手 。 門鐘再響）
賢：等我開 。 （門開 ， 眾人到齊）
賢：嘩！咁快嘅 ！ （眾人入內）
曼：喺樓下之嘛 ！
雪：（望望地下的畫）咦 ！ 今次多好多喎。
千：今次地方大好多 。 （跟著向高問）有冇邊啲攞得落去？ （高望望）
高：呀。。。（指點著）果啲喇。。。（門鐘又響，曼企近門口）
曼：等我開 。 （門開 ， 眾人望望是誰。 是阿米）
曼：Hello ! 賢：（笑）大佬 ！
米：（笑）（揮動雙手）Hi everybody ! 好齊人喎，我特登過嚟睇下 有冇嘢幫到手 ！
（雪、鴻與千亦笑著向米打招呼）
高：哈 ， 梗有 ! 冇咗你就唔成事喇！
米：（拍拍高的膊頭）哈哈哈 。 乜咁講呀！ 雖然係 ！ 哈哈哈！
（眾人亦笑）
（各人亦開始執拾，很多說話）
（跟著眾人開始搬畫落樓 ， 一路搬、一路傾， 有講有笑）
（最後所有人離開了 ， 關門）
（燈轉暗、落幕）
（全劇完）
--------------------------------------------------------------------------------
歡迎給予指正和意見或感想，先謝! 
