歡迎給予指正和意見或感想，先謝! 
故事:
問米即是通過靈媒把已死親人朋友的靈魂招喚上來，問問事情或只是懷故舊人。
但這故事裡的問米師卻有所分別，他們所招喚的都是一代名人學者，只要有死亡年份、
性別名字和專長，就能夠使那些古人上其身。若願意繳付相當的金錢，便能請問米師招喚
任何國家、時代的靈魂。但所有問米師也要面對一個危機，就是可能有一天會失去自己。
「漱玉軒」主要聚集了幾個專門招文學、藝術界靈魂的問米師，和幾位失去了自己的問米師。
而東主的一段情更和某一個問米師有著莫大關連，故事就這樣子發展下去。
景:
台上是一個露天咖啡座景，服務台在左後側，但沒設客人入口，顧客 均需坐在露天的位置
或服務台前的高椅。左手面前方有一座不太漂亮 的鋼琴接連著服務台，有篷或有瓦頂遮蓋。
而服務台的右面位置放有 一畫架，周圍有一些凌亂的畫具和畫布版。露天位置中央有一張
較大 的枱，其餘只須要有數張小枱就行了。 在咖啡座頂一個不大起眼的角落安上招牌--
「漱玉軒」(宋朝字體)，英 文招牌在較為顯眼的地方---Vaudeville Cafe。
人物:
東主-
中年男人，有一股滄桑味，深愛亡妻; 為人不大計較，所開設的 咖啡座志不在賺錢，
而是報恩。
問佬-
中年男人，身材廋削，乃資深問米師。對朋友重情，喜好中國 文學; 為人有點神經質，
口齒伶俐。
惜惜-
二十多歲的女性，文靜、大方的問米師，入行只有三年多，對 自己的能力信心還不大。
白小姐---約二十歲的女性，問佬的顧客，好奇、面皮厚。
楊宏雲/莫札特---若三十歲的男性，擅彈琴。喜歡笑，個性單純，是 「漱玉軒」的駐場音樂家。
何小姐/holly---二十多歲的女性，楊的未婚妻，容易哭、略為吵鬧， 深愛楊。
梵谷-
約三十歲的男性，擅繪畫。不愛說話、沈鬱，喜歡整天站在畫 布前畫畫。因以為自己沒了
一隻耳朵，所以常常戴著一頂能遮 蓋耳朵的帽子 ; 是「漱玉軒」的駐場畫家。
林語堂-
中年男人，喜穿長衫、手持煙斗。說話幽默隱含哲理，身份 思想較其他人特殊。
梁醒波---中年男人，肥胖、喜穿西裝、擔雪茄。懂演戲和唱粵曲，喜歡撩女仔。
上身人物:
尼采-哲學家，自信，語氣肯定。
王爾德-文學、劇作家，自負、說話機伶、誇張。
蘇東坡-文學家，豪邁、機智、豁達。
李斯特-音樂家，私文、瀟灑、擅彈琴。
相關人物:
李清照-宋朝女詞人。
趙明誠-宋朝金石學家，李清照之夫。
分場: 第一幕-普通日子時的咖啡座。
第二幕-佈置成開派對模樣的咖啡座。
--------------------------------------------------------------------------------
第一幕
(東主在服務台裡頭，莫札特在彈琴，梵谷在畫畫，其餘地方沒有客人。時為中午時份，
露天的位置有陽光射入。)
(問佬入，行往服務台坐在高椅上。)
東主: (向問說) 咦? 今日有生意?
問佬: 有生意先至嚟得咩? 不過你講得啱，真係有生意。
(東主沒答口，斟了杯飲品給問佬)
問佬: (接過) 唔該。話你知呀老闆，哩個世界乜野都多，水魚就仲多。
東主: 問佬，咁你又唔好咁講，話晒都係客仔嚟。
問佬: 客又好、水魚又好，都係愛嚟噤。
東主: 啱嘅，(語氣重些) 客仔!
問佬: 哈哈。
東主: 話時話，你哩排生意咁差，有冇諗過賣下廣告?
問佬: 哈，(望一望那些空枱子) 五十步笑百步。
東主: 呀，我都係關心你啫。
問佬: 唉，有麝自然香。
東主: 香就香，我驚你窮到聞到棺材香咋。
問佬: 哈，都唔拘，好過聞蓆香，瞓棺材都重有番小小私人空間。
東主: 好嘢、好嘢，百無禁忌。
問佬: 我地做呢哩行，專門同嗰味野打交道，重有乜野好忌。
東主: 你估會唔會出面太多講你地哩行嘅書，啲人以為睇書學得到? 好似話有本叫
「心靈威士忌」，好多人買喎。
問佬: 有咁易學! 威士忌，飲呀! 總係有人濫竽充數，又咁多人盲 從附和。
東主: 你講嘢呢，一時就鬼咁市井，一時又文質彬彬。
問佬: 咪多得佢地囉，唔多唔少，梗瀨低啲。
東主: 咁你就更加應該去蕪存菁，做個謙謙君子。
問佬: 做君子好咩? 要坦蕩蕩。
東主: 係囉，咁你就一路長慼慼哪。
問佬: 咁我又無小人咁難養，我寧願傻更更。
東主: 戇居居!
問佬: 哈哈!
東主: 哈哈! (望望出面) 你個客仔會唔會放你飛機呀? 咁耐都未到。
問佬: 無法啦，人邊有準時，遲下到先至有型呀嘛。(轉向莫說) 喂，老莫，彈首費加羅嚟聽吖。
莫 : no problem !
問佬: Thanks !
(莫轉彈費加羅的婚禮某一段)
(梵谷仍在畫畫，不時看著東主和問佬)
問佬: vincent哥，日畫夜畫你唔洗抖嘅? 你唔攰，支筆都攰啦。
梵谷: 畫畫就係我生命嘅全部。 (梵谷繼續畫畫)
東主: 其實你驚唔驚有一日會好似佢地咁，易請難送?
問佬: 邊有得驚，高風險行業，正式搵命搏。(望望莫) 不過佢地兩個都 唔錯呀，無啦啦做左
名人。(有點羡慕)
東主: 如果比你揀，你想邊個留低喺你度?
問佬: (不太認真) 哈! 搵啲咁嘢搞。
東主: 如果咋嘛，你成日都話百無禁忌㗎。
問佬: (嚮往地) 最好就做番唐人啦，詩人就更啱，李白嘅飄逸、蘇東坡 嘅豪邁、
李商隱嘅淒美。正!
東主: 睇你，唔講唔講，一講個樣幾咁陶醉。
問佬: (自拍兩頰) 醒! 醒! 醒! (停頓) 呢排有冇人嚟探佢地?
東主: 阿莫個女友時時都有嚟睇佢，阿Vincent就到而家都冇人嚟探過佢。
(二人望望Vincent 感無奈)
問: 喂，你係咪買左嗰本乜鬼嘢"威士忌"?
東主: 我哩度大把威士忌，洗買人地嗰啲! 何況，有咩我唔知呀。
(白小姐入，揹著手袋內有能錄音的工具，四周望望)
(東主向問佬打眼色)
(問佬轉身望過去)
問佬: 係咪搵人呀?
(白小姐兩頭望望，指指自己跟著行往問佬處)
白小姐:你就係問米師?
(東主往服務台的另一頭)
問佬: 唔。白小姐係嘛?
(白小姐點點頭)
問佬: 請去嗰邊坐。
(問佬把酒飲清，再引領白小姐往近台前的細枱)
問佬: 先小人後君子，價錢有冇問題?
白小姐: 冇。(拿出一張支票，遞給問佬) 嗱。
問佬: (不接) 支票唔收，一係現金、一係純金。
白小姐: 哎吔。(拿銀包出來看看，跟著取出一疊鈔票) 我得咁多係身咋。
問佬:(接過，數一數) 夠請一個，但係唔會好耐。
白小姐: 呀......
問佬: 咪當試下我有冇料到囉，滿意嘅，再約時間問過。
白小姐: 哦，好呀。
問佬:(把錢袋好) 請邊個?
白小姐: Nietzsche,尼采，哩個少問題。
問佬:(想一想) 德國哲學家，男性，1900年病死。(望望白小姐) 諗好問題未? 唔好浪費時間，
時限到左我就會請佢走。
白小姐:(拿一張寫滿問題的紙出來) 我得㗎哪。
問佬:好。(拿出一粒狀似葯丸的東西放入口)
(問佬閉上眼，靜了一會，跟著睜開眼，神態語氣完全不同了)
問佬-尼采: (打量一下白小姐) 妳對人生有何疑問呢年輕人?
白小姐:(懷疑) 你，真係尼采?
問佬-尼采:(搖頭) 妳可以叫我超人或者皇帝?
白小姐: 唔係神咩? 問佬-尼采: 神已死。
白小姐: 咁你呢?
問佬-尼采: 我死嘅次數一定比妳多。
白小姐:(望望問題紙) 呀......
(惜惜入，四周望望，看了問佬那兒一會，跟著往吧枱去)
(問佬沒有看到惜惜入來)
問佬-尼采: 盡快問啦，我精神唔係太好。
白小姐:(望著尼采，猶豫了一會) 我想知道你有冇真正戀愛過?
問佬-尼采: 只有深近視嘅男人先至會談戀愛，如果妳想治療狂戀症嘅 男士，只需要幫佢地
配一副深度數嘅眼鏡就可以。
白小姐: 可能，只係因為你唔瞭解女人。
問佬-尼采: 女性嘅思想係最深沉，男人根本唔會有辦法探索出其中 嘅底蘊。
(惜惜要了杯飲品，跟著往另一張細枱坐，不時望向問佬那邊)
白小姐: 你對女性嘅評價咁差，只係因為冇女人肯嫁你?
問佬-尼采:(冷笑) 我話過，能夠結到婚嘅哲學家，係一齣喜劇。
白小姐: 但係你所寫嘅係悲劇。
問佬-尼采: 咁當然，希望搵一個賢妻良母型嘅女性作為太太，絕對係一 齣令人傷心到全身
不停發抖的悲劇。
白小姐:(停頓) 你而家喺邊度?
問佬-尼采: 周圍。
白小姐: 周圍?
問佬-尼采: 我存在喺空氣裡頭、人嘅思想裡頭，就算我唔出現喺妳嘅 生活當中，妳一樣認識
我。
白小姐: 我希望認識得深入一啲。
問佬-尼采: 可惜，我同妳似乎並唔喺同一類人。
(白小姐不明白)
問佬-尼采: 如果妳能夠稍為減退妳嘅美艷，一定會變得聰明好多。
白小姐: 唔?
(當白小姐表示不解時，問佬已閉上了眼)
白小姐: 你仲喺唔喺度?
問佬: 走左哪。
白小姐: 噢! (顯得失望)
問佬: 唔好期望咁高，大家level唔同，好難一下子就溝通到。
白小姐: 係呀，溝唔到呀。
問佬: 下次囉，下次帶夠錢嚟再溝通過。
白小姐: 哦。(突然望向問佬) 同你溝通，洗唔洗錢㗎?
問佬:(少許詫異) 咁睇下乜嘢程度嘅溝通啦。
白小姐: 冇呀，我想瞭解下點先可以請到嗰啲'人'上嚟㗎?
問佬: 商業祕密。
白小姐: 唓，如果個個都唔講，邊有得學呀?
問佬:(停頓) 佢揀你。
白小姐: 唔?
問佬: 唔係你想做就有得做，係一種召喚。
白小姐: 咁如果你唔想做呢?
問佬: 咪拒絕囉。但係咁大嘅誘惑放喺你面前，又點捨得推呢?
白小姐: 因為高收入?
問佬: 哼，承受咁高風險就更係要高收入。錢係其一，最難抵嘅係覺 得自己好似有超能力，
同其他人唔同。(陶醉)
白小姐: 咁，係咪個個古人都請得到㗎?
問佬: (搖頭) 首先要死左，而佢嘅思想波比我搵得到。
白小姐: 會搵唔到嘅咩?
問佬: 會! 如果佢地有寄生體。所以妳想請梵谷上嚟，就唔洗我出馬。
(問佬望向梵谷)
白小姐:(跟著也望向梵谷，驚訝的問) 佢就係梵谷?
問佬: 唔似哩! 樣唔似唔係問題，最緊要啲畫似，同埋精神。
(白小姐起來，向梵谷的身邊去，望著他畫畫)
白小姐:(溫柔地) 請問你，可唔可以幫我畫一幅畫?
(梵谷抬高頭，望了白小姐一會)
梵谷:(開心) 好呀，難得有人肯做我模特兒。不過講明先，我冇錢比番 妳㗎。
白小姐:(笑) 我都冇錢比你㗎。
梵谷:(高興) 好，等我入去攞張新畫布。
(梵谷出)
(問佬行近)
白小姐: 佢唔知自己有幾出名、佢啲畫有幾值錢?
問佬:(無奈) 佢仍然係歷史裡頭咁多多嘅梵谷。
(白小姐向梵谷入去的方向望，有點激動)
(梵谷入，拿著新畫布)
梵谷:(興奮) 可以開始哪。(架好畫布) 妳坐好。
(白小姐坐在畫架前，梵谷幫她擺姿勢)
問佬: 我唔阻你地哪。
(沒有人理問佬，跟著他往吧枱去)
梵谷: 唔，我覺得妳有好多心事。
(白小姐笑笑沒回答)
東主:(斟了一杯酒給問佬) 整番杯啦。
問佬: 唔該。
東主: 喂，嗰面有個女仔吼左你好耐，會唔會睇中你呀?
問佬: 係都唔奇，呢啲事年中都唔少，不過喺呢度就怪啲。
東主: 哈。(停頓，往外望望) 咦，行緊過嚟哪。
(問佬轉頭望過去，與惜惜對望數秒，跟著一笑)
問佬: 唓!同行嚟嘅。
惜惜:(坐在問佬側) 睇得出咩?
問佬: 感覺到。 (東主行離他倆)
惜惜: 哦? 如果唔係剛才睇到你接客，我感覺唔到你會係同行。
問佬: 妳入行幾耐? 惜惜: 都有三、四年。
問佬: 人老精、鬼老靈，冇錯嘅。
惜惜: 你，好耐嗱?
(問佬笑而不答)
惜惜: 我叫惜惜，珍惜嘅惜。未請教?
問佬: 妳叫我問佬啦，個個都係咁嗌我。
惜惜: 問佬?
問佬: 即係問米佬。
惜惜: 哦。(停頓) 咁唔知我可唔可以請你呢?
問佬: 請我飲酒? 當然歡迎。
惜惜: 呢個固之然冇問題，我意思係，可唔可以請你幫我喚一個靈?
問佬: 唔?
惜惜:(苦笑) 能醫不自醫。
問佬: 哈，咁我又真係未試過有同行幫趁。好似冇抵觸嘅，師傅又冇 話過唔比問米師幫
另一個問米師喚靈。(想一想) 喚靈，真係文雅。
惜惜: 你唔覺得問米好似好神婆咁咩?
問佬: 我咪係貪佢夠神囉。 (惜惜尷尬一笑)
問佬: 咁妳想請(改口) 喚邊一個靈呢?
惜惜: Oscar Wilde 王爾德。
問佬:(想一想) 愛爾蘭作家、男性、1905年病死。想問幾耐?
惜惜:(拿出一個小布袋，交給問佬) 嗱。
問佬:(接過，打開看看) 唔，盡量啦，妳都應該知道規矩。
(惜惜點頭)
問佬: 開始得未?
惜惜:(再點頭) 嚟啦。
(問佬拿出一粒葯丸放入口，閉上眼，靜了一會，再睜開眼，神態語氣 完全不同了)
問佬-王爾德:(一臉傲氣、自負, 行往另一張枱，坐下來) 有煙嘛?
(惜惜尾隨他，拿出一支幼身雪茄給他，跟着替他點火)
問佬-王爾德: 多謝! (惜惜看着他沒有即時發問)
問佬-王爾德: 希望妳唔好浪費我寶貴嘅時間，雖然我並唔在乎。
惜惜:(也坐下) 你有冇後悔過，當日喺法庭上面承認自己係同性戀?
問佬-王爾德: 哼，我覺得只有異性戀至須要神神秘秘、偷偷摸摸。
惜惜: 但係，因為你坦白承認，而要坐兩年苦工監，值得咩?
問佬-王爾德: 無錯，坦白的確應該要坐監，係監獄入面好好思考一下 做人嘅基本原則。
惜惜:(苦笑) 咁你思考到啲乜嘢?
問佬-王爾德: 做人唔應該坦白，但係為一個自己愛嘅人而受苦，絕對係美麗而唔抵可憐。
妳知道嘛? 小說同人生一樣，有悲 慘嘅結局、下場，先至能夠顯得與別不同、
震撼人心。 每個人都會犯錯，美其名為經驗。規行矩步必定係庸才 笨蛋，
做乜嘢、講乜嘢都要一板一眼，簡直荒謬。
惜惜:(並不欣賞王的說話) 記唔記得快樂王子?
問佬-王爾德:(停頓) 唔?
惜惜: 點估得到Oscar Wilde就係快樂王子嘅創造者。
問佬-王爾德: 咁唔係顯得更有趣、更有說服力咩?
(惜惜有點失望，苦笑)
問佬-王爾德: 有幾多人可以咁赤裸裸企係廣場、企係法庭?
明知一定 係慘淡收場都一路繼續演落去，絕對需要超級嘅演員道德。
惜惜: 不過冇人欣賞。
問佬-王爾德: 呵，我希罕咩? 反正仍然有人記得我寫嘅戲、我嘅詩、 我嘅文章、重有童話。
惜惜: 甘心咩?
問佬-王爾德: 我冇甘心，只係得野心、虛榮心、真心。
惜惜: 真心...(停頓) 你對自己做嘅一切負責任、承受懲罰，但係對被你 傷害左嘅人，
你又有冇發自內心嘅歉疚?
問佬-王爾德: 妳指我太太?
惜惜: 重有仔女。
問佬-王爾德:(停頓) 因為我傷害左佢地，所以我亦順理成章咁被遺棄。
惜惜: 你有冇後悔過?
問佬-王爾德: 人生只係一個短暫嘅過程，兼且並冇建設到回頭路; 後悔 係冇意思㗎，
先悔，或者可能有用。
惜惜: 先悔?
問佬-王爾德: 後悔即係做錯事之後產生嘅悔意，先悔呢，就喺事情未 發生之前先嚟懺悔，
咁樣可能重有機會博取同情。
惜惜: 好一番謬論。
問佬-王爾德: 妳似乎唔見左道德枷鎖條鎖匙。
惜惜: 因為一早比你攞左。
問佬-王爾德: 喔，真係唔好意思。不過，妳好似幾享受嗰種束縛，睇嚟 冇需要幫妳打開佢。
惜惜: 鎖住，或者真係好啲。
問佬-王爾德: 不過，鎖得太耐，一旦要脫枷開鎖，就容易惹人非議。
惜惜: 做人最緊要光明磊落。
問佬-王爾德: 哎吔，妳又忘記左我嘅下場?
惜惜: 但係你抵觸左法律。
問佬-王爾德: 唔，法律就好比偷雞摸狗一樣，總係鬼鬼祟祟。
惜惜:(不懂如何回答，停了一會) 快樂王子犧牲自己令到其他人得到快樂;你不單止犧牲自己，
重犧牲埋家人，換番嚟嘅又係乜嘢?
問佬-王爾德: 幾個破碎嘅心，點都流唔完嘅眼淚。
惜惜: 你總係唔懂得珍惜。
問佬-王爾德: 我就係太過珍惜，一切嘅愛、所有嘅情。
惜惜: 但係你犯左個嚴重嘅錯。
問佬-王爾德: 唔，我錯在愛我嘅家人之餘，亦太愛我嘅情人。
惜惜:(失望) 你走啦。
問佬-王爾德: 噢，老朋友唔係身邊總可以心安理得咁忍受，但係，新相識 而咁快就話要分離，
的確教人傷感。
惜惜: 更傷嘅大家都經歷過。
問佬-王爾德: 唔，不可能更傷，惡運總有個限度。
惜惜:(不情願) 再見。
問佬-王爾德: 唔好再見哪，太深刻嘅事都係忘記比較好。
(說罷便離開了，問佬靜止了一會)
(惜惜拍一拍問佬)
問佬:(醒) 咳咳咳，嘩，佢食乜鬼嘢嚟! (弄熄了那雪茄)
(惜惜不好意思)
問佬: 自己走左?
惜惜: 唔。
問佬: 唉，何必煩惱自尋。
惜惜: 唔，或者太深刻嘅事都係忘記比較好。
問佬:(笑) 率性而為最愜意。
惜惜:(勉強一笑) 唔該晒，我走先哪。
問佬: 哎，啱啱識，咁快就話要走!
惜惜:(笑) 小心，佢又漏低左啲嘢喺你度。
問佬: 呀，個個都硬係瀨低啲，遲啲我自己都唔認得自己。
惜惜: 麻煩晒。
問佬: 咪客氣，錢照收。
惜惜: 咁我走先哪，想辦法去忘記一啲，不愉快。
問佬: 唔，咁要趁快，我都唔阻妳。
惜惜: 後會有期。
問佬: 請請。
(惜惜笑笑，轉身離去)
(問佬往服務台去)
問佬:(向東主說) 比我一杯忘情水。
東主: 乜你以為咁就可以一生不傷悲咩?
問佬: 咁，給我一個吻，可以不可以?
東主: 假如讓你吻下去，我便全身都受罪。
問佬: 哈，真唔比面。
東主:(拿出一杯飲品) 嗱，你杯忘情水。
問佬: 唔該。(望望杯) 咦，咁似我頭先嗰杯?
東主: 係呀，咪頭先你飲剩嗰杯忘情水囉。
問佬: 洗唔洗咁慳呀? 東主: 你唔好唔記得，自己係間歇性失業人事，慳得就要慳。
問佬: 係嘅，老闆。話時話，如果呢杯嘢真係可以忘情，你就發哪。
東主: 就算我發左，你嚟飲飲食食嘅時候都一樣要比錢。
問佬: 唓，咁你係咁上下好哪。
東主: 知足者、貧亦樂。
問佬: 你啱、你啱。(轉過頭向莫札特說) 老莫呀，首費加羅咁長嘅?
莫: 歌劇喎，梗係長啦。
問佬: 呀，你曉唔曉轉彎。
莫: 彈琴唔洗轉彎㗎。
問佬: 咁你肚唔肚餓?
莫: 餓呀。
問佬: Vincent，你餓唔餓?
梵谷: 我未畫完。 白小姐: 但係我餓呀。
梵谷: 哦，咁抖抖先。
問佬:(向東主) 無乜客，一齊啦。
東主: 咁我都要去煮，你地先至有得食㗎。
問佬: 係喎。(轉向眾人) 咁我地飲杯嘢先。(向東主) 等我嚟。 (向眾人) 你地過大枱嗰便坐啦。 (一眾往大枱坐下)
(東主入內弄食物)
(問佬弄飲品)
(莫札特顯得高興，梵谷繃著臉，白小姐望著莫)
白小姐: 你彈琴好好聽呀。
莫: 多謝，好多人都咁讚我。不過哩個琴同我以前彈開嗰個唔同， 點都爭啲。(望向梵谷)
你又話幫我畫幅彈緊琴嘅畫?
梵谷: 每次當我睇住你彈琴，就唔記得左原來要畫畫。所以我打算遲 啲憑記憶去畫。
莫: 好呀、好呀，最鍾意人幫我畫畫，不過冇左個假髮會唔會爭啲呢?
白小姐: 唔係呀，你而家咪幾好睇，你嗰個時代啲假髮好恐怖。
莫: 哈，貴族時尚，唔少得㗎。(望向梵谷) 終於有其他人相信我地 嘅身份哪，
你同佢講左咩嘢呀?
梵谷: 冇乜特別嘢講過，只係佢睇過我嘅畫、聽過你嘅琴聲。
(白小姐只笑著聽兩人說話，覺得很有趣)
莫: 係啦、係啦，最佳証明。
(問佬捧着飲品入)
(給莫一杯紅酒、給梵谷一杯咖啡、給白小姐一杯雞尾酒，還有兩杯是他 自己和東主的)
眾人: 唔該、唔該。
問佬:(坐在白身旁) 傾緊咩呀?
莫: 講緊哩位女士信我地兩個囉。
問佬: 唉，好心你兩個就唔好咁執著，成世揹住兩個大師包袱好辛苦㗎。 我都同你地解釋
過好多次、你地亦見過我上身好多次，都唔明點 解係要屈喺度。
梵谷: 哩度有安全感。 (莫也點頭)
問佬: 咁即係你地其實明白、瞭解自己嘅處境啦?
莫: 知知地啦，但係我真係覺得哩處幾好。
梵谷: 我唔想再一次被排斥。
莫: 你都知我唔識面對無窮盡嘅制度。
問佬: 唉，由你兩個啦，一場朋友，我點都睇住你地嘅。
莫: 如果你第時出左事，我地一定會照顧番你!
(梵與問看莫認真的樣子，不禁笑起來，三人碰杯)
白小姐: 佢地以前都係問米師? (梵與莫不語)
問佬: (冷淡) 唔。 白小姐: 因為出左意外?
問佬:(不想講) 唔。哎，妳唔好問哪，都唔關妳事。
(東主正好拿食物出來，白小姐沒繼續追問)
東主: 開餐哪。
問佬:(向梵與莫) 幫手。
(眾人把食物餐具放好)
白小姐: 你呢度生意認真麻麻，冇人嚟嘅。
(問佬把飲品遞給東主)
東主:(接過) 哈，妳真係坦白。
白小姐: 如果唔係約左佢 (望一望問佬) 點會知有撻咁嘅地方。
東主: 每個人做生意嘅動機都唔同，比個地方佢地(望向梵及莫) 落腳、 聚集係我許下嘅承諾。
(莫與梵已開始吃，但問佬顯得不大高興)
白小姐: 承諾?
東主: 唔。
問佬: 都話唔關妳事咯，妳係咪八得有點過份呢?
白小姐: 八卦係人嘅天性，亦係我嚟哩度嘅原因。
問佬: 哼，咁妳原本諗住請幾多個?
白小姐: 起碼四、五個啦。
問佬: 咁妳真係錢多冇'訂'洗。
東主: 飲啦，問。食得咸魚抵得渴。
(問佬苦笑，白小姐不和他再說下去，開始進食)
東主: 呀莫，隻歌作好未?
莫: 唔，差不多哪，重有時間嘛。
東主: 唔係催你，問下啫。
莫:(笑笑) 放心。(繼續食)
東主: 咁vincent你又幫我畫好幅畫未呢?
梵谷: 畫好哪。 東主: 咁唔比我睇?
梵谷: 我想畫多幅比你揀。
東主: 硬係鍾意買一開二。
梵谷:(微笑) 開三都得。
(問佬突然觸着白小姐的手，白手中拿着錄音機)
問佬: 妳做乜錄音，妳係乜嘢人?
(眾人驚訝，起身)
白小姐:(緊張地解釋) 唔好誤會，冇惡意㗎。
問佬: 冇惡意妳唔一早講? 妳究竟係乜嘢人? 記者? 警察? CIA? FBI? ICAC? 海關? 青山?
互助委員會? CASH? ADC? USD?
東主:(喝止) 夠哪! (分開二人) 妳比個機會佢答先啦!
(問佬瞪着白小姐，等她解釋)
白小姐:(喘氣) 我真係冇惡意㗎，只不過我唔相信個朋友講有樣咁嘅 服務，所以咪嚟試下
(未講完)
問佬:(搶白) 咁你做乜錄音?
白小姐:(驚) 我諗住用嚟証明並唔係幻覺，係真有其事。
東主:(望向問) 咁妳信唔信佢講呀?
問佬: 你話呢?
東主: 信同唔信，對我嚟講冇分別。犯法嘢我又冇做，佢係乜嘢身份 有關係咩? 何況佢係你嘅?BR> 客仔。
問佬:(想想) O.K.，妳攞返餅帶出嚟，無數!
白小姐: 好，如果咁樣會令你舒服啲(把餅帶交給問佬)，但係vincent 幫我畫嗰幅畫我可
唔可以帶走?
(眾人望向梵谷)
梵谷:(望向問佬) 點呀?
問佬: 你喜歡啦，又唔係古董。
梵谷: 哦。(向白說) 咁送比妳。
白小姐:(非常高興，深情的望着梵谷)多謝你! 我地可唔可以談一場戀愛?
(梵谷愕然)
莫: 嘩! 東主: 而家啲後生真大膽，識左無耐就話愛!
白小姐: 唔係無耐。Vincent van Gogh，1857年荷蘭出生，曾經志願當牧 師，三十歲開始沉迷繪
畫，從未真真正正談過戀愛。就算冇飯食 都堅持畫畫、創作，第一幅賣出嘅畫係
紅葡萄園。因為同高更爭 執而割左自己隻耳仔落嚟，最後開鎗自殺，享年37。
(梵谷用手按着自己的耳朵)
莫: 啊! 你重長我兩年命。
梵谷:(望定白) 對唔住，我唔會再愛上任何人。
白小姐: 唔緊要，最重要係，你要知道重有人愛你。
(跟着去了拿畫)
東主:(感嘆) 柏拉圖式的戀愛!
問佬: 唉!
白小姐:(回身望着梵谷一笑，跟着向眾人道別) 咁多位，告辭哪。
梵谷: 再見! 得閒就(被問佬打斷)
問佬: 唔好嚟坐!
白小姐: 咁我唔得閒至嚟啦。
問佬: 哼!
莫:(揮手) 拜拜!
(白小姐揮手離去)
東主:(向問佬說) 何必呢? 難得Vincent 識到朋友。
問佬: 八卦喎，我硬係覺得佢有古怪。
梵谷: 唔緊要啦，佢都冇傷害我。
(問佬不語)
莫: 繼續食飯好嘛?
問佬: 乜你有停過咩?
(眾人笑笑，繼續進食)
(林語堂入，手拿着煙斗)
林: 啊! 打唔打擾你地用膳呀?
(眾人望過去)
東主: 林sir，一齊哩!
問佬: 打乜鬼，過嚟坐啦!
(東主起來往斟茶給林)
林: 哈哈，禮多人不怪嘛。莫老兄、梵老兄，身體都好嘛?
莫: 好好呀!
梵谷: 幾時教我畫山水畫?
林: 啊，畫畫並不是在下專長，搵個日子叫阿大千兄過嚟同梵老兄切磋 切磋，好嘛?
梵谷: 好好好，一言為定。
(東主捧茶回來)
東主: 林sir 請茶。
林:(接過) 謝哪。
問佬: 開場白就免哪，到嚟何事?
林: 哈哈哈，都係問兄知我脾性。我一向都話，開場白同演講，就應該 好似女士們嘅裙一樣。
問佬: 愈短愈好丫嘛。
林: 哈哈。其實因為林某辦左一份報紙，想話擺放一部份喺哩處，供人 取閱。
(望向東主) 未知...
東主: 哦，冇所謂，咩性質?
林: 性靈文章、幽默小品。
問佬: 人間世重現?
林: 再吹宇宙風。 (二人會心一笑)
莫: Mr Lam , 你好耐冇嚟講故事哪。
林: 係呀係呀，俗務纏身。
東主: 貴人事忙。
林: 哈哈，好好，就等我講一個母豬渡河嘅故事。
(莫與梵顯得非常留心聽)
林: 相傳有一隻母豬，帶住九隻小豬渡河。渡河之前點一點豬數，計埋 母豬自己一共有十隻。
水流並唔係太急，好快就到左對岸。母豬跟 住再點豬數，竟然只係剩低九隻，點多一
次都係得九隻。於是母豬 四周圍去搵，搵呀搵、搵呀搵，都係搵唔到，喺情急悲痛之下，
母豬就一命嗚呼哪。
莫: 哎吔，咁八隻小豬咪冇左媽媽? 實在太可憐哪。
林: 錯，係九隻小豬。
梵谷: 唔見左一隻丫嘛?
林: 哈哈。
(問與東二人暗笑)
林: 只係母豬忘記左要數埋自己哪。
(梵與莫齊說)
梵谷: 呀!咁母豬咪死得好唔抵?
莫: 咁母豬咪死得好唔抵?
林: 哈哈! 對、對，確實唔抵死。
(梵與莫二人不明白，問與東二人暗笑)
林: 言歸正傳，重有事想問兄幫個忙。
問佬: 哦? 直說不妨。
林: 我希望能夠同東坡居士傾談一趟，充實專欄嘅內容。
問佬: 唔，明白、明白。
林: 費用方面?
問佬: 你都話份報紙係任人取閱，做朋友嘅又點忍心收你錢呢?
林: 哈哈，問兄呀問兄，果然係一個交得過嘅朋友!
問佬: 言外之意，收你錢的話，哩個朋友就交唔過哪?
林: 哎喲，賠本生意有誰人願做?
東主: 呢處就有幾個!
(三人笑起來)
(梵與莫二人互望，不知有甚麼好笑)
東主:(向問佬) 不過，睇怕你要做嘅賠本生意就唔止一單。
林: 哈哈。
問佬: 啊，咁我放長雙眼，睇下語堂兄份報紙捱得幾耐哪。
林: 呵呵呵，非常多謝問兄由衷嘅鼓勵同支持呀。
東主:(向林) 你訪問古人，咁份報紙嘅對象只係圍內一班同道、同行?
林: 其他人點睇我管唔到哪，只希望能夠藉着份報紙，團結我地一班 行內人、知情者。
既然冇人去做，就等我嚟做。好等各處兄弟、 朋友，有一個聯絡嘅途徑。
問佬: 重有姊妹!
林: 對、對。現今社會最忌存有性別歧視。
東主: 唉，多制度、少支持。
莫: 你地講嘅說話太深哪，好難明。
林: 咁莫兄會否樂意為我彈一首小夜曲?
莫:(高興) 好呀!(往琴處去)
梵谷: 咁我都去畫你地傾緊計嘅素描。(起身離去)
問佬: 畫得我靚啲呀!
梵谷:(邊行邊說) 真為難!
東主: 哈哈。
林: 哈哈!
(音樂響起)
東主: Vincent都識講笑。
林: 近朱者赤。(望一望問佬)
問佬: 哎吔，好失禮咩!
林: 當然唔失禮，我與問老兄都係朋友嘛!
東主: 哈，兜咁大個圈嚟讚自己!
(眾笑)
東主: 唔阻你地傾正經事，等我執埋啲嘢。
問佬: 我幫你手。
東主: 我自己得哪。
問佬: 隨你啦。(向林) 咁我地過嗰張枱傾。
(東主繼續執枱，然後入內)
(問佬與林行往另一張枱，坐下來)
林: 問兄你幾時方便呢?
問佬: 我就時時都便，不過......
林: 唔?
問佬: 我都好'恨'同蘇學士傾一傾。
林: 唔。既然如此，不若......(望向梵及莫)
問佬: 佢地?
林: 唔。
問佬: 得嘅咩?
林: 能力仍在，我試過。
問佬:(訝異) 你試過?
林: 當我能夠面對事情嘅真象之後，我試過。
問佬: 哦，即係好似踩單車咁。
林: 知道竅門所在，永遠不忘。
問佬: 老師傅冇講過可以咁。
林: 可能連佢老人家都唔知道。
問佬:(點頭苦笑) 咁你而家完完全全係兩個人嘅融合。
(林笑而不語答)
林: 有冇其他更好嘅人選?
問佬:(想想) 我剛才遇到一個。
林: 哦?
問佬: 佢搵我幫手。
林: 有冇可能聯絡到?
問佬: 可以試下(停頓) 不過佢未必肯免費幫我地。
林: 錢方面我有預算，只不過數目並不大。
問佬: 好，咁即管試試。(定神，集中精神的樣子)
林:(詢問) 唔?
問佬:(點頭) 唔。
(兩人靜了一會)
林: 被取代嘅生命愈來愈多。
(問嘆氣)
林: 老師傅將來召喚新人就要更加嚴格。
問佬: 被取代嘅比率的確相當高。
林: 我識得嘅，就只剩番你。
問佬:(苦笑) 買少見少。
林: 你嘅精神力，係咁多人當中最強。
問佬: 但係人好多時候，都係好脆弱。
(林不知說甚麼好)
問佬:(起身) 我過去攞支酒。
(問行近服務枱，惜惜到)
問佬:(沒有轉身) 新朋友到。
(林起身，惜惜行往林處)
林:(和惜握手) 妳好!妳好! 惜惜: 你好。你係?
林: 曾是同道，可惜...
惜惜:(明白) 啊! 咁點稱呼?
林: 小姓林。
惜惜: 林..., 而家嘅你姓林?
林: 唔。妳呢?
惜惜: 你叫我惜惜丫，珍惜嘅惜。
林: 啱，凡事都應該好好珍惜，唔珍惜就會變成可惜。
(問佬拿酒出來，斟給各人)
惜惜:(向問) 唔知我幾時先會有，同你一樣嘅能力?
問佬: 總有一日。
惜惜:(望望林，向問說) 你朋友似乎好明白自己的處境。
(問與林相對一笑)
林: 既成事實，接受總比抗拒好。彷如利用別人的身體，再續自己嘅生命;
又或者利用他人嘅智慧，達成自己嘅目標。
惜惜: 咁，邊一個至係'自己'?
林: 無所謂，都是一體。
惜惜: 好豁達呀!
林: 真正豁達嗰位，還請閣下幫忙。
惜惜: 啊? 佢咪得囉。(指問佬)
問佬: 能醫不自醫。
惜惜:(會意一笑) 要喚邊一個靈?
林: 喚靈!
問佬: 幾優雅啊呵。
林: 哈哈，有意思。
(惜惜感少許尷尬)
問佬:(笑笑) 蘇東坡。
惜惜: 宋朝...好古遠。
林: 有冇把握?
惜惜: 唐朝都冇問題，外國就差啲
問佬: 心理作用。
惜惜: 道行未夠。
林: 費用方面?
惜惜: 你介唔介意話我知係邊方面嘅用途?
林: 可以、可以，我辦左一份報紙，專門報導我地哩個圈子嘅事情同埋 活動。
希望能夠團結起所有從事者、被佔據者、甚至被問者。亦因 為咁，我想請東坡居士
做個訪問，關於豁達、關於人生。
惜惜: 唔。對被佔據者尤其有幫助。
林: 正因為自己身在其中，感受尤深，總希望能為同儕做點事。
惜惜:(突然地) 免費!
(問與林一呆)
問佬: 多謝!
惜惜: 或者遲下我會有所要求都未定㗎。
(三人笑笑)
惜惜: 而家開始?
(林望望問)
問佬: 唔。
惜惜: 中國宋朝大文豪，男性、1101年逝。
(惜惜顯得睡眼惺忪，跟着閉上眼。過了一會張開眼，精神抖擻)
惜惜-蘇:(深呼吸) 好特別。(望着枱上的酒)
林:(斟一杯給蘇) 來一杯如何?
惜惜-蘇: 哈哈! 好好。
(三人互敬)
惜惜-蘇: 唔，好酒，不比桂酒差。
林: 天神甘露?
惜惜-蘇: 哈哈哈。(望望二人) 東坡與兩位的情況都好特別。
(二人感詫異)
惜惜-蘇: 思想波亦有其獨特嘅存在模式，換句話說，東坡從未死亡。
林: 死亡嘅意思係?
惜惜-蘇: 死亡並不是終結，好多時代表另一個階段開始。(望定林) 老弟肉身未死，
生命仍在，但係行為思想卻出現天大轉變。
林: 學士明白在下嘅處境?
惜惜-蘇: 唔。兄弟既有之身被一組強烈嘅思想波進佔，幸好定有交融之日。(稍停)
不過，身後兩位仁兄，情況就有所不同。
林: 不同?
惜惜-蘇: 佢兩位，似乎放棄追尋自身原本之記憶及思想，甘心被取代。
(問佬一直專心聆聽一臉崇敬之色，沒有發問)
林: 學士依家嘅生命模式，就好似一束游離嘅腦電波?
惜惜-蘇: 若然如此解釋會令你容易了解、明白。
林: 還望賜教。
惜惜-蘇: 你依家見到、感覺到只係眼前、身邊嘅一切一切，而我所感應 到，暫時嚟講，
差不多係全世界。
林: 不識廬山真面目。
惜惜-蘇: 只緣身在俗塵中。(稍停) 學無止境，世界之後就到宇宙，生命 似乎係一個永遠研究
不完嘅課題。
林: 學士依家，是否等於永生?
惜惜-蘇: 哈哈哈。當年孜孜不倦去追尋長生之秘，永生之法 ; 事實畢竟 唔係凡人想像得到。
林: 學士而家係仙?
惜惜-蘇: 錯錯錯! 凡人意指生存於地面上有形體，有獨立思想嘅生物。或許，仙只係一個
攏統稱呼，又可必拘泥於此，是仙、是人、 是電波對事情本身又有何影響。
林: 學士所言甚是。
惜惜-蘇: 傳統觀念根深蒂固，好難一下子改變、接受，隨心。(望向問) 哩位小兄弟，
何必疑問哽在心頭，無事不可對人言。
問佬: (遲疑) 學士應該知道在下擔任嘅係請靈嘅角色，相信亦明白我哽在心嘅疑問。
惜惜-蘇: 唔。其實大部份游離電波，即係你地俗稱嘅靈或者鬼，都有能 力去駕馭任何
普通人。而被佔據、還是不被佔據亦視乎相方面 嘅意願; 再生嘅慾望、與及放棄生命
潛意識，勉強不得。
問佬: 依學士所言，只要自己並唔放棄生命，就不怕被所請嘅靈取代?
惜惜-蘇: 理論成立。(望定問) 年輕人切勿玩火，應當熱愛自身獨有嘅 生命。人總愛煩惱自尋、
不滿現狀，當你明白任何事都只是 過眼雲煙、世事如一場大夢，千古風流人物都
不能萬事稱心 如意。
(問佬低頭不語)
惜惜-蘇: 按部就班，完成一個階段、再去追尋亦未遲。
(問佬輕輕一笑)
林: 學士已經唔係從前嘅學士。
惜惜-蘇: 哈哈哈。你總不能話，六十歲嘅蘇軾同六歲嘅蘇軾係兩個人哪。
林: 蘇軾就係蘇軾。
惜惜-蘇: 不過，兄弟你卻有所夾雜，亦算係另一種機緣。
林: 其實我有能力抽身而退。
惜惜-蘇: 唔。(上下打量林) 你知道，一旦離開，此人生命亦了。
林: 唔。
惜惜-蘇: 水垢何曾相受 細看兩俱無有 寄語揩背人 盡日勞君揮肘
輕手 輕手 居士本來無垢 自淨方能淨彼 我自汗流呵氣
寄語澡浴人 且共肉身遊戲 但洗 但洗 俯為人間一切
林:(停頓) 領受、領受。
惜惜-蘇: 東坡要告辭哪。(拍着問的肩) 小兄弟，甘之如飴、從容以對。
(互望一會)
(惜惜手仍搭着問，但閉上眼，慢慢軟癱坐下漸漸甦醒)
林:(向惜惜) 飲啖酒、定定神。
(惜惜點頭接過)
林:(向問，學着蘇的語氣) 小兄弟，笑臉背後原來隱藏住苦惱。
問佬:(苦笑) 真係咁易甘之如飴、從容以對咩。我去洗個面。
(問佬出)
林: 辛苦妳哪。
惜惜: 唔好客氣，不過記得鳴謝我噃。
林: 一定、一定。
(東主入)
林: 份報紙出左，哩度應該會熱鬧好多。
東主: 喂，我唔係好想哩度熱鬧嗰喎，嚟埋啲唔三唔四、八八卦卦嘅人， 志在好奇，好煩㗎。
林: 哈哈，最多我唔登地址，搵唔搵到就睇佢地能力哪。
東主: 我已經有駐場音樂家同駐場畫家，一個場容納唔到太多藝術家哪。
惜惜: 係呢? 點解一定係藝術家? 政治家、科學家唔嚟嘅咩?
東主: 乜有駐場政治家、科學家嘅咩? 未聽過喎。
惜惜: 又好似係。
東主: 呀，爭啲唔記得，下個禮拜，毋忘聚會。
林: 點會忘記呢! 惜惜: 歡唔歡迎我參加?
東主: 只要唔係冷血嘅都歡迎。
(莫剛把曲彈完)
(全部人靜止數秒後，燈暗，落幕)
--------------------------------------------------------------------------------
轉下幕
不問蒼生問問米
第二幕
(咖啡座佈置成開派對的模樣，東主身穿西裝在四處看看有沒有地方不妥善，
近門口處放了一疊報紙。莫在試琴)
東主: 見唔見Vincent ?
莫: No. 東主:(大叫) Vincent ! (過了一會) Vincent !
(梵谷手拿着兩幅畫走出來)
梵谷:(喘息) 得哪! 得哪! 你估冇左隻耳仔就聾哪咩。嗱，兩幅，你揀 一幅啦。
東主:(看着兩幅畫) 我冇你要求咁高，你唔洗搞咁耐嘛。
梵谷: 唔可以咁唔認真，一筆一點都係自己心血。
東主: 係係，你啱。唔。(猶豫着) 喂，真係爭小小咋喎，點揀呀?
梵谷: 咁兩幅要晒啦。
東主: 唔...唔得，講明一幅就一幅。呀! 就哩幅啦!
梵谷: 哦，你鍾意哩幅個背景?
東主: 唔係，因為哩幅你記得簽名。
梵谷: 哎，我成日都忘記要簽名。
東主: 咁至似你。
梵谷: 嘻。我攞返哩幅入去先。
東主: 記得洗個面、換件衫，睇怕你琴晚都冇瞓。
梵谷:(傻笑) 呀。(入內換衫)
(東主把畫掛在預留的地方，是一幅古代女性的畫像)
(莫彈了一少段新歌，東主轉過頭看他。莫再彈一次，東主笑笑表示 欣賞，莫頑皮一笑，
跟着繼續彈)
(惜惜入)
東主: 啊! 最早係妳。
惜惜: 唔，今日冇預約。
東主: 飲啲乜嘢?
惜惜: 比杯熱茶我呀，唔該。
東主: 熱茶? 乜嘢茶葉都得?
惜惜: 唔，係茶就得哪。
東主: 好，妳等等。
惜惜: 唔該。
(東主行了去斟茶，惜惜往拿報紙看。掀到某一版，邊看邊笑)
(東主捧着一托盤出來，有茶壺、杯、檸檬、蜜糖)
惜惜: 咦，咁多嘢嘅?
東主: 飲茶係一種學問，哩隻係玫瑰子茶，略帶酸味，所以喺飲嘅時候 要加檸檬同埋蜜糖，
咁就冇得彈哪。
惜惜: 哦? 等我試下先。
(惜惜開始泡茶，東主看着她如何泡，略有所感)
惜惜:(飲一口) 唔，的確幾好味。
東主: 內子以前好鍾意咁樣飲，重幫哩種茶起左個名，叫做'莫分茶'。
惜惜: 哦? 東主: 想唔想聽故事?
惜惜:(點頭) 唔。
東主:(回想着) 今日嘅party 就係紀念我地兩夫婦，失散左幾百年之後， 再度重逢嘅日子。
惜惜:(驚訝) 幾百年?
東主: 唔。重記得我後生嘅時候好迷信，算命、風水、紫微斗數、測字、
鐵板神算，樣樣都好，樣樣都啱。有一次我嘗試去追尋自己嘅前生，原來我係一個宋朝嘅金石學家; 妳估唔估到係邊個?
惜惜: 金石學? 唔知，宋詞就知。
東主: 尋尋覓覓 冷冷清清 淒淒慘慘戚戚 乍暖還寒時候 最難將息
三杯兩盞淡酒 怎敵他 晚來風急 雁過也 正傷心 卻是舊時相識
滿地黃花堆積 憔悴損 如今有誰堪摘 守著窗兒 獨自怎生得黑
梧桐更兼細雨 到黃昏點點滴滴 這次第 怎一個愁字了得
惜惜: 李清照?
東主:(淡淡一笑) 即係內子。
惜惜: 哦! 你就係趙明誠。
東主:(苦笑) 我前世係趙明誠。(稍停) 當我知道自己嘅前生之後，尋找 內子就變成我生命
唯一目標。我相信無論清照變成點樣，我一定 會認得佢。可惜... (稍停)
終於，我諗到嘗試用問米，試下尋找 佢嘅靈魂。(黯然)原來，佢喺另一個地方尋
找緊我，我地就喺兩處 唔同嘅空間度捉迷藏。我想盡辦法令我地可以長時間相聚，
但係我唔 可以自殺，內子亦不能隨意投胎。(稍停) 後來比我遇到一個問米師，
唔同一般嗰啲問米婆，自然好多，即係好似你地咁，所以久唔久 我就會去搵佢。
惜惜: 嗰位問米師今日會嚟?
東主:(搖頭) 有一日，個問米師同我講，佢剩番三個月到半年命，問我想 唔想借用佢個身體。
當時我並唔知道可以咁樣(望一望莫)，有啲懷 疑。我同內子商量之後，終於決定半年
又好、三個月又好，甚至一 日都好，只要可以喺一齊，我地唔再在乎長久定短暫 .
跟住我就同嗰位 問米師作左一個協議。
惜惜: 協議?
東主: 唔。佢借佢嘅身體比清照，而我就比一個地方佢嘅同道落腳，尤 其係失去左自己嘅問米 師。
惜惜: 即係Vincent同阿莫。
東主: 佢地係其中兩個唔想離開。
惜惜: 重有其他?
東主: 當然，你嗰日都遇到語堂。
惜惜: 唔。
東主: 一年之後，清照再一次過身。
惜惜: 喔! 東主: 我終於感受到內子失去我嘅時候，啲日子係幾咁難捱。
(惜惜看着東主不知說甚麼好)
東主: 去經歷愛人所受嘅苦，都係一種幸福。
惜惜: 哦?
東主: 妳愛過未?
(惜惜不懂回答)
東主: 你知道自己深愛嘅人喺度受苦，但係自己就乜嘢都做唔到，只 能夠袖手旁觀，
重好似置身事外咁，一啲都唔好受。(回想狀)佢凍嘅時候，我唔能夠攬實佢;
?????佢喊嘅時候，我連幫佢抹眼淚都做唔 到 ; 孤苦伶仃、天涯飄泊。
惜惜: 你都唔想㗎。
東主: 所以，當有機會去體驗番佢曾經受過嘅酸苦，我覺得絕對係一種難以言喻嘅幸福。
惜惜: 好難理解。不過，好開心見到，仍然有人相信愛。
(東主笑笑)
惜惜: 點解話你嘅故事比我聽?
東主: 咁點解妳要嚟喚靈?
(惜惜會意一笑)
東主: 每個人背後都有個故事，唔同嘅只係其他人有冇興趣聽。哩度每 一個人或者靈嘅故事，
都有絕高嘅可聽性; 我相信妳都有。
(惜惜苦笑)
東主: 公開定係守祕密，只在於你自己點睇件事。我喜歡將自己嘅故事講出嚟，並冇特別原因。
??????只有自虐狂先至會不斷重映自己嘅傷痛， 挖深自己嘅傷痕。
惜惜: 或者我要學嘅，係事過情遷。
東主: 丟掉傷痛，循環再造，出嚟嘅就唔再係苦。
惜惜: 係甜。
東主: 其實妳相唔相信前世今生?
惜惜: 唔。亦係我嚟哩度嘅原因。
(東主笑笑起身)
惜惜: 呀，你今日特別有型!
東主: 哈哈，真係? 多謝、多謝! 杯茶我嘅。
(惜惜舉杯一笑)
(東主出)
(梁醒波入，兩頭望，向惜惜那兒去)
梁: 阿大姐仔，借問聲見唔見阿老闆?
惜惜:(望望梁) 呀，佢啱啱入左去。
梁: 啊。(坐下) 妳好生面喎，新入行?
惜惜: 幾年啦。
梁: 咁多啲嚟坐哪。(拿出一支雪茄) 阿大姐仔，解唔解意我吔雪茄呀?
惜惜: 隨便。
梁: 哈，妳有冇聽過呀"擔番口大雪茄，充生晒認經理，撈世界要醒目， 不會衰收尾。"
我飲歌嚟㗎。
惜惜: 你好鍾意波叔㗎?
梁:(蠱惑一笑) 梗鍾意。
惜惜: 我都好鍾意睇佢做大戲。
梁: 當時人稱丑生王，任白就梗'能'住個波。
惜惜: 我最記得就係紫衩記入面嗰個黃衫客，冇人做得番。
梁: 哈哈! "龍泉不取佢匹夫命，難慰青春棄婦情。俺要他，要他賒來花債此時還，"
哎吔吔，又忘記左接住係點。
惜惜: "不許負義之人留性命呀。"
梁: 啊? 大姐仔都唱得兩咀喎。好，考下妳。"我可以喝斷長江波浪湧㗎。他呢? "
惜惜: "佢可以橫霸西湖玉女叢。"
梁: 哈哈哈，有意思。再嚟。"有幾個多才宋玉重婚娉 "(望向惜惜)
惜惜:(接唱) "有幾個薄倖王魁負桂英。"
梁: "有個霍家小玉，魚目將珠認"
惜惜: "崑山良璧托浮萍"
梁: "焚台怨婦，若是與佢相同命呀"
惜惜: "試問傷心呀---誰重，與誰輕---"
梁: "我愧無靈葯，為妳療心病呀。"
惜惜: "都或何為妳重牽舊赤繩。"
梁: 誰個是妳負心郎，妳一路講、我一路飲。好待我暖酒聽炎涼，冷眼參風月。
(用詢問的眼神望着惜惜)
惜惜:(苦笑) 恐怕佢未能借屍還魂。
(林語堂入)
梁: 唔，世間事本來就不能盡如人意，但"從天降下黃衫客，愛向人間 管不平。"
林:(坐下) 不平、不平，天下負心人總是殺之不盡呀。
梁: 哈哈，林老兄說得有理。
林:(向惜惜) 喜歡份報紙嘛?
惜惜: 唔。(笑) 尤其係個鳴謝。
林: 哈哈。肥波兄有冇睇過呢?
梁: 點敢唔捧場。
(東主入，拿着一支紅酒)
東主: 早到嘅朋友有福了。
梁: 紅酒、雪茄，就爭個美人。
東主: 今日嘅美人只得一個。(行了去拿杯)
林: "此情無計可消除 才下眉頭 卻上心頭。"
惜惜: 所有參加 party 嘅人都知道內情?
梁: 係哩處常客的話，都冇可能唔知。
林: 如果唔係因為嗰段刻骨銘心嘅愛情故事，又何來「漱玉軒」?
惜惜: (望望招牌) 我一直冇留意哩度有中文名。
梁: 講比人聽，會以為食嗰種瘦肉哪。
(東主拿着杯回來，斟酒給眾人)
東主:(舉杯) 盡興而歸!(拿一杯給莫)
梁: 好酒!
莫: Thank you!
梁: 阿老闆，其實除左慶祝重逢紀念日，應該d埋結婚紀念日、生日、 咁我地就成日
有party開哪。
東主: 對我嚟講，日日都係紀念日，但係冇理由下下拖人落水，陪我 慶祝。
梁: 唔拘、唔拘，飲飲食食我好專業㗎。
東主: 咁睇你身形都知，人如其名，成個波咁。
梁: 叫做阿波，梗係要肥至似樣。瘦波瘦波，咪即係漏左氣嘅波? 面圓圓、身圓圓，
都不知幾可愛。(向惜惜) 大姐仔呵?
惜惜:(笑) 0黑!
林: 平時實係阿問最早到， 莫非今日有生意?
梁: 我都好耐冇見佢哪。
東主: 你少嚟唧。
梁: 我接左幾部戲丫嘛。
東主: 係呀，咁紅呀。
梁: 腳色仔，搵兩餐咁啦。市道唔好，拍左都唔知有冇機會上畫。
林: 去做粵劇嘛，你擅長㗎。
梁: 唔得哩，我以前拍開嘅老倌，唔係退休就過左身，同啲後生邊夾得嚟唧。個個冇哩風格、
冇功架、冇唱腔，學啲老前輩又學到唔湯唔水。 隻隻三腳貓就話上大台，
丟人現眼! 乜得佢地又夠膽着條紅褲出嚟。
東主: 而家啲人都冇乜唔夠膽，唔識唱歌叫歌星、唔識做戲叫名星、 聲大無準就叫名咀、
不理民生就做領導人!
林: 老闆終於都睇清楚出面嘅世界。
東主:(拍一拍枱) 唔好再講啲唔開心嘢，今日大家都要開開心心!
(莫彈的節奏變輕快)
(梵谷出來)
東主: Vincent，過嚟飲杯。
(梵谷坐下)
梁: win 臣，你上次幫我畫嗰幅畫，我咪話畫得唔似我嘅。但係唔知點解人 人睇過都話似
到我十足十。
梵谷: 啊?
林: 當然啦，邊有人想睇到真正嘅自己呢?
東主: 哈哈! 一矢中的。
梁: 哈哈!
惜惜:(突然向東主) 其實你有冇嘗試過再一次喚你太太嘅靈上來?
(眾人靜默數秒，惜惜望望各人，不明所以。東主顯得愈來愈傷感， 眼眶有淚，但沒有哭出來) 梁:(為東主斟酒)
飲杯飲杯! 一醉能解萬古愁。
東主:(哽咽) 舉杯消愁愁更愁。
(問佬入)
林: 人生在世不稱意。
問佬:(邊行邊說) 明朝散髮弄扁舟。喂喂喂，唔好話比我聽，李白 做左哩度一份子。
(望見東主雙眼通紅) 邊個衰嘢整喊你?
東主: 痴線，大丈夫流血不流淚，吹沙入眼之嘛。
問佬: 哦，(坐下) 你出面係沙漠，吹沙入眼! (斟酒往東主的杯， 自己飲) 不過你話係就係啦。
東主: 個杯我㗎。
問佬: 驚你有菌咩!
(氣氛輕鬆了，眾人鬆了口氣)
東主: 我去整埋啲嘢食。(轉身入內)
惜惜: 我幫你。
(東主望向惜惜，猶豫片刻)
東主: 唔。
(惜惜跟着東主出)
(待二人走了，問佬挨近梁)
問佬: 喂，老肥，發生乜嘢事?
梁: 唓!一係叫我老梁，一係就叫我波叔，老乜鬼肥呢!
問佬: 是旦一句啦。話時話，你肥左好多喎。
梁: 你把口硬係唔收，哩啲叫做福相，你啲後生都唔知道!
問佬: 咁你唔好叫波叔，叫波福啦，好冇?
(林與問笑，梵谷只看着沒甚麼反應)
梁: 硬係成日搵人嚟開玩笑，都無解!
問佬: 你夠'海量'汪涵嘛，心胸'咁闊'，一定大人有大量。
林: 哈哈，波兄，咁你咪 '大人' 不記 '小人' 過囉。
梁: 哈哈，係係。大人不記小人過，肥人不記瘦人錯!
林: 好句、好句。 梁:多謝、多謝。
問佬: 咪住，我好似問緊你地頭先發生乜嘢事喎，係嘛?
林: " 莫道不銷魂 簾捲西風 人比黃花瘦 "。
問佬:(明白) 唉，都冇乜邊次開party佢唔喊㗎哪，咁次算叻，忍得住。
梵谷: 我手痕哪。
問佬: 畫少陣哪Vincent，你好唔鍾意同我地傾計咩?
梵谷: 咁詩詞歌賦我又唔識，唔通同你地講米勒、林布蘭?
問佬: 唉，隨你啦。
(梵谷往內拿畫布)
問佬: 好彩我唔係藝術家。
林: 做藝術家唔好咩?
問佬:日日做埋同一樣嘢，唔洗有病我都悶死左咯。
梁: 嘖嘖嘖，你亭人都冇文化! 要有成就、流芳百世，梗係要日練夜練㗎啦。
問佬: 一步登天咪幾好，唔洗嘥時間!
林: 好似阿莫咁係神童，都要不斷苦練。
問佬:(望着莫) 但係楊仔唔係神童，亦唔需要苦練。
林: 你唔記得學士提醒過你，年輕人唔好玩火。
梁: 阿問，你想搞咩呀? 肥人心臟弱，唔嚇得㗎!
問佬:(停一會，輕聲說) 唔係你想比佢，佢地就會要，都重要講緣份。
梁: 衰仔你試過?
(問佬不答)
梁: 唔好制呀! 你知嘛，依家有時喺街度，有人叫住我同我講鬼咁多嘢， 我根本唔識得佢係邊個!
調返轉頭，我識晒電影公司啲大老細，但 係就冇一個識得我! 你知唔知初頭段日子幾難捱呀!
問佬: 但係，你到底都做左名人喎，我做極咪又係咁。
林:(敲問的頭，嚴肅地) 出番嚟!
問佬: 嘩! 出乜番嚟呀?
林: 喺個牛角尖度行返出嚟! 唔好羡慕人地嘅成就，靠自己雙手創造同 冒名頂替，完完全全
係兩回事。我地矛盾掙扎嘅艱難你唔知，失去 所有親人、朋友，人認得你時你
唔識得人，嗰種痛苦你又唔知。 自己究竟係邊個? 哩條問題都不知問左自己幾多次。
問佬: 但係你地咪幾快活。
梁: "千里孤墳 無處話淒涼"。
林: "縱使相逢應不識 塵滿面 鬢如霜 夜來幽夢忽還鄉"。
梁: "相顧無言 唯有淚千行"。
林: "料得年年腸斷處 明月夜 短松岡" 。
問佬: 哼，"十年生死兩茫茫"。
林:(搭着問的肩) "不思量 自難忘"。
梁: 一陣老闆出嚟，咪講話 "小軒窗 正梳妝" 呀，咪得佢又喊㗎哪。
(眾人苦笑)
問佬: "明月幾時有 把酒問青天 不知天上宮闕 今夕是何年"。
林: "我欲乘風歸去 又恐瓊樓玉宇 高處不勝寒" 。
梁:(起來舞弄) "起舞弄清影 何似在人間 轉朱閣 低綺戶 照無眠"。
問佬: "不應有恨 何事長向別時圓"。
林: "人有悲歡離合 月有陰晴圓缺 此事古難全" 。
眾:(問與林也起來) " 但願人長久 千里共嬋娟 "。飲勝!
(何小姐入)
問佬: 何姑娘，見到妳真係開心!
(何牽強一笑)
梁: 大姑娘，過嚟坐低飲杯嘢先啦。
(何指指阿莫，跟着行了過去)
梁: 都係曉彈琴着數。
問: 你都識唱戲㗎。
梁: 咁我又唔想淘古井，重邊有後生曉得欣賞傳統曲藝。
林: 重會有。
梁: 唔多呢!
(何拍拍莫)
何: 楊仔。(改口) Wolfgang。
莫:(轉過頭) oh! my Holly，妳嚟左實在太好哪。
(問他們三人注視着莫二人)
(何錫了莫一啖)
(眾人嘩一聲叫出來，問吹口哨)
莫:(向眾人) 哎吔，咪大驚小怪啦。
問佬: 咁又係，特別多女人鍾意錫你。
(何不好意思，垂下了頭)
問佬:(向林和梁) 喂，一齊入去睇下老闆搞乜搞咁耐。
(林會意，起來欲行，梁不起。問大力的打了梁一下，梁彈起)
問佬: 行啦! 通氣! (三入出)
(莫觸着何的手)
莫: 妳今日怪怪地嘅，唔舒服呀?
何: 點怪都怪唔過你。
莫: My Holly，有事妳要講比我聽呀，我估唔到妳諗乜㗎。
(何欲言又止)
莫: 唔?
何:(深呼吸) 不如我地結婚!
(梵谷剛拿着畫布出來，聽到何的說話，不想出來打擾，站在一旁)
莫: 結婚? 因為妳錫過我?
(何感難為情，卻又焦急)
莫: 噢，如果因為咁，我咪要同二百幾位女士結婚!
何: 楊(改口)Wolfgang。
莫: 不如妳叫我Amadeus啦。
何: 你係被神寵壞嘅孩子。
莫: no, no, 係被神寵愛嘅孩子。
何:(欲哭）寵到你咁樣!
莫: 唔，點解要結婚呢?
何: 我地已經訂左婚幾年哪!
莫:(驚訝) 係?
何: 唔係同你! (莫鬆口氣)
何: 係同你個人!
莫: 下?
何: 你明㗎!
莫: oh! my Holly，雖然妳話，我太太Constance已經過左身好耐。但係我 仍然好愛佢㗎，
點何以隨便同妳結婚呢? 何況，PAPA係唔會贊成我 再婚，咁唔係幾好。
何: 你知你唔係乜嘢莫札特，你係楊宏雲!
莫:(驚慌) 噢，妳咁樣講，我會暈就真。
何: 我再問你一次，你會唔會同我結婚? 你究竟重愛唔愛我?
(莫望着何，不知該如何回答。跟着抱着頭，很痛苦的樣子)
莫:(大叫) 呀! (抱着頭亂竄)
(何大驚，不知如何是好)
(梵谷見狀，拋低畫具，衝出來捉緊莫)
梵谷: 莫! 你點呀，莫!
(梵谷似乎捉莫不住)
梵谷:(向何) 入去叫佢地出嚟。
(何呆呆的不知怎樣好)
梵谷:(大叫) 快! 快!
(何跌跌撞撞的走入內)
(莫顯得很痛苦)
梵谷: 莫! 你點呀?
(莫在哀哭)
梵谷:(抱緊他) 莫，冇事㗎。
(莫還想掙脫梵谷的手)
(眾人出來，走近二人)
問佬: 莫!
東主: Vincent,發生乜嘢事?
(何站在一旁，看着莫哭)
(問佬和東主合力按着莫)
梵谷:(喘氣) 阿莫突然抱住個頭，發晒狂咁嗌。
東主: 點會咁㗎?
(梵谷望向何)
(林和梁行近何小姐處，何在顫抖)
(林拍拍她的肩，另一方面莫仍未平伏)
林: 何小姐，妳係咪同阿莫講過一啲好特別嘅說話?
梁:(捉着她的手) 何姑娘，唔洗驚，講比大家聽，頭先發生左啲乜嘢 事呢?
(何小姐只哭着望定莫，不懂回答。惜惜站在一旁也不知如何是好)
林: 何小姐，好緊要㗎，妳剛才講過乜嘢呢?
何:(嗚咽) 我問佢，結婚好冇!
梁: 結婚?
何: 我地訂左婚幾年哪。
林: 妳同阿莫? 何: 唔係呀，同楊仔呀!
梁: 楊仔?
林: 啊! 楊仔!
何: 佢唔係乜嘢莫札特，佢係楊宏雲!楊宏雲呀!
(莫聽到叫得更痛苦)
問佬: 莫! 你冷靜啲! 林: 何小姐，你應該知道阿莫發生過乜嘢事。
何: 我唔理、我唔理! 佢就係楊仔! 你地知唔知楊仔有幾愛我呀! 我又幾 咁愛佢! 而家哩個人、
哩個人，佢竟然答唔出，佢乜嘢都唔記得晒!
林: 妳重問過阿莫愛唔愛妳?
何: 唔得咩?
梁: 何姑娘，唔好咁勞氣。
何: 你地哩班都唔知乜嘢人嚟，搞到楊仔咁。我一直以為佢只係一時神經 失常，
一定會好番。點知、點知...(哭出來)
林: 但係妳咁樣做，阿莫都唔會好㗎。
何: 唔係阿莫! 係楊仔!我唔得閒理嗰個乜鬼嘢莫札特好定唔好，我淨係 關心楊仔!
林: 好好好，妳冷靜一下先。(向惜惜) 可唔可以斟杯酒比我?
惜惜: 哦。(去了斟酒)
林: 妳唔好咁勞氣先，我問妳幾個問題。
(莫好像靜了些)
(問和東主把莫扶到琴凳上去)
(惜惜拿酒來，林遞給何)
林: 妳飲啖酒，定定神先。
(何猶豫一會，接過，一飲而盡。惜惜拿走空杯)
林: 如果妳真係深愛楊仔，
何:(搶白) 梗係!
林: 係係。咁妳首先要接受阿莫。
何: 我一直都嘗試緊。
林: 楊仔重未可以有番自己嘅記憶，妳要幫佢。
(問在掃莫的背)
何: 我重可以點?
林: 其實阿莫個頭會痛成咁，即係代表楊仔仍有殘留嘅記憶喺度。
(東主望過去林處)
(何不明)
林: 我諗重有法子。
何:(緊張) 點呀?
林: 你地盡快結婚。
何: 佢唔肯呀!
林: 哩層我地幫妳想辦法。(說時望望問和東主) 跟住每晚當佢瞓着之後， 妳就不斷嗌楊仔
? 個全名。
何: 楊宏雲?
林: 唔。當阿莫熟睡嘅時候，妳就去喚醒(小心的讀)楊宏雲嘅記憶。
梁: 好似行得通喎姑娘仔。
何:(想想) 你地令到佢肯同我結婚至算啦。
林: 妳坐陣。(拉着梁和惜惜去問和東主那邊)
(林招手示意梵谷也過來)
(眾人耳語一會，莫仍有微弱的呻吟)
問佬: 咁都得?
東主: 好似得喎，c你就難，阿莫會信嘅。
梁: 好呀好呀!試下無壞唧。
問佬: 會唔會唔係幾好呀?
東主: 你幾時變得咁正義㗎?
問佬: 試咯、試咯，都係為佢好唧。
林: 好，(向惜惜及梵谷) 有冇問題?
(梵谷搖頭並不雀躍)
惜惜: OK!
(東主往拿酒，林過去和何小姐說兩句)
(其他人站在莫側)
(何小姐聽罷林的話點點頭，望着莫)
(林跟着行往莫處)
林: 莫呀莫，舞會開始哪。各國貴賓等緊聽你演奏呀。
(莫有些反應)
(東主拿酒出來)
東主: 莫，極品紅酒呀。
(莫反應大了些)
問佬: 你爸爸同主教都嚟左哪。
(莫抬起頭，剛睡醒的樣子。兩邊望望)
(眾人靜下來，跟着林給何小姐一信號)
(何小姐看到信號便開始哭)
(莫漸漸清醒)
(何小姐哭得更響)
問佬: 莫呀，乜你咁㗎!
東主: 莫，今次我都唔幫你哪。
梁: 後生仔，血氣方剛。
林: 莫，你有乜打算呀? (過去拍拍莫的肩)
莫:(不知發生甚麼事) 下?
(何小姐再哭大聲點)
眾人: 唉!
梁: 酒能亂性呀，小兄弟!
問佬: 莫，你睇下你搞到何小姐，唉!
莫: 我做過乜呀?
林: 莫，我諗你要再婚哪。
梁: 擇日不如撞日，就今日行禮啦。
東主: 係啦，難得又幾人齊。
林: 打鐵趁熱，就等我同波叔做你証婚!
梁: 好呀、好呀!
(惜惜和梵谷往搬開枱凳，空出一個地方)
莫: 咪住，我唔知我對Holly做過咩嘢喎? 雖然我的確幾喜歡佢，不過無 理由咁就結婚㗎?
問佬: 頭先我地問過你爸爸，佢都贊成哪。最衰阿惜惜唔夠力，留唔到 佢等你醒番。
(惜惜點點頭)
莫:(驚訝) PAPA 都贊成我再婚?
眾人: 真! 真!
莫: 啊! PAPA 從來冇認同過我嘅婚姻同愛情。(高興) 啊! PAPA 終於 贊成我嘅婚姻!
問佬: 係呀，佢話贊成你同'何小姐'結婚。
莫: 啊，既然PAPA都贊成，咁開始啦。
(眾人愕然)
問佬:(輕聲) 唏，一早講哩句就唔洗搞咁多嘢。
(惜惜替何小姐抹掉淚痕，跟着拖她過去)
(莫上前拖着何的手，何不相信但高興)
莫: 噢!
何: 你想反悔?
(眾人緊張)
莫: 我冇介子?
(眾人鬆口氣)
莫: 咁結唔結得婚㗎?
林: 得得得!
梁: 小問題、小問題!
東主: 等陣。(入服務台，開兩罐氣水，抽出兩個拉環，走去莫處) 頂住檔先。
莫: 噢，多謝你! Holly 希望妳唔好介意。
(何笑笑)
莫: 呀! 問佬: 又點呀?
莫: 我要行禮，咁咪冇人幫我彈琴囉?
(梵谷拾起畫具，開始繪畫)
問佬: OK，OK ，Liszt 啱唔啱?
莫: 是旦啦。
問佬:(向東主) 有冇白手套?
東主: 等我搵搵。(入內)
(林和梁搬好自己要坐的椅子)
(問佬拉惜惜往琴邊)
莫:(向梵谷) 畫靚啲呀。
(梵谷點點頭)
問佬:(向惜惜) 妳一陣就叫Liszt 幫妳彈一首結婚進行曲，或者類似嘅 歌啦。
惜惜: 哦。
(眾人已預備好)
(東主拿了對白手套出來，交給問，問給了惜惜。東主行往莫身旁)
(問佬請Liszt上來)
問佬-L: 啊，哩位美麗嘅女士，唔知有乜嘢我可以為妳效勞呢?
惜惜: 我朋友今日結婚，想請你幫佢奏一首結婚進行曲。
問佬-L: 啊，無問題。(預備彈) 哎，我忘記左帶白手套。
惜惜:(把手套給他) 嗱。
問佬-L: Oh! Thank you! 妳真係體貼。
(問佬開始彈奏，婚禮亦開始)
(莫和何行至林和梁的面前)
林: 莫札特先生。
梁:(輕聲說) 楊宏雲先生。
林: 你願意娶何...(望向何，徵詢她叫甚麼名字)
何:(輕聲說) 何小姐。
林: 你願意娶何小姐，(奇怪) 何小姐?
(何點點頭)
林: 哦。你願意娶何小姐為妻，此後甘苦與共?
莫: 我願意!
林: 何小姐，妳願意嫁莫札特先生為夫，此後甘苦與共?
梁:(輕聲說) 嫁楊宏雲先生。
何: 我願意! 林: 好! 相方交換介子。
(莫和何互為對方戴上拉環)
梁: 小心𠝹手。
林: 哈哈! 禮成，新郎可以錫新娘。
(眾人鼓掌，東主拿香檳給大家)
東主: 哈哈，今日嘅Party就更有意義哪。我祝福你兩個好似我同內子 咁恩愛!(舉杯)
莫: 多謝! 多謝!
林: 好似我段婚姻咁美滿!
莫: 哈哈! 多謝!
梁: 好似我做嗰個呆佬咁專一!
(莫不明，但也笑笑。何也只懂得笑)
(眾人顯得很高興，惜惜行過去)
惜惜: 幾時叫佢停? (指問佬)
東主:(給杯酒惜惜) 得㗎哪，飲埋香檳先。
梁: 佢曉停㗎哪。飲勝!
(眾人仍在嬉笑，曲終也沒人發覺)
(問佬除下手套，放了在琴面，離開了)
(眾人仍不察覺)
惜惜:(驚) 呀，佢走左!
東主: 乜咁小氣㗎。
林: 哎吔，佢同李斯特一樣，彈完琴之後放對白手套係個琴上面，留為紀念。
梁: 咁哩次弊弊都冇咁弊!
東主: 我地出去搵佢。
(莫、何、梵谷也不知發生甚麼事)
林: 惜惜，妳同佢地幾個留低。
惜惜: 我都去!
東主: 或者佢會返轉頭呢。
林: 行哪。 (三人剛行至門口)
(問佬入，仍是用李斯特的語氣)
問佬: 噢，唔好意思，我迷左路，請問點樣何以離開哩處地方?
(眾人一呆)
問佬: 噢，你地開緊Party? 歡唔歡迎我參加?
莫: 歡迎、歡迎，我啱啱行完婚禮哪，你頭先重幫我彈琴。
問佬: Oh ! Congratulations !
(問佬自己斟香檳飲)
問佬: 唔。Good!
(眾人只懂望着問佬)
(莫札特不知發生甚麼事，還斟酒給自己及Holly)
(問佬四圍走，背對着眾人，像忍着笑)
(林發現問佬有異)
林: 可唔可以再請李斯特先生為我地彈一首曲助興呢?
(問的背抽得更厲害)
林: 唉，你無得救!
問佬:(大笑) 哈哈哈!
(梁、東主也笑起來)
(莫、梵谷和惜惜卻仍不明白)
(燈光隨着笑聲暗)
(落幕)
----全劇完----
------------------------------------------------------------------------------
歡迎給予指正和意見或感想，先謝!