歡迎給予指正和意見或感想，先謝! 
無宿
一群露宿者，各自有各自的背景，各有各的難處。極度繁榮的地方，為何仍有無家可歸的人。
人物：
阿寶—因目睹丈夫攜子跳樓自殺而有點不正常，常抱著洋娃娃當作是自己的嬰孩。外
出工作回來必定有傷痕，深信籌得一百萬便可以醫好兒子的病。
阿仔—大學生，失業多時，每天仍繼續找工作。曾因欠卡數而連累家人，所以不想再
成為家庭的負擔。
工頭—老頭一名，常有些散工。
老細—已破產，對人不信任，對任何事也不滿，總愛提及從前風光的日子，兒子們離
棄了他。
婆婆—愛拾破爛，每天一定拿些乾糧給各人。
靚女—富家女，愛喝酒，但易醉。與父關係惡劣。
丈夫—阿寶的丈夫，因負資產及染病而攜子跳樓。
序幕
[丈夫抱著嬰兒入，站到近前台邊緣的位置]
丈夫：[望向遠處] 老婆，對唔住!
[嬰兒笑聲]
丈夫：仔，爸爸名都未同你改，對唔住，係爸爸唔好，惹埋啲咁嘅病返嚟。
[嬰兒笑聲]
丈夫：不過，呢個世界都唔係咁好，你有機會投胎，都唔好揀做人，做人好辛苦，錢
又揾唔番，病又醫唔好。
[嬰兒笑聲]
丈夫：你都覺得爸爸講得啱？哈哈，千祈唔好信爸爸，你媽媽就係太信爸爸，累死佢
自己。
[嬰兒笑聲]
丈夫：爸爸同你喺呢層樓跳落去，呢層樓害得爸爸好慘。點解你地要逼得我咁緊要，
係要逼到我死你地就安樂，係咪! 點解要咁樣! 好，橫掂都係死，我就喺到跳落
去，睇你班人攞得番幾多。仔，記住，投胎唔好揀做人、千祈唔好做窮人。
[嬰兒笑聲]
阿寶VO：老公，夠鐘食藥。
[阿寶入，見狀大驚]
阿寶：老公，你，你做乜企喺嗰度？窗邊風大，寶寶唔吹得風，你返過嚟坐，返過嚟
坐好冇？
[丈夫只搖頭]
阿寶：寶寶肚餓㗎喇，你沖支奶比佢飲先，好冇？
[嬰兒笑聲]
[丈夫只搖頭]
阿寶：寶寶重未改名，寶寶改到個好名就無事㗎嘞。你返過嚟坐，我求下你。
丈夫：無用㗎、無用㗎。咩嘢都無嘞。
阿寶：會無事㗎。
丈夫：對唔住，對唔住呀老婆，係我累咗個仔，係我惹個咁嘅病返嚟，係我衰。
阿寶：會無事㗎，醫生話有得醫㗎。
丈夫：有得醫，我地都無錢去醫。無錢，咩嘢都無。對唔住，老婆，我同個仔行先嘞。[跳下台]
阿寶：老公!!!!!! 寶寶!!!!!!! [暈倒]
[燈滅]
[二人被抬走]
[燈稍亮，為深夜]
[靚女拿著啤酒入，非常醉]
靚女：Merry Christmas !!!!! 生日快樂!!!!!!!! 恭喜發財!!!!!!!!!!重有咩？重有咩!!!!!!!![飲
完最後一口酒，擲罐] 妳快啲去死!!!!!!點解重唔死…… 我要死呀，我要死
呀，比藥我、比啲藥我。比啲藥我，我就可以死嘞。比啲藥我，我就可以安安
樂樂咁死嘞。比啲藥我……[醉倒在地上]
[婆婆拖著紮好的紙皮盒入]
[婆婆見到地上的罐，高興的踏扁後拾起。看到靚女在地上，退後兩步觀察一會，才往探探她有沒有氣，跟著抽了張紙皮蓋在她身上]
[婆婆出]
[阿仔、工頭、老細各自拖著紙皮盒入，選好位置便準備睡覺]
[阿寶抱著洋娃娃入，坐在一角，哼著歌{像安眠曲}：「You better watch out, you better not cry, you better
not pout, I'm telling you why: Santa Claus is coming to town! He's making a
list, He's checking it twice, gonna find out who's naughty or nice. Santa Claus
is coming to town! He sees you when you're sleeping, he knows when you're awake.
He knows when you've been bad or good, so be good for goodness sake!」]
[眾人突然彈起身，阿寶除外，仍哼著歌，不受騷擾]
[眾人互望]
工頭：[望著靚女] 喂! ……喂!
老細：[望著靚女] 囁……囁…….
阿仔：[望著靚女] 請問/
工頭：洗唔洗咁好禮貌？
阿仔：係，係。
老細：阿仔，你過去睇下有氣無氣？
阿仔：我？
老細：唔通我! 呢啲嘢都要我去做，咁要你嚟做乜。
阿仔：老細，你唔係我老細喎。
[靚女輕微轉身]
工頭：唔洗嘈，重郁嘅。
老細：我呀，我聽日有工開呀，都費事同你講咁多，一早要起身喇我。
工頭：挑，你條茂利有工開？早啲起身，霸定個屎瘩，出恭就有你份。
老細：唔係一定要靠你呢個大眾工頭至有工開嘅，我呢啲人面幾咁廣至得㗎。你啲工，得
過返字，無糧出嘅，餐餐白做。做邊間執邊間，都唔知你黑定嗰啲老闆黑。
工頭：係，邊個夠你呢個老細本事，有工我就揾阿仔，唔打攪你老人家。
老細：係囉，係囉，幾時都話「鷸蚌相爭，漁人得利」，讀得書多係唔同嘅，醒目仔。
阿仔：老細，我都係同你瞓埋一度地方，讀得書多咁又點？
老細：點知你係咪嗰啲咩體驗生活，你知啦，我地呢啲，由送信做到董事長，有讀幾
多書啫，係蝕底過你地啲大學生㗎嘞。得罪晒、得罪晒，早抖嘞、早抖嘞。[睡]
阿仔：咁點呀？
工頭：尤佢瞓一晚。
阿寶：[幽幽地] 阿仔，你拖佢埋去瞓啦，唔係夜啲落雨就會淋病嘞，淋病咗，醫唔好就手尾
長喇，病咗醫唔好，就冇咗爸爸嘞。[繼續唱歌]
[阿仔起來，過去拖靚女入內]
[阿寶傳呼機響]
阿寶：寶寶，媽媽要開工呀，你乖乖地自己瞓覺，要乖仔呀，媽媽好快就揾夠一百萬、
儲夠一百萬，醫生話有一百萬就可以醫好你個病喇，要乖呀，知道嘛。[輕輕放
下寶寶] 阿仔，我去開工呀，你幫我睇睇寶寶，個袋度有奶粉同尿片，唔該你
嘞。不過佢瞓得好稔，應該會一覺瞓到大天光。如果寶寶醒咗，你記得唱歌佢
聽，唱得好聽啲，記住嘞。
[阿寶出]
阿仔：哦。[有點無奈]
[阿仔把靚女放好，靚女全無知覺]
工頭：好瞓嘞，聽朝一早你重要去見工。[睡]
阿仔：哦。[移近寶寶處睡]
[燈由暗轉為晨光]
[阿寶一拐一枴的行回來，面有瘀傷。第一時間往看寶寶，抱起他，行往前台，哼著歌：
「You're my love you're my angel You're the girl of my dreams
I'd like to thank you for waiting patiently Daddy's home your daddy's home to
stay
How I've waited for this moment To be by your side Your best friend wrote and
told me
You had teardrops in your eyes Daddy's home your daddy's home to stay
It wasn't on a sunday [monday and tuesday went by]
It wasn't on a tuesday afternoon [all I could do was cry]
But I made a promise that you treasured I made it home back to you
How I've waited for this moment To be by your side
Your best friend wrote and told me You had teardrops in your eyes
Daddy's home your daddy's home to stay Daddy's home to stay
I'm not a thousand miles away Daddy's home to stay.....。」]
[婆婆拿著一大袋子入，裡面裝了一袋袋乾糧。在每人的跟前放下一袋。看著阿仔一會，想摸摸他但又縮回手，跟著行往阿寶處]
婆婆：早晨，阿寶。
阿寶：早晨。寶寶，嗌婆婆早晨啦。
婆婆：寶寶好嘛？
阿寶：寶寶好，寶寶好。
婆婆：[看到阿寶面有瘀傷] 陰功咯，舊嗰撻瘀都未清，又多撻新嘅。嗱，等阿婆比支
陳年去瘀跌打酒過妳，陳間叫阿仔地幫妳捽，知嘛，瘀要散㗎。
阿寶：妳睇下寶寶對眼係咪好藍？係咪即係有風呀？
婆婆：睇過。係喎，等阿婆聽朝拎隻熱雞蛋過嚟比妳，不過要趁熱碌。呀，加條銀鍊
重”靈擎”。寶寶碌又好，媽媽碌又好。
阿寶：唔該婆婆啦，寶寶。
婆婆：寶寶乖。阿婆要行喇，聽朝我攞雞蛋過嚟吓。早餐，攞住。
阿寶：拜拜婆婆啦，寶寶，謝謝啦，拜拜。
[婆婆眼濕濕的出]
[阿寶繼續唱安眠曲]
[阿仔起身，跟著拍拍其餘兩人]
[靚女也醒，望望四周，但未太清醒]
[阿仔摺好紙皮，拿過袋食物，顯然不是第一次收到]
阿仔：早晨，阿寶。
[阿寶只點點頭沒回話]
[阿仔行往阿寶處]
阿仔：寶寶，早晨。
阿寶：哥哥早晨。[又再哼歌]
[阿仔拿過背包，出]
[工頭和老細也起身，同樣收起紙皮，拿起紙袋]
工頭：早晨阿寶。
[阿寶只點點頭沒回話]
老細：個個淨係識同阿寶講早晨。
工頭：去洗面霸瘩啦，”gege” 疙疙。
老細：[大聲] 早晨!
[阿寶只點點頭沒回話]
[工頭和老細出]
靚女：[稍稍清醒] 啊~~~哎吔，又瞓街。不過今次有被襟。[抱著頭] 好痛呀!
阿寶：我有止痛藥，妳要唔要？
靚女：No, thank you 喇，唔work㗎。
阿寶：女仔人家，飲到咁醉，好蝕底。
靚女：哼~睇下邊個蝕底。
阿寶：妳……妳有病？
靚女：係呀，我父親大人成日同人講話我有病，我諗我都有，仲要係死症，無得醫嗰
隻。
阿寶：病……係有得醫㗎，有得醫㗎。
[靚女聳聳肩]
阿寶：信我，咩嘢病都有得醫，千祈唔好死，死咗就解決唔到問題。
靚女：喂，妳唔係社工下嘛，响街”僕”啲老泥妹嗰隻？我有屋企㗎，住响跑馬地，只
係我唔多鐘意返去。妳唔好諗住輔導我，我父親大人都放棄我，妳盞嘥心機。
阿寶：唔好咁容易放棄，有辦法㗎，一定有辦法㗎。[哭]
靚女：嘩，妳做乜講講下喊㗎，妳唔洗為我喊喎。
阿寶：寶寶乖、寶寶乖，唔好喊，媽媽錫返。[行往角落坐下來，哼著歌]
靚女：哎吔，死喇死喇，我係咪仲醉緊？醒呀醒呀!
[阿仔入]
阿仔：小姐？
[靚女抱著頭沒回應]
阿仔：小姐？!
靚女：你叫我？
阿仔：係呀，妳無事喇嘛？
靚女：無呱。你幫我襟嗰張被㗎？
阿仔：唔好介意，係得紙皮咋。不過乾淨㗎，放心。
靚女：好口渴。
阿仔：嗰邊體育館有水機。
靚女：[拿出一百元] 唔該你呀，哥哥仔，幫我買樽水嚟丫。
阿仔：入coins 㗎喎。
靚女：唔該你呀，唔洗找，[挨埋阿仔處] 唔該你丫。
阿仔：OK、OK、OK，[推開靚女，往買水] 朝朝有得幫人買水就唔洗捱肚餓。哼，真
係有志氣。 [出]
[靚女在做些古怪體操]
[工頭和老細回來]
工頭：嘩，靚女，咁早晨你就fing頭。
老細：fing 啦、fing啦，晨早流流披頭散髮，今日重唔食白果。
靚女：阿叔，你姓賴㗎？
老細：哼，我個名講出嚟，驚嚇到妳企唔穩。
靚女：哈，我又真係想嚇吓，睇吓嚇唔嚇得死。
工頭：係囉，我都想知，唔係你一個唔該去鬼咗，都唔曉同你攞死亡證、立番個碑。
老細：哼，想當年中環、銅鑼灣、尖沙嘴、沙田、大埔，邊度無我公司辦事處，無我
公司地盤。我一破產，你知唔知香港嘅失業率即刻升咗幾個百分點。幾個百分
點呀! 你知唔知有幾多人？香港多咗幾多人失業。
靚女：你講嘢咁似我父親大人。咦？或者你地真係識都未定。佢喺你講嗰啲地方全部
都有公司，仲要係贏返嚟。
老細：你老豆又貴姓名呀？
靚女：翟/
老細：你老豆係翟萬財!!!
工頭：唔係呀，你老豆係翟萬財？
靚女：我都想唔係。不過你地無睇到報紙話佢個女响美國戒酒成功，返番香港咩。仲
幾靚女㗎。
工頭：妳都算戒酒成功？咁我就未戒奶咯。
靚女：唓!我根本就無去戒酒，亦唔需要戒酒。
工頭：啱啱啱，酒唔係愛嚟戒嘅。
老細：妳就係個大老千個女!!我都比你老豆害得慘!!
靚女：你比佢害得有幾慘？你重可以生勾勾企响我面前，無穿無爛。
老細：一晚咋，一手牌，咩嘢都無晒!! 樓市冧我無事，股市冧我更加無事，冧乜都無
損我分毫。就係嗰一手牌，就係妳老豆嗰一手牌。
工頭：你講真講假？一手牌攪到你要瞓街？
靚女：喂，我父親大人你係唔能夠睇小。你估佢係第一個中招咩，日日唔知幾多人喺我
屋企外邊喊苦喊忽，要生要死，呢啲我見唔小啦。不過，就算比你贏到，你估
你又能唔能夠安安全全咁返屋企？做人要睇開啲。
老細：就係嗰一手牌…….[不斷以不同語氣重複]
[靚女和工頭看著老細一會]
靚女：不如你去同佢洗個面啦。
工頭：啱啱先洗完返嚟。
靚女：一係沖個涼。
工頭：前日先沖咗。
靚女：係呢，你覺唔覺我個身有陣味？
工頭：唔……我對異味已經好麻木。
靚女：一舊水，出力聞吓啦。
工頭：咁著數。[挨近靚女]唔……
[阿仔拿水入]
阿仔：工頭，你做咩？
工頭：阿靚女叫我聞吓佢係咪有陣除喎。嘿，我個鼻唔知係咪死咗，無乜嗅覺，你新仔，
過嚟嗦吓。
靚女：過嚟丫，過嚟幫我聞吓啦。係有陣味呢。
[阿仔過去聞]
阿仔：無咩呀，有陣酒除囉。
靚女：酒除？[自己聞聞] 又好似係。
阿仔：水呀。
靚女：Thank you ! [飲] 其實你地咩嘢人嚟㗎，琴晚同我一齊瞓街？
工頭：我地專業瞓，你就客串。
靚女：[問阿仔] 你都係？
阿仔：係。
靚女：咁點沖涼？
阿仔：去附近啲體育館，有時咪蛇返屋企。
靚女：瞓街都有屋企？咁做咩要瞓街？
阿仔：瞓街……
工頭：風涼水冷，有乜唔好？好多屋企都唔住得人，瞓街不知幾爽。
靚女：有無嘢食？
工頭：妳即係問和尚借梳。
阿仔：[從紙袋那出食物] 嗱，妳肚餓就食先啦。
靚女：哈，咁算唔算係乞兒兜到嗱飯食？[沉默] 哎吔，sorry囉。
工頭：粗嘢嚟，怕唔啱大小姐胃口。
靚女：唓，玩小氣。
阿仔：老細無嘢丫嘛？
工頭：佢玩想當年。
阿仔：唔講嘞，夠晒鐘。
工頭：馬到功成!!
阿仔：承你貴言。
靚女：你去邊呀？
阿仔：見工。
靚女：咦。帶埋我去得唔得？ 我咁大個女都未見過工。
阿仔：得唔係唔得，不過我諗住行路去咋。
靚女：行去邊？
阿仔：大角咀。
靚女：好呀，我咁大個女都未去過大角咀。
阿仔：我唔係去玩。
靚女：我知，去見工丫嘛，我都無話同你去玩。
工頭：帶佢去啦，佢走咗老細就舒服。
靚女：[挨埋阿仔處] 帶埋我去。
阿仔：[推開她] OK、OK、OK。
靚女：好嘢。
阿仔：妳都完全唔怕”衫保”。
靚女：死我都唔怕，仲有咩好怕。
阿仔：咁就真係要指教吓。
[二人出]
工頭：願賭服輸。行啦。
老細：我三歲游水落嚟，擦鞋、派報紙、掘地、洗廁所、整豆腐、養豬，早午晚三份
工。有咩我未捱過未做過。捱到有自己公司、有自己間廠、五架車，六層樓。
我一直都做實業，真真正正嘅實業，從來無投機取巧。一毫子股都唔炒、唔攪
上市、唔攪集資、唔呃人，連女人都唔玩。結果呢？就比個老千一Q 清袋。佢
就利害，唔洗捱，呃呃騙騙，攪上市、攪集資、呃呃埋埋嚟發達。
工頭：走喇，賭仔最忌磨爛蓆。
老細：哈，如果當日我聽老婆講，賭兩鋪，輸贏都起身，今日我就唔洗响處對住你。
工頭：蝦，你個冚加祥，有工開咁你行唔行？
老細：行! 我梗行，個天留番我條命就係比我贏多一次。
工頭：係呀，今日開三T，成億呀。
老細：一人五蚊。
工頭：殺你，磅水。
老細：出到糧扣喇。
工頭：殺你。
老細：今次係咪即刻出糧㗎？咪一陣佢執咗，我地又白做。
工頭：執執執執執，咁易執就’聽’執骨。
老細：要幾邪有幾邪，我地由旺角做到深水埗，都係因為啲酒樓由旺角執到深水埗，
執吓執吓都唔知會唔會去到荃灣。
工頭：方向正確，一路去仲有排去，深井、屯門、元朗，睇吓我地去得快，定係
佢地執得快。
[二人出]
[阿寶唱歌—“Let go” [詞:李宗盛、余致明 曲:張震嶽]：
「在你沉睡的時候 我有個荒謬的念頭 匆匆忙忙的地球 會不會自己轉昏頭
煞時明白我其實再無他求 我只想疼你到永久
在你緊鎖的眉頭 也許有難挨的寒冬 純真對你招著手 其實你天生愛從容
感應風中的節奏時間在動 就這樣愛你到永久
這一生因有了你 縱然有天大的風雨 LET GO 讓我帶你走過春夏秋冬
一心一意愛著你 外面再大的風雨 誰會在意 在你沉睡的時候
我有個荒謬的念頭 這乖乖努力的地球 會不會自己轉昏頭
然後明白我就此別無所求 我願意疼你到永久
這一生因有了你 縱然有天大的風雨 LET GO 別理外面世界波濤洶湧
一心一意愛著你 外面再大的風雨 不會在意 這一生因有了你
就算是再多不如意 LET GO 讓我帶你走過春夏秋冬 我用一生愛著你
外面再大的風雨 無憂無懼。」]
[唱罷親親寶寶]
VO：阿寶女士，妳份報告出咗。對唔住/
[阿寶大叫，四處走]
VO：份報告，對唔住。
[阿寶大叫，四處走]
VO：係陽性，係陽性。
[阿寶大叫，四處走]
VO：妳個病，我地無能為力。
[阿寶大叫，四處走]
VO：我地估計，妳只係得番三個月/
阿寶：唔聽，唔聽，聽唔到，聽唔到。無聲、無聲、無聲。瞓醒就無事，瞓覺，瞓覺
寶寶，媽媽要瞓覺，寶寶乖仔，唔好嘈醒媽媽，知嘛，乖仔，唔好嘈醒媽媽。
[往台後躺下來]
[晚上]
[工頭和老細各自拿著食物回]
老細：又係得啲麵包皮，點解無啲蛋糕唔要嘅呢。
工頭：嗰排有漢堡包薯條你食又話食到厭，你都幾難服侍。我都唔知幾想佢再換貓換
狗換豬換怪獸，咁就成個禮拜嘅伙食都唔洗愁。重唔洗好似乞咁企响人地門口，
等佢地啲垃圾。
老細：呻吓啫，我地已經無乜權利，唔係連呻下嘅權利都無吓嘛。
工頭：權利，嗱，過去裝兩樽水，免費，去攞啦，權利。
老細：權利!! 啲面口不知幾難睇，我同佢講，我都有納過稅，多過你成世人人工。佢
咪當我傻，重好，當我傻反而避咗我。係啦，傻咗重好。[出]
工頭：阿寶，起身食嘢嘞。
[阿寶沒反應]
工頭：妳成鬼日都唔比反應，真係死咗都無人知。
[阿仔背著靚女入，靚女拿著一袋食物]
阿仔：[喘氣] 到喇，到喇。
靚女：你個背脊又幾舒服喎，有得發展。
阿仔：背脊都有得發展？
靚女：我請你做我司機。
阿仔：小姐，咪玩我啦。
靚女：我認真你就驚。
工頭：食咗嘢未，你兩個。
靚女：篤咗魚蛋，食咗雞蛋仔、生菜魚肉、串燒、燒賣、重有碗仔翅，我咁大個女都
未食過啲咁得意嘅翅，請你地嘅。幾想試埋臭豆腐。
工頭：嘩，去掃街咁開心，多謝先，熱辣辣，熱辣辣，哈，重有煙。[食]
阿仔：老細呢？
工頭：爭取權利。
靚女：去咗示威？好玩喎，我又去。
工頭：呢，去咗嗰便，去啦、去啦，個人權益，去啦。
[靚女往工頭指著的方向跑去]
阿仔：又話行唔郁，跑得咁鬼快。
工頭：今日有無聲氣？
阿仔：咪一樣，間間都要留電話，邊有電話留。寄信嗰啲我留咗屋企地址，間唔中返
去裝吓有無消息。
工頭：電話我有喎，買張太空卡用住先。
阿仔：有電話都無得叉電，買太空卡點都要一兩舊。
工頭：賣咗個電話都有兩三舊，不過賣咗部電話要卡嚟又無用。唉，工頭都幫你唔到。
阿仔：有心。
工頭：我就老嘞，無所謂，你仲後生，有得變，有機會。熱辣辣，好耐未食過咁熱辣
辣嘅嘢。
阿仔：我都有想過返屋企。
工頭：係囉，你仲有屋企。
阿仔：有家，但歸不得。
工頭：都過咗咁耐，無嘢㗎嘞。正所謂浪子回頭金不換。
阿仔：如果淨係金，我諗我一早返咗去。
工頭：意外嘅嘢，怪得邊個，又真係唔一定關你事，無証無據又拉唔到人。
阿仔：揾到份工，揾到份工我就會返。
工頭：你開到個盆口咁大，揾到份工喎，今日比你揾到，轉頭執Q咗，咁你點先？今
日返，第日又走過？我地啲死老鬼就認命嘞，你仲有大把世界。係度，屈吓屈
吓就一世，今日你仲有衫有褲，凍啲呢？你或者會揾個垃圾袋笠住自己，笠吓
一個、笠吓一個、笠吓笠吓，你就唔會想係啲垃圾袋度出返嚟，或者你已經唔
記得點樣可以出返嚟。飯又喺嗰度食，屎又喺嗰度屙；到嗰個地步，你就真係
連乞衣都不如。所以，你仲想走得甩，記住，垃圾絕對唔可以上身，尤其
是垃圾袋。記住，記住工頭呢番說話，有一日你見到我有垃圾响身，記得提我，
記得拉返我出嚟。
[阿仔思量著工頭一番話]
[老細與靚女有說有笑返來]
工頭：咦喂，老細，你失憶唔認得佢？
老細：哼，我大量就街知巷聞。佢話呀，幫我port個白鴿眼，哈，你頭先見唔到佢個
死狗樣，爭啲想跪喺地度吠兩聲。
靚女：port人我好在行，只要我睇唔過眼，或之佢係總統定特首，每個人都有佢嘅權
利，去爭取自己嘅權利，係無分階級唔睇背景，唔可以因為自己唔夠人叻就縮，
我地唔係烏龜。
阿仔：妳唔係話好攰，行都行唔郁/
靚女：咁人地頭先係好好好攰嘛，但係為咗伸張正義，警惡懲奸，攰並唔係藉口。
老細：好，有我當年嘅風範。
工頭：趁熱食啦，咁多口水。
老細：咦，係喎。咁好有翅食。
工頭：你仇家個女同你個新偶像夾份買。
老細：趁熱，趁熱。（食）
阿仔：咩仇家？
[阿寶call機響，起身）
阿寶：起身、起身，開工、開工。
阿仔：阿寶，食啲嘢先去啦。[把碗仔翅拿過去]
阿寶：熱過喎，熱辣辣喎。[吃了一口]寶寶唔食得呀，大個仔媽媽先買比你食。你想食
咩呢？嗱，媽媽要返工賺錢，你乖乖地唔好扭計，知道嘛？阿仔，又要麻煩你
幫我睇住寶寶，唔該晒。你睇佢瞓得幾冧。我收工就即刻返嚟㗎嘞。唔該晒。
阿仔：妳攞埋碗嘢去食喇。
阿寶：係，係，唔好嘥，熱辣辣、熱辣辣。[出]
工頭：食飽，早抖。[拿回紙皮，睡]
老細：咩翅我未食過，新同樂都係無咗我幫襯先做唔住，唉，又多班人失業。一日都
係嗰個死老千，害我好啦，仲累埋其他人。因住生仔無屎忽。
靚女：佢的確係無仔生，好彩我係女。
老細：我就有仔嘞，兩個添。哼，呢樣佢就搶唔走。
靚女：佢地而家呢？
[阿仔想制止靚女，但已遲]
老細：好叻仔，一個讀劍橋一個讀哈佛，年年都考到獎學金，叻仔嚟㗎，兩個都叻仔
嚟。佢地成日話返嚟帶我過去享福，一個New York、一個L.A.，唔好嘞，順得
哥情失嫂意，唔通將自己劏開兩邊咩，好孝順，唔係老黃賣瓜，我兩個仔真係，
真係……新年咋嘛，兩個特登飛返嚟陪我過年，比錢我過年。聖誕又話返嘞，
話住唔好。我話唔好嘞，機票又貴，講唔聽，911嘛，危險呀。真係好孝順。呀，
食晒咯，拎去掉咗佢。好熱喎今晚，呵，咁鬼熱嘅，我過海皮嗰便瞓，涼啲、
涼啲。[拖著腳步，出]
靚女：佢兩個仔唔係嚟呢度拜年吓嘛？
阿仔：家家有本難唸/
靚女：咪住，而家幾多點？
阿仔：[望望外面] 成十一點喇。
靚女：[大叫] 嘩!!!!嘩!!!!
阿仔：小姐，成十一點啦，無事吓嘛？
靚女：我成日、成日無飲過酒嘞，哈哈哈哈，我成日無飲過酒呀!!!
工頭：成日就呱呱嘈，我成年啦咪要登報紙，弗妹。[拖著紙皮睡遠一些]
阿仔：係咯，咁高興，返屋企慶祝啦。
靚女：屋企？屋企得五個工人、四個司機、三隻狼狗、兩個保鑣、一個管家，揾邊個
同我慶祝？
阿仔：好誇喎。但係我同妳一樣無關係。
靚女：無關係㗎。
阿仔：咁，夜嘞，早抖。
靚女：喂，陪我傾吓計丫。
阿仔：妳放過我喇，我聽朝仲要去見工。
靚女：你今日已經去咗大角咀、新蒲崗、土瓜灣、紅磡，見咗1、2、3……14份工，
你覺得有無一份會請你丫？
[阿仔不語]
靚女：None! 我諗連份死人化妝都唔會請你，因為地址嗰欄你竟然填瞓街，咪即係擺
明唔想人請。不過，其實瞓街並唔係問題，仲有人會慧眼識英雄，嗱，有份私
人助理，時薪一百，無試用期、無福利、24小時on call，做唔做？
[阿仔不語]
靚女：唔洗填form、唔查家宅、唔洗擔保、無人同你爭、唔洗等通知等second-in，點？
[阿仔不語]
靚女：你細個讀書作文寫我的志願，寫做露宿者㗎？
阿仔：好，一日二千四，一個月七萬，多謝。比嚟喇。
靚女：嘩，你啲心算都幾利害喎。
阿仔：我淨係唔識化妝啫。
靚女：聽日去銀行攞比你。
阿仔：[不信] 好。
靚女：好，坐低。你第一個任務就係講故事。
阿仔：講故事？
靚女：快啲，坐低。
阿仔：咁你想聽乜？
靚女：驚險刺激嘅。
阿仔：驚險刺激……，你有無住過公屋？
靚女：無喎。
阿仔：咁有無爭卡數？
靚女：都無，都唔洗我找。
阿仔：好，聽住嘞。從前有個大學生，自以為好醒，為咗身份嘅象徵，申請咗第一張
信用卡，請晒班死儻去唱K。跟住因為要換演唱會飛同埋有機票優惠，佢申請
咗第二同三張信用卡；換咗機票，去日本旅行又申請第四同五張；最後，為咗
卡噤卡，佢總共有十幾張信用卡。畢業嘞，佢最叻係點計信用卡啲利息，原來
可以還一世都還唔完。
靚女：好恐怖喎，又真係。
阿仔：都未入正題。
靚女：哈，未㗎？
阿仔：畢咗業一年，個大學生一直揾唔到嘢做，但係佢要找十幾張卡數同埋要還返啲
貸款比政府。於是，佢決定玩失蹤。無幾耐，怪事就發生嘞，屋企大門嘅匙窿
比人塞咗牙簽、鐵閘無端端多咗條鐵鍊、走廊貼滿尋人廣告、半夜三更會有人
用搥仔拍門；有一晚，佢聞到好大浸火水味，好驚，但係都唔敢開門出去睇
下，無幾耐，有煙、火警鐘響，好多人走出嚟。但係，大學生屋企無火燭，火
燭嘅係隔離屋，度鐵閘比人鎖住咗。消防員好快嚟到，屋裡面得陳伯同佢部輪
椅，但係消防員無辦法可以分開陳伯同張輪椅，無人有辦法將陳伯放入嗰
啲黑色嘅拉鍊袋，最後唯有用張好大嘅黑布，連人帶輪椅將佢送上黑箱車。
靚女：哎吔……
阿仔：之後，個大學生就無再返屋企，雖然佢好想知陳伯葬咗响邊。
靚女：一定要火葬喇。
阿仔：講完嘞。
靚女：唔……麻麻地驚險咋喎。
阿仔：咁妳講嘞。
靚女：好呀。有一個女大學生，佢好細個嘅時候爸爸同佢講，媽媽生佢嘅時候死咗，
佢一直都唔相信，佢覺得係爸爸殺死咗媽媽。因為婆婆曾經同個女大學生講，
爸爸係靠媽媽份保險發達，所以喺佢好細個開始就唔鍾意爸爸。而佢爸爸為咗
揾更多錢，亦唔發覺個女原來一直都憎緊自己。終於有一日，爸爸返到屋企，
發現响媽媽個靈位面前，瞓咗個血人，仲有封遺書，。嗰時爸爸先知道，原來
個女一直好憎自己，原來個女一直以為媽媽係比爸爸殺死。經過搶救，個女大
學生無事，醒返嘅時候見到爸爸坐响床邊，無出聲。佢無望個女，只係靜靜咁
坐喺度，坐到好夜。最後，佢將封遺書放咗喺個女嘅枕頭底，然後走咗，亦無
再去醫院。
阿仔：如果佢阿婆係呃個女大學生，佢媽媽真係難產死，咁個阿爸咪好唔抵？
靚女：[想想]呢啲係之後嘅事啦，聽古咪駁古之得㗎。
阿仔：OK、OK。
靚女：個女大學生好番之後就返番屋企，往後嘅一個月，佢都無見過佢爸爸，
於是佢開始絕食。幾日之後，工人送咗佢入醫院。當佢能夠擘大對眼嘅時
候，見到嘅就只有護士。個護士同個女大學生講，減肥都要適可而止，無咗條
命，幾瘦都無意思。佢望住個護士，乜嘢都講唔出。
阿仔：咁鍾意自殺，應該試吓燒炭，多數都死得去。
靚女：佢都有諗過，可惜佢唔識得透爐。唔好再駁嘞。個女大學生返到屋企，佢依然
見唔到爸爸，只係每日都有唔同嘅補品放响佢床頭。之後，個女大學生試過割
脈、跳海、食安眠藥、飲滴露、連撞車都死唔去。原來，命可以咁硬。
有一日，佢遇到一株大樹，好壯好茂盛，佢翹好頸上面嘅印度絲巾，拋上株樹，
佢相信今次應該可以結束無謂嘅生命。哈，唔知係咪撞鬼，醒返，又係瞓响醫
院。不過今次嚴重好多，個女大學生發覺手手腳腳都郁唔到，佢癱咗喺張病
床度，好想喊，好想喊。爸爸依然無嚟到，每日就有好多唔同國籍嘅醫生出出
入入。每日，都有一個護士同佢換咗床頭嘅花，日日都有唔同嘅野花。
瞓咗好耐好耐，佢終於能夠講到嘢。當個護士嚟同佢換花嘅時候，
佢向護士要兩隻藥。個護士聽到個藥名愕咗然，無答佢。於是個女大學生同個
護士講，如果能夠幫佢揾到嗰兩隻藥，佢就幫佢實現三個願望。個護士諗咗一
陣，笑住點點頭。個女大學生勉強笑一笑，問個護士係邊三個願望。個護士哄
埋佢耳邊：「第一個願望，我想要妳一半財產。」
個女大學生話比晒你都無所謂，護士搖搖頭。
「第二個願望，我要妳將啲錢唱晒做一百蚊。」
個女大學生雖然覺得奇怪，但係都應承咗。
「第三個願望，我要妳親自將嗰啲一百蚊紙，分比有需要嘅人，唔能夠施捨，唔
能夠就咁捐比慈善機構。當妳分晒所有錢嘅時候，我就會比啲藥妳。」
阿仔：終於呢？
靚女：到而家，啲錢都未派晒。
阿仔：嘩，咪好有錢。
靚女：咁又點？
阿仔：咁……不如瞓咯。
靚女：好呀。[說罷睡了在阿仔的大腿上]
阿仔：喂!
[靚女裝作已睡著]
阿仔：有無咁快瞓著。
[阿仔除下自己的外套，聞一聞，跟著蓋了在靚女身上]
靚女：唱歌丫。
阿仔：詐瞓。
靚女：唔，唱啦。
阿仔：OK、OK、OK。「恭祝你福壽與天齊，慶賀你生晨快樂，年年都有今日，{啋}，
歲歲都有今朝{大吉利是}，恭喜你，恭喜你。」
靚女：Happy Birthday ! [錫了阿仔的面]
阿仔：[愕然] 多謝。
[靚女真的睡去，阿仔呆望一會也睡著]
[天剛剛亮]
[阿寶頭髮凌亂的回來，又多了些傷痕。她立刻往抱起寶寶]
阿寶：寶寶乖唔乖？有無扭計呀？琴晚個叔叔比咗好多貼士媽媽，媽媽好快就可以貯
夠一百萬，醫生話有一百萬，寶寶個病就會好。寶寶乖，好番就快高長大、活
活潑潑、開開心心。
[哼歌] 「願寶寶早點去睡 閉上眼進太空裡 我會抹去你的眼淚
那怕變化歲月裡 北風祇管呼呼吹 我也會抱你 吻你 身心裡
愛你是我的生趣 怎麼結果都心醉
無須負重任 催逼一生答謝 祇須講 Ma Ma I Love You」
[婆婆提著一袋食物及暖壺入]
婆婆：早晨，阿寶。
阿寶：早晨。寶寶，嗌婆婆早晨啦。
婆婆：寶寶好嘛？
阿寶：寶寶好，寶寶好。
[婆婆把食物分發給各人，看不到老細，把他那份放在工頭側。注視了阿仔一會，跟著才行往阿寶處，從暖壺拿出雞蛋，用手巾包著。像忘了甚麼，把雞蛋放下，把頸上的銀鍊除下，拿走玉墜，把鍊放入手巾內，再放入雞蛋。]
婆婆：阿寶，阿婆攞咗雞蛋嚟幫寶寶碌吓對眼。寶寶乖，阿婆幫你碌吓對眼仔。[詐作
幫寶寶碌眼] 妳做乜又多咁多瘀痕，陰功。好，寶寶碌完到媽媽碌。[幫阿寶碌
那些瘀傷] 痛妳就出聲，痛妳就要出聲。瘀要散，病就要食藥。有唔舒服記得
話比阿婆聽，阿婆同妳去睇醫生。阿婆老嘞，無有怕，都聞到棺材香咯。妳後
生呀，有病要揾醫生幫妳。唔好再做嗰啲工，惹到啲衰男人都無得講，佢地再
惹到周圍係就唔好，累到人就唔好。妳都受過嗰種苦，阿婆知妳苦、痛心妳。
[阿寶眼淚在流，但沒說一句話]
婆婆：阿婆知，阿婆知妳想貯多個錢。寶寶知道媽媽咁樣嚟為佢，如果佢有性呢，就
會怪自己唔好，要媽媽辛苦。病呢，唔係有錢先醫得好。最緊要有媽媽錫，寶
寶知道有媽媽錫，個病自然就會好。媽媽都要錫自己。嚟，婆婆比個觀音娘娘
妳陀住，消災解難，觀音娘娘保祐，保祐阿寶兩母子健健康康、平平安安。觀
音娘娘保祐咗阿婆幾廿年，好靈性㗎。[替阿寶帶上鍊]
[阿仔好像會睡醒]
婆婆：阿婆要走嘞，妳要錫自己，知嘛。寶寶，阿婆走嘞，聽日先嚟睇你吓。早餐，
攞住。
阿寶：婆婆走嘞，寶寶同婆婆拜拜嘞，謝謝婆婆啦。拜拜。
婆婆：寶寶乖嘞，拜拜嘞。
[婆婆拿出手帕抹抹眼角，出]
阿寶：[哼歌] 「願寶寶早點去睡 閉上眼進太空裡 我會抹去你的眼淚
那怕變化歲月裡 北風祇管呼呼吹 我也會抱你 吻你 身心裡
愛你是我的生趣 怎麼結果都心醉
無須負重任 催逼一生答謝 祇須講 Ma Ma I Love You」
[工頭起身，收起紙皮，沒拿紙袋，出]
[阿仔已醒，但因靚女未醒，唯有繼續坐著]
阿寶：阿仔。
阿仔：早晨，阿寶。
阿寶：你有媽媽嘛？
阿仔：有。
阿寶：媽媽錫唔錫你？
阿仔：錫，好錫。
阿寶：如果媽媽做埋啲污糟邋遢嘢賺錢，你會唔會嫌棄你媽媽？
阿仔：阿寶…..
阿寶：吓？會唔會呀？
阿仔：唔會。點都唔會。
阿寶：唔會就好嘞，唔會就好嘞。[又再哼歌]
[靚女醒]
靚女：早晨。
阿仔：早晨。
靚女：[把外套給阿仔] 唔該。
阿仔：唔洗。
靚女：行咯。
阿仔：去邊？
靚女：去銀行攞錢嘛。
阿仔：咁早，銀行未開門。
靚女：早？幾點呀而家？
阿仔：（望望外面）七點。
靚女：朝早七點？我無可能咁早起到身。
阿仔：夜晚七點你瞓得喺度，乞衣都唔得啦。
[工頭入]
靚女：吓？咁即係乞衣仲勁啲？
工頭：我地係露宿者，只係夜晚無屋企瞓嘅人，唔係嗰啲有手有腳但又無所事事，喺
街兩頭遊嘅廢柴，仲未洗同人乞。
靚女：[細聲問阿仔] 我係咪講錯嘢？
阿仔：好明顯。
工頭：我呀，衰到今時今日都未揸過兜、未問政府攞過一毫子。不過第時夠期攞生果
金我一定攞，咁好，成幾百蚊請你食生果。”笛”米都未夠，食生果，真攪笑。
批錯合同、揾錯地，閒閒地蝕幾廿億，人老咗就賤過地底泥。無銜頭、無碼頭
係輸蝕比人，認命、認命。老有所養，咪揾鬼養囉。[行遠]
阿仔：你去邊呀，工頭？
工頭：去揾番阿老細，我唔想一陣有人發現浮屍，啲記者走嚟訪問我，一世人上一次
頭條夠嘞。[出]
靚女：佢上個頭條？
阿仔：瞓得响度，唔簡單嘅。
靚女：好嘢，今晚有古仔聽。
阿仔：唔係好嘢㗎，無人會想再提再講，最好連諗都唔好諗。唔好諗。[感到可怕]
靚女：我係咪好微不足道？
阿仔：我都曾經以為自己喺十八層地獄。
靚女：其實呢？
阿仔：唔知。[打開婆婆放下的食物袋，拿出一隻紅雞蛋，感奇怪] 紅雞蛋？
靚女：比我，男仔唔食得隔夜蛋。
阿仔：重熱㗎。
[阿仔再從袋裡拿出一封利是]
靚女：咦，你周圍話比人聽你生日㗎？早知唔洗偷睇你身分證啦。
阿仔：生日？
靚女：又紅雞蛋、又利是，仲唔係知你生日？咩嘢人擺低㗎。
阿仔：從來都未見過。
靚女：未見過？
阿寶：係一個好好心地嘅婆婆，好好心地。
[阿仔望過去阿寶處]
阿仔：你識佢？
阿寶：識我嘅返而避咗我。
阿仔：[望到阿寶的鍊墜] 阿寶？[行近她] 妳個觀音……好靚。
阿寶：係呀，婆婆話保祐寶寶同媽媽。
[阿仔把觀音看仔細]
阿仔：個阿婆呢？佢行咗去邊呀，阿寶？
阿寶：佢喺度，佢咪觀音娘娘囉。
（阿仔向每一個角落走去）
阿仔：婆婆!!! 婆婆!!! 婆婆!!! 婆婆!!![走到台中] 婆婆，多謝妳!!!! 多謝妳封利是!!!![喘
著氣，趕緊把眼淚拭乾] 婆婆……婆婆!!! [走了去找婆婆]
靚女：咦~咁人地點呀？[無所事事便行近阿寶] 妳叫阿寶啊呵？
[阿寶點點頭]
靚女：妳同佢地好熟㗎？
[阿寶點點頭]
靚女：妳有無工做㗎？
阿寶：賣淫。
[靚女愕然]
靚女：妳，妳都有人買？
阿寶：我捱得、打得、點攪都得。有市有價。
靚女：妳個仔好乖喎，唔喊嘅。
阿寶：係呀，我寶寶好乖㗎，有媽媽錫，寶寶就會乖。
靚女：佢爸爸呢？
阿寶：寶寶好乖㗎，妳睇佢瞓得幾冧。
靚女：我都有爸爸㗎，不過唔知佢記唔記得自己有個女。
[有call 機響，但不是阿寶那部]
阿寶：寶寶，媽媽要開工，你要乖仔，媽媽好快就返。阿仔，你……[望不到阿仔]阿仔？
靚女：阿仔行開咗。
阿寶：麻煩你幫我睇住寶寶，唔該晒。你睇佢瞓得幾冧。我收工就即刻返嚟㗎嘞。唔
該晒。嗰度有奶粉同尿片。唔該晒。寶寶扭計妳就唱歌比佢聽，佢好鍾意聽歌，記得唱得好聽啲。寶寶乖，媽媽走嘞。[出]
靚女：賣嗰啲都咁早都有工開？（四周望望）邊度有奶粉同尿片呀？（看看寶寶，驚
慌掉開，掉了公仔入台側，但包著公仔的布掉在地上）咦!!!!公仔嚟嘅! 我估妳
係傻啫，點知真係傻嘅。
[傳來狗吠聲]
靚女：喂!!喂!! 狗仔唔咬得㗎。喂!!喂!! [追了出去]
[工頭和老細入]
工頭：掛住鬧人，瀨低份免費早餐。[拿過兩袋食物] 老細，你嘅。你下次咪行到咁遠
瞓，嘥我時間揾你。
老細：你都唔知海邊幾好瞓，好過開恆部三匹冷氣。以前一到夏天，我就將全屋冷氣
開到恆一恆，你知唔知我一個月要交幾錢電費。
工頭：咦？阿寶呢？咪口水多浪。阿寶好小咁早唔係响處瞓覺㗎。
老細：喂，你睇呢條係咪寶寶條巾。[拾起]
工頭：係喎，個寶寶呢？
[阿寶入]
阿寶：真係懵豬嘞媽媽，都無人call媽媽開工。寶寶，媽媽返嚟嘞。[望不見寶寶及靚
女] 寶寶？寶寶呢？？寶寶？[看到老細拿著寶寶的巾] 寶寶呢？你做乜攞走寶
寶張被？你想凍死寶寶。我寶寶呢？我寶寶呢？[搶過那條巾，四周圍找] 寶寶？
寶寶？媽媽返咗嚟嘞，寶寶呢？唔得匿埋，媽媽會好驚㗎。寶寶？寶寶？寶寶？
寶寶？[大叫]寶寶!!!!!! 媽媽返咗嚟嘞，寶寶…….
[工頭與老細也不知如何是好]
阿寶：寶寶呢？唔得匿埋，媽媽會好驚㗎! 寶寶!!! 媽媽返咗嚟嘞，寶寶…….媽媽唱歌，
媽媽唱歌比寶寶聽，寶寶乖。[唱] 「願寶寶早點去睡 閉上眼進太空裡
我會抹去你的眼淚 那怕變化歲月裡 北風祇管呼呼吹 我也會抱你
吻你 身心裡 愛你是我的生趣 怎麼結果都心醉
無須負重任 催逼一生答謝 祇須講 Ma Ma I Love You」寶寶…….
呀!!!! 比番寶寶我呀，寶寶!!!![ 一直四周圍找]
丈夫VO：對唔住，老婆。
阿寶：唔好呀，唔好呀。
丈夫VO：對唔住，老婆，我同個仔行先嘞。
阿寶：唔好呀，唔好呀。[追著，跳跌落台下，昏倒]
[工頭和老細大驚，追下去]
工頭：阿寶! 阿寶! 醒醒呀，阿寶!
老細：慢慢抬佢上去先再講。
[二人合力把阿寶抬回台上，阿寶死搾著寶寶那條巾]
工頭：阿寶! 阿寶! 醒醒呀，阿寶!
[靚女拿著公仔回]
靚女：做咩呀？
工頭：妳攞寶寶去邊鬼度，妳想嚇死阿寶咩!
老細：妳又係，好玩唔玩，攞人個仔去玩，想嚇死阿寶咩!
工頭：啲有個錢嘅零舍麻煩。
老細：阿寶已經夠慘，妳仲/
靚女：喂，好咯喎。我見到佢個寶寶夠嚇死喇，仲要同隻衰狗搏鬥至攞得返。隻手甩
咗我都幫佢整返啦，咁緊張就唔好擺低個仔比人，自己就走咗去。係咁緊張就
”咩”埋去返工。淨係得把口話錫，講咋嘛，容乜易。佢無咗個仔，我夠無媽媽
咯。佢顛嘅、佢窮嘅就可憐，你估我想做有錢女㗎，我夠想我父親大人係死窮
鬼，日日對住我，鬧我、打吓我、望吓我都好。我死呀，我真係去死呀，佢都
唔嚟望我一眼呀。
工頭：唉，真係無錢就顛，有錢就”臣”。咪嘈嘞，嗱嗱淋去買支藥油返嚟先。
老細：錢呢？
靚女：錢，我有。[拿一百元出來]
老細：點講都好，有錢係方便啲嘅。
工頭：仲講咁多，行啦。
老細：窮就講多句都比人鬧嘞。[出]
靚女：洗唔洗做人工呼吸呀？
[婆婆在前台行出，感覺上離工頭他們有點遠]
工頭：妳知唔知口水會唔會傳染愛滋？
靚女：血同血、性交……口水呢……吓，你有愛滋病？
工頭：好驚呀，驚就返屋企。
靚女：唔驚，我諗我無理由會同你上床啫。
工頭：你唔比我夜晚強姦妳。
靚女：你唔會嘅，雖然我都幾靚女。
阿仔VO：婆婆!!!! 婆婆!!!! 婆婆!!!!
[婆婆停一停，跟著急步走]
[阿仔跑入]
阿仔：婆婆!!!!
[婆婆一驚，跌倒]
阿仔：婆婆!!!! [趕緊扶起婆婆]
工頭：攞寶寶嚟。
靚女：我真係無心㗎。
工頭：得嘞、得嘞。（想拿過寶寶那條巾包好寶寶，但阿寶拿得很用力）喂，幫幫手。
[二人合力拿過那條巾，包好寶寶]
阿仔：婆婆，有無整親。
婆婆：無事，無事。
阿仔：估唔到朝朝放低啲早餐嘅人會係婆婆。
婆婆：婆婆想見吓你。見吓你我就安心。
阿仔：對唔住。阿爸同阿媽都好啊？
婆婆：好，好靜。
阿仔：婆婆……
婆婆：你知唔關你事，點解仲要走出嚟。
阿仔：我唔想再推卸責任。
婆婆：最緊要知錯，知錯就得嘞。你阿爸都係咁講，最緊要你知錯，知錯咪返屋企囉。
阿仔：婆婆，妳知唔知陳伯葬响邊？
婆婆：你又話知？陳師奶都話係陳生爭大耳窿/
阿仔：婆婆，我知。不過，我真係想拜吓陳伯。
婆婆：好，我幫你問吓陳師奶。
阿仔：唔該，婆婆。
婆婆：你會唔會同阿婆返屋企？
阿仔：我……我會返屋企，我一定會返屋企。
[老細拿藥油返]
老細：藥油、藥油。
工頭：快啲搽，講有鬼用。
老細：我搽？
工頭：搽油唔會傳染㗎。
老細：我有話驚傳染咩。
靚女：咦∼究竟邊個有病㗎。
[老細幫阿寶搽藥油]
阿寶：[微弱] 寶寶。
工頭：寶寶响處、寶寶响處。
阿寶：[立刻攬住寶寶] 寶寶，寶寶，嚇死媽媽、嚇死媽媽。寶寶乖、寶寶乖。
[靚女感動攬住阿寶]
[工頭和老細也感動]
[阿仔扶著婆婆，出]
[全劇完]
歡迎給予指正和意見或感想，先謝!