因原稿含香港字，所以劇本裡有很多問號，若感興趣，可電郵本人索取原稿作閱讀用。
務請尊重創作，謝謝!
不寫之迷 --------------------03/02/98
因原稿含香港字，所以劇本裡有很多問號，若感興趣，可電郵本人索取原稿作閱讀用。
務請尊重創作，謝謝!
不寫之迷 --------------------03/02/98
曾經是一位文采風流、有情有義的大作家-李思絮，不知何故擱筆多年，久久未有新作面世。
一位熱心記者，為解大作家不寫之迷，親往採訪 ; 在採訪過程當中得知該作家已死，
但卻在其家中遇到另一位性格完全相反的 爬格子動物-李老師。後於李老師和其助理口中
慢慢得知事情的真像。
場景:
全劇只得一幕、一景，在李老師的客廳。有書桌、書櫃、音響組合、電視、梳化、
電話，佈置整齊簡潔。
人物:
李老師 (男，中年。出口不饒人。心底深處隱藏傷痛)
助理 (男，約三十歲。對人隨和、有禮。和李感情深厚，但也喜歡和他頂嘴)
記者 (女，二十多歲。喜尋根問底，不易放棄)
小李、陳仔(收稿人) 送票人
--------------------------------------------------------------------------------
(李老師坐在書桌前寫稿，助理在旁看着)
助:(注視着稿件，驚訝狀) 嘩! 老師，乜你而家連碟評都寫埋 ?
李:(滿不在乎) 好出奇咩!
助:(奇怪地) 你聽流行曲嘅咩?
李: (不耐煩) 我*寫*樂評，識寫字就得喇，洗認真! 求其湊夠字數咪得囉，隻隻碟都聽 ?
哈 ! 對耳仲洗要 ! 十隻裏頭有八隻半係垃圾 !
助:(笑笑說) 喺你耳中，有咩唔係垃圾呀 !?
李:(惡) 大把好嘢 ! 不過啲 (望向助理)"垃圾" 唔識欣賞唧 ! (助理不以為然)
李:(按着肚，感不舒服) 哎，要去一去辦大事。(望向助理) 嗱，一陣阿小李嚟就比嗰份劇本佢，
(指一指) 左邊嗰份! 阿陳仔嚟就比右邊嗰份佢。 (助理望着劇本點頭) 識分左右未呀 ! 唏 !
(行了去)
助:(喃喃自語) 又唔寫個名喺封面度。左面比小李，右面比陳仔。唉，點解係唔叫人做李仔，
小李、小李，飛刀咩。
(門鐘響)
助:(往開門) (大聲地) 嚟。 (是小李)
小: 早晨 ! 老師呢 ?
助: 啊，去咗辦大事。
小: 哦 ! 又有大嘢搞，真係能者多勞 !
助: (暗笑) 呀......哈，係呀! 等等，我去攞份稿比你。(往拿稿)
小: 唔該哂! 助: (把稿交給小李) 嗱，呢份你嘅。
小: 麻煩哂! 咁我走先。
助: 好行! (關門。往梳化看雜誌)
(門鐘再響)
助: 今次梗係陳仔，攞定比佢先。(拿稿，往開門)
陳: 早晨，早晨! 老師呢?
助: 去咗辦大事。嗱，呢份你嘅。
陳: 呀!你真係醒目。唔該哂，咁我走先哪，同老師講聲電話聯絡。
助: 哦，拜拜。(關門。往梳化去) 搞掂哂!
(李出來)
李:(望望枱面，向助理問) 嚟攞哂嗱?
助: 係呀，陳仔啱啱走咋。
李: 唔。(往播音樂。跟着繼續寫作) (向助理道) 幫我去買包煙。
助: 哦。
李: 咪又買錯呀!
助: 金色嗰隻吖嘛。
李:(惡)綠色呀! 色盲!
助: 係哪! 唔洗咁勞氣。(細聲) 買錯你咪一樣食哂。
李: 又講咩呀你!
助: 無嘢，無嘢。重有冇其他嘢買?
李: 冇咩你咪買咩囉，吓吓要我叫。
助: 哦。(出門) (李繼續寫作)
(門鐘響。但李不理。過了一會門鐘仍在響)
李: (往開門) 邊鬼個! 梗係隻死仔包又唔記得帶鎖匙。
(門開，見到是個女子[記者]，大力關門，行往梳化) (門鐘再響不停，李萬不情願往開門)
李: (不客氣) 你唔好再噤我門鐘呀下，我報警㗎 !
記: (把握機會說)早晨! 我想搵李思絮先生呀。佢喺度嘛 ?
李: (惡) 無呀 ! 無屎水呀 ! (大力關門)
記: (想追問)哎! (不忿氣，看看手上的地址，望望門牌) 無錯呀，係呢度喎。
就算真係搵錯都唔洗咁惡下嘛 !
(李回書枱，但沒有繼續寫作。若有所思)
(助理剛剛回來，拿着兩大袋)
助: 咦 ? 你搵邊位呀 ? (記者回頭)
記: 你好呀! (拿出証件) 我係大報記者，我想搵姓李㗎。
助: (沒有看証件) 哦 ! 你搵老師。
記: 係呀 ! 李思絮老師呀。
助: (驚愕) 嘩 ! 你搵呢個名......
記: 係呀。我想搵李先生做個專題訪問。我好鍾意佢寫嘅嘢㗎! 不過好耐 都唔見佢有新作，
所以好想訪問吓佢，點解突然間冇哂作品出版。
助:(猶疑地) 唔......(面有難色)如果你搵嗰個李生，我就勸你請回哪！
記:(不明白) 哦，點解?
助: 唉，好複雜 ! 總而言之，你搵李思絮先生呢，就請回啦。(想一想) 唔，如果搵李老師，
即管可以幫你通傳吓。
記: 哦? 李老師......(想一想) 都好喎! 助: 咁你喺度等等。
記: 麻煩哂!
(助理開門入內。李聽到開門聲時便裝作寫稿) (拿煙給李)
李:(望一望) 終於都買啱。(點煙) (助理偷笑)
李: 嘩! 你買咁大袋乜呀?
助: 嘻! 乜色都買哂，包無錯!
李: 哼! 冇你修! (助理放低兩袋)
助:(向老師道) 出面有個女仔搵你喎。
李:(不屑) 嚏! 佢搵我咩! 佢搵死鬼咗嗰個!
助: 唔係呀，佢話搵李老師喎。 李: 唔得閒呀! 唔好煩我!
助: 你唔得閒咪等我招呼佢囉，靚女嚟喎。
李:(惡)你想識人就出聲 ! 咪鬼搵我過橋 ! 要訪問就叫佢預約，鍾意幾時嚟就幾時嚟，無規無矩!
助:(細聲) 你心想就想喇，*彫橋扭擰*!
李: 你又講咩呀死仔 ! 我未聾呀 ! 唔想我聽到就喺心諗好嘞 !
(助理停了一會，雙目流轉) 李: 哼 !
助: 咁喇，比佢入嚟先，睇佢有冇誠意囉。
李: 哼 ! 助: 嗱，咁我去開門㗎哪。
李: 哼 !
(電話響，李接。助理往開門)
李: 喂! 我係。...... 哦，小李，點呀? ...... (助理正招呼記者入內)
哦...... 哦...... (眼癘着助理) 無搞錯，係，係。我知你地人少，
喀，角色多咪 諗住等佢地有更多機會發揮囉。...... 係嘞，
一人兼飾幾角，夠哂特色呀! ......哈哈! 係呀，啱㗎哪。......
咁先考演技 ! ...... 哈哈! ...... 係，係。冇寫佈景?哦，係呀，
你又冇講有冇budget。嗱， 有嘅，咪搭個兩層旋轉舞台囉。
如果冇，咪淨係掛塊黑布算囉，一樣有特色㗎。
(略為認真)啲人去睇戲，唔係去睇佈景!...... 係啦，有問題再搵我
喇。...... 好，好。(掛線) (望向助理)
助: 隨便坐呀。
(記者坐在梳化)
記: 好呀。(四處張望)
(記者留心聽着李講電話)
(助理看着記者)
助: (推一推記者) 喂!
(記者回過頭來)
記: 吓?
助: 你點稱呼呀?
記: 吓? (心不在言)?我卡片。
(助理接過)
李: (手指着助理) 你個死仔包!/(電話又響) 喂! ...... 係! 點呀，陳仔。...... 哦，唔妥? 咩唔妥? ......
得四個角色? (眼癘着助理) (助理走過老師身旁) 係呀，唔好咩? ......係，係，我知你地人多 ......
係囉，我幫你地諗好哂 㗎嘞，嗱，分開兩組演員做，唔同演員就做相同角色 ...... 係呀，夠哂
綽頭呀! ...... 喀，係囉，...... 喀，到時如果啲觀眾兩組演員都鍾意，咪 要睇兩次囉! ...... 係呀，
明益你! ...... 係呀，得啦，我話得就得啦。 有問題再搵我啦。...... 好好，係咁喇! (掛線)
(癘着助理) (起身。語氣極 惡) 你個死仔 ! 幾時至識分左右呀你 ! 好彩我有急才 !
都唔明點解 我會請你，你再比鑊我孭呢就炒鬼咗你個死仔包 !
助:(漫不經意) 你去邊度搵個頂得你順嘅人吖，係我咁抵得諗唧 !
李: 魽A你個死仔 ! (望到記者行近)
記: 老師你好!
李: (極不友善) 哼! 同你好熟呀!
記: (感尷尬) 呀，李老師，有冇時間 ? 可以同你做個訪問嘛?
李: (不屑) 好忙 ! 冇時間 ! (坐回書枱前)
助: (向記者說) 哎，咪理佢。不如你訪問我吖? (回梳化坐) 嗱，寫番個 "李老師助理專訪" 吖!
記: 呀......(猶疑)
助: 過嚟吖! (招手) 過嚟呢便坐呀!
記: 唔...... 都好。(往梳化去)
(電話又響)
李: (不滿) 電話又唔聽，都唔知乜嘢叫助理 ! (拿起聽筒)
(記者拿出筆記本，預備訪問助理，但又想聽老師講電話)
李: 喂! ...... 係，...... 張生，好耐冇見喎! 咩貴幹? ...... 呀，我未寫過電影劇 本喎。 ...... 哦，
我有乜所謂，你要比錢我洗，阻唔到你㗎! ...... 哈哈! 講 笑講笑。不過咁，我勸你就咪用
我個名出，最好就話係呀邊個邊個嘅遺 作。你知喇，有時啲嘢，死咗先至馨香! 唔......用
王炳喇。......信 我，一定冇衰。......唔，記得落訂先呀! ...... 好，你一陣搵人攞過嚟? ...得啦。
係咪寫乜都得? ... 唔，好! 一言為定。 (掛線) (向助理喝道) 死仔包，過嚟!
助: 哦。(行去書枱)
李: (不太大聲) 幫我去搵呀王炳老婆個地址同電話嚟。
助: 愛嚟做乜?
李: (惡) 多事! 叫你去就去喇!
助: 哦。(入內)
(記者行往老師處)
記: 李老師，你都好忙喎。
李:(不友善) 知人忙，就唔好係度阻住哂 !
記: 但係見你咁忙，又唔見你有新作出嘅 ?
李: 而家叫做訪問呀 ? 有冇誠意呀你 !
記: 咁當傾閒計囉。
李: 有乜好傾 ! 咁鍾意同人傾計就去做173! (記者覺激氣，但敢怒不敢言)
(助理入，拿着地址)
助: 嗱，王太個地址。
李:(看一看) 唔。
助: 要嚟做乜?
李: (惡) 多事! 好得閒，冇嘢做!
助: 呀。(轉身。向記者說) 我地繼續吖?
記: 唔，好呀。 (兩人再往梳化去)
李:(按著肚) 又嚟! 死仔包，你今朝比瀉葯我食呀 ! (起身去洗手間)
助: 唉，姓賴!
記: 咦， 啲音樂幾好聽喎。
助: 係呀，咩伊咩安鍾斯，豎琴, High Class !
記: 李老師鍾意呢類音樂?
助: 係呀，佢至鍾意。有時又播吓Phantom呀，任白呀，咩鬼協奏曲。
記: 佢唔聽流行曲㗎 ?
助: 好少。(想一想) 唔，都有嘅。
記: 例如呢?
助: 阿...(停) 唉，都係咪講嘞。一陣你地又唔知會唔會寫 : 李老師話香 港樂壇得阿邊個邊個
識唱歌，有水準，其他啲全部係垃圾 !
記: 哦? 佢咁講過咩 ?
助: 嗱，我冇話呀，譬如咋。
記: 好，好! 咁問過第二個問題。我見老師寫好多嘢，但係又唔覺佢有新作面世嘅?
助: 有呀! 專欄、小說、散文、劇本、碟評都寫埋 !
記: 係咩? 有咩? 呢幾年我都冇見過有李思絮有作品出版噃。
助:(緊張，望一望李出來沒有) 哎呀，都話唔好講嗰個名咯!
記: 點解?
助: 你唔想比人烹扯呢，就唔好再提呢個名 !
記: 點解 ?
助: 哎吔，乜你咁打爛沙盆㗎! 問吓我嘅嘢喇。
記: (猶疑) 咁...你做咗李老師助理幾耐 ?
助: 嘩，好耐咯... 耐到唔係好記得。
記：咁即係，你同李老師好熟嗰咯喎？
助：當然喇! 直頭可以幫佢寫自傳!
記: 哦，咁點解 ......
助: 哎! 嗱，咪再問嗰個問題呀吓!
(李入)
李:(望一望記者) 仲唔捨得扯! 你*呢亭*人面皮都幾厚!
記: 乜有面皮薄嘅記者嘅咩?
李: 哼! (轉向助理) 死仔，本地圖呢?
助:(感奇怪，起身) 地圖? (誇張) 你出街?
李:(惡) 唔得呀!
助: 得，得! (於書枱的抽屜拿出地圖) 嗱。
(李接過，跟着查看王太的地址)
李: 呢度去沙田，遠唔遠?
助: 好近唧。搭的士一百蚊有找。
李: 唔。
(記者上前)
記: 我有車呀，我車你去吖?
李: (惡) 關你鬼事! (記者忍住不發怒)
助: 你真係一個人去?
李: 唔得呀 ! 你驚我蕩失 !
助: 唔係，你自己知自己事啦。
李: 哼，最多咪的士去的士返 !
助: 我同你去啦。
李: 唔洗，費事你又搞鬼錯哂 !
助: 好心着雷劈。
李:(搵東西) 見唔見我本支票部。
助:(於書枱的另一個抽屜拿出支票部) 嗱。
李: 唔。(簽支票) 我出一出去，一陣張生會搵人送張支票嚟，你幫我收咗佢，得閒就幫我攞
去入咗佢。
助: 你唔洗睇吓啱唔啱數先 ?
李: 得喇，睇唔睇都係咁㗎喇。(袋好支票) 我行嘞。
助: 帶身份証，帶銀包。(李袋好銀包)喂，煙呀。
李: (接過煙) 唔。(望一望記者) 傾飽好烹佢扯!
助:(往開門) 得嘞。你睇路，小心呀!
李: 得嘞，得嘞。
(李出，助理關好門回梳化)
助: (自言自語) 咩咁緊要，竟然出街。 (記者也往梳化坐下)
記: 佢唔出街㗎?
助: 好耐冇咯。除咗有朋友過身，要去送喪之外，老師就只會留喺屋企，寫呀寫。
一係就聽吓音樂，睇吓報紙、電視呀咁。有咩需要咪叫我 去買、去做。
記: 成日留喺屋企度，邊度搵咁多題材、邊度搵靈感寫嘢 ? 咪脫哂節 ?
助: 哈! 好耐以前我都咁問過佢。佢話(學老師的語氣):" 好事不出門，醜 事傳千里。
就算我唔出去周圍逛、周圍八，咪一樣知道世界大事、八卦 新聞! 有電視、有報紙、
有收音機。有咩我唔知呀 ! 你知啲嘢咪又係喺 嗰度嚟 !" 咁又啱喎，唔通件件事都要
親身經歷咩 !
記:(苦笑) 聽落又好似懶有道理......呀，咁點解你又會頂得佢順嘅 ?
助:(不明) 唔 ? 咩意思 ?
記: 佢好 "啷嚟" 吓喎，你唔覺嘅咩 ?
助: 哦 ! 噓，慣喇。佢得把死人聲嘅唧。係咁衰㗎，永冇話好聲好氣同人講嘢， 不過......
記: 唔?
助:(笑) 好多嘢，唔洗講明講白嘅。
記: 唔明...... 助: 佢都冇要求過其他人明白佢。
記: 都係唔明......
助: 明嚟做乜 ? 你諗住同佢做人世 ?
記: 梗係唔係...... (疑問) 但係，如果佢就係李思絮，冇理由係咁㗎......
助: 哦 ? 咁應該係點 ?
記: 我記得，喺我讀書嗰陣，唔鍾意睇小說，但係有一次，有個同學話比我聽有本書好正，
唔係講情情塔塔，唔係無病呻吟。題材好新、好特別， 有嘢想講嗰種呢 ! 我見佢講到咁正，
咪即管攞嚟睇睇 。(少許誇張) 嘩 ! 真係不得了，簡直愛不釋手。 之後，所有李思絮嘅書、
散文、專 欄、劇作我都唔會錯過。(稍停) 直到我畢業，做咗記者......我慢慢發覺再搵唔到佢
寫嘅任何文章，真係乜都冇哂 ! 連專欄都冇埋。
(助理苦笑)
記: 卒之就比我搵到嚟呢度。我真係好想知道佢擱筆嘅原因...... 你知嘛，
從來未試過有作家令到我咁感動㗎 ! 我諗都唔諗就嚟到呢度， 點知......
助:(打斷記者的話) 咁究竟喺你印象中嘅李思絮係點嘅呢?
記: 唔......好正路、好有理想，唔會嘩眾取寵，唔會用啲無稜兩可嘅理論嚟扮高深，
(微笑)有情有義。重有，佢文筆好好，用字靚得嚟唔做作， 每一篇新嘅作品都比到你
新?鼤 感受。逢親佢編嘅劇我一定會捧場，佢寫 嗰啲同而家嗰啲好唔同㗎!
(嘆氣) 如果佢真係唔再寫就太可惜嘞。
助:(有感而發) 若果佢知道曾經有人咁喜歡佢，佢一定會好開心。
記:(疑問) 你識得李思絮 ?
助:(傻笑掩飾) 哈! 呀...... 都可以咁講嘅。(記者想發問) 不過你唔好問 我，我答你唔倒。
記: 你乜都話答我唔倒，咁點算訪問呀?
助: 你好似冇問過我嘅嘢喎......
記: 哎吔! 咁李老師助理訪問，更係問好多李老師嘅嘢㗎喇。
助: 但係，你好似問緊第二個李，唔係呢個李喎!
記: (狡猾一笑) 我相信其中一定有關連。
助: (不置可否) 哈，你要咁諗我都冇辦法。
記: 嗱，(挨近助理) 趁老師而家唔喺度，講啲李思絮嘅嘢比我聽吖 ! 我真 係好想知呀。
(助理感為難)
記: 呢件事 *哽* 咗係我心好耐嘞。有乜理由寫得好地地會乜都冇哂 !
助:(感慨) 唔係乜都冇哂...... 只不過係，乜都唔同哂。
記: 唔同哂?
助:(嘆氣) 唔......(苦笑)食多咗煙、出少咗街、睇少咗戲、講少咗嘢、鬧多咗人，
(稍為認真) 唔再見到面上有笑容，亦忘記咗開心應該係點。真 誠原來係奢侈品，
冷漠對人先至能夠保護到自己。封鎖所有嘅情感，生 活就會過得輕鬆。
記:(聽得傻了) 你...冇嘢吖嘛?
助:(苦笑) 我都話咗你唔會明㗎啦。
記: 似乎，你又好明佢咁喎。
助:(搖頭) 哼... 佢從來冇要求過其他人明白佢...或者應該話，佢從來冇 *需要*過其他人明白佢... 唔，
其實可能係，佢*唔想*有人明白佢。
記: (不明) 喂 ! 你真係知你自己講緊乜 ?
助: 唔。(笑笑說) 我有講嘢咩 ?
記: 呀 ! 我有種比人玩緊嘅感覺 !
助: 嘩 ! 乜咁講呀 ?
記: 唔係咩 ? 一係就乜都唔知，一係就答非所問 !
助:(笑) 你觸覺太唔敏銳嘞。你做咗記者幾耐?
記: 呀......掉返轉頭，你訪問我呀?
助: 哈 ! 我一路都叫你問我嘢㗎，係你唔問咋。
記: 唉。我想知嗰啲你又唔講!
助:(想一想，淡淡然道) 你咪當佢死咗囉。
記: 點當呀? 我相信佢重喺度㗎。
助: 相信?
記: 我肯定佢喺度!
助: 肯定 ? (苦笑) 世界上有咩係可以肯定㗎 ? 何況大家肯定嘅嘢都唔同。你肯定一個死咗嘅人未死 ;
我肯定一個在生嘅人不在生。
記:(呆了一會) 我 . . . 我開始對你另眼相看。
助:(笑) 哈 ! 我地呢啲，點都有小小技量用嚟氹女仔嘅!
記: 你有冇寫嘢㗎?
助: 唔...寫嘢 ? (點頭) 曾經，不過好耐冇咯。
記: 咁，有冇發表過 ?
助: 唔...曾經。
記: 筆名係咩呢 ?
助:(認真地) 李思絮!
記:(想了一會) 咪玩喇，你咁後生。
助: 哈哈! 唔信算!
(電話響。助理往接)
助: 喂。係...哦，(客氣)佢未返到喎。係，係。...好呀，佢返嚟我幫你同 佢講聲。... 喀，
得喇得喇... 我會㗎嘞。唔，唔... 好好，再見再見。 (掛線) (笑一笑，轉身回梳化。輕聲道)
又去做善事。
記:(不明) 唔?
助: 冇嘢。
記: 又唔講得㗎?
助:(笑) 又唔係醜聞，講比你聽都冇新聞價值。 (記者正想反駁，但門鐘響)
助: 咁快? (往開門。原來是送支票來)
票: 比李老師㗎，唔該簽簽收。
助: 好。(接過) 你等等。(往簽名。給回收條送票人) 唔該哂 ! 拜拜。
(關門。跟著看一看支票，放在書桌抽屜內)
助:(望向記者) 呀，你嚟咗咁耐都唔記得問你飲唔飲茶 ?
記: 唔洗嘞。
助: 順便咋。我去沖定壺茶，老師應該就返。
記: 哦，咁是旦啦。
助: 咁你等陣。 (記者點頭。助理出)
(記者往書櫃去)
記:(看著櫃內的書。疑惑) 真係一本李思絮嘅書都冇喎。唔通真係我搞錯 ? 激氣，
無喇喇比人噴到一面屁 !(拿出其中一本翻閱)
(門鐘響)
助:(大聲地) 唔該幫我開開門呀。應該係老師返嚟，佢好似冇帶鎖匙。
記:(回應) 好呀! (記者往開門，手拿着一本書)
(果然是老師回來)
李:(入內，但沒有望是誰開門) 提人帶銀包，又唔提人帶鎖匙，你出左去我咪 冇門口入!
(望一望，原來是記者) (惡) 乜你重未捨得扯! (望到本書) (拿回) 你好冇規矩!
(助理入。拿着杯盤)
助: 返嚟嗱。
李:(惡) 好好傾呀? 隻嘢重喺度。
助: 咪嘢嘢聲啦。(遞上茶) 飲茶，小心熱。
李: 唔。放低先。有冇人搵過我? (坐回書枱前)
(助理放低茶。另外一杯遞給記者)
助: 張生使人送咗支票嚟。同埋王太打過電話嚟。
李: 有冇特別嘢講低 ? 助:(笑一笑) 佢話你做乜咁傻。
李:(淡然一笑) 哼。(稍停) 張票呢? (助理從抽屜拿出來，李沒有拿來看) 幫我攞去入咗佢，
順便帶埋隻 "人" 扯。
助: 哦。(拿出數部記錄跟著袋好支票) (望向記者) 你......
記: 呀。我想飲埋杯茶先。
(助理笑一笑，開門出去)
記:(行往李處) 李老師，啲音樂好好聽呀。
李:(望也不望記者一眼) 哼!
記:(繼續) 豎琴嘅聲音，比人一種置身於希臘神話裏頭嘅感覺。 (李斜望記者一眼)
記:(見對了口味，繼續) 唔知有冇一首曲係關於神話故事嘅呢?
李:(仍沒有望記者，冷冷地) 想知就自己去查。
記:(緩慢地說) 想知就自己去查...... ，咁都要有途徑去查之得㗎。 (李不作回應)
記:(繼續) 正如我想知道 "李思絮" 點解唔再寫作/(比李打斷)
李:(非常惡) 收聲 !
記:(繼續) 點解 ? 點解你咁憎聽到呢個名 ?
李:(怒目相向) 咁點解你又成日提住呢個名 ?
記:(認真) 因為我崇拜佢，我唔想佢消失 !
李:(凌厲) 就因為你唔想佢消失，佢就要留喺呢個討厭嘅地方 ?!
記:(想一想) 除咗我之外，仲有好多喜歡佢嘅讀者!
李:(冷笑) 係咩 ? 由佢終結自己寫作生命嗰一刻開始到而家，佢一封讀者來信都冇收過。
你能夠代表幾多人呀? (稍停) 而家香港冇作家、冇書 出、冇戲睇咩 ? 冇一個李屎水，
仲有大把識寫字嘅人!(行往書架) 要心 靈慰藉咩 ?(拿出一本書)有!(擲向地)要愛情咩?
(拿出兩本書)多到你 唔要! (擲向地) (行往記者處)武打、科幻、哲學理論，要咩題材有咩題材。只要你地班 "讀者" 喜歡 !
(冷笑) 哼，跟住我就會寫EQ、AQ、 MQ、孖Q、塔羅牌的奧秘 ，金融心湯 ! (鄙視的笑) 你地要吖嘛 !
記:(肯定地) 有，我有。每年佢生日、聖誕、新年我都有寫信同寄賀卡比佢。雖然未試過有
回覆 ，但係我從來都無忘記過。
李:(態度仍是很差) 寄去出版社 ?
記:(點頭) 唔係可以寄去邊 ?
李: 哼! (一口氣) 你認為嗰啲文化商人真係會將你地呢啲熱情讀者嘅來信，轉交比一個已經
毫無利用價值，甚至唔存在喺佢地世界裡頭嘅所謂 作家咩?
記: 唔會嘅咩 ?
李:(冷笑) 你好似做記者個可 ? 啱啱入行 ? (搖頭) 轉行喇!
記:(苦笑) 哈，我都有咁諗過。
李: 咁好快嘞，趁你仲咁天真。
記: 天真 ?
李: 唔天真，又點會鍾意嗰個屎水作家 ?!
記:(認真) 佢喺我心目中係好好㗎 !
李:(冷笑) 好...... 好......(苦笑) (記者望著李一會，略有所感)
記:(唸一段文) 傷痛往事誰沒有，但淚落後換不到歡欣逗留。心若已碎，哭不會醉。歲月悠悠，一切如舊。 (李一呆)
記:(繼續) 星掛在天，天還是遠。心仍留戀，戀那會完。 風依然有，露濕了街頭。夢常夢見，
你倚在身邊。 (李望向記者)
記: 風難留、自愛自重、天秤上的父子、流離失所、一點鄉情、 強化生命、心安理得、
由空白開始、世界原來沒終站/ (比李喝停)
李:(激動)夠嘞，夠嘞 !你想搵嗰個專寫人性、親情、民族大義、保家衞國、世界大同、
禮義廉恥、諸如此類無謂題材嘅屎水作家已經死咗好耐 ! 而家企喺你面前呢個係發錢寒嘅寫字機器，專寫低級趣味、
三級笑話、 婚外情、三角戀、金錢糾葛、警匪槍戰、亡命英雄。
(稍停) 話你知， 啲人鍾意睇書睇戲，係因為想睇一啲假嘅人生。
(冷笑) 人生如戲 ? 傻喇! 幾時會有王子錫得醒公主 ? 三十樓跳落嚟唔死得 ? 個個乞兒背後都有
故事 ? 天長地久，等你成世 ? 次次偷食都比老婆捉到 ? 你有冇 見過恐龍週街行 ? 又有冇遇過外
星人 ? (冷笑) 哼 ! 根本個世界就唔 係咁。
(語氣更重，步步逼向記者) 七、八十歲重要瞓街 ; 殉情自殺 ? 唔 好講笑 ! 男有男偷食就女有
女勾佬 ; 感冒、aids、cancer都未醫得 好，講咩探索外太空 ; 香港人唔鍾意過九龍、九龍人唔
鍾意入新界、新 界人都未必鍾意返深圳喇，世界大同 ! 哼 !
當你鋪緊草皮嘅時候，有 冇諗過嗰啲錢可以助養幾多個孤兒 ? 食大餐嗰陣有冇諗過非洲啲飢民 ?
著皮草嘅時候會唔會 悼念嗰啲為件衫而死嘅動物 ? 一味睇書睇戲，你得 到啲乜呀 ?
(退至牆角)
記:(激動) 咁點解你唔再寫 ? 點解連你都放棄 ?
李: 我 ? (囂張地)我寫緊銀紙，唔係寫緊垃圾!(行遠)
記:(怒) 咁一味睇你嗰啲銀紙文章，我地又會得到啲乜呀?
李: 呵呵呵 !(沒有望記者) 真好笑，你地得到啲乜關我咩事 ? 我冇搵支槍 指住要你地買要
你地睇。選擇權係你地班友仔度。個個要揀銀紙唔愛垃 圾，我冇計㗎!係啲垃圾冇生存
價值咋。
記:(搖著頭) 唔係咁㗎，唔係咁㗎。
李: 唔係咁㗎 ? 係咩價 ? 任何人都有個價，文章亦有個價。但係， *垃圾* 就無價。
記: 嗰啲唔係垃圾 !
李: 咁你要當垃圾係寶，冇問題嘅。有邊個唔係一屋垃圾 !
記: 我知道你就係李思絮 !
李: 哼 ! 你又真係知道幾多嘢，連我自己唔知嘅你都可以咁肯定。哈，如果你
真係咁想搵嗰 個屎水作家做訪問，好，我比個地址你去搵佢。
記: 邊度 ?
(李寫地址給記者)
李: 嗱，三婆問米。你咁鍾意搵佢，試吓，幾*靈*㗎。(冷笑)
記:(沒有接，嬲怒) 點解要咁 ?
李: 你要同個死人做訪問嘛 ! 咪試吓囉。喂 ! 問米做訪問，夠哂綽頭呀! 實做封面。
記:(怒) 我有原則㗎。唔會作一啲不盡不實嘅報導 !
李: 咁你一定係賺錢買花帶，唔驚比人炒。
記: 你認為物質上嘅滿足同精神上嘅滿足係等同 ?
李:(誇張) 梗係唔係 ! 精神滿足值幾多錢 ? 食得飽 ? 着得暖 ? 到你精 神滿足嘅時候，
睇怕你都喺精神病院。嗰陣就真係唔憂食唔憂住。 (稍停) 小妹妹，等你做多幾年人，
先至再考慮吓去唔去訪問一個不識時 務、不能隨俗嘅屎水作家喇。你太過超現實 !
記: 你覺得幾年後我就會訪問嗰啲好似你咁嘅寫字機器 ?
李:(冷笑) 如果你冇比人炒的話。
(助理回來。拿着幾袋餸)
助:(望一望記者) 咦，重未走? 食唔食埋飯? 今晚整炒鮮魷。
李: 哈! 好。記得豉椒炒! (行了入房)
助: (望着記者) 做乜嬲爆爆 ?
記: 點解你可以喺度做。
助: 點解唔可以 ?
記:(感無奈) 理想同現實分別可以咁大 !
助:(輕笑) 理想同現實你又睇得有幾真 ?
記:(嘆氣) 我寧願相信你先係李思絮。
助:(笑) 我一早話咗我係㗎，你唔信咋。
記:(嘆氣) 唉，咪玩喇。好激氣呀 ! (助理不明)
記:(深呼吸) 我好似同人嗌完交。
助:(仍是不明) 好似?
記: 好似。(想一想) 又唔係好似......
助: 嬲到語無倫次 ?
記:(再嘆氣) 諗諗吓佢講嘅嘢又好似幾有道理......
助: 佢 ? 老師 ?
(記者點頭)
記:(大叫) 係嘞 ! 佢喺度講緊反話 !!
(助理還是不明)
記: 佢口口聲聲話嗰啲係垃圾，話我將垃圾當寶。其實係佢自己! 佢先至係垃圾當寶 !
助:(開始明白，輕笑) 佢口中嘅垃圾，有兩個定義。
記: 唔?
助:(認真) 真正嘅垃圾，同普遍人眼中嘅垃圾 。
(到記者不大明白)
助:(沒有解釋) 呀，係喎，頭先你地傾咗咁耐，有冇錄到音 ?
記: 哎吔，冇呀 !
助:(搖頭) 嘥哂 ! 一定好精彩 ! (稍停)(苦笑) 佢都係時候要有小小衝擊。
記: 衝擊 ?
助:(點頭) 一路以嚟都太平靜，一啲漣漪都冇。交行貨嘅次數愈多，脾氣就愈差。
記: 咁點解要交行貨 ?
助: 啲人鍾意睇行貨，佢咪交行貨囉。
(李在房內突然大叫，很大聲及痛苦的)
李: 呀!!! (兩人嚇一跳)
記:(驚詫) 咩事 ?
助:(立即拉著記者的手，往門口去) 你走先，有機會再搵你嚟做過訪問。
記:(疑惑) 咩事唧 ?
李:(再嗌) 呀!!!
助: 今次你一定要走。
記: 點解喎 ? 做乜嘢呀 ?
助: 總而言之，我遲啲搵你。ok ?
(助理推了記者出門，關門)
(助理跟著急步入房內)
(記者沒有離開，在門外竊聽)
(助理扶李出來往梳化坐。李樣子很悲傷，面有淚痕)
助:(語氣溫柔) 忘記唔到，咪*由*佢留番喺度。何必逼得自己咁辛苦。
李:(語氣軟弱無力，傷心地) 我...我唔想忘記，但係記番嘅時候 (按着心) 又好痛。
佢重喺度，係我一直自己呃緊自己......
助: 係，仲呃哂其他人。嗱，既然個包袱係咁重，你又唔捨得丟，咪放低一陣先。
到有力嘅時候先再孭番起佢，或者到時你又*躉*得低呢。
李:(捉緊助理的手) 佢死咗㗎嘞，佢唔存在。(抬頭問) 呵? (助理點點頭)
李: 但係佢想返嚟呀。佢想證明佢冇放棄過。
助: 要證明比邊個睇 ? 證明嘅過程係會令人咁痛苦的話，又何必勉強自己呢 ?
李:(痛苦狀) 點解會咁樣 ? 點解會變成咁 ?
助: 你唔想咁樣咩 ?
(李惘然)
助:(扶起李) 嚟。過嚟書枱呢便。
(李坐回書枱前)
助: 揸番起支筆，想寫乜就寫乜，唔需要理其他人鍾唔鍾意，淨係為咗自己。
(李揸起筆，瞌上了眼。跟著伏了在枱上，助理掃著他的背)
(門鐘響。助理定一定神，跟著往開門) (門外的是記者)
助: 哦，又係你 ?
(記者望著助理，眼神中充滿疑惑)
(李正慢慢抬起頭來，伸個懶腰。神情如往常般)
李:(叫) 死仔包，煮好飯未 ?
(助理向記者微微一笑，轉身)
助:(亦如往常般) 嚟--! 好餓咩你!
(記者呆立在門外，不明所以)
全劇完
--------------------------------------------------------------------------------
歡迎給予指正和意見或感想，先謝! 