劃過晴星 依奧 (15/3/2000)
故事：
身患絕症，命不久矣，在剩餘的生命裡可以做些甚麼？可以用一個怎麼樣的態度來對待生命？
除了自己，我們曾否花時間關心身邊周圍的人和事？若然世上真有晴星，幸福定在不遠處。人物：
孫晴 ：三十多四十歲，心臟病人，瘦削、蒼白，但樂天知命，積極面對短暫人生。
梁韋悟：晴的主治醫生，三十多歲，樸實、俊朗，但愛皺眉。
林可天：住院病患，冷豔，說話惹人厭，很多人追求。愛看星，已四十歲。
老婆婆：七十多歲，持枵杖，常到醫院輪街症。還有：數名護士，風景王，男朋友，律師。
(台上是可天的病房，內有一支觀星望遠鏡。台右是梁醫生的診症室，只需辦公桌及兩張椅子，
近台右出入口處放一白色屏風。可天的病房外可用一個活動透明幕作間場。背景純白色，
可以打星圖於上。場中預設能以人手拉動之白布幕。)(可天已睡在病房內。)
(晴揹著老婆婆入)
(晴身穿白襯衫近腹部位置有墨汁漬;老婆婆手拿拐杖)
(二人行至台中)
婆：得囉，得囉，放低我啦後生仔，呢段路阿婆自己行得過囉，睇你呀，成頭汗o勒﹗
晴：唔緊要，幾步路就到。
婆：呀，諗住話轉間醫院輪街症，點估到會遇到你D咁好心地o既後生仔。
晴：小意思。
婆：哎，真係到o勒。
晴：哦。(慢慢放下婆婆。)
婆：辛苦晒你o勒，後生仔。
晴：乜說話﹗
(婆看到晴的襯衫有一片墨汁漬)
婆：哈，你梗係單身寡仔。
晴：咦？婆婆你識睇相o架？
婆：睇你件衫，咁大撻墨汁漬就知你屋企無個女人當家啦。
晴：哦，唔關事，頭先我抱個小朋友落巴士，點知佢個墨盒漏墨，揩倒D。
婆：哈，你又真係幾肯幫人喎。
晴：舉手之勞，無咩話幫唔幫。
(傳來一陣貓叫聲)
婆：哎呀，大吉利是，大吉利是!
晴：做咩呀婆？
婆：o個'恕'頭先有隻黑貓閃過呀，大吉利是!大吉利是!今日實行衰運。
晴：咁妳放心得o勒，婆婆，黑貓見到我先行衰運。
婆：乜解究呀?
晴：我黑到無得再黑，功力高佢幾倍。哎呀，話口未完，真係比個鐵絲網"CLICK"住左，
(趕去救貓)婆婆，我唔送妳o勒﹗(出)
婆：(望著晴離去)咁o既人都有o既，都唔知係咪撚化呀婆，(邊行邊說)不過，咁好心地
o既後生都無乜幾多個咯。(出)(護士，拿著FILE入)
護：晴先生，你又遲到，梁醫生就淨係等你一個得啦﹗(聽不見回應，轉頭又看不到人)
晴先生？!
(晴跑入)
晴：哈，幫個大肚婆'禁'住部LIFT，嘩佢個肚大到呢，可能係三胞胎。
護：唉……真係無你修，我唔陪你去梁醫生度o勒，你都黎慣o架o黎熟。
晴：得o勒，我o係度重耐過妳。
護：錯喎，我o係度出世o架。
晴：哈哈，我都係，唔通妳大過我？
護：蝦？!你把口硬係咁o既。
晴：哈哈，死症黎o既，無得醫。
(護士面色一沉)
護：希望在人間﹗
(晴感激一笑)
晴：唔阻妳做野，我自己會去。
護：都係唔好，咪一陣又唔知你見到邊個要幫，又走左去。
晴：哈，咁又係，咁又係。
(二人出)
(可天從床上下來，往望遠鏡處去，坐了在地上。)
(男朋友手持鮮花入)
(男朋友入了病房，把花遞給可天，可天沒接，對男朋友顯得厭惡，逕自回到床上，男朋友
尾隨之，坐了在床邊)(梁醫生從屏風後入，手持FILE坐在桌前)
(晴入，正整理衣衫，坐了在床邊。)
(梁醫生寫下些記錄)
晴：梁大夫，係咪同上次一樣？
梁：唔同，上次遲一個鐘，今次遲45分鐘，有進步。
晴：咦？咁三次之後我咪好番晒囉？
梁：你唔記得自己係逢二進一，下次你咪又遲番一個鐘﹗
晴：哈哈﹗知我者梁韋悟大夫是也﹗
梁：今日又幫阿婆托米定係公園有遺失小童？
晴：都唔係，今日托呀婆﹗
(梁感激氣)
晴：你地醫院條長命斜都唔知係咪愛黎陰D老人家，唔小心一個跣腳就碌番落巴士站。
梁：呢度係專科，唔係投訴科，孫病人。
晴：係o既梁醫生﹗
梁：幫人係好，但係你都要注意自己0既身體狀況，睇你，幫人幫到隻手損晒。
晴：啊﹗隻貓緊張，抓左兩野。
梁：又遇到咩倒霉事？
晴：今日無咩，兩三單，雞毛蒜皮。
(梁醫生不期然皺起眉頭)
(晴伸手按著梁的眉心)
晴：你o既煩惱都唔少喎。
(梁撥開了晴的手)
梁：邊有人夠你豁達﹗
晴：任何人有我一樣o既經歷都會好似我咁豁達開朗。
梁：或者真係要向你請教下點樣面對不愉快o既人生。
晴：咁睇你將不愉快設定o係咩野水平，有D人跌左一蚊都會勁"dum"心，但係有d人無左
一百幾十萬都毫不在乎。
(梁醫生留心聽著)
晴：每一日能夠繼續呼吸，有得飲有得食，夜晚可以好好咁訓一覺，能夠用自己雙腳黎行，
我已經好滿足，好多人都唔明白，生活就係咁簡單。
梁：唔......唔需要愛情咩？
晴：唔......唔(沒有直接回答)
(梁苦笑，跟著看看報告有沒有甚麼遺漏)
(晴看著梁寫著自己的報告)
晴：我知道自己隨時都會離開，每朝早我發覺自己仲有心跳已經好滿足，o個D濕濕碎碎
o既倒霉野又有咩相干。至於愛情……太o徙精神，我負擔唔黎。
梁：不過，愛情又相當吸引。
晴：咦？睇黎有人談戀愛喎。
(梁尷尷尬尬的，沒有回答。)
(晴笑了一笑，也沒有追問下去)
晴：其實，咁樣o既例行檢查，對我真係有幫助咩？
梁：即使唔能夠根治，起碼知道有無惡化，你好唔鐘意見倒我咩？
(護士入，遞了一份報告給梁)
晴：點會呢？梁醫生係我抱病生涯中遇到過最好o既醫生，(望向護士小姐)而呢度o既姑娘，
全部都又靚又溫柔，日日黎都唔厭哪﹗
護：哈，晴先生依然咁口甜舌滑。
晴：過獎﹗過獎﹗
梁：上晝仲有無病人？
護：上晝無o勒。我出返去做野。(出)
(可天病房開始發生爭執)
梁：同你去飲杯野？
晴：多謝醫生。
梁：遇到個會請病人飲野o既醫生，你都未算好黑。
(二人邊說邊行，接近可天的病房。)
晴：我不嬲都話梁醫生係我抱病生涯中o既一抹彩虹。
梁：哈，你重有寫詩？
晴：亂咁寫，都唔算係詩。
(可天房內傳出爭吵)
(梁與晴停下腳步)
天：你同我躝返出去﹗
男：妳真係咁憎我？
天：老鼠，'蟑螂'，乞兒，發"毛"麵包，都可愛過你一百倍。
男：妳病到癲左﹗
天：我就係癲左先至會同你呢亭垃圾一齊。
男：垃圾？當初係邊個讚到我天上有地下無？話我似天上面o既月亮，纏住我唔放？
天：(冷笑)呵﹗係？如果你係月亮，我就係太陽。
男：(行近天)咪係囉﹗
天：你註定呢世都跟住我尾﹗
男：(指著天，極怒)妳﹗妳﹗癲婆﹗(出)
(梁待男離開，才入房內)
(晴仍在外)
(可天躺回床上，蓋著被)
梁：(憐惜)林小姐，醫院係比妳靜養o既地方，為身體著想，唔可以太激動。
天：(背著梁)若果想我清靜休養，就唔好放D衰人入黎，咁多閒人出出入入，叫人點休息，
點靜養。(跟著蓋頭而睡)
(梁醫生站了一會，才慢慢轉身離去)
(晴見梁的樣子也不多問)
(梁拍拍晴，二人出)
(病房區燈稍暗)
(前演區如陽光般亮)
(有些雀鳥聲)
(晴拖著兩張膠椅入)
(把椅子放好位置，坐下，伸懶腰)
晴：咁好陽光，最好就係露天o既地方飲咖啡。
(看著遠景，吟起詩來，觀眾亦聽不到)
(梁拿著兩杯紙杯飲品入)
(梁遞一杯給晴，然後坐下)
晴：(接過)唔該﹗(打開蓋)咦？鮮奶？重要熱o既﹗
(梁也打開自己那杯)
梁：你飲o既雖然係鮮奶，但係一樣聞到咖啡o既香味﹗
晴：哈﹗請你唔好混淆我o既味覺同嗅覺。
梁：(笑)係呢？頭先你唸o個首詩係邊個寫o架？
晴：哈，仲有邊個﹗
梁：啊，原來係晴大詩人o既作品﹗
晴：不敢當，不敢當。
梁：可唔可以再唸多一次？
旯：梁醫生叫到，當然樂意，咳唔﹗「疊疊山林綠，阻隔了我從你眼中探知，是甚麼事鎖住
了你的話語言詞，拋進了找不著的太平洋深處。」
梁：哦？係一首情詩。(望向晴)
晴：唔，係一首情詩。(望向遠處)
梁：有無一首係關於星星？
晴：唔……都有。
梁：唸黎聽下。
(晴用雙手包著紙杯)
晴：(緩緩地)星掛在天，恨天還是遠，心仍纏繞，牽扯不成眠。
梁：(輕輕地)星掛在天……重有無？
晴：怎也忘不了，那令人目眩的星光，一點一點恍似訴說著希望，不朽的愛意盡在星裡藏，
我盼能摘下來，送你作嫁妝。
梁：噢，愛人結婚了，新郎不是你？
晴：傻啦？作詩係天馬行空，咪當真。
(梁笑笑望向上空)
梁：星星真係會比人希望？
晴：睇你用乜野心情黎睇啦，你o既煩惱來自星星。
(梁只是望著天空)
晴：你鐘意佢D乜野？
梁：(想了一想)只係一個表情，佢睇星星o既時候o既表情。(歎)就算幾唔開心，幾多痛苦，
佢都會抑壓住自己，唔會流半滴眼淚。
晴：除左我之外，仲有咁慘o既人？
梁：你睇得開﹗
晴：哈......仲未係情人，咁快就幫住晒。
梁：情人......恐怕無可能。
晴：年輕有為，斯文靚仔o既梁醫生佢都睇唔上眼？
梁：佢都無正正式式望過我。
晴：唉，造物弄人，各人總有各人o既煩惱。
梁：或者佢身邊有更多，更大，更光o既星星，所以無將我呢粒暗星放在眼內。
晴：好靚女？
梁：倔強同冷傲將佢o既美麗淹沒左。
晴：唔，咁唔怪得之佢唔開心。
梁：唔？
晴：一個將自己感情囚禁，冷凍起黎o既人又點會開心？
梁：好想再睇多一次佢o既笑容。
晴：主動D啦，淨係講，咩野都唔做，有鬼用咩﹗
梁：哈﹗估唔到要比你教訓返轉頭﹗
晴：哈哈哈，我等左呢個機會好耐o勒﹗
梁：唔好講我o勒。你呢？仲有無做義工？
晴：(點頭)最近去探過孤兒院，得閒又去陪下D獨居老人。
梁：你真係有魄力，又返工，又做義工，唔"支力"o既咩？顧住自己身體呀﹗
晴：你再咁囉唆，全世界D女人都怕左你﹗
梁：就係有你呢D咁唔愛惜自己o既病人，先至有我呢D咁囉唆o既醫生。
晴：做少D都唔見得會長多幾年命，生命唔係愛黎o徙o既，能夠出多一分力，縱使係微不
足道o既一分，都係好事。
梁：今日o既醫學無辦法，仲有聽日，生命固然唔係愛黎浪費，但亦唔可以無限制咁燃燒。
晴：大幾年o個個係我呀梁醫生﹗
梁：你幾大都好，我始終係你主治醫生。
晴：係係，病人孫晴自當緊記梁韋悟醫生o既教晦﹗
梁：唔同你講o勒，同我好好反省反省﹗走先。
(晴把飲品舉高代說再見)
(梁出)
(晴待了一會，飲光鮮奶後，拖著椅子，出)(可天病房漸亮，可天病發，傳來微弱的呻吟聲。)
(晴再入)
(晴路經病房時，刻意放緩了腳步，看了看可天的病房，跟著像聽到一些聲音。)
(可天的呻吟聲漸大)
(晴把耳貼近房間)
(可天的呻吟聲再大點，但又忍著不大叫出來)
(晴敲門)
晴：可以入黎嗎？(再敲)
(見沒回應，逕自入了房內)
(晴看到可天的病況大為緊張，急往細看)
晴：小姐﹗小姐﹗ (可天有點抽搐)(晴從口袋拿出手帕，包在食指，給可天咬著)
(再按緊急鐘)
晴：我叫左醫生黎，無事o架，妳放鬆。
(梁醫生飛奔入，直入可天病房，沒有理會晴)
(晴一見梁醫生到便立刻抽出手指)
(護士尾隨而到)
(梁醫生趕快幫可天作緊急護理，護士協助著)
(經過一輪護理，可天慢慢平復下來)
(梁醫生鬆了一口氣)
(晴呆立一旁)
(梁發現晴在，捧著手指)
梁：(上前檢查晴的手指)你又多管閒事，好彩無整傷。
晴：放心，我經驗豐富。
梁：(有點心不在焉)我重有野做，唔陪你。
晴：我先至唔駛你陪。
(梁只笑笑，出了病房)
(梁站了在房外，看看房內，才出)
晴：(問護士)佢無事呀呵？
護士：打左支針，訓一覺，暫時無大礙。
晴：哦，咁我走先。
護：你自己都小心呀﹗
晴：遵命﹗ (出)
(護士替可天蓋好被，檢查一下點滴，也離開了)(漫天星光)
(可天慢慢起來，掩著面一會，跟著下床，往望遠鏡處去，把望遠鏡拿出房外，置於前台，
搬的過程顯得有點艱難。放好位置，開始作觀星狀。原來冰冷冷的面孔，漸漸泛起了笑容)
(梁醫生入，看到可天，但沒作聲，靜靜站在一旁觀看)
(星光漸漸慢下來)
(可天坐了在地上，仍看著天空)天：我有無機會睇到流星雨呢？
梁：一定有。
(可天有點愕然，望了望梁醫生，沒再說甚麼，把望遠鏡搬回房內)
(梁欲協助，但卻又止步)
梁：(望著可天的房間)一定可以﹗
(可天放回望遠鏡，上了床上)
天：一定唔可以。(睡)
(梁出)
(星光再轉一會，燈轉亮)(護士1 & 2入)
護1：咦，o個便咁大班人，咩事？
護2：你唔記得咩，藝術在醫院嘛﹗
護1：今日咩？
護2：係呀﹗
護1：我重諗住無人再黎，無人會理美化醫院o既重要性。
護2：好彩重有人記得，唔知今次畫咩呢？
護1：上次兒童病房出面個森林，有泰山o架。
護2：哈，係個小朋友自己加上去o架。
護1：咦？咁佢又幾有天份喎。
護2：哈﹗
(二人接近台側) ( 晴入)
晴：前面兩位靚靚護士﹗
(二人轉身)
護1：(看看晴，再看看錶)晴先生，難得今日咁準時。
晴：哈，係呀，無乜幾可。係呢？o個便咩事咁熱鬧？
護2：藝術在醫院o丫嘛，你唔知咩？﹗
晴：終於都黎到o勒﹗
護1：係啦，以為無人再黎。
晴：去八下先。
護1：唔得﹗
晴：點解？
護1：係去都等你做完檢查先，幾難得你準時。
晴：哈哈，咁又係，咁又係，叻番次﹗
護2：晴先生專蝦梁醫生。
晴：梁醫生心腸好，知我可憐。
護2：你可憐？﹗邊有病人好似你咁，成日嬉皮笑臉。你可憐？梁醫生可憐過你多多聲啦。
護1：唔同你講，你快d去梁醫生度，我地就去八一八先，今年唔知有無靚仔畫家呢？
護2：哈哈…(二人出)
晴：比妳地搶先，算﹗ (出)(梁醫生於診症室處入，坐下寫報告)
(晴在另外一面坐下)
晴：今日係咪好左好多呢？
梁：點解？
晴：我準時喎。
梁：準時係應該o既。
晴：本來可以早到添呀﹗
梁：你都會早到？
晴：如果唔係"困"左半個鐘頭lift，我就早到o勒。
梁：(望向晴)"困"左半個鐘，咁有無特別覺得邊度唔舒服？
旯：家常便飯，我先至唔會因為咁唔舒服，心都無跳多兩下。
梁：咁，而家訓覺重有無被壓住o既感覺？
晴：近排無，不過有時好似比針拮咁。
梁：嚴唔嚴重？
晴：可以接受。
梁：可以接受？﹗你真係講得輕鬆。
(晴笑)
梁：你仍然堅持唔施手術。
晴：(想一想)我都係鐘意而家咁，如果施手術就要訓o係病床度，無得自由活動，重有可能
以後都無得再落床。
梁：你對醫生o既醫術都係無信心。
晴：爸爸同媽媽都係o係手術床上面去，我連佢地最後一面都見唔倒，我唔想自己又係咁樣。
梁：你重後生，成功o既機會高好多。
晴：成功左，最多咪比多幾年我玩下，唔值得因為咁而比佢地o係心口開個大窿。
梁：咁多謝你重黎比我檢查，好比面喎。
晴：哈。唔好客氣，唔好客氣。
(二人相視而笑)
晴：哎，今日有義工黎醫院畫畫，你去唔去趁熱鬧？
梁：唔去o勒，我重要值班。
晴：噢，咁我自己去咯。
梁：適可而止。
晴：(起來)遵命，醫生大人﹗ (轉身出)
(梁看著晴離開，有點感慨)
梁：或者，手術真係幫你唔到。
(跟著把報告填完，再收拾離開)(晴再入，喜孜孜的四處望)
風景王v.o.：孫晴﹗
(晴回頭看)
(風景王入，手拿繪畫用具。)
風：真係你，好耐無見﹗
晴：喂，風景王，無見一排靚仔左喎﹗
風：哈，駛乜講﹗你呀﹗好耐無黎畫室o勒﹗
晴：我支筆生晒鏽。
風：咁咪愛黎畫D生鏽畫囉。
晴：哈﹗好，試下﹗咦？你黎探病？
風：(拿高畫具)我黎做義工。
晴：咦？﹗你都有咁好心地？﹗我真係走漏眼﹗
風：哈，我大把好野你唔知o者﹗
晴：講笑，講笑。咁即係話你黎畫壁畫？
風：唔﹗藝術在醫院。
晴：我都想趁下熱鬧，受唔受我玩？
風：你支生鏽筆要參加，自然無任歡迎。
晴：有無多套畫具？
風：你用我呢套，我去拎過套。
晴：好﹗唔該晒﹗
風：你自己搵幅牆畫啦，我唔理你o勒﹗
晴：ok，無問題。
(風景王拍拍晴，出)
(晴拿著畫具，像小朋友般興奮地四處看，突然停在白牆前，即可天的病房隔鄰)
(可天醒來，下床)
(晴放下畫具，看著大牆，想著畫甚麼)
(可天出來，看到晴在，也看到畫具)
天：除左星空，呢度乜野都唔畫得﹗
(晴回頭一看)
晴：妳無事o勒？
天：我有事無事，關你咩事？﹗
晴：與我無關。(豎起食指)但係同我呢隻手指有D關。(咬咬自己的手指)
(可天望著晴的手指，想了一想)
天：(冷冷地)睇黎好似要同你講聲多謝。
晴：(伸出手)我叫孫晴，未請教。
(可天沒有和晴握手，敲敲透明幕)
(晴笑笑上前看看)
晴：啊，原來係林可天小姐，咁妳可唔可以話我知，點解淨係可以畫星空？
天：你地唔係黎討病人歡心o既咩？
晴：都唔能夠咁講。
天：除左星空，你o係度畫乜我都唔會高興。
晴：妳都唔會o係度住好耐o者，畫D充滿生氣o既畫，令其他病人睇到都會開心，唔係更
加好咩？
天：啍﹗咁唔該你去問下D狗屁醫生，我要住到邊年邊月邊日先至可以離開呢個鬼地方﹗
(可天說完便即轉身入回房內，上了床)
(晴看著可天回房，覺得她有點可憐)
晴：(看著牆) 星空﹗(笑) 難到我咩﹗
(晴開始繪畫，首先掃上深紫藍色)
(白牆上慢慢映出深紫藍)
(風景王入)
風：(看到晴掃油了牆，大驚) 晴？你攪咩鬼？
(晴沒有停下來)
風：我地係黎美化醫院，唔係恐怖電影海報大賽，你黑麻麻咁攪乜鬼？
晴：呢隻唔係黑色，係深紫藍色，你最好快D去驗下有無色盲，橫掂呢度係醫院，夠晒方便。
風：你把口呢﹗我唔同你拗，你自己話o勒，你o係度畫緊乜野？
晴：宇宙星空﹗
風：晴大哥，雖然係義務工作，無人工，但係都唔可以亂黎o架。
晴：我點會亂黎，你對我無信心咩？你知道唔可以咁早下評語。
風：我對你有信心，但係呢度係醫院，唔係公園D隧道。
(晴想反駁)
風：係o勒﹗係o勒﹗我唔應該咁早下評語，你唔好太亂黎就得o勒﹗
(晴笑笑)
(風景王拍拍晴，出)
晴：星空o丫嘛，我就要妳知道乜野叫星空﹗
(漫天星光)
(白牆漸漸現出星圖)
(晴起勁地畫)
(星光漸慢，至消失)
(梁醫生入)
(梁見晴在，詫異)
梁：晴，咁夜，你仲o係度？
晴：(轉頭望向梁)梁醫生﹗(笑) 我希望o係天光之前畫好佢。
(梁這時才看到牆上的畫)
梁：(更詫異)全部都係你畫？
(可天下床)
晴：當然﹗
梁：估唔倒，畫畫你又識﹗
晴：無畫好耐，好彩支筆重聽駛。
梁：點解畫星星？
(可天從房出來)
天：你地好嘈呀，究竟呢間係乜野醫院，咁多閒人﹗(這時才望到牆上的畫，停了下來)
(梁望著可天，晴望著梁)
天：(平和了點) 未見過真正o既星空，就唔好亂畫。
晴：(望向可天)雖然呢幅係牆上面o既星空，但我絕對有信心同上面個星空一較高下。
天：係咩？你都相當自大。
晴：彼此，彼此。(晴繼續畫)
天：畫畫又好，過路又好，請安靜。(即返回房內)
(梁仍望著房門)
(天返回床上，望著天花板)
(晴邊畫邊說)
晴：梁醫生鐘意o既人的確唔簡單。
梁：咪亂講。
晴：係亂講，定講中？
(梁醫生嘆了口氣，沒再說甚麼便離去了)
(晴停了下來，看著梁離去的方向，再看看病房，笑了一笑，繼續畫)
(星光再次流動)
(牆上的星圖漸現九大行星和無數閃星)
(星光流動轉慢，晴伏了在牆上)
(星光停，陽光射入)
(可天從房間出來，看了晴一眼, 跟著看了星圖一會)
天：你重早過D打工o既。(再看了一會星圖) (輕聲) 咁傻o既人都有。喂﹗你唔係成晚無訓，o係度畫張咁o既野o下嘛？
(見沒回應)喂﹗(行近晴)喂﹗(拍拍他)喂﹗
(晴倒在地上)
(天大驚)
天：(拍拍晴的瞼)喂，你無野嘛？醒醒喇﹗(大叫)姑娘﹗姑娘﹗
(護士入)
護：咩事？
天：佢唔知係咪暈左﹗
(護士蹲下看)
護：晴先生﹗晴先生﹗
(台中拉出白幕)
(晴躺在病床上，打著點滴，由護士推入)
(病床置於台中)
(護士把點滴檢查過，替晴蓋好被後，出)
(晴有點郁動)
(梁醫生拿著報告入，行近床尾)
(晴甦醒)
(梁醫生板著瞼)
(晴掙扎著坐起來)
晴：(看到梁的表情) 對唔住﹗
梁：唔需要同我道歉，條命係你自己﹗
晴：我"支力"得滯，訓著左o者。
梁：咁你要小心，唔係每次訓著左都會醒番。
晴：所以我更加要珍惜清醒o既時間。
梁：只要懂得珍惜身體，你重有大把時間。
晴：你成日都係咁講，我先至唔上當。
(可天入)
天：(望著晴) 死唔去？
晴：唔，死唔去。
天：畫未完成，畫家唔死得。
晴：遵命。(勉強作了一個敬禮)
(可天沒有望梁醫生一眼便離開了)
(梁卻望著可天，看著她離開有點不知所措)
(晴看著梁的樣子，苦笑)
晴：我只係想快D畫好林小姐房外面o既牆，等佢可以開心D。
(梁又皺眉)
(晴本想按他眉心，但卻力不從心)
晴：有病o個個係我呀梁醫生，點解滿懷心事o既總係D健康o既人？
梁：你又多管閒事。
晴：唔係閒事，係幫你為林小姐做D事。
梁：幫我？
晴：唔係我成晚無訓為咩？
梁：你做咩都係o徙氣o徙力，無用。
晴：你成日皺埋眉頭，木口木面，野都唔講多句，叫人點鐘意你？
梁：唔係你諗得咁簡單。
晴：有幾複雜，婚外情定三角戀？
梁：咪亂估，你休息下啦。(出)
(晴無奈，躺下，睡)
(燈漸暗)
(護士入，推晴出)
(白幕拉走)
(星光流動)
(可天已站在房門外，看著星圖)
(可天坐在地上，邊看邊笑)
(梁醫生入，看到可天坐在地上笑，有點錯愕，猶豫了一會，終於走近可天身邊)
(可天卻沒有甚麼反應)
(星光漸慢)
天：呢間醫院，咩野病人都有。
(梁望著天，天仍望著畫)
梁：妳終於都再同我單獨傾計。
天：星星o係天上面，牆上面，抑或係腦海入面，都一樣咁迷人。
(二人沉默一會，看著星圖)
(護士2入。看到二人一起，立即回轉)
天：聽日又會有新o既傳言。
梁：再無新話題刺激下，大家就無心機做野，會悶、會厭。
天：總有一日，你對我都會厭。
梁：o個一日，或者係天o既另外一邊。
(可天沒有立即回答，仍望著星圖)
天：冥王星或者會被踢出太陽系，唔再係一粒行星。
梁：啊……真係可憐。
天，可能，我就係冥王星。
梁：妳唔係太陽咩？
天：相對o個D垃圾，我就係太陽。
梁：妳一定唔係冥王星。
天：o岩，冥王星重要o係太陽系o既邊緣掙扎，太辛苦o勒，我先至唔想再花氣力。
梁：(認真)妳可以係彗星。
(可天終於望向梁)
梁：我作為引力，(鼓起勇氣)跟住將妳溶化。
(可天愕然，二人對望一會)
天：(回望別處，冷笑)彗星？我先至唔想做拖住掃把o既老巫婆﹗
(可天隨即返回房內，倚在近門口處)
(梁醫生上前一步，欲跟入，但終於離開了)
(可天再出房門)
天：(望著梁離去的方向)呢粒彗星，轉多一個圈就完，你永遠無機會睇到佢o既彗髮……
(停望一會，才再入回房內，上床睡)
(梁於右方入，坐回辦公桌前，從公文袋內取出天文雜誌，找些甚麼資料)
梁：(喃喃自語)冥王星……冥王星……(停在某一頁，細看)重未有結論。
(梁拿著雜誌，行近台口，向上望)
(星光閃動)
梁：(伸手一摘)我可唔可以摘妳落黎？(攤開手掌)林可天……..
(停一會，才把雜誌放回入袋，脫下白袍，出)
(星光轉動一會才停，漸變天亮)
(老婆婆持拐杖入)
晴v.o.：婆婆﹗婆婆﹗
(婆停下，向前望去)
(晴身穿病人服加外套快步入)
婆：唉喲，後生仔，又係你。
晴：我晨運呀，妳黎覆診？
婆：人老左，寧舍多病痛。
晴：我"咩"妳上去。
婆：哈哈，講咁耐都係等你講呢句。
(晴揹起婆婆)
婆：咦？後生仔，咩解究你著成咁o既？
晴：我要住院呀。
婆：你邊"恕"似有病？
晴：講出黎唔係嚇妳，我有急性心肌缺血，冠狀動脈栓塞，急性心肌梗塞。
婆：嘩，聽落咁得人驚o既，咪死得人？
晴：係呀，顧問醫生話我心口袋左個計時炸彈，要盡快做手術，最好就係琴日做。
婆：放我落黎﹗放我落黎﹗
晴：未到喎。
婆：你講到咁恐怖，萬一你行行下慣低左，碌落地，咁呀婆咪一齊同你去見閰羅王。
晴：唔會，我一定上天堂。
婆：啋，後生仔，亂咁講說話，吐口水講過﹗你荒唔係蝦阿婆唔識野，"反"我。
晴：哈哈…，咁鬼精靈o既妳﹗"反"妳唔倒添。
婆：到o勒﹗到o勒﹗
晴：哦。(放下婆婆)咦，不如我帶妳去睇D正野o丫。
婆：點正法先？
晴：正到呱呱叫啦。
婆：你呢個後生仔，寧舍古靈精怪，好，又陪你癲下。
晴：(俯低身)黎。
婆：做咩？
晴："咩"妳去。
婆：唔駛o勒，平路，阿婆自己曉行。
晴：咁駛唔駛扶？
婆：扶就更快D啦。
晴：(扶著婆)老佛爺起駕。
婆：哈哈，你係咪想做李連英﹗
晴：哈哈。
(二人出)
(轉室光)
(二人再入，有點星光流動)
(二人站在星圖前)
晴：登登登登~~~正唔正？
婆：正﹗(稍停)不過咩傢伙黎o架？
晴：哈，(誇張)九大行星呀，唔係嚇妳，o拿，地球就係呢度。
婆：咁細？咁大D o個粒係咩？
晴：你鐘意大D o個粒？
婆：大D，易睇到，阿婆老花眼。
(護士1入)
護1：晴先生，又解畫。
晴：哈，o係醫院好無聊，無咩細藝。
護1：你呀，精力過盛。
晴：係呀，我有過度活躍症。
護1：哈，哎，點解你唔畫流星雨？好似話好靚過喎。
晴：流星雨可以肉眼睇到。
護1：得o架？
晴：方向o岩就得o勒。
護1：哎呀，唔講o勒，重有大把野做，你呀，記得去梁醫生度檢查，巡房o個陣你又唔知
走去邊。
晴：遵命﹗
(護士1出)
婆：乜你同D姑娘咁熟o既？
晴：我熟客黎o架。
婆：啋﹗邊有人鐘意做醫院熟客o架，重講得咁開心。
晴：開心個病會好快D，所以婆婆妳都要開開心心。
婆：次次都有人"咩"我上黎就梗係開心。
晴：絕對樂意。
婆：我個仔唔知會唔會好似你咁好心地。
晴：婆婆有個仔？一定大過我o勒。
婆：細過你…
晴：細過我？
婆：18歲。
晴：咁後生？妳"反"我？
婆：個腎唔爭氣，18歲就去左咯。
晴：啊……
婆：最衰我地兩公婆個腎都唔捐得比佢，唉…….18歲咋，有你咁高o勒。
(可天出來)
晴：婆婆………
婆：如果o個時有人肯捐過腎比明仔, 如果……(慢慢行出)
晴：婆婆…….
(晴轉身望到可天，可天立即回房去)
(晴再看看婆婆離去的方向，看看星圖，再看看可天房門，決定上前敲門)
天：(已回床上) 入黎。
晴：頭先係咪騷擾到妳？
天：你入黎就最騷擾。
晴：說話又唔好咁客薄，妳仲欠我一個咬指人情。
(可天隨即伸出一隻手指)
晴：做咩？
天：比你咬番一啖，我唔想欠人D乜野。
晴：唔，咁可唔可以搵人代勞？
天：你無牙o架？
晴：妳唔好理，總言之呢個權利要留返比我。
天：留都唔會留好耐，除非死人你都想咬。
晴：唔？﹗
天：說話我唔鐘意講兩次。
晴：咁不如我地黎一次比賽，遲一D死o個個要比對方大大力咁咬一啖，當然只係咬手指。
天：你都有夠無聊。
晴：橫掂都係虛耗生命，賭一賭又何妨。
天：點睇你都係唔似一個有病o既人。
晴：咁都唔駛成日掛住個病樣，四圍搏人同情。
天：你終於講番句人話。
晴：但係亦都唔需要起冰牆，落冷窗，拒絕全世界。
(可天停下來沒說話，望著晴一會兒)
天：係，我打算將病變既細胞一齊冷凍起黎，呢個係新o既療法，要唔要試下？
晴：哎，如果真係能夠阻延病情，點都要試一試。總好過比人o係心口度開個大沽窿，方便
快捷。
天：醫院咁冷冰冰就係因為要進行呢個實驗。試下呢個方法o既成效，將病人等死o既時間
延長,將我地o既痛苦延長，醫院o既賬單項目跟住不斷延長。
晴：妳講緊o既謀人寺，唔係醫院。
天：咁你去問下D狗屁醫生，醫你唔好，又唔比你出院，唔準呢樣，唔準o個樣，o岩﹗或
者唔應該係謀人寺，應該叫監倉﹗
晴：梁韋悟都係狗屁醫生？(可天有點詫異，再望望晴一會)
天：你都幾多管閒事。
晴：哈，佢又係成日叫我唔好咁多管閒事，你倆個真係夾。
天：(轉話題)你要住幾耐？
晴：兩日。
天：兩日？咁快可以出院？
晴：我唔鐘意住院，成日訓o係張床度，同訓棺材無乜分別。
天：啍﹗你咁講咩野意思？﹗
晴：哎﹗對唔住，不知者不罪，我從來都未見過妳。
天：啍﹗呢度係醫院，唔係酒店BALLRooM。見到人都唔需要打招呼。
晴：妳認為自己有病，好不幸？
天：唔通健康先至不幸？
晴：咁健康o既人通常唔知道自己有幾幸福，呢個係事實。
(天冷笑)
晴：但係，有病o既人，只懂得埋怨自己o既不幸，同其他人比較，苦埋口面過日子，亦唔
見得對病情有幫助，(坐了在可天床邊)我有遺傳性心臟病，手術成功o既機會不足三成，
但係每一日我都過得好開心，好滿足，每一日放對腳係地上面，感受到自己仍然生存緊，
個心仍然跳緊無停到。(望定可天)
天：你一定有一個好好o既屋企。
晴：(搖頭)爸爸媽媽好多年前亦因為心臟病去左咯，兩個人有埋同一種病，做仔o既又點走
得甩。(笑)
天：你似乎樂觀得太過份。
晴：係呀，我成日同人講，我生肖係黑貓，星座係烏鴉。
天：o下？
晴：困LIFT，跌銀包，外傷，拗柴，天天新款，日日不同，有D幾得意，想唔想聽下？
天：你鐘意。
晴：有一日o係街度有個女仔無啦啦摑左我一巴，話：「你個死人頭，無本心。」跟住先發
覺自己認錯人，一句對唔住都無就走左去。又有一次去沙灘游水，點知遇o岩潮退，
踩正海膽，D刺挑左成日都挑唔完，仲比D朋友搽到成腳板都係油，肥淋淋，話第二
日D刺就會出返晒黎，呃鬼。重有一次去美國旅行，人在紐約，但係D行李就去左東京。
天：夠哪。都唔知真定假，你講得咁開心。
晴：妳諗下，整親手腳可以醫得返，如果無左手腳呢？困LIFT總有人黎救妳；跌左錢可以
再賺；行李失左可以等航空公司送番比妳；男朋友走左，或者下次遇到個更適合自己
o既呢？但係如果有一日個心唔再跳，個腦唔再轉，生命就會消失，o個陣就真係乜野
都無。我記得梁醫生講過，今日o既醫學幫唔到妳，重有聽日；雖然我唔知自己重有無
聽日，但係我依然會好好地生活落去，就算無奇蹟，起碼我都對得住生命。
天：(平和了點)你傳教o架？﹗
晴：哈，我諗我夠資格上天堂，唔駛再做神父、牧師。
天：咁你有無女朋友？
晴：唔…….女性朋友就好多，妳呢？妳一定好多人追。
天：(冷笑)啍… (望向天空)我o既愛情….就好似天上邊o既星星一樣，我見到好多好多，
但係我一粒都捉唔到。
晴：唔係捉唔到，係妳自己"搾"唔定主意，o個一粒梁星星咪企定定等妳出手囉。
天：(望定晴)你睇下我，(稍停)值得佢愛咩？
晴：咁妳要問下佢本人至得o勒，又唔係我鐘意妳。
天：如果你鐘意我就容易o勒。
晴：點解？
天：一腳踢你出房門咪得囉。
晴：哈哈哈﹗
(可天也笑了)
晴：唔講o勒，我要去檢查。
天：咁駛唔駛我落床送你？
晴：(耍手)唔駛o勒，唔駛o勒﹗唔敢勞煩大駕，BYE BYE﹗﹗
(可天目送著晴離開)
(晴離開的時候一直摸著星圖，出)
天：(望著望遠鏡)我可以做D咩呢？
(星光流轉，星圖上多了一些星雲)
(可天下床，走向望遠鏡，看了一會星星，滿足地笑，跟著望向房門口，出外看星圖)
(可天出了病房，看到星圖上又多了一些星雲，很欣賞的樣子)
(梁醫生從左側入，看到可天又站在房門外，猶豫著好不好站過去)
天：唔知幾時佢又加左D星雲上去。
(梁醫生見可天和自己說話便站了過她身旁)
梁：佢係一個唔可以停落黎o既人。
(二人沉默一會)
天：如果一停落黎，生命亦會跟住停落黎。
梁：咁妳想唔想繼續行落去？
天：一個人……..好難行。
梁：兩個人一齊會唔會好D？
天：唔。
(二人眼仍看著星圖，但卻已牽住了手)
(二人沉默一會)
天：你重唔走？
梁：同妳一齊走？
天：(笑)呢度唔係你屋企。
梁：(認真)都唔係妳屋企﹗
天：唔。
梁：我同妳返入房先。
(可天點點頭)
(二人回到房內，可天上了床睡，梁醫生替她蓋好被子，吻了她前額一下，才不捨的離開房間)
(梁醫生從右側離開)
(星光漸慢至停，燈轉亮)
(晴身穿便服入，往可天的病房去)
(晴敲門)
(可天起來，撥好了頭髮)
天：入黎。
(晴入房)
晴：早晨﹗
天：早晨，點解你永遠都早過D醫生同護士？
晴：哈﹗唏，聽講妳肯做手術咯喎。
天：你係醫院部電腦？乜都知。
晴：我關心朋友。
天：我幾時做左你朋友呀？
晴：哎呀，(按著心口)乜妳講埋D咁傷人心o既說話o架，我我..我頂唔住o勒。
天：唔好用病情黎開玩笑。
晴：近朱者赤，我以為只有梁醫生先至會講埋D咁o既野。
(可天顯得有點尷尬)
晴：(笑)喂﹗遲D就可以睇到妳光頭o個樣。
天：係呀，咁你就可以睇到我頭頂o個三個字。
晴：哈哈，好，我遲D返黎探妳，睇下係三個六定三個九。
天：你出院？﹗
晴：妳唔見我換晒衫咩？
天：你係咪靜雞雞，自己出院？
晴：如果佢地留得到我，妳就無機會遇到我呢個天才大畫家o勒﹗
天：唔明？
晴：好多年前，呢度個顧問醫師話我一定要住院，否則小命不保，我話，如果要我住o係呢度，
原本有三年命，變左一年唔到。
天：勸人珍惜生命o個個係你，唔住院唔做手術o個個又係你。
晴：我同妳唔同，佢地有把握醫好妳，只在於妳自己想唔想保住條命。
天：你個病…..真係(詢問的眼神)
(晴點一點頭)
晴：都好o架，佢地無信心，咁我咪放心四圍去，做自己想做o既野，唔駛o係張床度等…….時間過﹗
天：(望著晴一會)如果有一日，我搵到一粒新星，我會改佢個名做晴星。
晴：哈﹗咁有人一定呷大醋。
天：(笑)佢先至唔會。
晴：愛情可以係毒藥，亦都可以係良藥仙丹。
天：我而家要學，點去愛一個人。
晴：跟住學做個快樂o既人。
(可天點點頭)
晴：我走o勒。
天：記得返黎探我﹗
晴：一定﹗(轉身離開)
(晴又再摸著星圖出)
(可天撫摸著自己的頭髮，再向晴離去的方向望去)
天：多謝你。(躺下)
(星光流轉)
(晴拿著畫具和畫布板入，坐了在台前地上，開始繪畫，突然面色一沉，按住了心，深呼吸，
跟著再畫一會，心又再痛，辛苦狀)
晴：oK，你贏，訓醒再畫。
(收拾畫具，辛苦地出)
(星光轉慢至完，燈漸亮)(可天起床，撥撥自己的頭髮，跟著下床，從衣物內找出一對肉色絲襪，跟著把頭髮梳向後，把絲襪套在頭上，找鏡子看)
(梁醫生入，往敲門)
天：入黎。
(梁入房，看到可天的模樣，失笑)
梁：妳做咩？
天：林可天光頭預演，本來想搵鏡照下，見到你個表情，唔駛啦。
(梁又笑)
天：我光頭個樣好肉酸咩？
梁：唔係，唔係。點解唔戴帽呢？
天：唔肉酸，駛乜帶帽呀。
梁：呀，有時真係唔識答妳D問題。
(可天把絲襪除下，撥弄一下頭髮)
天：唔施手術得唔得呀？
梁：施手術快D好。
(可天沒回應，返回床上)
梁：唔係決定好o勒咩？
天：死o係手術床上面，好老土。
梁：佢地有把握先至會勸妳做手術。
天：咁點解晴又唔駛做？
(梁醫生呆了一呆)
天：佢真係無希望？
(梁醫生沒有直接回答可天，走近去握住她雙手)
梁：妳唔可以死。
(二人對望一會)
天：知道。
梁：我唔陪妳o勒。
天：我先至唔駛你陪。
(梁醫生親了可天的瞼，才離開)
天：真係唔駛你陪？﹗(躺下)(梁醫生由白屏風後入，皺著眉看報告，坐下)
(晴尾隨，仍是整理著衣衫)
(晴顯得衰弱了，跟著坐下)
晴：點呀？係咪同上次一樣？
梁：晴，我要你住院。
晴：啊…..要o拿。
梁：儘快。
晴：等我搞埋D手尾。
梁：有咩緊要過自己條命。
晴：有﹗
梁：好，但係你要應承我，每日都返黎覆診。
晴：係﹗係﹗咁我走o勒。
梁：記住﹗
晴：呀﹗你又咁長氣。(出)
(梁醫生看著報告，眉頭更皺，拿著報告，出)(老婆婆入，停在台中，四周圍望)
婆：呀後生仔梗係出左院頂o勒，今趟要自己行咯，(慢慢行)咁鬼死斜，平時後生仔"咩"住我上黎，梗係好辛苦o勒﹗(出)(傳來一陣救護車聲，由遠至近至無)
(可天起床，頭帶著帽子，行到望遠鏡處)
(梁醫生入，手拿著一紮鮮花，神情顯得嚴肅)
(敲門)
天：入黎。
(梁入房)
(可天看到鮮花，走過去梁的身伴)
天：(接過鮮花)多謝﹗你第一次送花比我。
梁：(吞吐)晴送比妳。
天：晴？佢人呢？
梁：佢話，以花代人，佢可能黎唔到探妳。
天：啍﹗男人總係鐘意作一D不能兌現o既承諾。
梁：唔？
天：佢話過手術之前一定會黎探我。
梁：男人，都有佢地難言之忍。
天：下次佢黎到，我一定一腳將伸佢出房門口。
(梁醫生沒有回答，只苦笑，皺起眉頭)
天：(用手按按梁的眉心)要比人劏o個個係本小姐，唔係你。
(梁捉住天的手)
梁：我聽日再黎睇妳。
天：好忙咩？
梁：係…….今日好忙。(拍拍天的手，出了房門)
(可天有點疑惑)
(梁醫生行了近台前的地方，坐了地上，掩面而哭)
(傳出兩聲)
(可天行近望遠鏡)天：今日睇唔到星星o勒…..呀，可以出出面睇。
(出房門)
(星圖上多了一顆閃星)
(可天見到，失笑)
天：無時間探病，有時間加自己上去。
(梁在抽泣)
(可天聞聲，轉頭看去，見是梁，急步走過去)
天：咩事呀？o下？係咪手術會有問題？
梁：(揉揉雙眼)重唔訓？
天：我問你坐o係度做咩？
梁：醫生坐o係醫院，好正常。
天：認真答我，到底發生咩事？
(梁強忍著淚水，垂下頭)
天：有咩野你唔怕同我講，我已經唔係容易放棄生命o既林可天，啍？唔好要我帶住不安o既心情入手術室，好無？(梁沒有回答，抱住了可天)
天：啍？你話過手術成功o既機會好高o架。醫生要對病人有信心至得o架。
梁：(望著了可天)唔係妳………
天：啍？
(梁望著星圖)
(可天跟著望過去)
天：唔係我……..
(梁站起來，走近星圖，伏了在上面)
(可天也行了過去，抱住了梁)
(燈滅)
(前台拉出白布幕)
(晴躺在病床上被護士推入於白布幕後)
(台後也拉出白布幕)
(燈亮)
(台前白布幕拉走)
(晴的床伴還有律師，護士在檢查儀器)
(可天哭著入)
(梁醫生跟著入)
天：(捉著晴的手)你無口齒。
(晴欲起手，但力不從心，護士幫忙坐起)
晴：(微弱)係呀﹗無口齒所以咬妳唔倒。
(可天仍在哭，面有淚水)
晴：我仲以為妳係一個無眼淚o既女人。
天：唔好以為詐病，詐….我就會原諒你，你應承過等我做完手術就去探我。(哭)
(梁把可天摟在懷中)
晴：(向梁)代我補償。
梁：你無咁易輸。
晴：又唔能夠一世都贏。
梁：唔好講咁多，你都"支力"o勒。
晴：太"支力"o勒……
梁：好好咁訓一覺。
晴：我怕一闔埋雙眼就再睜唔開。
(眾人沉默)
晴：可唔可以幫我一個忙。
梁：唔﹗
晴：將我身上重健康o既器官，捐晒比有需要o既人。(微微遞起了手)
(梁捉著他的手)
梁：無人比你更健康。
(護士和可天也哭)
(晴勉力笑笑)
晴：將我未享用過o既幸福送比你兩個。
(梁把晴的手捉得更緊)
(晴想再坐高一些，但做不到)
晴：梁醫生……
(梁醫生俯身，聽聽晴想說甚麼)
(晴在梁醫生耳邊說了一句話，便去了)(梁聽後愕然，頭垂在晴的面旁，跟著吻了他的額)
(可天哭著吻了吻晴的額)
(護士預備推晴離去)
天：去邊？
護：有7個病人等住做器官移植。
天：留多陣都唔得？
護：對唔住。
(梁摟著可天)
(護士推晴走)
(律師打開公事包，拿出一份文件)
律：梁韋悟先生？
梁：(望一望律師)我係。
律：你好，我係孫晴先生o既遺囑執行人，孫先生將佢o既遺產成立左一個慈善基金，閣下被委任為該基金o既管理人。
梁：遺產？基金？
律：孫晴先生聲明，該基金一定要用o係推動器官捐贈，器官移植同藝術在醫院o既用途上面，呀，重有，
購置一架小型巴士，穿梭醫院正門入口同公眾門診o既地方，老弱婦孺優先。
天：孫晴到底係咩人？
律：(看了看遺囑)孫晴先生希望你地"鄧"佢開心，因為佢已經到左天堂。
(梁醫生不知應哭還是笑)
梁：佢重有無其他野講？
律：(再看遺囑)哈，你地果然係好朋友，孫晴先生畫左幅自畫像，佢希望你地幫佢掛o係靈堂；
另外，有份結婚禮物比你兩位。
梁：結婚禮物…..
天：結婚禮物？
律：(從公事包再取兩份文件)一粒悟星比林可天小姐，一粒天星比梁韋悟先生，呢兩份係証明書。
(二人接過)
律：最後，孫晴先生提醒林可天小姐，記得搵一粒晴星返黎，一日未搵倒，一日唔準去見佢，呀，重有一封信，
(給梁)喪禮完成左之後，希望兩位黎我律師樓辦埋D手續。
(遞上咭片，梁接過)
梁：麻煩晒。
律：節哀順變。(出)(梁與可天互望了一會，梁替可天抹抹面上的淚痕，才拆開信看)
(可天靠近梁，一起看)
晴v.o.：係咪有人喊呢？哈哈哈哈，我都無死到。我諗會有五至七個人延續我o既生命，
而我o既靈魂，如無意外應該到左天堂，不過我唔記得左領洗，唔知D天使會唔會請我食
閉門羹。不過就算落地獄，都唔緊要，我咁黑仔，可能閻羅王都要買我怕。梁醫生，
唔好再皺眉頭o勒，有個咁靚o既女朋友重想點？可天，得閒唔好淨係掛住睇星，
睇多D個醫生男朋友，好多姑娘吼住佢o架，妳知啦，呢間醫院D姑娘好~好人o架嘛，
唔同你地講o勒，我無藉口遲到o勒，希望我未享用過o既幸福，你地照單全收啦，
bye﹗bye﹗with love 晴。(白布幕拉開，晴星在閃亮，二人拖著手行近星圖)
(燈漸暗)
(星光流動)(二人出)
(燈滅，但星仍流動)
(一粒流星閃過)
(星光也停)
(全劇完)
歡迎給予指正和意見或感想，先謝!
