板主的話

　　話都冇咁快，靈豐既網頁已經去到兩周年喇！雖然個網頁洗左我唔少青春，但係見到網頁同球隊一樣，一日一日咁進步，真係帶比我唔少滿足感。最記得初初製作呢個網頁既時候，足足用左我成兩個月既時間去做，直到個網頁成形－－－開心晒！！跟住差唔多每日更新，每星期更新，每個月更新．．．．．係呢兩年黎當中最辛苦既，就係更新入面既資料喇，因為我覺得呢一份確實係吃力不討好既工作，我地唔係Ｄ乜野大球隊，又冇乜FANS，每日瀏覽我地個網頁唔好話過百，過十個都好多喇。近年我轉左另一份工作，加埋夜晚返學，時間少左，令到網頁有時候幾個月都冇更新，比人睇到分分鐘以為球隊解散左。不過最令我心傷既，係當我聽到Ｄ微言：｢個網頁仲係年頭既料既？得閒更新下好喎！｣從正面睇，有微言即有人留意個網頁，加上做左咁多年既紀錄如果冇人繼續更新，真係太可惜。但係心傷既並唔係因為比人催！只係覺得究竟大家對球隊有幾投入呢？我放時間同心機落去攪個網頁，唔係因為我鍾意攪網頁，目的只係想大家睇得開心同增加歸屬感。我希望而家唔會有隊員埋怨出場時間少，又或者覺得波衫做得貴。因為只要你係投入的話，我相信以上既都只不過係小問題。團體活動始終都係要團結先可以發揮出力量。

由守門員轉型做後衛既死侍

阿星(Ｏ六年冬）

首先,我本身唔係好識得做網頁，但係見其他業餘球隊都有自己既網頁，而我地自己球隊都有返咁上下歷史，加上有好多新加入既球員我都唔係好認識，我都好想自己球隊都有返自己既網頁，所以諗住睇書學下啦~哈！原來都唔係好難者，所以話~ 只要有心，好多野都做得到既~ ^^"

　　其實我自己加入球隊都算係好耐喇，最初係同阿聰一齊係中學踢波，佢同佢阿哥(即係阿威)對足球都好有熱誠，估唔到出黎做野都好有熱心去組織球隊，諗諗下都有成十年喇，係球隊入面有開心有唔開心，最唔開心梗係失準比人入波之後比人小啦(我是守門員來的 = =")

　　作為一隊業餘球隊，大家唔係為錢而走埋一齊，我諗係大家都有咁既興趣而走埋一齊，我相信個個隊員都唔想輸，而我自己都係，但係我覺得建立大家友誼同信任，先至係業餘球隊最重要，當茶餘飯後提起某埸波有幾精彩，又或者係電話講起新賽事會點安排，而等賽事來臨個種期待，我覺得往往會比係比賽中心情更加興奮......

守門員
阿星(Ｏ四年冬)