|
2006年11月05日
靈豐於今天進行既油尖旺區賽事，陣容上作出多個變動，上仗對「HV」一對閘阿康及良仔未有上陣，改由Leo及阿志擔正，中場由阿星伙拍銘賢，面對英戰超聯組別中暫列第三既「思友」亦未落下風，雖然「思友」控球能力及個人技術較佳，但上半場靈豐憑較佳身材反而取得不少甜點，先有阿餅中場罰球大腳吊入禁區，阿董力壓兩名守衛起腳，被門將反應快擋出底線，其後一次右路角球，銘賢開出、Leo跳起一頂僅僅斜出，結果雙方上半場互無紀錄踢成0比0。
下半場，阿董因拗傷左腳腳眼被迫退下火線，由阿堂入替，將銘賢推前。但「思友」亦換入兩名速度及技術兼備既球員，逐漸控制戰局及取得不少射門，最有威脅一次為對手於左邊禁區頂K角位起腳勁射，皮球省中阿堂後直飛網角，眼看必入之際，幸好阿楠反應快單手托出底線，可惜5分鐘後靈豐終告失守，被對手於禁區頂右路起腳射近柱入網，「思友」領先1比0。落後既靈豐傾力反撲，先有阿志後上左路起腳射高，完場前2分鐘，靈豐右路搏得界外球，阿星手榴彈掟入禁區，Leo接應人叢中一頂破網，為靈豐追成平手；1
分鐘後，銘賢中場附近以速度個人突破對手防線成半單刀之勢，可惜被力壓下起腳欠角度，被門將沒收，未能反超前，結果雙方踢成1比1完場，需要互射9碼分勝負！
9碼由靈豐先射，可惜阿餅操刀一射太正兼軟弱無力被門將單手擋出，其後雙方5名球員皆射入，(靈豐主射球員為銘賢及阿星)，結果靈豐總比數以3比4不敵對手，於首圈出局！
|
