港台《瘋Show快活人》
動物主持集中營

梁繼璋（Michael）、羅啟新（Cuson）、梁思浩同貴花田呢４個《瘋 Show 快活人》主持，咪睇佢o地平時做節目時口花花，好衰格咁，但其實佢o地個個都愛心爆棚，淨係睇佢o地點對o的動物就知，聽眾一有動物o既問題就搵佢o地幫手，佢o地都會好樂意兼盡力去幫，點解咁熱心同動物服務？因為佢o地個個都話自己前世係動物化身，所謂「前世債，今世還」，而家再次投胎做人，為動物出番少少力都係應分o既。

前世：烏龜
今世：貴花田

自白：唔知點解，由細到大，我做o野都好慢，呢樣可能係受前世烏龜o既遺傳，仲有一樣就係好怕死，一有事我就好似烏龜咁縮埋，總之避得就避，安全至上。

旁觀者點講？

Michael：睇睇o下，貴花田個外形同烏龜都有o的似，成日著好多衫，十足十帶住個龜殼出街咁。

Cuson：同龜一樣，可以行到邊，訓到邊。

思浩：唔好以為做龜唔好，其實龜都有好處，佢o地適應能力高，去到邊都唔會死，好彩呢樣o野，貴花田都學到。

前世：老鼠
今世：羅啟新

自白：雖然我唔係鼠年出世，係蛇年，但有云蛇鼠一窩，可想而知兩者關係幾密切，除o左呢樣，o係個性上我同老鼠都好相似，行動同樣咁快，惟一唔同兼最可惜係體型冇老鼠咁細。

旁觀者點講？

思浩：老鼠外形唔靚，但好聰明，正如Cuson一樣，外表唔突出，但就好有內涵。

貴花田：似老鼠咁鍾意四周竄冇時停，身手靈活。

Michael：Cuson隨時可以做成鼠禍，事關佢破壞力強，乜都會搞一餐。

前世：狗
今世：梁思浩

自白：講真，我份人都幾狗，唔係話我賤格，而係做事方面，有時俾人話都唔出聲，仲有同狗一樣服從性好強，公司叫我做乜就做乜，十足十狗一樣咁聽話。 除此之外，本身我仲好鍾意狗，屋企養o左足足４隻狗咁多。

旁觀者點講？

貴花田：忠心度同狗有得揮，做o左港台７年都冇話走。

Michael：一個人打幾份工，成日做到成隻狗咁。

Cuson：同狗一樣唔鍾意著衫褲，有裸睡習慣。

前世：白兔
今世：梁繼璋

自白：有白兔o既瀟灑性格，一樣有鬍鬚，幾得小朋友鍾意，仲有最似就係一有乜o野事，就好似白兔咁，走得快。 正因為我覺得白兔係我o既前世，所以我養過唔少白兔，可惜每次養唔夠幾個月就死，希望呢隻唔會啦。

旁觀者點講？

思浩：Michael似白兔咁天真，有時玩起上o黎，真係好似大細路咁。

貴花田：同白兔一樣咁細粒。

Cuson：白兔眼紅佢又眼紅，成日唔抵得人o地中六合彩。